Frauðviðgerð olli banaslysi. Af hverju ryðgar bílstjóramegin?

Ég krækti mér í ódýran og stuttan en '33 breyttan Suzuki Vitara fyrir nokkrum árum og fór á honum í nokkrar kvikmyndatökuferðir um hálendið, meðal annars um Vatnajökul. 

Í fyrra lagði ég bílnum til bráðabirgða þegar í ljós kom við skoðun að þröskuldurinn (síls) bílstjóramegin var að byrja að rygða það mikið að gera þyrfti við hann.

Skoðunarmaðurinn brýndi mig til að láta gera það almennilega og ekki með frauðplasti, því að frauðplastviðgerð hefði þegar kostað mannslíf í árekstri.

Smá aukaspurning: Af hverju ryðga sílsar og hurðir fyrr bílstjóramegin en farþegamegin?

Svar: Af því að bílstjóramegin eru dyrnar miklu oftar opnaðar og þeim lokað en farþegamegin.

Það skapar stöðugar hita- og rakabreytingar til og frá með tilheyrandi saggamyndun. "Dropinn holar steininn".  

 

P. S. Hvers vegna er lýsingarorðið "skemmdur" orðið svona lélegt að það er ekki hægt að nota það, heldur verður að nota orðið "tjónaður." Á ég að segja að ég sé með tjónaðan hálslið? 

Ekki gert við öryggisbúnaðinn

Athugasemdir

[JR (IP-tala skráð) 20.1.2015 kl. 12:36]

Er það í lagi að tryggingarfélög séu að selja bíla sem eru ,,tjónaðir"  eða skemmdir ?

[Sigurdur Hjaltested (IP-tala skráð) 20.1.2015 kl. 12:38]

Thetta er nu ekki alveg rett hja ther. Bilstjorahlidin er alltaf i mun meiri agangi af vatni og seltu. Thegar thui maetir bil i rigningu, tha er farthega hlidin i skjoli fyrir slettunum sem fylgja thvi ad maeta.

M.b.kv. 

[Stefán Þ Ingólfsson, 20.1.2015 kl. 13:49]

Ertu ekki að meina glerfiber, ég hef aldrei heyrt að gert sé við bíla með frauði, nema þá ef til vill til einangrunar.

[Þorvaldur S (IP-tala skráð) 20.1.2015 kl. 15:04]

Það er alls ekki óþekkt að menn sprauti þanfrauði inn í sílsana, fylli þá þannig og skeri frauðið síðan til í götunum og sparsli yfir og máli.  Lítur flott út.

[Haraldur Borgfjörð (IP-tala skráð) 20.1.2015 kl. 16:52]

Tek undir þetta hjá Sigurði.Hef tekið eftir þessu í mörg ár.

                                       Haraldur Borgfjörð.

[Ómar Ragnarsson, 20.1.2015 kl. 20:10]

Þröskuldurinn, sem um ræðir, er ryðgaður innan frá og sama er að segja um margar bílstjórahurðir. En það er rétt ábending að ég hefði líka átt að hafa austur vatns og salts frá umferð úr gagnstæðri sem orsakavald.