Veðrið í dag "svo mikið erlendis."

Það kæmi mér ekki á óvart ef Björgvin Halldórsson hefði sagt ofangreinda setningu í dag. Ég á bók þar sem er hægt að fletta upp veðrinu í öllum heimshlutum og þar stingur í augu að meðalhiti í júlí í Reykjavík þegar hlýjast er á daginn, er 7-8 stigum lægri en á Norðurlöndum. Það er meira að segja töluvert hlýrra í Tromsö, sem er miklu norðar en Reykjavík.

Niðurstaða: Þetta er kannski mesti munurinn á veðráttunni hér og erlendis og það sem helst mætti breytast.

Fyrir rúmri viku þegar ég var að ræða við Karl Olgeirsson, góðan vin minn, um væntanlegt brúðkaup hans og notkun minnsta brúðarbíls landsins, sem ber einkanúmerið "Ást", var niðurstaðan auðvitað sú að notkun svona opins bíls ylti algerlega á hinu óútreiknanlega íslenska veðri.

"Það er góð spá", sagði ég en konan mín leiðrétti mig strax og sagði að of langt væri til brúðkaupsins til þess að hægt væri að segja svona vitleysu.

Ekki óraði mig fyrir því að í dag yrði hlýjasti dagur í Reykjavík síðan á svipuðum tíma í júlí 1976, ef ég man rétt. Er skemmst frá því að segja þessi frumraun brúðarbílsins gerði þetta brúðkaup einstakt. "Þetta var svo mikið erlendis" að maður trúði því vart.  

Heitasti dagur ársins

Athugasemdir

[Emil Hannes Valgeirsson, 26.7.2008 kl. 09:58]

Að vísu varð heitara í júlí í Reykjavík 1980 og 1991, en það er samt alltaf viðburður þegar við fáum 20 stig hér í borginni. Ég tók þetta saman fyrr í sumar, sjá hér.

[Bernharður Guðmundsson (IP-tala skráð) 26.7.2008 kl. 17:33]

Þvílík veisla , Ómar, að lesa bloggið þitt. Lestur bloggs hefur ekki verið  mikill þáttur míns veruleika en í dag datt ég ofan á síðuna þína og hef nú lesið marga mánuði aftur í tímann og naut þess mjög. Ekki aðeins  að fjallað  er um málefni sem varða okkur öll og  textinn er bæði skýr og skemmtilegur heldur fyrst og fremst vegna þess að hér talar maður sem hefur yfirsýn og vegna starfa síns hefur innsýn í liðna atburði sem eru viss undirstaða þess sem nú er að gerast.

Bestu þakkir Ómar og  blessaður haltu áfram að efla umræðuna og opna augu okkar  fyrir því sem er að gerast í þjóðlífinu.

Bernharður Guðmundsson