"...stykki´ er margir fíla..."

Flík í snjónum stakk í stúf, - 

það stykki´er margir fíla, 

því brjóstahöldin létt og ljúf

losa fleira´en bíla. 

Brjóstahald til að losa flóttabíl

Ekki í fyrsta sinn að fjárútlát eru "falin" hjá Gæslunni.

Á yfirborðinu ríkir sú stefna stjórnvalda að fjölga opinberum störfum úti á landsbyggðinni. En í raun ríkir stjórnleysi þar sem vinstri höndin tekur meira til sín en sú hægri gefur af því að yfirsýnin skortir og þessi sömu stjórnvöld eru búin er að losa svo um tökin á opinberum rekstri með stofnun opinberra hlutafélaga að ekki ræðst neitt við neitt.

Ráðist er með offorsi í vanhugsaðar fljótræðisaðgerðir á borð við flutning Fiskistofu frá Hafnarfirði til Akureyrar sem bitna á tugum starfsfólks með stórfelldri röskun á stöðu og högum þess auk þess sem viðkomandi stofnun er lömuð árum saman eftir flutninginn, samanber flutning Landmælinga Íslands upp á Akranes á sínum tíma, sem lamaði reksturinn í fimm ár.

Á sama tíma er það látið afskiptalaust hvernig störf eru lögð niður úti á landi og þau flutt til Reykjavíkur oft með hókus pókus aðferðum.

Þegar litið er á kort yfir flugvelli á Íslandi sést glögglega að þeim er þannig raðað niður að Akureyrarflugvöllur liggur mun betur við þessu neti vallanna til flugmælinga en Reykjavík.

Auk þess hefði maður haldið að útboð væru besta leiðin til þess að laða fram sem besta hagkvæmni.

En hér gildir hins vegar fyrirbæri sem maður kynntist vel hjá opinberri stofnnun í gamla daga, að öllu skipti stundum í huga yfirmanna úr hvaða "skúffu" fjármunirnir komu en ekki hvað verkefnið kostaði.

"Hesturinn ber ekki það sem ég ber" sagði karlinn, þegar hann sat á hestinum með poka á baki sér í stað þess að reiða hann fyrir framan sig á baki hestsins.

Í því tilfelli hér um árið, sem ég vitna til, taldi yfirmaður minn nauðsynlegt að gera sjónvarpsþátt sem kostaði ekki krónu! Þetta væri nauðsynlegt til að sýna fram á hvað hans deild, FFD, væri miklu betur rekin en "hin deildin", LSD, Lista- og skemmtideild.

Það gerði hann þannig, að þátturinn fjallaði um vitavörðinn á Hornbjargsvita og yrði á dagskrá sama kvöld og hneykslanlega rándýr mynd á vegum LSD um Lénharð fógeta !

Hann fól mér að gera þáttinn af því að mín laun voru færð sem laun íþróttafréttaritara! 

Jú, farið var fljúgandi til Ísafjarðar á FRÚnni til þess að finna með erfiðismunum eitthvað smá íþróttatengt efni til að fjalla um og myndi kostnaður við þetta flug skrifast á íþróttir í Sjónvarpinu. Á Ísafirði færum við með varðskipi til Hornbjargsvita og síðan aftur með varðskipi til baka til Ísafjarðar og þaðan beint til Reykjavíkur á kostnað íþróttaumfjöllunar í sjónvarpi.

Í sjónvarpinu yrði þátturinn unninn á vinnutíma íþróttafréttamannsins og kostnaðurinn falinn í þeirri "skúffu" og öðrum skúffum Sjónvarpsins, svo sem hjá framköllunardeildinni og víðar! 

Þátturinn um vitavörðinn á Hornbjargsvita myndi ekki kosta eina einustu krónu!

Höfuðatriði væri að ekki færi króna í mat eða gistingu.

En minnstu munaði að öll fléttan félli á fjórum kjúklingjum frá Aski, sem ég neyddist til að kaupa fyrir ferðina, af því að últra hægri sinnaður kvikmyndatökumaðurinn neitaði á síðustu stundu að láta yfirlýstan kommúnista á Hornbjargsvita brasa ofan í sig á meðan við dveldumst þar ókeypis ! 

Þetta sýnir að Landhelgisgæslan er ekki í fyrsta sinn notuð til þess að fela hinn raunverulega kostnað við fjárútlát, fjárútlát sem fyrir bragðið verða jafnvel meiri en ella hefði orðið. Og skattgreiðendur um allt land borga. 

 

Störf flutt frá Akureyri til Reykjavíkur

140 ár afturábak! Yfirgengileg þráhyggja!

Það liggur við að maður klípi sig í handlegginn til að vera viss um að það sé rétt að enn þann dag í dag eigi að fara að eyða stórfé í að undirbúa virkjanir á stöðum eins og Hveravöllum og á vatnasvæði Jökulsár á fjöllum, vatnasvæði sem býr yfir fjölbreyttasta og magnaðasta eldvirka svæði í heimi samkvæmt rannsókn Magnúsar Tuma Guðmundssonar jarðfræðings.

Varla væri verið að gera þetta nema vegna þess að þeim, sem fara nú á fulla ferð við þessi ósköp, ætla sér að ganga í skrokk á hverri þeirri náttúruperlu á Íslandi sem þjónar virkjanafíkn þeirra.

Það kemur fram í því að færa hverja perluna af fætur annarri úr verndarflokki (sem ætti að heita verndarnýtingarflokkur) yfir í nýtingarflokk (sem ætti að heita orkunýtingarflokkur).

Fyrir 140 árum friðlýstu Bandaríkjamenn fyrsta þjóðgarð veraldar, Yellowstone, og síðan þá hefur hin gríðarlega jarðvarma- og vatnsorka þjóðgarðsins, langstærsta orkubúnt Norður-Ameríku, verið friðhelg, "heilög vé" svo að notuð séu orð eins fremsta vísindamanns þeirrar álfu á sviði jarðvarmavirkjana.

Um aldur og ævi verður ekki virkjaður svo mikið sem einn hver af 10.000 hverum garðsins og þar að auki er boranabann á 100 þúsund ferkílómetra svæði, svonefndu Greater-Yellowstone, umhverfis sjálfan Yellowstoneþjóðgarðinn.

Sá Bandaríkjamaður, sem vogaði sér að leggja til virkjanainnrás í þjóðgarðinn yrði ekki talinn með réttu ráði.

 En hér á landi eru valdaöfl sem ætla sér greinilega ekki að eira neinu og engin takmörk virðast vera fyrir virkjanagræðginni. 

Yellowstone er ekki á alþjóðlegum lista yfir 40 stærstu náttúruverðmæti heims eða á listanum yfir undur Norður-Ameríku.

Það sést þegar gluggað er í vandaða bók um "100 Great Wonders of the World", þar sem 40 eru náttúrugerð en um 60 manngerð, svo sem Kínamúrinn, Stonehenge og Tach Mahal.

Á listanum yfir undrin í Norður-Ameríku finnst Yellowstone ekki þar.

"Does not qualify" eins og Kaninn myndi orða það.   

Af um 40 náttúruundrum bókarinnar eru aðeins sjö í Evrópu.

Þar er má sjá hinn eldvirka hluta Íslands tróna á einni opnu.

Og ekkert annað undur í bókinni fær viðlíka ummæli: "Iceland is a land like no other".

En innrás vinnuvélanna og skriðbeltatækjasveitanna inn í magnaðasta og fjölbreyttasta eldfjallasvæði heims til að umturna einstæðri náttúru þess, sem þar að auki er hluti af Vatnajökulsþjóðgarði, er orðinn að fáránlegri þráhyggju, sem er 140 ára afturhvarf aftur í tímann.   

 

 

 

 

 

Segja Orkustofnun ógna friði rammaáætlunar

Framsókn hlýtur að ráða þessu sjálf, er það ekki?

Framsóknarmenn og flugvallarvinir ákváðu fyrir síðustu borgarstjórnarkosningar hver yrði oddviti þeirra í Reykjavík. Strax kom upp andstaða ýmissa áhrifamanna í flokknum, svo sem fyrrverandi formanns flokksins, við þessa ákvörðun á þeim forsendum að stefna listans væri ekki alveg í samræmi við stefnu flokksins í mannréttindamálum, en skipan listans var ekki breytt, enda er slíkt á forræði Framsóknarmanna í Reykjavík.

Nú hafa Framsókn og flugvallavinir fengið kjörinn varamann í mannréttindaráð og þeirri stöðu sinni mun hann gegna þar til þeir hinir sömu Framsóknar og flugvallarvinir skipta um mann ef þeir kjósa svo.

Svona einfalt er þetta. Að stilla þessu máli upp sem "samræmdri aðför" og "rafrænni múgsefjum sem veki hroll" er undarleg nálgun.

Þegar það virðist vera komið í ljós að Gústaf Níelsson sé gersamlega ósammála stefnu Framsóknar í mannréttindamálum, ítreki þá afstöðu sína og sé hugsanlega félagi í Pegidasamtökunum, sem setja andúð á múslimum og innflytjendum á oddinn, hlýtur það að vera innanflokksmál Framsóknarmanna í Reykjavík að meta það hvort Gústaf geti unnið í mannréttindaráði sem fulltrúi fyrir allt önnur sjónarmið en felast í stefnu flokksins.

Og sé það rétt að hann sé hrifinn af stefnu Pegida ætti það að vera lýðræðislegur réttur hans og skoðanasystkina hans að fara í framboð fyrir þau samtök, er það ekki?

 

P.S. Ég sé því haldið fram annars staðar á netinu, að það sé ofmælt að Gústaf sé félagi í Pegida, enda séu það erlend samtök. Ástæðan fyrir því að hans nafn hafi verið nefnt sé sú, að hann hafi "lækað" á samtökin. Sé svo, er það ekki í fyrsta skipti sem það að "læka" sé túlkað sem samþykki viðkomandi við þeim skoðunum sem komi fram. En í flestum tilfellum er lækað bara til þess að lýsa yfir áhuga á umræðuefninu og geta tekið þátt í umræðunni. Hitt blasir við að bæði Pegida og Gústaf berjast gegn því sem kallað er "múslimavæðing" Evrópu og Gústaf hefur talað um innflytjendur frá múslimskum ríkjum sem eins konar dreggjar þeirra þjóðfélaga.         

Dæmi um „rafræna múgsefjun“

Kynslóðabil, sígilt fyrirbæri.

Kynslóðabil er vafalítið eitt þekktasta og algildasta fyrirbærið í menningu þjóða. 

Frank Sinatra sagði í upphafi ferils Elvis Presley, að tónlist hans væri viðbjóðsleg.

Bono sagði það sama um tónlist ABBA. Át það hraustlega ofan í sig 20 árum síðar.  

Eitthvað voru þeir Bubbi og Bo ósammmála um hlutina hér um árið en héldu þó saman tónleika nýlega. 

Í skoðanakönnun meðal skólanemenda upp úr 1950 fékk Haukur Morthens flest atkvæði sem merkasti maður heims, og Kristur og Jón Sigurðsson áttu ekki séns í Hauk. 

Í dag myndu flestir um fermingu gata á því hver Haukur Morthens hefði verið. 

Hermann Gunnarsson fékk létt sjokk 1994 þegar strákarnir á 800 stráka pollamóti á Sauðarkróki höfðu ekki minnstu hugmynd um að Hemmi hefði spilað knattspyrnu, hvað þá sem landsliðsmaður. 

Ég spurði Hemma hvort hann vissi hver Garðar Gíslason hefði verið og fyrir hvað hann hefði orðið þekktastur.

"Heildsali" svaraði Hemmi. 

"Nei, Hemmi minn, hann var besti spretthlaupari Íslands á fjórða áratugnum og Íslandsmethafi í 100 metra hlaupi", svaraði ég. 

"Hvernig á ég að vita það. Ég var ekki fæddur þá", sagði Hemmi. 

"Og strákarnir hérna voru líka ófæddir þegar þú varst í boltanum", svaraði ég.

Fyrir um tuttugu árum voru margir unglingar yfir sig hrifnir af Bogomil Font.

"Það eru svo flott lögin og textarnir sem hann hefur samið" sagði einn við pabba sinn, þegar hann kom að syni sínum við að hlusta á lagið "Pabbi kýs mambó."

"En hann gerði hvorki lögin né textana" sagði faðirinn.

"Nú, hver gerði það?" spurði strákurinn.

"Loftur Guðmundsson gerði suma, til dæmis þennan sem þú ert að hlusta á."

"Hver var Loftur Guðmundsson?"

"Hann var blaðamaður fyrir meira en 40 árum. Þetta er 40 ára gamalt lag, sem þér finnst svona flott." 

Það var létt sjokk fyrir drenginn að fá að vita að þessi "spánýju" lög væru lög afa og ömmmu. 

"En Bogomil Font er flottur", segir hann loks. 

"Hann heitir ekki Bogomil Font. Það er listamannsnafn."

"Hvað heitir hann þá?"

"Sigtryggur Baldursson." 

Þekktu hvorki Wu Tang Clan né Prodigy

Hinn nýi veruleiki í tilveru listamanna.

Hinn nýi veruleiki í heimi listamanna blasir við bæði Björk, Madonnu og öðru tónlistar- og kvikmyndagerðarfólki. 

Plötum og kvikmyndum er "lekið" á netið og niðurhalað á netinu út um allar koppagrundir, þannig að hin gamla fjáröflunarleið listamanna að fá endurgjald fyrir kostnað og vinnu sem fylgir slíkum verkum með sölu platna og sýningum í bíóum og í sjónvarpi er að hverfa hratt og miskunnarlaust. 

Það er talið sjálfsagt og eðlilegt að efninu sé ýmist "lekið" eða það hreinlega tekið traustataki án endurgjalds, - nú, eða þá að fyrirtæki, sem ekkert komu nálægt gerð efnisins, græði á því að dreifa því á netinu, oft án þess að listamaðurinn fái neitt í sinn hlut.  

Þetta gerist líka vegna þess að svo virðist sem það sé afar algengt viðhorf meðal almennings, að listafólk sé ekki "vinnandi fólk" og "skapi atvinnu", heldur hent á lofti ummæli eins og "lattelepjandi kaffilhúsalýður", "ónytjungar", "afætur" og "það getur hver sem er farið út í bílskúr og tekið upp eitthvern söng og glamur á gítar."

Í umræðuþætti um þetta fyrirbæri á einni útvarpsstöðvanna var yfirgnæfandi hluti í viðhorfskönnun á þessari eða svipaðri skoðun, svo sem að listamenn ættu ekki skilið að fá neitt í sinn hlut af veltunni í kringum tónlist á netinu. 

Þótt upplýst sé að milljarða velta sé nú til komin vegna framlags skapandi listgreina bæði hér og erlendis og að þetta sé orðin gjaldeyrisskapandi atvinnugrein, virðist það ekki breyta neinu. Þetta er hinn nýi veruleiki, sem listafólk verður að horfast í augu við og finna svör við. Aðrir munu ekki gera það fyrir það.  

 

Plötu Bjarkar lekið á netið

Liður í að veikja völlinn og koma honum í burtu.

Hvort sem það er meðvitað eða ómeðvitað stuðlar meðferðin á neyðarbrautarmálinu svonefnda á Reykjavíkurflugvelli að því að veikja gildi vallarins og koma honum í burtu í framhaldinu. 

Ávinningurinn af því fyrir aukna íbúðabyggð að leggja brautina niður er hverfandi hvað íbúðabyggð snertir en skerðing á notagildi vallarsins er afdrifarík, því að þessi flugvöllur hefur jafnmikla þýðingu fyrir innanlandsflug og allir aðrir flugvellir innanlandsflugsins til samans, af því að allar innanlandsflugleiðir landsins liggja um Reykjavíkurflugvöll. 

75% af svæðinu, sem brautin tekur, fellur inn í svæðið, sem akbraut alfa, norður-suður brautin og austur-vesturbrautin taka hvort eð er að meðtöldum öryggissvæðum í kringum þær. 

Á Hlíðarendareitnum á að vera blanda af íbúðabyggð og auðum svæðum. Með því að skipuleggja reitinn þannig að hafa autt svæði fjær brautinni og íbúðablokk nær brautinni er beinlínis verið að nýta reitinn þannig að sem allra mest skerðing verði á notagildi brautarinnar. 

Ef þessu væri snúið við, auði reiturinn hafður nær og íbúðablokkinn fjær, myndi verða hægt að nota brautina áfram vegna þess að hún er einungis notuð í miklum vindi þar sem aðflugshraðinn miðað við jörð minnkar stórlega, - og hægt er að koma brattar inn en ella. 

Suðurendi brautarinnar og autt svæði í kringum hann þekur innan við 10 hektara, eða 0,1 ferkílómetra. Það litla svæði skiptir engum sköpum um byggðaþróun borgarinnar, auk þess sem andstaða er meðal íbúanna í Skerjafjarðarbyggðinni gegn stækkun hverfisins til austurs. 

Hópurinn leystur upp fyrirvaralaust

Þarf ekki að vera svekktur.

Það var unun að horfa á svo margt sem Aron Pálmarsson gerði í leiknum við Frakka. Það voru ekki bara skotin heldur fyrst og fremst það hvernig hann spilaði samherja sína upp og fann langoftast þann mann, sem var í bestri skotstöðu, til að senda sínar frábæru stoðsendingar til.

Frakkarnir settu líka sérstakan mann til höfuðs honum langtímum saman í leiknum, og þegar þeir misstu mann út af í síðari hálfleik eftir að franski markmaðurinn hafði varið fjölda skota í röð , og við útafreksturinn losnaði um Aron, var það hans fyrsta verk að skjóta niður í gólfið við hlið markvarðarins þar sem hann var veikastur.

Franska vörnin einbeitti sér greinilega að því að komast fyrir lokaskot Arons og því enginn skömm að því að lúta í lægra haldi, einn á móti meistaravörn.   

Svekktur að hafa ekki skorað

Framför. Þeir geta þetta !

Það er búið að vera allt annað að sjá til íslenska handboltalandsliðsins á móti Frökkum en í fyrri leikjum þess. Þótt vel gengi í síðari hluta leiksins við Alsír er það ekki sambærilegt við það þegar vel gengur á móti jafn frægu landsliði og því franska.   

Á góðum degi geta þeir þetta ! Þeir eru aðeins fjórum mörkum frá því að skora jafn mörg mörk í einum hálfleik á móti sjálfum Frökkum og þeir skoruðu í öllum leiknum við Svía.

Ef þetta gengur svona vel áfram er ekki amalegt að horfa á þennan leik, en fyrir bragðið missir maður af stórskemmtilegum leik Þjóðverja og Dana þar sem íslenskir þjálfarar eru stórum hlutverkum beggja vegna vallarins. 

 

P. S. Ógnar spennandi leikur endaði með jafntefli við meistarlið Frakka, sem drógu Íslendinga upp á annað plan en fyrr. Nú er bara að láta ekki slakari liðin, sem eftir eru, draga liðið niður, en það kemur oft fyrir í íþróttum.  

 

 

Frábær úrslit gegn Frökkum

Frauðviðgerð olli banaslysi. Af hverju ryðgar bílstjóramegin?

Ég krækti mér í ódýran og stuttan en '33 breyttan Suzuki Vitara fyrir nokkrum árum og fór á honum í nokkrar kvikmyndatökuferðir um hálendið, meðal annars um Vatnajökul. 

Í fyrra lagði ég bílnum til bráðabirgða þegar í ljós kom við skoðun að þröskuldurinn (síls) bílstjóramegin var að byrja að rygða það mikið að gera þyrfti við hann.

Skoðunarmaðurinn brýndi mig til að láta gera það almennilega og ekki með frauðplasti, því að frauðplastviðgerð hefði þegar kostað mannslíf í árekstri.

Smá aukaspurning: Af hverju ryðga sílsar og hurðir fyrr bílstjóramegin en farþegamegin?

Svar: Af því að bílstjóramegin eru dyrnar miklu oftar opnaðar og þeim lokað en farþegamegin.

Það skapar stöðugar hita- og rakabreytingar til og frá með tilheyrandi saggamyndun. "Dropinn holar steininn".  

 

P. S. Hvers vegna er lýsingarorðið "skemmdur" orðið svona lélegt að það er ekki hægt að nota það, heldur verður að nota orðið "tjónaður." Á ég að segja að ég sé með tjónaðan hálslið? 

Ekki gert við öryggisbúnaðinn