Speki Finns.

Drykkjusiðir Íslendinga hafa alla tíð verið frumstæðir og einna svakalegastir á þeim tímum sem pukrað var með vínið og dottið rækilega það í skyldudjammi helganna. 

Skyldudjammið hefur lengi falist hjá mörgum í því að verða útúrdrukkinn, en það er þó líklegast heldur á undanhaldi.  

Danskur maður, sem vann hjá Sjónvarpinu fyrstu árin og náði furðu góðum tökum á íslenskunni af Dana að vera, furðaði sig eitt sinn á þeirri staðreynd, að á hverju ári drakk hver Íslendingur minna vín að meðaltali en tíðkaðist víða um lönd. 

Skildi hann hvorki upp né niður í hinu mikla fylleríi um helgar og hve oft menn urðu blindfullir. 

Út úr Dananum datt þessi speki, þegar þetta bar á góma: 

"Íslendingar drekka lítið; en oft, og þá mikið."

Varð mönnum orðfall við að heyra þessa speki. 

Er í sjokki yfir drykkju Íslendinga

Sem betur fer framhald kúvendingar hjá Trump.

Í upphafi forsetatíðar Donald Trumps tók hann upp ítrustu haukastefnu gagnvart Norður-Kóreu með svipuðum hótunum um gereyðingu landsins og hann notar nú gagnvart Íran. 

Trump fór ansi nærri því að það munaði 10 mínútum á því hvort hafið yrði stríð, sem allt eins gæti orðið gereyðingarstríð, við Norður-Kóreu, en nokkurn veginn sama er, hvernig hið hótaða stríð hefði orðið, að það hefði leitt hrikalegt tjón yfir nágrannaríkin sem hefði skekið heiminn. 

Þessi boðaða stefna hefði gert illt margfalt verra varðandi ömurleg kjör hinnar kúguðu þjóðar sem byggir Norður-Kóreu. Og svipað er að segja um ítrustu refsiaðgerðir, að þær hefðu bitnað mest á alþýðu manna.   

Svona stefna var augljóslega óraunhæf og versti kosturinn, sem var í boði, ef hafður var í huga sá möguleiki að Trump stæði við stóryrði sín. 

En síðan gerðist það að bæði Trump og Kim Jong-un fór að draga í land, og má með sanni segja að heimsbyggðin gat farið að anda léttara. 

Leiðin til sáttalausnar er þó erfið, því að Kim krefst tryggingar fyrir því að fá frið til áframhaldandi harðstjórnar og afléttingu allra viðskiptaþvingana og refsiaðgerða. 

Þess vegna hefur hann hingað til haldið fast við að eiga einhvers konar kjarnorkutromp uppi í erminni. 

Trump er nú kominn á það ról að reka einu stefnuna í þessu máli, sem í raun er í boði; að afstýra hættunni á kjarnorkustríði eða minnka hana svo mjög að hægt sé að sigla lygnari sjó en gert hefur verið í 66 ár. 

Það kostar að vísu að einveldi Kims verði ekki haggað, heldur haldið við þeirri harðstjórn og heilaþvotti sem völd hans kosta, en sem betur fer virðist Trump sjá, að málamiðlun er eina útgönguleiðin, og er það vel og í samræmi við málflutning Trumps í kosningabaráttunni 2016 varðandi stefnuna gagnvart Írak, Líbíu og Sýrlandi. 

 

 

 

Tók 20 skref í Norður-Kóreu

Patentlausnir eru oft tvíbentar.

"Maður verður háður þessu."  Þetta viðkvæði hefur oft komið upp þegar reynt hefur verið að fara fram hjá afleiðingunum af þráhyggju af ýmsu tagi.  

Þegar fram koma óæskileg áhrif af ýmissi neyslu eða hegðun, er það oft þrautaráðið að finna einhverja patentlausn til þess að koma í veg fyrir verkanirnar af hegðuninni. 

Fyrir 70 árum var byrjaða að framleiða skaðlausar sígarettur með því að setja í þær filter. 

Raunar fengu tóbaksframleiðendur sérfræðinga og lækna til þess að sverja og sárt við leggja fyrir nefnd Bandaríkjaþings að reykingar sköpuðu enga fíkn og væri alveg skaðlausar. 

Hið óhjákvæmilega gerðist samt að á ferli tóbaksnautnarinnar hafa hundruð milljóna manna veikst eða látist af völdum hennar. 

Ef melaton á að geta gert fólk brúnt miklu fljótar en sólarljós án þess að vera krabbameinsvaldandi, kann krabbahættan að kom ekki strax fram við hina nýju brúnkusókn. 

En ef þetta klikkar, er þá ekki alveg eins líklegt að Melanotan valdi fyrr krabbameini úr því að það veldur brúnkunni fyrr?

Nú er byrjað að banna rafrettur í Kaliforníu, en þær áttu að verða allra meina bót varðandi reykingar. 

Ópíóðalyfin voru sögð bylting í upphafi hvað varðaði það að þau yllu engri fíkn en væru samt jafn góð verkjalyf. 

Of seint og um síðir kom í ljós að þetta var öfugt; framleiðendur nýju lyfjanna notuðu einmitt þann hluta parkódíns sem var mest ávanabindandi. 

Nú auglýsir einn bílaframleiðandi að hybrid bílar noti meira rafmagn en bensín af því að meirihlutinn af tímanum við akstur bílsins fari fram með rafmótorinn í gangi. 

En hvers vegna er eyðslan á hundraði ekki auglýst á þessum bílum eins og öllum öðrum öðrum bílum? 

Jú, af því að eyðslan er ekki nema í mesta lagi 20-25 prósent minni en ef bíllinn er ekki hybrid. 

Enda stendur sú staðreynd óhögguð, að ÖLL orka sem nota þarf í hybrid bílum kemur úr bensíni, því að það er ekki hægt að hlaða þá utan frá með rafmagni. 

Bílarnir eru "sjálfhlaðnir" á þann veg, að bensínmótorinn framleiðir orku til að færa yfir á rafgeymana, sem aftur knýja rafmótorinn tímabundið í akstri. 

Og af því að rafmótor skilar orkunni, sem hann fær, þrisvar sinnum betur en bensínmótor, fæst fram sparnaður í bensínnotkun, en þó miklu minni sparnaður á orku, en ef bíllinn er hlaðinn af utanaðkomandi raforku og ekið sem mest með því að nota hana.  

Maður verður háður þessu