Geri ekkert af mér.

Það er auðvelt að velja lag sem túlkar heit Tiger Woods um að hafa sér skár í framtíðinni. 

Hinn drykkfeldi og léttlyndi bandaríski píanóleikari Fats Waller samdi og flutti lagið "Ain´t misbehaving" fyrir meira en 70 árum og nokkrum sinnum hef ég sungið lagið á skemmtunum með íslenskum texta sem ber heitið "Geri ekkert af mér."

Læt hann flakka hér svona til gamans.

 

GERI EKKERT AF MÉR.

(Lag: Ain´t misbehaving)

 

Æsandi konur   á ýmsan veg  / 

eru í kringum mig en kvíddu´engu, ég sver að ég  /

geri´ekkert af mér, geymi mig fyrir þig,  - bara þig, aðeins þig , bara þig.

 

Ó, hve þær lokka - á ýmsan veg  /

með yndisþokka ´og mikla fegurð, en ég sver að ég   /

geri´ekkert af, mér, geymi mig fyrir þig,

aðeins þig, bara þig.

 

Skvísur anga  við minn vanga,  /

við það fer mann  margt að langa  /

en blessuð vertu, þær blikna við hliðina´á þér,  / 

ó, í hjarta mér.  

 

Banda þeim frá mér, - syng til þín söng, -  /

sé þig í anda´er pilsin líða framhjá, stutt og þröng, -  /

geri´ekkert af mér, -  geymi mig fyrir, bara þig.   /

Geri´ekkert af mér, -  geymi mig fyrir þig !  

 

Skvísur  

 

Mér að kenna, segir Woods

"Hvað getur Stebbi gert að því...?"

Hvað getur Stebbi gert að því þótt hann sé sætur  /  og geri allar stelpur vitlausar í sér...?" var sungið hér um árið. 

Ég hef aldrei skilið það en Tiger Woods hefur einhver óútskýranleg áhrif á konur.

Mér er kunnugt um eldri konur sem setjast sem límdar fyrir framan sjónvarpstækið þegar kappinn birtist með kylfuna reidda um öxl.

Þetta eru rólyndis konur sem annars haggast ekki eða láta neitt koma sér úr jafnvægi. 

Oscar De La Hoya dró jafnvel fleiri konur en karla á hnefaleikabardaga sína, þessi tiltölulega litli naggur og þær hvíuðu og flykktust að hvar sem hann fór.  

Það hlýtur að vera erfitt að vera eiginkona slíks manns sem er áreiðanlega eltur á röndum hvar sem hann fer um heiminn, fjarri heimaslóðum sínum.  

Hér forðum daga var það kökukeflið sem reyndist handhægt í svona tilfellum en þeir tímar eru liðnir þegar "konan var best geymd á bak við eldavélina."

Nú eru það golfkylfur eða hafnaboltakylfur sem túlka heitar tilfinningar sem fá útrás og geta síðan reynst vel sem björgunartæki þegar allt er komið í óefni.  

Woods flúði reiða eiginkonu

Var ekki nógu afdráttarlaust.

Þegar lesin voru blaðaviðtöl við talsmann Fíladelfíu var bagalegt að ósamræmi kom fram í svörum hans þegar spurningum blaðamanna var svarað. Slíkt er ekki hægt að flokka sem "rangfærslur fjölmiðla." 

Þess vegna er yfirlýsing stjórnar Fíladelfíusafnaðrins fagnaðarefni því að hún á að eyða vafa í þessu efni.

Í yfirlýsingunni kemur fram að kórstjóri Fíladelfíukórsins velji þá, sem syngi sem gestir á tónleikum kórsins, "á faglegum forsendum."  

Stjórn safnaðarins vísar með þessu málinu til kórsins og kórstjórans þar sem það hefur sennilega verið frá upphafi og verður áfram án þess að vitað sé hvernig því lýkur endanlega.

Í Fíladelfíusöfnuðinum er unnið frábært starf og starfsemi kórsins hefur verið með eindæmum glæsileg.

Ég hef átt samstarf við kórstjórann og söngvara í kórnum og það hefur verið eitt það mest gefandi og skemmtilegasta sem ég hef kynnst á mínum tónlistarferli.  

Kórinn og hljómsveitin hafa getið það gott orð að skiljanlegt er að sóst sé eftir að syngja með honum, enda fagmennskan, stemningin og fjörið einstakt.  

 

P. S. Þess má líka geta að ég hef átt frábært samstarf við Friðrik Ómar Hjörleifsson og er hann einhver allra færasti tónlistarmaður á sínu sviði sem ég hef kynnst.  

Hommar velkomnir í Fíladelfíu

Kastró á lífi, - Stalín slapp þrisvar.

Engan þarf að undra þótt Osama Bin Laden hafi sloppið undan öflugustu leyniþjónustu og her heimsins. Aðeins 140 kílómetrum undan ströndum Flórida hefur Fidel Castro sloppið undan erkifjendum sínum í hálfa öld, tíu Bandaríkjaforsetum sem setið hafa á þessum tíma til mikillar gremju.

tugi skipta hafa verið gerðar áætlanir og tilraunir til að koma honum fyrir kattarnef en án árangurs.

Jósep Stalín var þrívegis hnepptur í fangelsi í hinum illræmdu fangabúðum Rússakeisara í Síberíu og slapp jafnoft út.

Þegar hann sjálfur þurfti að hneppa margfalt fleiri í fangelsi í Gúlaginu sluppu menn ekki eins auðveldlega. Sá sem réði yfir þrælkunarbúðunum kunni manna best trixin til að sleppa og nýtti sér það.

Svona svipað eins og þegar bestu kennararnir eru þeir sem voru erfiðustu nemendurnir sjálfir þegar þeir voru ungir.

Osama Bin Laden hefur því miður tekist að gera sig að tákngervingi baráttu fátækra og undirokaðra þjóða við hin ríku og drottnandi Vesturlönd.

Þegar ég var viðstaddur mikla þakkarhátíð í Maputo í Mósambík fyrir nokkrum árum, þar sem heimamenn vildu gera vel við velgjörðarfólk sitt frá Íslandi, var meðal sýningaratriða mikill stríðsdans sem átti að tákna baráttu innfæddra á sínum tíma við hina ensku nýlenduherra í Ródesíu, eins og landið hét þá.

Á fremsta bekk gestanna sat Halldór Ásgrímsson, þáverandi utanríkisráðherra, sem hafði við annan mann látið skrá Íslendinga sem eina hinna viljugu þjóða er vildu ráðast inn í Írak.

Einn hinna dansandi hermanna, sem þandi sig fyrir framan íslenska utanríkisráðherrann, einn helsta bandamann Bandaríkjaforseta, var í bol með risastórri mynd af Osama Bin Landen á brjóstinu.

Íslendingarnir létu sér hvergi bregða enda líklegt að ungi blökkumaðurinn hefði ekki hugmynd um hvað þetta væri neyðarlegt.

En þetta atvik sýndi hvaða sess Osama Bin Laden hefur tekist að setjast í víða um lönd.Það er ekki útilokað að hann verði jafn ósnertanlegur og Kastró.

Bin Laden slapp naumlega

Þess vegna er málið svona vaxið.

Ólafur F. Magnússon bauð sig fram ásamt öðrum í borgarstjórnarkosningunum 2006 fyrir lista sem bar nafnið "F-listinn - listi frjálslyndra og óháðra." 

Í ljós kom ári síðar að efstu menn listans sögðust skilgreina sig sem "óháða" og voru þá ekki í Frjálslynda flokknum, heldur í Íslandshreyfingunni. 

Rök framkvæmdastjórnar Frjálslynda flokksins um að Ólafur F. Magnússon eigi engan rétt til neins er varðar framboðið virka því öfugt við það sem til er ætlast.

Frjálslyndi flokkurinn stóð ekki einn að framboðinu 2006 og í því liggur eðli þessa máls.

 

  

Ólafur F. er ekki í Frjálslynda flokknum

Ógn og töfrar, Rússland og Stalín.

Rússland er stærsta land í heimi og hefur ótal ólík andlit. Stalín var á ævi sinni blanda af fágætum töfrum og ógn í senn.

Ógn Rússlands birtist nú síðast í svívirðilegu hryðjuverki, sem er frétt dagsins, en töfrarnir eru margslungnir. Töfrar Moskvu og Pétursborgar eru gerólíkir töfrum hins rússneska dreifbýlis sem er hið sanna Rússland.

Því kynntist ég á ferð fyrir nokkrum árum með heimamanni þegar við fórum að vetrarlagi frá Moskvu til smábæjarins Demyansk sem er 550 kílómetrum fyrir norðvestan Moskvu, sunnan við Valdai-hæðir. 

Rússinn varð bergnuminn þegar út í víðáttuna kom. Hann hafði aldrei farið slíka ferð fyrr og var að kynnast hinu rétta og óumbreytanlega Rússlandi í fyrsta sinn. 

Í fyrrdag rakst ég á íslenska þýðingu á bók um Stalín á yngri árum sem hefur fengið mikið lof gagnrýnenda. 

Bókin varpar ljósi á það af hverju Stalín náði svona langt. Myndin af honum ungum stingur mann, einkum hið rafmagnaða og dáleiðandi augnaráð, og um mann fer svipaður hrollur og við að horfa á Godfather-myndirnar þrjár á Stöð tvö undanfarnar þrjár vikur.

Ef þessi bók hefði komið út fyrir 40 árum þarf ekki að spyrja að því hver hefði leikið hlutverk Stalíns í kvikmynd um þennan rússneska Godfather á hans yngri árum. Auðvitað Al Pacino ! 

Bókin sú arna varpar ljósi á að Stalín hafði gríðarlega og nánast óhugnanlega mikla persónutöfra, vafði kvenfólki um fingur sér ef svo bar undir og var alls staðar á heimavelli, í glæpakreðsum, hjá kirkjunni, í Síberíu. 

Skarpur, slóttugur og ógnvekjandi heillandi.

Þrívegis slapp hann úr fangelsi í Síberíu. 

Stalín olli dauða um tuttugu milljón manna eða meira með ofbeldisfullri ógnarstjórn sinni en líka það er  fullt af mótsögnum því að ef hann hefði ekki látið Rússa iðnvæðast á grimmilegan hátt, hefði Hitler haft betur í heimsstyrjöldinni síðari. 

Gerð voru nokkur tilræði við Hitler en ekkert við Stalín. Það sýnir hve snjall hann var í grimmd sinni. 

Hitler "hreinsaði" aðeins yfirstjórn SA-sveitanna á "nótt hinna löngu hnífa" 1934 en lét þar við sitja.

Hershöfðingjarnir Beck, Halder og Brauchitsh gerðu samsæri gegn honum 1938 og 1939 en Hitler braut þá niður án þess að þurfa að taka þá af lífi eða setja í fangelsi.

Eftir tilræðið í júlí 1944 var þó enga miskunn að finna hjá honum.

Stalín stóð hins vegar fyrir einhverjum hroðalegustu og grimmdarlegustu hreinsunum sem mannkynssagan kann frá að greina á síðari hluta fjórða áratugarins og fór langt með það að eyða öllum foringjum í Rauða hernum.

Trotskí lét hann myrða í útlegð. 

Það sýnir hvað hann og áróður hans voru mögnuð fyrirbæri að sjálft Nóbelskáld Íslendinga sem var viðstaddur réttarhöldin illræmdu, dáðist að því hvað Búhkarin væri forhertur í vörn sinni !

Kommúnistar um allan heim trúðu á Stalín eins og Guð. Þarf ekki annað en að lesa Þjóðviljann þegar hann sagði frá dauða hans til að sjá það.

En vegna hreinsananna í Rauða hernum gekk allt á afturfótunum í upphafi stríðsins við Þjóðverja. En það skipti ekki öllu máli því að framleiðslumáttur Rússlands var svo miklu meiri en Þýskalands að þegar Þjóðverjum mistókst að vinna sigur í stríðinu á fyrsta hálfa ári þess, og Bandaríkin komin í stríðið líka, voru úrslitin ráðin.

Stalín var gríðarlega klókur í samskiptum sínum við forystumenn annarra stórvelda og kom þeim á óvart. 

Griðasamningur hans við Hitler 23. ágúst 1939 var eitraður leikur í refskák stórveldanna og gaf Rússlandi frest til að nýta framleiðslugetu sína til eflingar herstyrks síns.

Rússland og Jósef Stalín, áhrifamiklar andstæður ógnar og skelfingar, töfra og stórfengleika. 

Lestarslysið rannsakað sem hryðjuverk

Röng stefna í 30 ár.

Vestfirðingar súpa enn seyðið af rangri stefnu í samgöngumálum í 30 ár. Allir aðrir landshlutar eru með flugvelli sem hægt er að nota að degi sem nóttu. Og heilsársvegir liggja til allra annarra landshluta.

Vestfirðir eru á sama stigi og aðrir landshlutar voru fyrir meira en hálfri öld. 

Upphaf þessa var sú ranga ákvörðun um 1980 að leggja áherslu á hinn óralanga Djúpveg austur á Strandir og þaðan suður í stað þess að leggja áherslu á leiðina um Dali og Gilsfjörð. 

Við þetta færðist öll áhersla frá suður- og suðvesturhluta Vestjarða. 

Íbúar Þingeyrar sem ætla akandi til Reykjavíkur hafa þurft að vetrarlagi að aka fyrst í áttina frá Reykjavík og síðan hvað eftir annað í áttina frá Reykjavík á leið út eftir öllum fjörðunum við Ísafjarðardjúp, þvælast síðan austur á Strandir og suður um Hrútafjörð. 

Við það eitt að fara Arnkötludal styttist leiðin um hvorki meira né minna en 40 kílómetra og væri talsvert styttri en það ef farið væri vestur fyrir. 

Næst var sú ranga forgangsröðun, sem hefur tafið gerð jarðganga og heilsársvegar milli norður- og suðursvæðisins á meðan gerð hafa verið jarðgöng annars staðar á landinu þar sem voru þegar komnir heilsársvegir og nútíma flugsamgöngur. 

Nú er mikið fjaðrafok réttilega yfir töf á gerð nýs vegar á 24 kílómetra kafla við norðanverðan Breiðafjörð. 

Það var fyrirsjáanlegt fyrir löngu að þarna þyrfti að ganga frá undirbúningi á skaplegan og yfirvegaðan hátt samkvæmt gildandi lögum en það var samt ekki gert. 

Þegar menn drattast loks til að koma þessu af stað er sökinni velt á þá sem þurfa að láta þetta mál ganga eftir eðlilegum reglum í stað þess að spyrja: Af hverju var ekki búið að hefja þennan undirbúning fyrir löngu? 

Heilsársvegur milli norður- og suðursvæðis gerbreytir möguleikum til nútíma flugsamgangna við Vestfirði því að þá verður hægt að fljúga til Vestfjarða jafnt að nóttu sem degi svo framarlega sem gerð verður gangskör að því að koma upp slíkum flugvelli, annað hvort með því að bæta Patreksfjarðarflugvöll eða gera snotran flugvöll við Brjánslæk eða Haga. 

Raunar er Bíldudalsflugvöllur stórgóð bót á samgöngum fyrir Ísfirðinga ef þangað liggur heilsársvegur því að sá flugvöllur er oft opinn þótt allir aðrir flugvellir á norðanverðu landinu séu lokaðir í norðanhríð. 

Það er allt á sömu bókina lært. Ég skil til dæmis ekki hvers vegna brautin á Patreksfirði hefur verið stytt og þar með til dæmis komið í veg fyrir að sæmilega stórar flugvélar geti lent þar. 

Á sínum tíma voru færð að því ágæt rök hvernig hægt væri að koma leiðinni milli Þorskafjarðar og Kollafjarðar í gott horf án þess að rista upp eftir endilöngu og stórskemma Teigskóg, stærsta birkiskóg Vestfjarða og mikilsverðan hluta í því verðmæta lífríki og náttúrufari sem er aðall Breiðafjarðar. 

Menn kusu hins vegar að fara strax ofan þær í skotgrafir með þetta mál að stilla því þannig upp að ekkert annað kæmi til greina en að fórna Teigsskógi.

 

Heilsársvegur milli norður- og suðursvæðis

Bara ef fleira breyttist.

Samvinnuhreyfingin var hugsjónahreyfing umbótasinnaðra manna og Framsóknarflokkurinn var það líka í upphafi ferils síns.

Stefna Framsóknarmanna var skynsamleg og nauðsynleg á þeim tímum þegar fasismi og nasismi sem stefndu á stríð og kynþáttakúgun voru á aðra höndina og kúgun, ófrelsi og mannfórnir kommúnismans á hina. Hinn óhefti kapítalismi beið skipbrot í Bandaríkjunum og var ekki fýsileg lausn.

En fljótlega eftir að Framsóknarmenn komust í valdaaðstöðu sem var langt umfram fylgi þeirra vegna ranglátrar kjördæmaskipunar seig á ógæfuhlið hjá flokknum.

Í svonefndri þjóðstjórn 1939 kom í ljós að sterkir sameiginlegir hagsmunir kölluðu á myndun þess sem síðar kom betur fram í helmingaskiptastjórnunum 1950-56, 1974-78 og 1983-1987.

Ég er fús til að játa það að allt frá því ég fór að fylgjast með stjórnmálum um 1950 langaði mig til að kjósa heilbrigðan og umbótasinnaðan miðjuflokk.

Ég var að miklu leyti framsóknarmaður í hjarta mínu en gat ekki kosið flokkinn með þessu góða nafni vegna þeirrar spillingarlyktar sem ávallt var af honum.

Nú er flokkurinn góðu heilli að skipta út forystunni bæði á landsvettvangi og vettvangi borgarinnar en nú er það stóriðjustefnan sem heldur áfram velli og færist jafnvel í aukana ef eitthvað er.

Bara ef fleira breyttist en forysta flokksins.

Einar sigraði Óskar

Af hverju ?

Saga Maríu Jóhannsdóttur, sem flaug í sumar yfir vettvang mikils flugslyss, sem hún slapp við fyrir 62 árum, minnir mig um sumt á sögu af stúlku, sem var að fara um borð í litla flugvél frá Akureyri sem fara átti með þrjá farþega frá Akureyri til Lauga á sjötta áratugnum. 

Hún stóð við flugvélina og búið var að setja farangur hennar inn í farangursgeymsluna, sem var aftast í vélinni, þegar hún fékk svo sterkt og óþægilegt hugboð að hún hætti við að stíga upp í vélina. 

Henni var bent á að farangurinn væri kominn inn og svo erfitt yrði að ná í hann aftur að það yrði ekki gert. Hér til hliðar er mynd af flugvél af þessari gerð, en á þessum tíma var engin lúga á farangursgeymslu véla af þessari gerði og því ekki hægt að setja farangur í farangursgeymsluna nema að handlanga hann inn um hliðarhurð og yfir aftursætið. 

Hún breytti þó ekki ákvörðun sinni heldur lét sætið öðrum eftir og lét sig farangurinn engu varða. 

Þetta var að vetrarlagi og gekk á með éljum.  

Vélin fórst í Vaðlaheiði í svonefndu Bíldsárskarði, sem er gegnt Akureyrarflugvelli og blasir við frá vellinum, aðeins örfáa kílómetra frá honum. 

Allir fórust en farangur stúlkunnar, sem hætti við, fékk hún óskemmdan í hendur. 

Þessi atburður hafði að sjálfsögðu mikil áhrif á þessa konu, ekki síst vegna þess að munurinn á hennar sögu og sögu Maríu Jóhannsdóttur er sá, að sú manneskja, sem sæti hennar tók, fórst en ekki hún. 

Slíkt lætur engan ósnortinn.

Hún flaug ekki aftur með lítilli flugvél fyrr en meira en tuttugu árum síðar þegar ég flaug með hana frá Reykjavík til Kirkjubæjarklausturs og til baka aftur. 

Hún segist ekki geta útskýrt af hverju hún hætti við það á síðustu stundu að fara upp í flugvélina forðum daga og hefði meira að segja verið svo ákveðin að hún hefði ekki látið farangurinn hafa áhrif á þá ákvörðun. 

Af hverju? Af hverju í þetta sinn? Á því er engin skýring. 

 

Flaug yfir slysstaðinn

Sjómenn bjuggu við verri kjör.

Sjómannasamningar gera það að verkum að gengisbreytingar hitta þá sérstaklega fyrir.

Á þeim árum þegar krónan var allt of hátt skrifuð í "gróðæris"vitleysunni versnuðu því kjör sjómanna á sama tíma og kjör annarra bötnuðu.

Það er því skiljanlegt að sjómönnum finnist það hart að þegar þeir fái nú loks uppbót á kjaraskerðinguna sem þeir urðu að hlíta gagnstætt flestum öðrum, skuli vera tekinn af þeim sjómannaafslátturinn.

En þá er á þrennt að líta.

1. Gengi krónunnar hefur lækkað miklu meira en það hækkaði á gróðæristímanum og meðan krónan er svona lágt skráð, sem gæti orðið næstu 2-3 árin að minnsta kosti, gerir það meira en að bæta sjómönnum upp skerðinguna frá fyrri árum.

2. Kjör annarra stétta, þar sem fólk þarf að vera erlendis, til dæmis í fluginu, eru samningsatriði þeirra og vinnuveitenda þeirra og enginn afsláttur veittur af ríkisins hálfu þess vegna. 

Af hverju er ekki flugfreyjuafsláttur? Flugmannaafsláttur?

Tæknilegar aðstæður eru líka breyttar. Sjómenn sáu fyrr á tíð ekki sjónvarp og urðu af ýmis konar þjónustu ríkisins vegna fjarlægðar sinnar frá henni. Þeir tímar eru liðnir.

Ríkið heldur þar að auki uppi öryggisþjónustu í formi landhelgisgæslu sem kemur sjómönnum til góða umfram flesta aðra. Það er hins vegar slæmt hvaða áhættu menn taka nú með því að veikja þessa þjónustu á hættulegan hátt.

Erfitt er að sjá sanngirni í því að sjómenn sem vinna á hafnsögubátum og skipum sem sigla alla tíð uppi við landsteina eigi að fá sérstakan afslátt hjá ríkinu.

3. Það er erfitt fyrir þjóðfélagshópa að færast undan því að taka á sig hluta af þeim byrðum sem þjóðin verður að bera vegna hrunsins, ekki hvað síst þá hópa sem hafa grætt á hruni krónunnar. Útgerðarmenn eiga nú léttara, gengis krónunnar vegna, að greiða sjómönnum það sem þeim ber.  

 

P. S.

Vegna ýmissa ummæla sem fallið hafa í athugasemdum við þennan pistil ætla ég að bæta því við tveimur dögum síðar, að það er slæmt að þessi svonefndi "afsláttur" skuli vera nefndur "sjómannaafsláttur", því að upphaflega var hann settur á til að leysa kjaradeilu og létta undir með útgerðarmönnum.

Fyrir bragðið gátu þeir borgað sjómönnum lægri laun en ella.

Þessi afsláttur ætti því að heita "útgerðarmannaafsláttur" og umræðan um hann að vera á þeim nótum.  

Sjómenn búa við betri kjör