Vestfirðir afgangsstærð í samgöngum frá upphafi.

Það er fróðlegt að skoða kort af Íslandi frá 1944. Einn landshluti sker sig þá úr: Vestfirðir. 

Engir vegir. Hægt að þvælast vestur í Króksfjarðarnes með því að sæta sjávarföllum í Gilsfirði. 

Einn vegarspotti yfir Gemlufallsheiði og annar milli Patreksfjarðar og Rauðasands. 

Þar með upptalið. 

Engir flugvellir. 

1960 þarf enn að sigla milli Bíldudals og Hrafnseyrar og skrönglast yfir Þingmannaheiði. Enn lent á sjóflugvélum á fjörðunum.   

Enn í dag eru Vestfirðir eini landshlutinn með engan alþjóðaflugvöll, og þegar eini flugvöllurinn  með aðflugsmöguleika í myrkri var lagður niður, Patreksfjarðarflugvöllur, var eytt í það stórfé að eyðileggja hann svo gersamlega að útilokað væri hafa hann á skrá. 

Í sjötíu ár þurfti að notast við Hrafnseyrarheiði, sem var lokuð hálft árið vegna snjóa. 

Nú standa menn frammi fyrir því að gamalt og úrelt skip bilar æ ofan í æ í siglingum yfir Breiðafjörð. 

Þótt styttist í að vegur um norðurströnd Breiðafjarðar vestur á Barðaströnd verði bundinn slitlagi breytir það litlu, því að áfram eins og hingað til verður Klettsháls helsti farartálminn á þeirri leið. 

„Algjörlega óboðlegt og á ekki að líðast“

Athugasemdir

[Pétur Örn Björnsson (IP-tala skráð) 18.6.2022 kl. 20:01]

Hárrétt. 

Hef margoft farið þarna um í seinni tíð.

Það er, einmitt, Klettshálsinn sem verður áfram helsti farartálminn.  Nema ... boruð verði tvenn örstutt göng (u.þ.b. 2 km. og 2,5 km.) með millilendingu fyrir botni Kvígindisfjarðar.

[Þórhallur Pálsson, 18.6.2022 kl. 22:25]

Auðvitað ætti að gera göng undir Klettsháls, en þau yrðu ca 4 km að lengd.
Ég er búinn að marg rýna í myndirnar á map.is og mér sýnist að það sé alveg nothæft flugvallarstæði við botn Önundarfjarðar sunnanveðan.  Hann gæti - ef svo reyndist - leyst af þennan vandræðaflugvöll við Skutulsfjörð.

[Pétur Örn Björnsson (IP-tala skráð) 18.6.2022 kl. 23:11]

Þórhallur, tvenn stutt göng dygðu (2 km. og 2,5 km).  Miðað við að millilenda fyrir botni Kvígindisfjarðar.  Undirlendið við botninn er svo um 2 km á breidd.  

Leiðin þar um -í heild- væri því um 6,5 km.