Óvenjuleg stemning á lofti og á jörðu.

Það er erfitt að finna orð fyrir stemninguna í lofti og á landi við gosstöðvarnar á Fimmvörðuhálsi í dag.

Fjölmennið og umferðin voru slík að minnti á landsmót hestamanna eða skíðamanna.

Nema í þetta sinn var á ferðinni fimmfalt landsmót, landsmót flugmanna, göngumanna, vélsleðamanna, fjórhjólamanna og síðast en ekki síst jeppamanna. 

Efstu myndirnar eru teknar í einni af fjórum flugferðum mínum yfir gosstöðvarnar í dag. 

Sú efsta er af eystri hluta þeirra, eldri gígurinn og hraunið, sem rennur ofan í Hrunagil.

Næstu myndir eru af vestari og nýrri hlutanum, þar sem hraunið rennur á hreint ótrúlegan hátt eftir mjóum hamramúla og steypist þar fram af á leið sinni niður i Hvannárgil. 

Nær óslitin röð breyttra jeppa var á 35 kílómetra langri leiðinni frá Sólheimahjáleigu að gosstöðvunum. 

Ég fékk að líta gosið í öllum mögulegum myndum.

Fyrst í ljósaskiptunum úr lofti eins og sást í fréttum Sjónvarpsins í dag og í kvöld.

Síðan í þremur flugferðum með áhugafólk og loks í jeppaferrð með elstu dóttur minni og fjölskyldu hennar, þar sem tvö systkini manns hennar þeystu á vélsleða og fjórhjóli. 

Til að fara með okkur yfir Mýrdalsjökul og Goðabungu á snjónum notaði ég 37 ára gamlan Range Rover með jafngamalli Nissan Laurel dísilvél.

Einfaldara og ódýrara verður það varla.

Þarna má sjá fimm ferðafélagana uppi á Goðabungu,  Óskar Olgeirsson, Auði Óskarsdóttur, Jónínu Ómarsdóttur og Stellu Björg Óskarsdóttur. . 

Mikil ánægja og hrifning yfir því sem fyrir augu bar. 

Gosstöðvarnar sjálfar eru eins og hannaðar af Ólafi Elíassyni.

Langleiðina frá byggð ber rauðan bjarmann og gosmökkinn við loft og þegar komið er á svonefndnan Gónhól, blass eldspúandi gígurinn og sístækkandi hraunið við.

Síðan er hægt að fara meðfram hraunröndinni allt niður á barm Hrunagils til að fylgjast með hraunánni og fossinum langa og háa.

Upp Morinsheiði silaðist þétt röð göngufólks. 

Umferð breyttu jeppanna og tuga kílómetra löng röð þeirra var eitthvað svo innilega 2007, - Icesave, skuldirnar og hrunið látið víkja í burtu einn dag, einn 2007-dag.  

Og samferðafólkið sagði að þetta væri eitthvað sem tæki fram hátæknilegasta 1. apríl gabbi, sem hægt væri að hugsa sér, - allur þessi fjöldi fólks, bíla, vélsleða, fjórhjóla, flugvéla og þyrlna í kringum jafn einsættt sjónarspil væri ekki mögulegur í neinni stórmynd. 

 

Óbreytt gos og fólk á heimleið

Athugasemdir

[Hólmfríður Bjarnadóttir, 2.4.2010 kl. 02:41]

Takk fyrir frábæra lýsingu af mögnuðum atburði.

[Hrólfur Þ Hraundal, 2.4.2010 kl. 15:11]

Þetta var ljómandi hjá þér Ómar alveg eðal, og gömul díselvél með alvöru olíuverki sem virkar á meðan snýst og spíssum sem leka ekki út í smurolíuna alveg frábært.

[Halldór Sigurðsson, 2.4.2010 kl. 17:08]

FLottar myndir , sett sjálfur inn myndir og myndbönd frá gosstöðvunum í dag

[Þorsteinn Briem, 2.4.2010 kl. 17:40]

Ekki taldi aprílgabb,
ansi mikið þó var labb,
feykilegt þar prang og príl,
prestur fyrsta hljóp apríl.