Verður ættarnafnafrelsið skeinuhættasta atriði breytinganna?

Staða kenninafna í íslenskum mannanöfnum er ekki bara einhver tiktúra og sérviska, heldur bæði jafnréttisatriði og mikilvægt verðmæti í ímynd þjóðarinnar. 

Langflestir útlendingar lýsa yfir ánægju og næstum því öfund yfir því, að hér á landi séu konur ekki skyldar til að taka upp ættarnöfn eiginmanna sinna.  

Nú verður slíkt að vísu ekki neglt niður með því að gefa ættarnöfn frjáls, en algert frelsi varðandi þau gefa þeim hættulegt forskot á kenninöfnin, sem gjalda verður varhug við að gera tilraunir með.  

Tveggja nafna hefðin, sem hefur rutt sér til rúms, lumar líka á ákveðinni hættu gagnvart kenninöfnunum, sem sé þeirri að kenninafnið falli dautt niður. 

Vafalaust er aukið frjálsræði í nýjum mannanafnalögum í góðu lagi, og til dæmis of langt gengið að innflytjendur séu skyldaðir til að kasta nöfnum sínum. 

En íslensk tunga á það inni að vandað sé sem best til verka og málrækt höfð í heiðri. 

Og þar með að fara með gát í breytingar, sem geti ógnað því dýrmætasta, sem prýðir gott íslenskt mál.  

 

Ekki einhugur um mannanafnafrumvarp innan VG

"Þegar miðað er rétt en skotmarkið hreyfist."

Eitt af þeim atriðum, sem virðist trufla mest aðgerðir í sóttvarnarmálum er fyrirbrigði, sem stundum hefur verið lýst þannig að "það er miðað rétt, en skotmarkið hreyfist." 

Eða að þegar horft sé til baka að það hafi verið miðað rétt en skotmarkið hreyfðist. "The aim was right but the target moved" eins og það er oft orðað í Vesturheimi. 

Allar mælingar á smitum og stöðunni á veirunni og faraldrinum verða fljótt úreltar vegna þess að þróunin tekur tíma.  

Þar að auki er veiran ólíkindatól hvað snertir styrkleika og aðra eiginleika. 

Samanburður á milli landa verður líka fyrir bragðið afar erfiður, því að "bylgjur" faraldsins fylgjast ekkert endilega að á milli landa og svæða. 

Þess vegna eiga þeir, sem þurfa að taka sóttvarnaákvarðanir í hinum mismunandi löndum oft ekki sjö dagana sæla um þessar mundir. 

Til útskýringar má nefna sem hliðstæðu ein mestu mistök í markaðssetningu bílasögunnar, þegar hin mikla auglýsingaherferð fyrir nýjan millistéttabíl Ford, Edsel, mistókst gersamlega. 

Ástæðan var sú, að þegar ákveðið var að bæta þessum bíl inn í þær bíltegundir, sem voru á boðstólum, var mikil uppsveifla í eftirspurn eftir bílum af millistærð vegna snarbatnandi kaupmáttar og efnahags. 

En lágmarkstími frá ákvörðun til markaðssetningar var þrjú ár, á þeim tíma gerbreyttist staðan, og Edsel kom fram á nákvæmlega því ári þegar mesta niðursveifla eftirstríðsáranna ríkti árið 1958.  

Þá hafði eftirspurnin færst niður fyrir ódýrustu bíla "hinna þriggja stóru" og sala á bílum eins og Volkswagen, Renault Dauphine og Rambler seldust einna best, en millistærðarbílarnir lentu í mikilli lægð..   

Mið markaðssetningar Edsel var rétt, en skotmarkið hreyfðist. 

 

Segir toppnum ekki náð

Sérstæð og þróuð tegund af "raunveruleikasjónvarpi."

Forseti Bandaríkjanna varð þjóðþekktur þar vestra hér á árum áður fyrir frammistöðu sína í svonefndum "raunveruleikasjónvarpsþáttum." 

Þegar rennt er augum yfir frammistöðu hans í sjónvarpi í embætti forseta, ekki síst það allra nýjasta um Fauci sóttvarnalækni Bandaríkjanna sem greint er frá í frétt á mbl.is, er ljóst að foersetinn er að hefja raunveruleikasjónvarp upp á alveg nýtt plan.  

Með snjallri tilfærslu myndskeiða í klippingu sjónvarpsauglýsingar Trumps, fær hann Fauci til þess að hæla forsetanum í hástert fyrir afburða frammistöðu leiðtogans varðandi COVID-19 faraldurinn. 

"Ég gæti ekki ímyndað mér að neinn gæti gert meira" segir Fauci í auglýsingunni um Trump að ekki fer á milli mála við hvern hann á.   

Fauci segist eftir á aldrei hafa í fimmtíu ára opinberri þjónustu hafa lýst yfir fylgi við neinn forseta, og sagði, að í myndskeiðinu, sem er þannig klippt til að svo virðist sem hann sé að mæra forsetann, hafi hann verið að tala um tala um heilbrigðisstarfsfólkið.

Hvað um það, forsetinn byrjar með látum eftir veikindin´með hverri bombunni á fætur annarri, segist vera orðinn ónæmur með öllu af veirunni og á batavegi eins og Bandaríkin öll, og að þar að auki sjáist glögg merki þess að Biden sé veikur og hóstandi, þótt fjölmiðlarnir hafi látið undir höfuð leggjast að sýna það. 

Og feli sig óttasleginn ofan í kjallaraholum. 

Þetta með veikindin er gamalkunnugt bragð í kosningabaráttu, sem ætti að bíta vel, því að 2016 sagði Trump svipað um Hillary, sem væri að þrotum komin þegar hún hálfdatt á leið inn í bíl, svo að það varð að styðja hana.   

Segist ónæmur og tilbúinn í lokasprettinn