Norskur Lee Harvey Oswald ?

Sagt er að Anders Breivik hafi legið löngum yfir tölvuleikjum og kvikmyndum. Hann sé greindur og hafi mikið ímyndunarafl.

Hann virðist því lifa að mörgu leyti í sýndarveruleika og hafa undarlegar hugmyndir.

Vafalaust hefur hann kynnt sér ódæðismenn á borð við Lee Harvey Oswald, sem Jack Ruby skaut í beinni útsendingu í sjónvarpi, og sett sig í spor Oswalds.

Við eigum vafalaust eftir að kynnast fleiru af þessu tagi í fari þessa hræðilega manns.

 

Bjóst við að verða skotinn

Hróp að grundvallaratriði réttarfarsins.

Ævinlega þegar ódæðismenn eins og Breivik eiga í hlut rís krafan um afgreiðslu málsins án dóms og laga.

Grundvallaratriðið í vestrænu réttarfari er að allir sakborningar, burtséð frá málavöxtum, fái sams konar málsmeðferð, þar sem sækjandi og verjandi hafa jafnstöðu til að sækja og verjast.

Breivik vill þetta vestræna réttarfar feigt og valda sem mestu uppnámi. Það tekst honum ef af heift og hatri er ráðist að verjanda hans.

Við þekkjum það frá löndum, þar sem lýðræðislegt réttarfar á undir högg að sækja og ofbeldismenn sækja að því, að þeir reyna að hræða dómara og verjendur og þvinga þá til að beygja sig fyrir ofbeldinu.

Þannig vilja þeir sprengja allt upp og koma sínu fram.

 

Dómþinginu lokið í Ósló

Brutus, John Wilkes Booth, Lee Harvey Oswald og kó.

Brutus, John Wilkes Booth, Lee Harvey Oswald, Sirhan Sirhan og Anders Behring Breivik, - hvað eiga þessir menn sameiginlegt?

Þeir eiga það sameiginlegt að enginn, hvorki samtíðarmenn þeirra né kynslóðirnar á eftir þeim, hefðu haft hugmynd um að þeir hefðu verið til ef þeir hefðu lifað venjulegu lífi. Allmargir samtíðarmenn þekktu Brutus og John Wilkes Booth en ekki hina.

En þeir eiga það sameiginlegt að hafa heillast af þeirri hugmynd að drepa þekkta persónur, Sesar, Abraham Lincoln, John F. Kennedy, Robert Kennedy og Gro Harlem Brundtland.

Þar með tryggðu þeir sér það að nöfn þeirra yrðu rituð í sögubækurnar.

Breivik virðist hafa haft það höfuðtakmark að drepa sem allra flesta af hugsanlegum leiðtogum framtíðarinnar, en nú kemur í ljós að hann hugsaði jafnframt á svipaðan hátt og þeir Brutus, Booth, Oswald og Sirhan.  

Ætlaði að ráðast á Gro Harlem

300 Íslendingar á dauðalista Breiviks ?

Nú hefur verið upplýst að samkvæmt skilgreiningu Anders Behrings Breiviks á fjölda "föðurlandssvikara í hverju Evrópu landi séu 322 Íslendinga á "dauðalista" hans og félaganna í samtökunum, sem hann segist vera í, það er, fólk sem þarf að útrýma.

Einhverjir kunna að segja að þetta séu aðeins órar geðsjúklings en þá ber á það að líta að órar vitfirringanna, sem komu seinni heimsstyrjöldinni af stað reyndust vera dauðans alvara og að þeir, sem aðhylltust þessa villimennsku voru fleiri en nokkurn hafði órað fyrir.

Á dauðalista þeirra voru allir Gyðingar Evrópu og þeim tókst að myrða sex milljónir.

Nýnasista nútímans má ekki vanmeta. Þá dreymir um að klára það verk, sem Hitler tókst ekki að klára.  

 

Kallaði sig Sigurð Jórsalafara

Fær í raun að halda áfram.

Eitt af því versta við mál norska fjöldamorðingjans er það að hann svo gersamleta firrtur og siðblindur að hann ætlar augljóslega að nota réttarhöldin til hins ítrasta til að beina athyglinni að sér og boðskap sínum.

Því meira sem fjallað er um skrif hans og skoðanir, því betra finnst honum.

Réttarhöldin verða því ekki nein refsing fyrir hann heldur þvert á móti, - hann ætlar að baða sig hinn ánægðasti í sviðsljósinu! Þess vegna heimtar hann að fá að vera í einkennisbúningi og mun leggja sig fram um að vekja sem allra mesta athygli og umtal.

Af þessum sökum gerði hann ekki það sem margir fjöldamorðingjar gera, að farga sjálfum sér í lokin, heldur ætlar hann þvert á móti að færast í aukana sem aldrei fyrr.

Ef hann þar á ofan verður aðeins dæmdur í 21. árs fangelsi og fær kannski að fara út einhverjum árum fyrr, verður hann aðeins um eða innan við fimmtugt og mun þykja allir áróðursvegir færir.

Hitler skrifaði Mein Kamph í fangelsi og Breivik mun áreiðanlega ekki sitja auðum höndum þar.

Norðmenn munu líklega ekki eiga eftir að eiga sjö dagana sæla hvað snertir þennan viðbjóðslega vitfirring.

Ætlaði að sprengja fleiri hús

Ætti að vera sama hér, og kannski á sama rauntíma.

Norðmenn standa okkur Íslendingum ekki síður nærri en Svíum. Því ættum við einnig að hafa einnar mínútu þögn á morgun, og mér finnst koma til greina, að við gerum það ekki klukkan tólf, heldur á þeim sama rauntíma og Norðmenn og Svíar gera það.

Þetta á vel að vera mögulegt þótt það falli ekki á klukkan tólf hér á landi. Ástæða þess að ég held að þetta væri betra, er sú, að það gerir stundina sterkari á Íslandi að vita af því að sama þögn ríki hjá nágrannaþjóðum okkar.

Og einnig það að það skipti máli fyrir þær að vita af okkar hljóðu stund á sama tíma og þeir drúpa höfði.

Mínútuþögn í Noregi og Svíþjóð

Gott að það var ekki eldgos.

Ef það hefði verið eldgos í gangi og sand- og ökumistur legið yfir landinu er næsta víst að í London hefðu menn, sitjandi yfir tölvum, stöðvað allt flug á landinu.

Enda er ösku- og sandmagnið í loftinu nú miklu meira en var suma daga á eldgosatímanum í fyrra og í vor.

Undarleg sýn við Breiðafjörð

Fer saman við holdafarið?

Dvínandi kynlíf með aldrinum virðist nú af sérfræðingi hafa verið gert að einni af ástæðu þess að fólk fitni með aldrinum, samanber frétt á mbl.is.  Eða hvað?

Kynlíf bætir heilsuna

Var líka óhugsandi í ferð Titanic.

Bandaríkjunum er nú siglt í átt að ísjaka greiðslufalls rétt eins og hið "ósökkvandi" Titanic forðum.

Enn er tækifæri til að breyta um stefnu en samt blasir við að með því að "hækka skuldaþakið" er í raun haldið áfram stefnu síhækkandi skuldabyrði sem getur ekki endað nema á einn veg.

Obama þorir ekki að grípa til þeirra róttæku aðgerða, sem þörf er á, vegna þess að hann þarf að leita eftir endurkjöri á næsta ári og vill ekki rugga bátnum.

Þess vegna er látið reka á reiðanum.  

Óhugsandi að Bandaríkin lendi í greiðslufalli

Dregur dilk á eftir sér.

Hinir hroðalegu atburðir í Noregi mega ekki valda slíkum ótta og örvæntingu á Norðurlöndum að það eyðileggi þau samfélög sem þar eru. Hins vegar hljóta þessir atburðir að draga dilk á eftir sér hvað varðar viðbúnað til að verjast svona árásum.

Meðal skæðustu aðferða, sem notuð eru í hernaði eru að koma á óvart og að gera árás, sem beinir athygli og viðbúnaði frá aðalárásinni ("diversion").

Í seinni heimsstyrjöldinni, til dæmis, var hvort tveggja notað oft og iðulega.

Í íþróttum er notað enska orðið "feint" sem á íslensku hefur verið kallað "finta" eða gabbhreyfing þegar leikmaður þykist ætla að skjóta eða gera eitthvað, en kemur með því andstæðingnum úr jafnvægi og gerir allt annað.

Breivik notaði hvort tveggja, notaði þá árás, sem minna manntjóni olli, til að leiða alla athygli og viðbúnað lögreglunnar frá aðalárásinni.

Við því má búast að Norðmenn og fleiri þjóðir muni læra af þessu á þann veg að efla viðbúnað sinn, gera ráð fyrir því í hvert skipti sem svona gerist geti um afvegaleiðingu sé að ræða og í samræmi við það að gera varnarviðbúnaðinn sveigjanlegri og fljótlegri.

Norðmenn hafa her og því hljóta þeir að skoða þann möguleika að sérsveitir lögreglunnar hafi yfir fullkominni, vopnaðri herþyrlu að ráða sem ekki aðeins geti farið með víkingasveit á stysta mögulega tíma á árásarstaðinn, heldur ráðist þar beint til atlögu við árásarmanninn eða árásarmennina.

Eitthvað svona kann að reynast nauðsynlegt til þess að koma í veg fyrir að árásarmenn geti í ró og næði athafnað sig í allt að eina og hálfa klukkstund á stað, sem er rétt við bæjardyr sjálfrar höfuðborgarinnar.

Á þessu sviði skipta sveigjanleiki og hraði gríðarlega miklu máli.

Menn kunna að segja að svona atburðir séu svo fátíðir og óvenjulegir að í of mikið sé lagt að eyða miklu fé og mannafla í viðbúnað gagnvart þeim.

En þegar um hundrað manns eru myrtir á kaldrifjaðan hátt er það einfaldlega of mikið til þess að hægt sé að una því að slíkt geti gerst án þess að viðbúnaður sé bættur og aukinn. 

Viðbúnaður af þessu tagi á ekki að verða til að útbreiða ótta og öfgakennd viðbrögð. Þvert á móti getur yfirveguð varnaráætlun stuðlað að því að auka öryggi friðsamra borgara.

Skaut óáreittur í 90 mínútur