SOS, - Sjálfhverfir og sofandi.

Eitt af þúsundum dæma um sjálfhverfa og sofandi bílstjóra, skammstafað SOS, í íslenskri umferð:

Síðastliðinn föstudag þegar umferðin var sem allra mest síðdegis var bíl á undan mér ekið svo hægt í átt að grænu umferðarljósi á gatnamótum Háaleitisbrautar og Miklubrautar, að alllangt bil myndaðist fyrir framan hann yfir í næsta bíl.

Með þessu háttalagi hans stefndi augljóslega í það, að að minnsta kosti 2-3 bílum færri bílar kæmust yfir á grænu ljósi en ella hefði orðið.

Nú kviknaði gult ljós og blasti við að hvorki hann né neinn fyrir aftan hann kæmist yfir gatnamótin fyrr en mínútu síðar.

Þá brá svo við að þessi SOS-bílstjóri gaf allt í botn og í sömu svifum var kviknað fyrirsjáanlegt rautt ljós.

Hann lét sér ekki segjast heldur brunaði áfram á rauðu ljósi þótt á móti honum kæmi bílstjóri sem ætlaði að beygja þvert í veg fyrir hann´inn á Miklubraut.

Eitt augnablik stefndi í hörkuárekstur, en bílstjórinn, sem kom á móti, afstýrði því eftir sekúndubrots störukeppin með því að nauðhemla.

Hafði ekkert upp úr því annað en að lenda þvert fyrir umferðina, sem var farin af stað á grænu ljósi á Miklubrautinni og valda hættu og töfum.

Skömmu áður hafði einn SOS bílstjóri afrekað það að koma með sofandahætti í veg fyrir það á tvennum gatnamótum í röð að hann og bílarnir fyrir aftan hann kæmust yfir á grænu ljósi. 

Þegar svona aksturslag og enn verra rugl við beygjuljós tefur í hundruðum skipta á hverri klukkustund fyrir umferð, safnast þegar saman kemur, þótt hvert atvik útaf fyrir sig sýnist ekki stórvægilegt og úr verða miklu meiri umferðartafir, vandræði og leiðindi en ástæða er til.

Sláandi hversu margir óku framhjá

Endurskipulagning og þjónusta alla daga?

Ég dvaldi langdvölum sumrin 2010-2013 á Hvolsvelli og þurfti í nokkur skipti á þjónustu heilsugæslu og apóteks að halda.

Í eitt skiptið slasaðist ég það mikið að ég hefði þurft að fara á heisugæsluna, en hitti ekki á réttan vikudag til að meiðast.

Ekki aðeins lokað um helgar heldur einnig lokað vegna sumarleyfa, en í þeim tilfellum bent á heilsugæsluna á Hellu, sem er í 13 kílómetra fjarlægð.

Er möguleg lausn að hafa aðeins eina heilsugæslu á þessu svæði en hafa þjónustuna þeim mun betri í staðinn?  

Auðveldara fyrir kýr að fá þjónustu

Rafaflið sækir á.

Tveir söluhæstu fjórhjóladrifsbílarnir í Noregi bjóða upp á rafafl, og Tesla model S er eingöngu knúinn rafafli.

Heildarsala Mitsubishi Outlander nýtur góðs af því að bæði er boðið upp á bensín- og olíuknúna bíla og "stinga í samband tvinnbíla", "plug-in hybrid".  

Raunar er merkilegt að það skyldi taka áratug að þróa slíka tvinnbíla upp úr fyrstu tvinnbílunum.

Ein ástæða þess að Sádi-Arabar halda áfram að dæla olíu inn í yfirfullan markað fyrir olíu kann að vera sá að með því að þrýsta verðinu niður minnka þeir samkeppnismöguleikana fyrir aðra orkugjafa.

En það mun ekki takast nema í afmarkaðan tíma.

Outlander vinsælasti fjórhjóladrifsbíllinn

Týnda teskeiðin.

Þegar tengd frétt á mbl.is er lesin kemur leikritið Týnda teskeiðin eftir Kjartan Ragnarsson upp í hugann. 

Það var afar vel skrifað og lærdómsríkt leikrit sem sýnt var í Þjóðleikhúsinu fyrir um 40 árum.

Það fjallar um mannlega veikleika þegar bregðast þarf við alvarlegum vanda sem kemur óvænt upp í samskiptum fólks, er algerlega klassískt og tímalaust og á við fjölbreytilegar aðstæður í lífi einstaklinga og jafnvel þjóðfélagshópa og þjóða.  

Leikritið myndi koma vel út sem kvikmynd og hafa alþjóðlega skírskotun.

Gaman væri að sjá það sem skáldsögu eða á fjölunum á ný. 

Lést mögulega í „kyrkingarleik“

Sporin hræða. "Túrbínutrix" í uppsiglingu.

Við höfum heyrt þetta allt áður þegar átt hefur að fara í háhitavirkjanir,- " lítil umhverfisáhrif, - snyrtileg mannvirki, - endurnýjanleg orka,- það verður að anna raforkuþörf, - bætt aðgengi, - misskilningur náttúruverndarfólks, - virkjanir og náttúruverðmæti fara vel saman o.s frv."

Við heyrðum þau á Hellisheiði, við Reykjanes, Þeystareyki og Bjarnarflag. Og við vitum hvert framhaldið var, afleiðingarnar og það sem blasir við á þremur fyrstnefndu stöðunu eru enginn misskilningur.

Forstjóri HS Orku stundar afvegaleiðandi blekkingar þegar hann lýsir tilraunaborununuum eins og þær einar marki endanlegt útlit heillar háhitavirkjunar.

Hann minnist ekki einu orði á gufuleiðslurnar og háspennulínurnar, sem leggja þarf, og lætur eins og stöðvarhús og skiljuhús séu smámunir einir.

Hann talar eins og Svartsengisvirkjun hafi risið í núverandi stærð fyrir 30 árum, en það er alrangt.

Hann talar eins og þrýstingsfall sé ekki í myndinni í holum Svartsengisvirkjunar. Af hverju bregður þá svo við að hætt er að birta tölur um þrýstung í holum virkjunarinnar?

Nú liggja fyrir tölur sem benda til 4% þrýstingsfalls á ári í Reykjanesvirkjun, en 2,7% þrýstingsfall hjá Hellisheiðarvirkjun þykja mikið áhyggjuefni.

Við Íslendingar framleiðum fimm sinnum meiri raforku en við þurfum til okkar eigin heimila og fyrirtækja.

Hvers konar orkupólitík er það sem leiðir til raforkuskorts 2018?

Ætli ekki sé sönnu nær að þá fari að blasa við, að hin margrómaða "endurnýjanlega og sjálfbæra orkuöflun" HS orku fer að dvína vegna rányrkju? 

Þetta er enginn "misskilningur".

Hver rannsóknarhola kostar 560 milljónir. Fimm holur kosta hátt í 3 milljarða.

HS orka ætlar sér varla að eyða þessu fé nema að fá eitthvað í staðinn?

Auðvitað heila virkjun. Og munu þá segja, að ef náttúruverndarfólk ætli að standa í vegi fyrir því. beri það ábyrgð á þriggja milljarða tjóni.

Svipað var reynt við Laxárvirkjun 1970 þegar kaupa átti stax risatúrbínur fyrir stórstækkaða Laxárvirkjun og kenna andófsfólki um tjónið sem yrði ef þær yrðu ekki keyptar. 

1970 var raunverulegur en ekki tilbúinn skortur á raforku handa heimilum og fyrirtækjum á Norðurlandi.

En "Túrbínutrixið" var afhjúpað og sprengt framan í þá sem beittu því.

Enn meiri ástæða er því til að andæfa nú og koma strax í veg fyrir það tjón sem er í uppsiglingu við Eldvörp.

 

 

 

Andmæli við virkjun „byggð á misskilningi“

Beck, von Brauchitsch, Rommel og Guderian reyndu andóf.

Foingjar í hernum stóðu fyrir tilræði við Hitler í júlí 1944. Ludwig Beck hershöðingi, sem hafði reynt að andæfa Hitler fyrir stríð, átti að verða leiðtogi þjóðarinnar að Hitler dauðum, en tiræðið mistókst og Beck var líflátinn.

Rommel var vitorðsmaður og galt fyrir það með lífi sínu.

Beck og von Brauchitsch voru í hópi hershöfingja sem vildu koma í veg fyrir styrjöld með því að taka ráðin af Hitler í september 1938.

Sigur Hitlers við samningaborðið í Munchen kippti fótunum undan andófinu.

Þeir félagar voru líka með í ráðum í október 1939 í svonefndu Zossensamsæri, sem átti að koma í veg fyrir innrás í Niðurlönd og Frakkland.

Slæmt veður varð til þess herferðinni var frestað til vors og botninn datt úr Zossensamsærinu.

Þegar skriðdrekasveitir brunuðu eftir sléttunum í átt til Moskvu í ágúst 1941, skipaði Hitler Guderian að taka vinkilbeygju til hægri suður í Ukraínu til að framkvæma stærstu umkringingu og fjölda stríðsfanga í hernaðarsögunni.

Þetta seinkaði herförinni til Moskvu um sex vikur og olli grimmilegum ósigri við borgarhlið Moskvu.

Þegar Guderian mætti fyrstu T-34 skriðdrekum Rússa í stórum hópum varð honum ljóst að forsendur herfararinnar voru rangar.

Þessar vikur stóð Guderian uppi í hárinu á Hitler í vaxandi mæli og það endaði með því að Hitler setti Guderian af.

 

Hellti sér yfir Hitler

Frost á Fróni, Kári í jötunmóð heilagrar reiði!

Það er engin furða þótt Kára Stefánssyni, öðrum tveggja Íslendinga sem nefndir hafa verið í hópi 100 fremstu í heiminum á sínu sviði, sé heitt í hamsi.

Hann minntist á fyrirbrigðið gáttaflökt eða hjartaflökt um daginn sem dæmi um það hvernig fjársvelti í heilbrigðisþjónustu skilur ekki aðeins eftir sig slóð þjáðra, örkumla og látinna sjúklinga að óþörfu, heldur verða heildarútgjöld þjóðfélagsins meiri en ef úrýmt hefði verið biðlista sem myndast síðustu mánuði ársins vegna þess að "kvóti ársins" er búinn.

Afleiðingar gáttaflökts geta orðið alvarlegar, t.d. heilablóðfall.

Einn minna bestu aldavina var kominn með gáttaflökt í haust en var látinn bíða.

Hann fékk alvarlega blæðingu við heilann, og við tók dvöl í öndunarvél. 

Hann var heppinn að því leyti að ekki urðu alvarlegar heilaskemmdir,- blóðið fór á milli heilans og höfuðkúpunnar.

En þetta var samt alvarlegt tilfelli og hann er enn í endurhæfingu á Gjörgæsludeild á Grensási. 

Heildarkostnaður vegna svona tilfellis er miklu meiri en ef tafarlausar aðgerðir geta afstýrt blæðingu.

Kári Stefánsson í jötunmóð

"Heilög vé" í Bandaríkjunum - ekki hér.

Á málþingi í tilefni af 10 ára afmæli Ísor flutti einn helsti sérfræðingur Bandaríkjanna, sem var þar gestur, fyrirlestur um stöðu jarðvarmanýtingar í Bandaríkjunumví, og sýndi helstu svæðin á stóru korti, sem hringlaga bletta, sem voru misstórir og í mismunandi gulum og rauðum litum, eftir því hve áætluð orka var mikil.

Hann lýsti helstu svæðunum, en var í lokin næstum búinn að gleyma langstærstu og eldrauðustu kúlunni við Klettafjöllin.

Bætti við þegar hann benti á kúluna: "Þetta er Yellowstone, langöflugasta jarðvarmasvæði Norður-Ameríku, heilög vé, sem verða aldrei snert."

Svæði á stærð við Ísland umhverfis Yellowstone verður heldur aldrei snert.

Samt kemst Yellowstone ekki á blað sem eitt af helstu náttúrundrum eins og hinn eldvirki hluti Íslands.

Vísa í blogg mitt og facebook um þetta mál í gær.  

Átökin um Eldvörp

Eitt borgarsamfélag: Borgarnes-Þjórsá-Suðurnes.

Svæðið frá Borgarnesi austur að Þjórsá og suðvestur um Suðurnes er samkvæmt alþjóðlegri skilgreiningu það sem kallað er "virkt borgarsamfélag" ("Functional Urban Area"), skammstafað "FUA".

Tvð skilyrði verða að vera fyrir hendi;

1. Minnst 15.000 íbúar.

2. Ekki meira en 45 mínútna ferðatími frá jöðrum svæðisins inn að miðju.

Án þess að gera sér grein fyrir þessu verður mat manna á aðstæðum  og byggðamálum oft afar bjagað og úr takti við tímann.

Sem dæmi má nefna að atkvæði hvers kjósanda á Akranesi hefur tvöfalt meira vægi en atkvæði hvers kjósanda í Vallahverfinu syðst í Hafnarfirði.

Selfoss og Reykjavík eru á sama atvinnusvæði, innan sama borgarsamfélags, og algengt er ínnan innan svæðisins að menn eigi heimili á jöðrum svæðisins og vinnustað á höfuðborgarsvæðinu,- eða öfugt.

FUA eru tvö á Íslandi: Annars vegar Suðvesturhornið og hins vegar Eyjafjarðarsvæðið, frá Öxnadalsheiði langleiðina til Húsavíkur og Mývatnssveitar þegar Vaðlaheiðargöng verða komin.

Þess má geta, að á meðan Reykjavíkurflugvðllur er í Vatnsmýri og nýju Dash Q400 vélarnar verða komnar í gagnið á næsta ári uppfylla Akureyri og Reykjavik vestan Kringlumýrarbrautar skilyrðin um sérstakt virkt borgarsamfélag.

 

Plastiðjan flytur til Reykjavíkur

"Að missa sig" eins og 2007?

Þegar ártalið 2007 er nefnt, hringja oft bjöllur.

Lokalag Áramótaskapsins var með þá undiröldu, að sú hætta gæti legið í leyni að þjóðin væri að missa sig eins og hún gerði á gróðærisárunum í aðdraganda Hrunsins.

Í fréttum RUV nú rétt í þessu voru tvær fréttir um fyrirbæri, sem minnia á 2007, annars vegar stórfelldan innflutning á erlendu vinnuafli næstu árin, og hins vegar fjárfesting lífeyrisjóðanna erlendis.

Síðan bætist við tengd frétt á mbl.is um mikinn vöxt innflutnings á bílum sem nálgast það sem gerðist 2007.

Vegna hins síðastnefnda verður að hafa í huga, að óeðlilega fáir bílar hafi verið fluttir inn síðustu fimm ár og þessvegna verður fjölgun nýrra bíls ævintýralega há í prósentum talið. 

Einnig hefur innflutningur bíla verið svo langt undir því sem eðlilegt er og nauðsynlegt, að bílaflotinn hefur elst og orðið dýrari í rekstri og meira mengandi og eyðslufrekari en annars hefði orðið.

Sömuleiðis ekki eins öryggir og nýir bílar.

Gagnlegt væri hins vegar að vita um samsetningu innfluttra bíla og hverjir kaupa þá. 

Varla er það fátækir öryrkjar og lífeyrisþegar sem standa að baki stórauknum innflutningi stórra lúxusbíla? 

Og haldi sú þróun áfram má kannski fara að spyrja að því hvort það stefni aftur í að þjóðin fari að missa sig.

 

Bílasalan nálgast ástandið 2007