FLUGIÐ FYRIRMYND FYRIR BÍLAUMFERÐINA.

Flugslysum hefur ekki aðeins fækkað í þotuflugi í heiminum heldur hefur flugslysum fækkað hér á landi síðustu ár. Margt af því sem reynt er að gera í fluginu mætti gera í bifreiðaakstri. Flugmenn verða að halda við færni sinni og vera í æfingu í viðbrögðum við óvæntum uppákomum, s. s. ofrisi og spuna. Hversu oft heyrum við hins vegar ekki setninguna: "...missti stjórn á bílnum..." og síðan kemur "orsökin", lausamöl, hálka o. s. frv. 

Ég byrjaði að suða um æfingasvæði fyrir ökumenn fyrir meira en þrjátíu árum á borð við þau sem ég sá þá í löndum í Evrópu sem voru mun fátækari en okkar.

Nú verður yfirgnæfandi hluti banaslysa og alvarlegra slysa vegna þess að belti eru ekki notuð. Segja má að óhugsandi sé að slík slys geti gerst í flugi.

Hversu oft heyrum við ekki setninguna: "...kastaðist út úr bílnum...."og samt er ekki sagt alltaf frá því, hvað þá að viðkomandi hafi augljóslega ekki verið í bílbelti. Það er misskilin tillitssemi við hinn látna eða slasaða að segja ekki frá svo mikilvægum atriðum varðandi slysið.

Segja má að hann hafi ekki látist eða slasast til einskis ef mistök hans geta orðið öðrum til varnaðar.  

Það er til einskis að hafa allt að sjö líknarbelgi í bílum ef bílbeltin eru ekki notuð. Ég gæti haldið áfram að telja upp fleiri atriði sem öryggisviðleitni í umferðinni á borð við það sem tíðkast í fluginu gæti skilað í fækkun slysa en læt þetta nægja. 

 

Slysatíðni í þotuflugi fer ótvírætt lækkandi

Athugasemdir

[Baldur Kristjánsson, 25.10.2007 kl. 03:08]

Sæll Ómar!  Þrátt fyrir allt þetta öryggi líður mörgum geysilega illa í flugi. Hvað er til ráða í því? Er til flughermir fyrir farþega?  kv.  B

[Bjarni Kjartansson, 25.10.2007 kl. 10:06]

Það atriði sem ég tel ekki nægjanlega æft í ökukennslu er, líkt og í fluginu, akstur/ flug, miðað við AÐSTÆÐUR.

Gerð og ástand yfirborðs vegar, gerð og ástand/búnaður ökutækis.

Í fluginu er lögð ofuráhersla á, að menn skoði aðstæður ,,plani" vel og afli sér upplýsinga um veður á leiðinni til áfangastaðar.  Einnig að menn læri að lesa í skýin, þekkja hætturnar sem kunna að búa í þeim.  Það fer engir einkaflugmenn, með fullum fimm inn í bratta ,,kúmma".  Það eru glæfraflugmenn, sem fljúga undir linsulaga ský yfir flöllum  (hugsanlegar fjallabylgjur).

Eins ættu ökumenn að miða hraða og annað við veður, yfirborð og búnað ökutækja sinna, þannig ná flestir að aka heilum vagni heim.

Miðbæjaríhaldið

[Sævar Helgi Lárusson, 25.10.2007 kl. 11:05]

Margt getum við sem vinnum við umferðaröryggi læra af fluginu, rétt er það. Þó er þar þrándur í götu og það er að sú skerðing á frelsi ökumanna sem þyrfti að koma til yrði illa tekið á mörgum vígstöðum.

Hitt langar mig til að benda þér á að lesa skýrslur Rannsóknarnefndar umferðarslysa, þær eru allar aðgengilegar á www.rnu.is og þú gætir td lesið síðustu ársskýrslu. Þar er greint frá þeim mistökum sem í banaslysunum eru gerð, hvort sem þau séu á hendi veghaldara eða ökumanns.