Íslands þúsund ár

29.3.2011 | 13:07

Að búa sig undir það versta en vona það besta.

Heimskreppan á fjórða áratug síðustu aldar stóð í tíu ár á Íslandi og hefði staðið lengur ef Íslendingar hefðu ekki dottið í þann lukkupott að verða eina Evrópuþjóðin sem græddi peningalega á stríðinu þótt mannfórnirnar á sjónum væru miklar.

Hrunið 2008 er að vísu ekki eins alvarlegt og heimskreppan var fyrir 80 árum, því að Íslendingar voru fátæk þjóð og bjó við frumstæðar aðstæður 1931, en með ríkustu þjóðum heims þegar Hrunið dundi yfir.

En nú er undirliggjandi sú efnahagslega hnignun, sem þverrandi olíuforði heims mun óhjákvæmilega leiða af sér, hnignun, sem á eftir að verða verri en ella vegna tregðu þjóða heims við að taka beint á vandanum, heldur reyna að fresta honum með hættulegri skuldasöfnun sem mun gera lausnina erfiðari en ella.

Rétt eins og ýmsir spáðu fyrir um Hrunið 2008 eru þeir einnig margir nú sem spá annarri fjármálakreppu í heiminum og að lokum alvarlegri kreppu ef skammsýnin í efnahags- og orkumálum heimsins haldur áfram að ráða för.

Nú lifum við á tímum þar sem "væntingavísitala" hlýtur að vera lág, einfaldlega vegna þess að það er ekki skynsamlegt annað en að búa sig undir það versta, þótt maður voni það besta og láti aldrei hugfallast.

Orkuvandamálin munu reynast þjóðum heims erfiðust en á því sviði erum við Íslendingar einstaklega heppnir, svo framarlega sem við kunnum með orkumálin að fara af framsýni og ábyrgð gagnvart komandi kynslóðum.

Þess vegna eiga þessar ljóðlínur við úr laginu "Styðjum hvert annað" sem er ferilsdiski mínum, þeim er gefinn var út fyrir síðustu jól:

Láttu ekki mótlætið buga þig heldur brýna !

Birtuna má aldrei vanta í sálu þína.

Ef hart ertu leikinn svo þú átt í vök að verjast

vertu´ekki dapur, njóttu þess heldur að berjast !

Látum ei mótlætið buga´okkur heldur brýna !

Brosum og elskum og látum ljós okkar skína !

	Íslendingar ekki bjartsýnir
Ábyrgðarmaður færslu Tilkynna um óviðeigandi tengingu við frétt

Flokkur: Bloggar | Breytt s.d. kl. 13:29 | Facebook

Athugasemdir

Sæll já það er að koma önnur bylgja í kreppunni og hún verður mun verri en sú fyrri því að nú er ekki lengur hægt að dæla fjármagni í örþrota bankakerfið það er þegar búið!

Sigurður Haraldsson, 29.3.2011 kl. 13:29

Verð að botna þetta hjá þér Ómar. Því fyrr sem við komum orkunni, fallvötnunum í verð og látum þau ekki falla ónotuð og arðlaus til sjávar, þeim mun meira koma þau komandi kynslóðum að gagni með verðmætamyndun. Kveðja,

Sigurður Ingólfsson, 29.3.2011 kl. 14:48

Ekki ætla ég að fara að spá um kreppur, en hitt vil ég benda á að menn skulu ekki áætla að þjóðir heims bregðist við þessu af "skammsýni" eða "tregðu". Má benda hér á að Þjóðverjar voru með tvær áætlanir um vetnisvélar. Sú fyrri, var vetnisvél sem átti að fleyta flugvél í geiminn. Sú átti að geta unnið í venjulegu andrúmslofti, og efra laginu þar sem lítið er um andrúmsloft. Hin var smíði vetnisvéla, sem meðal annars voru sendar til prófunar á Íslandi. Í báðum tilvikum, keypti bandaríkjastjórn þessar hannanir og stöðvaði þær. Og á sama tíma og verið er að boða skerðingu á iðnaði hér í Evrópu, ásamt niðurskurði á hertólum ... eru allar þjóðir í kringum Evrópu álfuna, að verða stærri, sterkari og með kjarnavopn.

Ef þessi þróun heldur áfram í þessa átt, verða afkomendur okkar hér á norðurlöndum afskaplega illa úti, þegar orku og efnahagsþröng framtíðarinnar, skellur á.

Bjarne Örn Hansen (IP-tala skráð) 29.3.2011 kl. 15:05

Því fyrr sem við pressum á að koma orkunni í verð, því lægra fáum við fyrir hana. Og því meira sem við bindum í samninga sem eru áratugi fram í tímann, því minna verður eftir.

Við eigum nefnilega að reikna með einhverju handa okkur sjálfum. Til dæmis til samgangna.

Jón Logi (IP-tala skráð) 29.3.2011 kl. 15:47