Þrautskipulögð innrás inn í Evrópu?

Nú má sjá því hampað á netinu, og vitnað í forseta Tékklands, að flóttamannastraumurinn inn í Evrópu sé skipulögð innrás múslima til þess að taka völdin í álfunni.

Harla óvenjuleg verður sú birtingarmynd hennar sem blasir við á ströndum grísku eyjanna þar sem flóttafólkið berst drukknandi fyrir lífi sínu.

Sérkennileg er líka "skipuleg innrás" þar sem meira en 90 prósent innásarhersins er á flótta á milli múslimskra landa sunnan Miðjarðarhafsins.

Þegar gluggað er í bók Páls Baldvins Baldvinssonar um stríðsárin og aðrar heimildir frá þeim tíma blasir við kunnuglegt orðalag um flóttamannastraum þess tíma, sem teygði anga sína til Íslands.

Í honum sáu menn lymskulega ógn Gyðinga við hinn "hreina kynstofn og þjóðerni Íslendinga".

Taka má margar setningar og heilu greinarnar og skipta út orðunum Gyðingar og setja inn orðið múslimar í staðinn, og yrðu þær þá fyllilega nothæfar í umræðuna í dag.

Það tókst að hrinda meintri innrás Gyðinga inn í landið að stórum hluta á árunum 1938-40, enda talið að með því að drepa Krist og trúa bara á Gamla testamentið en ekki á Nýja testamentið, kenningar Jesú um kærleikann, mannúð hans, mildi og umburðarlyndi, færðu Gyðingar inn í landið varasöm trúarbrögð framandi og foneskjulegs menningarheims fólks, sem væri ógn við íslenskt þjóðerni og hinn hreina norræna kynstofn.   

  

Heyrðu öskur fólksins í sjónum

Athugasemdir

[Hilmar Hafsteinsson (IP-tala skráð) 27.12.2015 kl. 23:13]

Ómar Biedermann Ragnarsson er klár með eldspýturnar :(

https://www.youtube.com/watch?v=httuzNQ7qDM&feature=youtu.be

[Hörður Þormar (IP-tala skráð) 28.12.2015 kl. 01:00]

Æ, hér virðist skammt öfganna á milli!

En hér er saga um það hvaða afleiðingar útlendingahatur geta haft í för með sér.

Fyrir meira en hálfri öld stormuðu nokkrir ungir menn í grænum úlpum inn á krá í erlendri borg. Við fatahengið stóðu nokkrir menn og veltu því fyrir sér hvaðan þessir menn kæmu, en þeir voru háværir mjög og töluðu mál sem enginn þekkti. Daman í fatahenginu var glögg á tungumál og giskaði á að þetta væru norðurlandabúar. Þá hrópaði einn viðstaddra til aðkomumanna: "ég þoli ekki Normenn, eruð þið Normenn"?

Til að gera langa sögu stutta þá hófust slagsmál á milli innfæddra og aðkomumanna sem enduðu með því að einn þeirra særðist svo að úr blæddi. Fór þá daman í fatahenginu að stumra yfir honum.

Til að gera enn lengri sögu enn styttri þá kom þessi stúlkan með þessum unga manni til Íslands og hefur verið hér síðan.

[Hilmar (IP-tala skráð) 28.12.2015 kl. 03:47]

Við eigum víst að trúa því að Ómari Ragnarssyni og öðrum vinstrimönnum sé sérstaklega umhugað um gyðinga. Á sama tíma tala þeir af hitasóttalegri ákefð um ofsóknir gegn múslimum, hvers helsta áhugamál er að ofsækja og drepa gyðinga.

Gyðingar í Evrópu hræðast mjög aukinn innflutning múslima til Evrópu. Þeir verða í síauknum mæli fyrir ofsóknum, aðkasti og árásum af hendi múslima, og er sívaxandi straumur gyðinga á flótta frá Evrópu til Ísrael.

Ég held að Ómar Ragnarsson ætti að sýna gyðingum þá lágmarksvirðingu, að hætta að nota gyðingofsóknir til varnar þeim sem standa fyrir gyðingaofsóknum.

[Björn J. Guðjohnsen (IP-tala skráð) 28.12.2015 kl. 17:56]

En hvar hefur kærleikurinn, mannúð Jesú "ef hann var yfirleitt til", mildi og umburðarlyndi verið innan kirkjunar ?

Allavega lítið umburðalyndi