"Veröldin er söm við sig..."

"Veröldin er söm við sig.

Svíkur margan auður..."

 

Þannig hófst staka sem Andrés heitinn Valberg flutti fyrir 19 árum og hefur marg sannast.

Hér um árið var maður svo barnalegur að halda, að vegna hinnar miklu fræðslu á upplýsingaöld um hvers kyns klæki, spillingu og græðgi myndu atburðir eins og kreppan mikla ekki endurtaka sig.

En þetta reyndist barnaleg tálsýn því að mannlegt eðli heldur áfram að vera jafn ófullkomið og það hefur verið í þúsundir ára.

Þótt það vantaði ekki að Rannsóknarskýrsla Alþingis ætti að koma í veg fyrir að einkenni aðdraganda Hrunsins skytu upp kollinum á ný, sést margt birtast sem minnir á það sem gerðist á árunum 2002-2008.

Vísa Andrésar Valbergs var að vísu ort með tilliti til lífsreynslu hans sjálfs, sem hafði marga fjöruna sopið á lífsleiðinni í fjármálum og fleiru, því að hún var svona í heild:

Veröldin er söm við sig.

Svíkur margan auður.

Allir myndu elska mig

ef ég væri dauður.

Ekki svigrúm fyrir svona framgöngu

Ekki "atvinnuuppbygging".

Næstum því í leyni hefur ein atvinnugrein, ferðaþjónustan, staðið fyrir sköpun þúsunda starfa, líkast til á annan tug þúsunda á fáum misserum, án þess að þess sé nokkurs staðar getið undir hinu fagra heiti "atvinnuuppbygging".

Ég minnist þess ekki að stjórnmálamenn né aðrir noti það orð þegar um stærsta atvinnuveg þjóðarinnar er að ræða.  

Mismunandi notkun þessa orðs segir mikið um þann hugsunarhátt sem enn heldur risaálveri í Helguvík með öllum þeim stórfelldu náttúruspjöllum sem það mun kosta, sem einróma keppikefli núverandi ríkisstjórnar til þess að "stuðla að atvinnuuppbyggingu".

Yfirlýsing þess efnis frá fyrstu dögum stjórnarinnar hefur ekki verið dregin til baka.

Barátta um starfsfólkið

Sveigjanlegri vinnutíma og fleiri vinnandi.

Nútíma þjóðhættir eiga alveg að geta rúmað meiri sveigjanleika í vinnutíma og möguleika fyrir fleiri vinnandi í hlutastörfum en nú er.

Aðstæður fólks, hæfileikar og þarfir, eru eins misjafnar og fólkið er margt.

Eftir því sem öldruðum fjölgar eykst þörfin á að veita þeim atvinnutækifæri, sem hafa enn starfsorku og finna sig illa með því að vera kippt út úr samfélaginu að miklu leyti og skyldaðir til að hætta að vinna og finnast þeir hafa verið settir utangarðs í þjóðfélaginu, engum til gagns.

Ég er kominn á þann aldur að þekkja fjölda aldraðra, sem myndu þiggja að fá að starfa eitthvað gagnlegt í hlutastarfi, og með því að stytta skyldaða vinnuviku niður í 35 stundir skapast rými fyrir meiri sveigjanleika.

 

Vinnuvikan verði 35 stundir

Versta ástandið breyttist í það besta.

Um mitt sumar var útlitið í vatnsbúskap hjá Landsvirkjun eitthvert það versta hin síðari ár.

Einkum var ástandið ískyggilegt á Norðausturlandi og notendur voru varaðir við því, að svo gæti farið að það yrði að skerða afhendingu raforku meira til þeirra en dæmi voru um áður.

En síðustu mánuðir hafa verið svo hlýir að dæmið hefur algerlega snúist við.

Á ferð við Hálslón í gær mátti sjá stútfullt lón og kröftugt rennsli á yfirfallinu við Kárahnjúkastíflu um fossinn Hverfanda niður í Hafrahvammagljúfur (Dimmugljúfur).

Ég minnist þess ekki að rennsli hafi verið á yfirfallinu á þessum tíma og ekkert lát á því.

Þetta þýðir aðeins eitt: Verði tíðin svipuð og í meðallagi í vetur, koma lónið og afhendingarmöguleikarnir betur út næsta vor en nokkru sinni fyrr.

Þótt allt liti svona sumarlega út þarnak í gær, leyndi sér ekki, að snjór í Snæfelli er með allra mesta móti, enda feikna mikil snjókoma á því svæði í fyrravetur og vor.  

 

"Sonur Íslands, sonarsonur Noregs."

Barack Obama byrjar ræðu sína á Degi Leifs Eiríkssonar að skilgreina hann sem son Íslands og sonarson Noregs. Þótt heppilegra hefði verið, að hann hefði haldið áfram í ræðunni að endurtaka þetta, verður að virða honum til vorkunnar, að á tímum Leifs voru menning og þjóðskipulag á Íslandi norsk í meginatriðum, landið numið af Norðmönnum að mestu og Alþingi sniðið eftir Gulaþingi í Noregi.

Vafasamt er að Íslendingar hafi litið á sig sem sérstaka þjóð með sama skilningi og síðar varð.

Íslendingar voru gjaldgengir til embætta í Noregi langt fram á 13. öld, eins og dæmið um Þórð kakala sýnir glöggt, en hann hafði verið settur sem héraðsstjóri í Skíðafylki í Noregi þegar hann varð bráðkvaddur við að fagna embættinu í teiti í Skíðaborg. (Skien)

Norðmenn sjálfir miða við orrustuna á Stiklastöðum þegar þeir tala um upphafið á tilvist norsku þjóðarinnar sem sérstakrar þjóðar í skilningi okkar tíma.

Var Leifur heppni norskur?

Síðasta sólbað ársins á Brúaröræfum í dag?

Það var 10 stiga hiti á Sauðárflugvelli á Brúaröræfum þegar ég kom þar við í dag og gat baðað skallann í háfjallasól í blíðviðri eins og meðfylgjandi mynd ber með sér. Hugsanlega síðasta sólbað ársins.  

Skaust þangið akandi í gærkvöldi til að ganga frá fyrir veturinn í dag, og kom aftur til Reykjavíkur í kvöld.

Ég man ekki eftir svona góðri tíð þarna svona langt fram á haust síðustu árin, og vegna þess hve miklu minna snjóar þarna yfirleitt en út við strendurnar, er ágæt von til þess að völlurinn verði fær og opinn vel fram í nóvember.

Fleiri góðar fréttir færir blítt haustveður þarna okkur, sem ég hyggst fjalla betur um á morgun.

Kuldaveður í kortunum

Hið eilífa tal um "atvinnuuppbyggingu".

Þegar rokið var af stað með kröfu um byggingu nýs álvers sunnan Skagastrandar með sjálfan forsætisráðherrann sem guðföður á miðri ljósmynd af hópnum, sem ætlar að keyra þetta i gegn án þess að nokkur raforka sé á lausu, var því svarað með einni upphrópun: "Atvinnuuppbygging!"

Samt er ekki að sjá að um íslenskt vinnuafl gæti orðið að ræða, en atvinnuuppbygging skal það samt verða.

Ég var að heyra það fyrir nokkrum dögum að kaþólski biskupinn á Íslandi hefði haldið hundrað manna messu á Reyðarfirði.

Ég sperrti eyrun, því að það eru sennilega fleiri en eru að jafnaði í messum Þjóðkirkjunnar á staðnum.

En svo rann upp fyrir mér ljós: Það skyldi þó aldrei vera að kaþólski biskupinn hafi verið að sinna kalli Pólverjanna á staðnum, sem vinna störf í álverinu og við það?

En allan tímann, sem kallað er á fleiri og fleiri álver er alltaf látið í veðri vaka, að um íslenskt vinnuafl sé að ræða, atvinnuuppbyggingu fyrir Íslendinga.

Ekki til íslenskt vinnuafl í þetta

Þrjú umframgrömm á dag, 30 aukakíló af fitu á 40 árum.

Ef maður borðar aðeins 3 grömmum of mikið á dag af orkuríkri / feitri fæðu, - samsvarar örlitlu broti af orku í einni 50 gramma Prinz póló kexköku, þyngist maður um 0,7-0,8 kíló á ári.

Frá 37 ára aldri til 77 ára aldurs þýðir það 30 kílóa þyngingu samtals, í mínu tilfellir úr 67 kílóum í 97 kíló.

Fór að vísu hæst upp í 93 kíló í fyrra en er að síga aftur niður.

Þetta þýðir að maður þarf að horfa á lítinn hluta af hverjum orkuríkum bita sem einmitt þann bita, sem etinn var umfram orkuþörf.  

Svona brennir þú fleiri hitaeiningum

Síðasti sumarmorguninn á Norðurlandi.

Sumarið er á enda. Kalt loft er á leið til landsins. Erlendir gestir hefðu fengið besta veðrið fyrir norðan þessa dagana en sáu samt Sólheimajökul.

Síðbúin sumarhlýindi upp í allt að 19 stig á Norðausturlandi björguðu vatnsbúskap Landsvirkjunar.

Síðasta sumarsólarupprásin gleður augað á Akureyri á leið minni til Sauðárflugvallar til þess að búa hann undir veturinn.

Sumarið varð þá ekki eins glatað og það leit út fyrir að verða í júlí.  

Frá Sólheimajökli til Bessastaða: Myndasyrpa

Já, kominn tími á vetrardekk undir Náttfara ?

Fordómarnir gagnvart rafreiðhjólinu Náttfara, sem ég byrjaði að nota í mars siðastliðinum, hrynja, einn af öðrum.

Sú mótbára að tveir þriðju hlutar sumarsins séu ónothæfir til hjólreiða, er hrunin, sem og að það megi varla anda vindur svo að ekki sé ófært til hjólreiða.

Ein mótbáran var sú að strax og snjór færi að koma á götur yrði ófært til hjólreiða.

Búinn að gleyma því hvernig maður hjólaði sem unglingur í skólann í nánast hvaða veðri sem var.

Þá voru aðeins sumardekk á reiðhjólum. Nú er hægt að kaupa negld vetrardekk.

Kannski er tengd frétt á mbl. dulin auglýsing um það að það sé að koma tími til að setja vetrardekkin undir ?

Skuldar syninum yfir 600 þúsund