Rjúkandi ráð.

Rjúkandi ráð var nafn á söngleik eftir bræðurna Jónas og Jón Múla Árnasyni sem sýnt var í því húsi, sem bar nafnið Framsóknarhúsið og síðar Storkklúbburinn og Glaumbær.

Nafnið táknaði ráðaleysi og mig minnir að slökkvilið hafi verið með í myndinni. Fyrir tilviljun brann síðan húsið sem var aðsetur söngleikjasmíða bræðranna, Glaumbær, í frægum bruna og kom í ljós að húsið var fágætur eldsmatur að allri innri smíð.

Nú fáum við að vita að Brown og Geir hafi setið að huggulegu spjalli á púðurtunnu sem rauk úr í Downingsstræti þegar í apríl síðastliðnum. Þetta var Glaumbær mikillar gleði og glaums íslensks og bresks fjármálapartís, fullur af eldsmat og fólki sem fór óvarlega og hætta á íkveikju fór sívaxandi.

Alltaf þyrptust fleiri og fleiri inn í húsið til að taka þátt í glaumnum og gleðinni.

Ýmsar leiðir voru til að afstýra stórbruna, sem vofði yfir, en niðurstaðan af huggulegu spjalli í teboðinu varð engin.

Í stað aðgerða var setti íslenski plötusnúðurinn á fóninn plötuna "Látum sem ekkert C" með Halla og Ladda og spilaði hana stanslaust á hæstu stillingu þar til eldurinn kviknaði svo að hún hljómaði hæst þegar húsið var orðið alelda.

Rjúkandi ráð þeirra Múlabræðra lýsti smámunum miðað við Rjúkandi ráð þeirra fóstbræðra Browns og Geirs. Aðalatriðið hjá forsætisráðherrunum varð að enginn sífjölgasti gesta í púðurtunnuhúsinu yrði var við neitt og að veislan mikla héldi áfram að færast í aukana.

Afleiðingin varð sú að þegar allt fuðraði upp var margfalt fleira fólk í húsinu en annars hefði verið og tjónið þeim mun meira.

Geir aðvaraði Brown í apríl

Athugasemdir

[Helgi Jóhann Hauksson, 1.11.2008 kl. 12:40]

Svo í maí opnaði Landsbankinn með leyfi íslenskra yfirvalda Icesave-reikninga í Hollandi, og þeir voru komnir á fáum mánuðum komnir í 350 milljarða króna.

[Björg (IP-tala skráð) 1.11.2008 kl. 18:27]

Eins og venjulega greinir Ómar hlutina af frábærri skarpskyggni. Frábær lýsing hjá þér. Legg til að þú, Ómar, farir af stað, fáir fleira gott og heiðarlegt fólk með þér og sendir ríkisstjórnina og alla hennar fylgisveina/sveinur heim. Við treystum ekki Geir og ekki heldur Ingibjörgu né neinum af þeirra fylgdarliði.