Grettir okkar daga.

Af hverju varð Mike Tyson tekjuhæsti íþróttamaður heims en jafnframt sá sem mestu tapaði? 

Skýringin er líklega sá mannlegi harmleikur og stóra dramatík sem felst í því að vera í nokkur misseri einhver útrúlegasta blanda af afli, hraða og tækni, sem sagan kann frá að greina eins ogTyson var þegar hann var upp á sitt besta, en missa síðan kjölfestu sína, þjálfara og fósturföður, Cus D´amato, sogast inn i vandræðamál og hjónaskilnað og hrynja í kjölfari niður í óvæntasta og greypilegasta ósigur hnefaleikasögunnar, aðeins 24 ára gamall.

Lenda síðan í fangelsi í þrjú ár, rísa aftur upp í mestu hæðir fyrst á eftir, en tapa óvænt á ný eftir aðeins rúmlega eitt ár. Tyson tókst enn 2002 að komast á þann stall að fá að keppa við Lennox Lewis um heimsmeistaratitilinn í þungavigt, en tapaði illa fyrir einum af allra bestu þungavigtarhnefaleikurum sögunnar.

Við Íslendingar þekkjum vel Tyson Íslendingasagnanna, Gretti sterka Ásmundarson. Eitt meginstefið í þeirri sögu er setningin "sitthvað er gæfa og gjörvileiki."

Grettir vann afrek en tapaði líka fyrir Hallmundi. Hann bjargaði skipsfélögum sínum með því að synda í land í Noregi og sækja eld í fjallakofa, en var síðan kennt um það að það kviknaði í kofanum og menn brunnu inni.

Hann stóð eitt augnablik á þröskuldi þess að verða sýknaður, en lét augnabliks bræði eyðileggja það fyrir sér og dæma sig í lengstu útlegð Íslandssögunnar.  

Mótsagnirnar í Grettis sögu gera hana svo sterka og áhrifaríka, - þetta, að aðalpersónan er í senn frægur og illræmdur, bæði að afrekum og endemum;  - dáður eða hundeltur.

Tyson er Grettir okkar daga á alheimsvísu, það blasir við. Þess vegna er engum sama um hann, þess vegna er hann svo frægur og þess vegna stefnir hann hugsanlega í átt að jafn ömurlegan dauðdaga og gerði sögu Grettis svo ógleymanlega.                                            

Segist vera að deyja úr alkóhólisma

Athugasemdir

[Þorsteinn Briem, 25.8.2013 kl. 13:07]

Grettir átti góða spretti,
en gæfu lítill smiður,
alla drap á einu bretti,
þar eldi góður viður.

[Þjóstólfur (IP-tala skráð) 25.8.2013 kl. 14:11]

Hefðir mátt sleppa "þar" í síðustu línunni, hr. Briem...en tækifærisvísur eru eins og skyndi...skvísur.... góðar en gleymast fljótt...

[Jenný Stefanía Jensdóttir, 25.8.2013 kl. 15:05]

Örlög Grettis voru ráðin, þegar Glámur lagði á hann álög, m.a. þau að frá og með þeim degi yrði hann ekki sterkari, enda þó það hefði verið skrifað í skýin. Sá sem pirraði hann, svo hann brást illur við og sló til fyrir framan konungsríkið og hirðina, var e.t.v. Glámur sjálfur í dvergslíki. En honum þótti alltaf undurvænt um móður sína. Það er eitthvað.

[Haukur Kristinsson (IP-tala skráð) 25.8.2013 kl. 16:02]

Hvað var það allt móti ógoldnu hefndunum

eða sem níðingur bregðast í efndunum?

Dauðinn varð leiðin að ljósinu, sanninum.

Lífið varð blettur á hetjunni, manninum!

Skap hans þann dug og þá djörfungu gaf honum,

drengskapinn lífselskan níddi ei af honum.

- Sloppinn við þulu um ævileið öfuga,

Illugi á söguna stutta en göfuga.

Klettafjalla- og andvökuskáldið.