"Áhafnarmeðlimir." Úff!

Eitt hvimleiðasta orðið, sem fjölmiðlamenn hafa tekið ástfóstri við um áratuga skeið, er orðið "áhafnarmeðlimur."

Í frétt af viðbúnaði í Keflavík vegna flugvélar, þar sem einhver leki á viðsjárverðu efni varð um borð, er þetta orð notað einu sinni enn.

Orðið er alveg einstaklega langt og leiðinlegt og gildir einu hvort það er notað á sjó eða landi. 

Íslenskan á þetta fína orð, skipverji, sem helmingi styttra.

Og í fluginu er til orðið flugliði, stutt og þjált.

Nei, - áhafnarmeðlimur skal það vera. Úff!  

Mikill viðbúnaður í Keflavík

Athugasemdir

[Þorsteinn Briem, 13.4.2010 kl. 14:57]

Linda hún með limum,
í London var afkimum,
fræknum þar og fimum,
Fons áhafnarmeðlimum.

[Hjordís (IP-tala skráð) 13.4.2010 kl. 15:02]

Víkurfréttir bæta um betur: "Óskilgreindur efnaleki mun hafa orðið í kringum eldhúsrými vélarinnar með þeim afleiðingum að áhafnarmeðlimir veiktust..." http://www.vf.is/Frettir/44042/default.aspx

[Nonni (IP-tala skráð) 13.4.2010 kl. 16:00]

Jæja Ómar,

Þá spyr ég þig sem flugmann. Hver er skilgreindur munur á flugverja og flugliða???

[Karl Jóhann Guðmundsson (IP-tala skráð) 14.4.2010 kl. 23:27]

Nonni.

Í reglugerð um flutningaflug nr. 780/2001 er að finna eftirfarandi skilgreiningar:

Flugliði (Flight crew member): Áhafnarliði sem er handhafi fullgilds skírteinis og falið er starf sem nauðsynlegt er við starfrækslu loftfars meðan á fartíma stendur.

Flugverji (Crew member): Áhafnarliði sem gegnir starfi um borð í loftfari meðan á fartíma stendur enda telst starf hans nauðsynlegt fyrir örugga starfrækslu loftfarsins eða fyrir öryggi farþeganna.

Flugliðar eru t.d. flugmenn og flugvirkjar.

Flugverjar eru t.d. flugfreyjur og flugþjónar.

[Nonni (IP-tala skráð) 15.4.2010 kl. 17:27]

Gott Karl,

einmitt það sem ég vildi fá fram. Því finnst mér að það væri rangt í fréttinni að tala um flugliða í stað áhafnarmeðlims eins og Ómar vill gera.