Hvað mun vanta í stjórnarsáttmálann ?

Löngum hefur verið sagt að það það hafi sagt mest um gildi mála hvort Mogginn hafi þagað yfir þeim. Aðferð strútsins.

Það verður ekki síður fróðlegt að sjá hvað muni vanta í stjórnarsáttmálann heldur en það hvað verður í honum.

1. Verður sett inn ein setning í 82. grein kosningalaganna sem gerir leyfilegt fyrir framboð að hafa óraðaðan lista, afsala sér valdinu tl að raða á hann og láta kjósendur framboðsins eina um það ?

2. Verður hinn ósanngjarni 5% þröskuldur afnuminn eða lækkaður ?

3. Verður eitthvað í sáttmálanum um stóriðjustefnuna, fyrirhugaða eyðileggingu stórkostlegra náttúruverðmæta nyrða og syðra. 360 þúsund tonna álver á Bakka þýðir það. Varla mun Norsk Hydro þurfa minna.

Ef hvorki 1 né 2 verður í stjórnarsáttmálanum þýðir það algjört viljaleysi til að gera auðveldar breytingar í lýðræðisátt sem geti tekið gildi strax í næstu kosningum.

Ef ekkert verður um númer 3 vitum við að VG hefur selt þau mál fyrir það að komast í stjórn í 83 daga og viðbúið að stefnan verði seld áfram ef flokkurinn verður í stjórn eftir kosningar.

Ný stjórn hefur 83 daga til stefnu

Sátt, - í aðeins í bili.

Ljóst er af lýsingu Sigmundar Davíðs og sú sátt sem nú er loks orðin um að ýta stjórninni úr vör er byggð á því að síðar muni nást sátt um ákveðin atriði svonefndar verkáætlunar stjórnarinnar.

Þetta eru helstu, mikilvægustu og viðkvæmustu atriðin í stjórnasáttmálnum og því er enn alls óvíst hvort ekki kunni að sjóða upp úr síðar úr því að ekki tókst í tímahrakinu að hnýta þessa lausu enda.

Framsókn ver nýja stjórn

Farið af stað með óklárað verk.

Nú rétt í þessu var tilkynnt endanlega að Framsóknarflokkurinn myndi verja vinstri stjórina falli. Formaður flokksins sagði þó að ekki hefði verið gengið frá öllum atriðum varðandi verkáætlunina um aðgerðir á stjórnartímanum, en að Framsóknarmenn yrðu hafðir með í ráðum við að ganga endanlega frá þessum atriðum.

Eins og ég sagði í bloggi í gær: Framsókn mun anda niður í hálsmálið á flugstjórunum tveimur og rífa í stýrin ef þeim þyki þurfa.

Framsókn fundar að nýju

"Verður líklega..."

Hvað oft hafa þessi orð, "verður líklega" ekki heyrst undanfarna daga? Og alltaf brugðist. Heil vika liðin og allt "óraunhæft" að mati flokksins sem stjórnar ferðinni núna þótt hann þykist ekki hafa umboð kjósanda sinna til þess.a

P. S. klukkan 18:30 Nú er þetta líklega loks orðið að veruleika.

Stjórnin mynduð á morgun

Stjórnmálameistarar ríkisins, ekki meir ! Ekki meir !

Við Íslendinga erum hafðir að háði og spotti um víða veröld og þar á ofan álitnir skúrkar. Það yrði ekki á þetta bætandi ef mikil umfjöllun erlendis um fyrstu samkynhneigðu konuna í embætti forsætirsrherra í heiminum snerist upp í það að hæðast að vandræðaganginum hérna og því að fréttir af valdatöku Jóhönnu hefðu verið tómt plat.

Að næsti bloggpistill minn á undan þessum væri orðinn úreltur auk allrar annarrar umfjöllunar um Jóhönnu um víða veröld.

Þessi vandræðagangur er áreiðanlega tilefni til þess að hrópað verði á Austurvelli í dag: Stjórnmálameistarar ríkisins, ekki meir ! Ekki meir !

P. S. Nú kemur í ljós kl. 18:30 að stjórnmálameistarar Alþingis séu búnir að ákveða að ýta stjórninni úr vör með óklárað það verk að samstaða sé um svonefnda verkáætlun. Ekki sérlega traustvekjandi.

Ósætti um aðgerðirnar

Textinn og lagið "Saga Jóhönnu."

Ég var spurður á sjötta tímnum í dag hvort ég gæti ekki sett lagið "Saga Jóhönnu" á netið, en viðkomandi hafði heyrt lagið spilað í útvarpinu. Þetta minnti mig á að hingað til hef ég ekki búið yfir þeirri kunnáttu að geta sett myndir eða tónlist inn á bloggið mitt svo að ég ákvað að bæta nú loksins úr þessu og þótt fyrr hefði verið.

Fór í það að gera þetta hvort tveggja í bloggpistli fyrr í kvöld.

Með hjálp Láru dóttur minnar gekk ljósmyndarmálið vel en innsetning lagsins hefur vafist fyrir okkur í allt kvöld vegna forritavandamála. Var þá ekki ónýtt að fá hjálp frá tengdasonum mínum, Hauki Olavssyni og Inga R. Ingasyni.

Og rétt í þessu skilst mér að málið sé leyst og hægt sé að opna lagið hér fyrir neðan textann og einnig fyrir neðan fyrri bloggpistilinn. Og ljósmyndina má sjá og stækka út úr bloggpistlinum fyrr í kvöld.

Útsetningu, undirleik, upptöku og hljóðblöndun annaðist Vilhjálmur Guðjónsson.

SAGA JÓHÖNNU.

(Með sínu lagi og eftirlíkingu af rödd Jóhönnu)

"MIinn tími mun koma" ég sagði eitt sinn
er sigur mér tókst ekki að vinna í slag við formanninn.
Þau sögðu mig búna að vera og eiga enga von
en "minn tími mun koma" ég söng lon don,
"já, minn tími mun koma, Jón Baldvin Hannibalsson.

Ekki virtist gatan greið.
Í nýjum flokki fann hún leið.
Fýrar háðskir fóru á skeið, -
um flokkinn ortu á þessa leið:

Eins og verkur í baki
í ástarleik með rúmbraki
eða blettur í laki
er hann, þessi Þjóðvaki.

Og árin liðu og liðu og liðu, uns góðar fréttir loks mín biðu.

Nú samherjarnir syngja er þeir taka mér höndum tveim:
"Ég er hýr og ég er góð, Jóhanna er komin heim."
Ég uppreisn fékk um síðir. Sælan er yndisleg
því sá sem mig vann um árið komst aldrei eins langt og ég.

Því ætla ég að segja að sumir ættu að þegja.
Það saknar þeirra enginn, ó, Gölli Valdason.
Og sá hlær best sem síðast hlær, nú syng ég lon og don:
Minn tími er kominn, Jón Baldvin Hannibalsson !

Minn tími er kominn!

Skrár tengdar þessari bloggfærslu:

• 01_-_saga_johonnu_0.mp3

Sleppir aðalmálinu, skuldunum.

Það væri ekkert sérstaklega slæmt ef það eina, sem væri að á Ísland, væri 10% minnkun kaupmáttar, jafnvel 20% minnkun. 20% minnkun myndi færa okkur til ársins 2000 og minnist þess nokkur að hér væri svo voðalega slæmt að búa hér þá? Nei, auðvitað ekki.

Geir H. Haarde sleppir því hins vegar að geta þess að skuldir heimilanna fjórfölduðust á síðustu árum og skuldir fyrirtækjanna þrefölduðust. Íslensk heimili eru hin skuldugustu í heimi og nú eru allir landsmenn sem heild að verða það.

Stjórnarstefnan var aðal hvatinn að þessari fáránlega miklu skuldasöfnun, allt of hátt gengi, húsnæðislánasprengja og boði inn í efnahagslegt fíkniefnapartí þar sem lánsféð flaut um allt.

Þú "græddir" þeim mun meira sem þú keyptir meira í þessu rammskakka umhverfi.

Nú sitja tugþúsundir fólks uppi með lán, sem er að keyra það í gjaldþrot og ekki er hægt að selja neinar eignir nema á brunaútsölu. Raunar varla hægt að selja neitt. Markaðirnir frosnir.

Allt í einu virðist engin ástæða til að segja: "Guð blessi Ísland." Blessun Sjálfstæðisflokksins virðist vera nóg.

Geir óttast sundrung og misklíð

"Þá getum við alveg eins..."Lofar ekki góðu.

Ég hjó eftir einni setningu í máli Sigmundar Davíðs Gunnlaugssonar varðandi það að Framsóknarmenn telja sig hafa umboð til þess ráða stjórnarsáttmála stjórnar sem þeir telja sig ekki hafa umboð til að sitja í.

Hann sagði að verkáætlun komandi vinstri stjórnar væri þannig að þá gætu við alveg eins haft stjórnina sem var.

Enn og aftur komum við að oddaaðstöðu Framsóknar, sem ég benti á eftir síðustu kosningar og hún notar sér til hins ítrasta nú.

Flokkurinn ætlar að anda ofan í hálsmálið á komandi ráðherrum og rífa í stýrin ef þurfa þyki. Lofar ekki góðu um föst tök komandi stjórnar á vandamálum þjóðarinnar.

Úr orðum Sigmundar Davíðs má lesa hótun Framsóknar um að fara sömu leið og í borgarstjórn að fara á ný inn í gamla meirihlutann með Sjálfstæðisflokknum.

En slíkur hringlandaháttur myndi verða stjórnarmyndunarflokkunum til þvílíkrar minnkunar að útilokað er að klókir stjórnmálamenn gangi svo langt að klúðra þessari stjórnarmyndun. Tími Jóhönnu hlýtur að koma. 

Á hinn bóginn er sérkennilegt að vinstri flokkarnir skuli ekki hafa reiknað með því að Framsókn þyrfti einhvern tíma til að sjá víxilinn sem þeir áttu að láta fara í umferð. Aflýsing hátíðarinnar á Austurvelli er neyðarleg og klaufaleg uppákoma. 

Nú fer helgin sem sé í aðrar stjórnamyndunarviðræður. 

Telur forsendur fyrir stjórn

Saga Jóhönnu og drápið á Faxa.

Óvænt eldflaugarskot á Jóhönnu Sigurðardóttur efst upp á himin stjórnmálanna mun vafalaust kveikja áhuga sagnaritara á að skrá sögu hennar.

Í mér blunda meðal annarra sagnfræðingur og tónlistarmaður og skemmtikraftur.

Þessir þrír menn hafa oft lagt saman í púkk í fimmtíu ár og ekkert lát þar á. Atburðirnir í vetur hafa verið gullnáma fyrir skemmtikraftinn.

Í tengslum við það að birta fyrstu ljósmyndina á þessari bloggsíðu læt ég fljóta með til gamans lagið "Saga Jóhönnu, sem ég raulaði inn á disk fyrir hennar hönd með undirleik Vilhjálms Guðjónssonar. 

 

Myndin er af fossinum Faxa í Jökulsá í Fljótsdal, ein af síðustu myndunum sem tekin var af 15 fossum, sem þurrkaðir voru upp í Jökulsá í Fljótsdal í haust til að veita vatninu úr þeim yfir í jarðgöng til Kárahnjúkavirkjunar. 

Á vef virkjunarinnar segir nú flestir þessara fossa séu meira en 30 metra háir, sem sé á hæð við allan Gullfoss. Þrætt var fyrir þetta áður en fossarnir voru teknir en nú er það "óhætt," ekki aftur snúið.

Faxi og Kirkjufoss eru tveir fossar á hæð við Gullfoss ofarlega í ánni. Faxi er tvílitur, eini stórfossinn af ca 10-12 stórfosssum á Íslandi sem þannig var.

Hægra megin er fossinn tær vegna þess að vatnið úr Laugará fellur þar í hann.  

Með einni virkjun, Kárahnjúkavirkjun, voru þurrkaðir upp þrír af stórfossum Íslands, 30% fossa í þessum flokki. Ef smellt er inn á myndina af Faxa má stækka hann og með því að smella á hann aftur fá myndina í fulla stærð og þá nýtur fossinn sín betur. P. S. Meðan reynt var að treysta á það hve lítt þekktir fossarnir eystra voru var reynt að gera sem minnst úr þeim. Talan 15 fossar sem eru hærri en 30 metrar eins og stendur í fréttinni á Kárahnjúkavefnum er hins vegar ýkjur, hvaðan sem það er nú komið. Fossarnir eru fimmtán en aðeins Kirkjufoss og Faxi eru svo háir. Hinir eru minni. Og síðan er annar eins fjöldi í Kelduá sem drepnir voru í haust. Og eitt enn: Þegar vatnið var tekið af Faxa var einn maður viðstaddur aftöku fossins og enginn viðstaddur við Kirkjufoss, því ekki gat ég verið á báðum stöðunum í einu. Allir voru uppi við stífluna þegar þetta gerðist.

Skrár tengdar þessari bloggfærslu:

• 01_-_saga_johonnu.mp3
• 01_ras_1.wma

"Ömmi frændi"

Strax í starfi sínu sem frétta- og dagskrárgerðarmaður hjá RUV kom ijós mikill félagsmálaáhugi Ögmundar Jónassonar. Fljótlega varð hann formaður Starfsmannafélags Sjónvarpsins og var mjög annt um hag hvers einasta félagsmanns.

Hann vann sér trúnað og vinsældir og fékk fjótlega viðurnefnið "frændi" hjá okkur því að var eins og hvert okkar væri í fjölskyldu hans. Þá myndaðist vinátta með okkur sem hefur haldist æ síðan.

Mér er það eftirminnilegt hve yfirvegaður hann var í upphafi verkfalls opinberra starfsmanna og vildi ekki stíga feilspor. Það er algengur misskilningur að hann hafi verið upphafsmaður að hinni frægu stöðvun útsendinga RUV þar sem stefið "Ár vas alda" stimplaði sig óverðskuldaað inn sem eitthvert leiðinlegast stef allrra tíma.

Ögmundur spurði strax í upphafi þeirrar spurningar hvort við myndum ekki fá svona algera stöðvun í hausinn.

Eitt gott kom þó út úr þessu, afnám einokunar RUV á markaðnum. Nú myndi engum detta í hug að fara aftur í gamla farið, að minnsta kosti ekki meðan RUV verður áfram sú kjölfesta sem nauðsynleg er.

Eldskírn sína utan félagsins fékk Ögmundur á frægum baráttufundi í Austurbæjarbíói í upphafi þessa verkfalls
Þá flutti hann mjög eftirminnilega ræðu, eina af þessum sem maður gleymir ekki.

Framhaldið þekkja flestir og það kom svo sem ekki á óvart að hann skyldi hasla sér völl á vinstri væng stjórnmálanna. Hann er vel að því kominn að vera orðinn ráðherra.

Ögmundur vill alla hluti gera vel og á vafalaust eftir að leggja sig fram. Honum flyt ég árnaðaróskir í tilefni þessa.

Ögmundur verður ráðherra