Ofríki hins "harða húsbónda" verður að linna.

"Grease stjarna látin", "fyrrum Idol-dómari nærri dáinn", - þessar fyrirsagnir segja mikið um eyðileggingarmátt fíkniefnanna. Skæðast þeirra mun samt ekki veriða verkjalyf eða dóp heldur áfengi og var fyrrum sagt að Bakkus væri harður húsbóndi. 

Hann fer ekki í manngreinarálit og það fer ekkert eftir andlegu eða líkamlegu atgerfi hvort fólk verður háð vímuefninu. 

Þættir Jóhannesar Kristjánssonar um læknadópið fjalla um ægilegt mál, það hvernig fyrirbærið "læknadóp" geti verið til. 

Fyrir allmörgum auglýsti þáverandi landlæknir að komið hefði verið á kerfi sem sýndi hve miklu hver læknir ávísaði og að með því ætti að vera búið að binda enda á þetta böl. 

Læknadópið er ekkert nýtt. Allt frá því er ég komst til vits og ára loddi það við einstaka lækna að þeir stunduðu þetta og voru tveir þeirra, sem nefndir voru, sjálfir á kafi í dópinu. 

Ein af afsökununum fyrir því að þetta fyrirbæri sé til er sú, að ef fíklarnir fái ekki skammtana sína á nógu auðveldan hátt, muni þeir verða tilbúnir að gera hvað sem er til að ná í dópið sitt og þar með muni glæpum fjölga. 

En þetta er bara ekki boðleg réttlæting. Sú spilling sem í læknadópinu flest getur ekki verið verjandi, allra síst ef viðkomandi læknar eru sjálfir háðir dópinu eða peningunum, sem þeir hafa upp úr í því að dreifa þessum andskota. 

 

Grease-stjarna látin

"Vísindin efla alla dáð"

"Vísindin efla alla dáð.." orti skáldið og það á við um notkun tækja og tækni til að stytta þann tíma sem flugvellir eru lokaðir vegna ösku frá eldgosum.

Þetta á við um tækin sem sagt er frá í tengdri frétt en hinu má ekki gleyma, að úrslitum réði einnig að hægt var með íslenskri tækni í samvinnu við háskólann í Dusseldorf að fylgjast með öskumagni í lofti með mælingum. 

Ég minni á bloggpistil minn á eyjan.is með yfirskriftinni "Jónas Elíasson og Sverrir Þóroddsson" um þetta efni. 

Mælitæki tryggðu að hægt var að halda vellinum opnum

Morðæði hefndarinnar.

Ég hef áður hér á bloggsíðunni lýst frásögn rússneskrar konu af villimennsku finnskra hermanna, sem voru í slagtogi með þýska herfylkingu sem hafði Demyansk á milli St. Pétursborgar og Moskvu á valdi sínu í fjóra mánuði á útmánuðum 1942.

Þeir voru mun grimmari en þýsku hermennirnir af því að þeir voru að hefna fyrir Vetrarstríðið milli Finna og Rússa tveimur árum áður. 

Að sjálfsögðu hefði það verið gríðarlegur fengur fyrir Breta ef uppgjafartilraun skipverja á Bismarck hefði verið sinnt og skipið hertekið. 

Það hafði verið ótrúleg tilviljun að sprengja sem hin hægfleyga tviþekja af Swordfish gerð hitti á stýrisbúnað Bismarck en þetta réði úrslitum, því að skipið átti skammt eftir til að komast það nálægt Frakklandsströndum að Þjóðverjar gætu sent flugvélar til verndar því. 

En Bismarck hafði sökkt stærsta herskipi Breta og flaggskipi flota þeirra og drepið með því rúmelga 1400 sjóliða og því gilti ekkert annað en auga fyrir auga og tönn fyrir tönn í því morðæði, sem rennur á menn í styrjöldum þar sem lögmál hefndarinnar ryður öllu í burtu. 

Skipverjar á Bismarck reyndu að gefast upp

"Afagrauturinn" er fitandi.

Ég verð að taka undir það sem sagt er um að Jennifer Aniston hafi notað barnamat til að grennast, að þetta er alger bábilja.

Þetta get ég fullyrt vegna þess að í áratugi hef ég notað barnamat sem mismikinn hluta af fæði mínu og það þarf ekki annað enn að lesa utan á pökkunum til að sjá hvert innihaldið er, hitaeiningar, kolvetni, fita o.s.frv.

Í þessum tölum kemur glögglega í ljós hve maturinn hentar vel fyriir ört stækkandi börn en að sama skapi illa fyrir þá sem eru fullorðnir og vilja halda líkamsþyngdinni í skefjum.

Um árabil notaði ég svo mikið af barnamat að barnabörnin mín kölluðu hann "afagraut". 

Hann fer mjög vel í maga og með því að borða hann eingöngu, ekkert annað og passa að borða sem minnst, er hægt að grenna sig. 

Það er einfalt mál ef "afagrauturinn" er eina fæðið með því að nota uppgefnar tölur um innihaldið og áætla magnið sem neytt er. 

En sama væri svosem hægt að gera með því að borða flesk sem megrunarfæði. 

"Afagrauturinn" er góður á morgnana til þess að neyta helstu næringarefna í upphafi dags og fá góða undirstöðu fyrir daginn. Enn hann er ekkert megrunarfæði. 

Barnamatur grennir stjörnurnar

Gildi öryggisatriða ekki alltaf augljós.

Atvik á borð við það þegar flugmaður fékk aðsvif í flugi í Klettafjöllunum leiða hugann að því hvort og hvernig sé hægt að koma í veg fyrir að svona lagað gerist.

Árum saman var það svo, að flugmenn þurftu með reglulegu millibili að fara í afar dýrar og ítarlegar skoðanir í öryggisskyni. 

Fyrir nokkrum misserum tók maður nokkur sig til og gerði ítarlega úttekt á árangri þessara viðamiklu skoðnar á flugmönnum. 

Í ljós kom rmunum  að árangurinn af því að vera með svona miklu ítarlegri og dýrari skoðanir var sáralítill og í engu samræmi við kostnaðinn.  Þessum miklu fjármunum væri miklu betur varið í að efla önnur öryggisatriði þar sem árangurinn yrði meiri.

Í samræmi við þetta hefur kröfum verið breytt. 

Þess má geta að það hefur komið fyrir að atvinnuflugmenn hér á landi hafi fengið hjartaáfall án þess að nokkur leið væri að sjá það fyrir. 

Einn af reyndustu flugmönnum okkar dó úr slíku áfalli þar sem hann stóð á jörðu niðri við flugvél sína. 

Ef maður skoðaði líkurnar á því að hann hefði fengið þetta áfall í flugi voru þær sáralitlar miðað við þann flugtíma sem hann flaug árlega. 

Og vafasamt er að miklu dýrari og ítarlegri hjartarannsókn hefði skilað neinu. Stundum  er engin leið að sjá svona fyrir. 

Sem dæmi get ég nefnt að þegar ég flaug með einn af þekktustu vísinamönnuustlegur. m landsins 75 ára gamlan í Lakagífa hljóp hann upp á gígana eins og unglingur, enda grannur og hraustlegur.

Hann lést úr hjartaáfalli og mér var sagt að þegar læknar gættu að hefðu æðarnar verið gerónýtar. 

„Hefur þú einhverja reynslu af því að fljúga?“

Samband manns og náttúru eru mannréttindi.

Ég hef oft orðað það svo að við Íslendingar höfum landið að láni frá afkomendum okkar og séum með það í vörslu fyrir mannkynið allt eins og safnverðir, sem sjá um varðveislu dýrgripa.

Með ákvæðinu um náttúruauðlindir Íslands er tekið á því að við höfum landið að láni frá afkomendum okkar og með því að segja að þær séu ævarandi eign þjóðarinnar og nýtingin í samræmi við sjálfbæra þróun er jafnréttis kynslóðanna tryggt og sameiginleg eign þeirra á auðlindunum.

Hvað varðar þá hugsun að náttúran sé þrátt fyrir þetta ekki beinlínis eign okkar heldur séum við vörslumenn þeirra fyrir mannkynið allt, þá lít ég á tillögurnar um ævarandi "eign" okkar á þeim sem praktiska útfærslu á því.

Spurningin um meðferð okkar á yfirráðasvæði Íslands og nýtingu þess snýst í raun um fólkið og rétt þess frekar en náttúruna sjálfa.

Í stjórnarskrám annarra landa er víða fjallað um þetta í tengslum við mannréttindi og það var jú mannréttindanefnd Sameinuðu þjóðanna sem gerði athugasemd við íslenska kvótakerfið.

Ævarandi eign þjóðarinnar

Ein af tíu merkilegustu eldstöðvum jarðar.

Jarðvísindamenn hafa í alþjóðlegu verki valið tíu merkilegustu eldstöðvar jarðar, þar af sjö ofansjávar.

Ein þessara sjö eldstöðva eru  Grímsvötn.

Hekla, Snæfellsjökull, Fujijama, Kilimanjaro, Vesuvius og  fleiri þekktustu eldfjöll jarðar komast þar ekki á blað.

Grímsvötn komast svona hátt vegna hins einstæða samspils ísss og elds sem þar er.

Slík eldfjöll eru fleiri og stórkostlegri hér en annars staðar og Grímsvötn eiga íslenska keppinauta svo sem Kötlu og Kverffjöll. 

Eyjafjallajökull sýndi líka takta. 

Ég hef áður bloggað um þetta og þið getið fundið það með því að nota leitarreitinn vinstra megin á síðunni og sett þar inn orð eins og "Grímsvötn", "Vorferð Jöklarannsóknarfélagsins" o. s. frv.

Ég ætla að setja hér inn eina og eina mynd eftir hendinni, sem teknar voru í flugferð í Grímsvötn í kvöld og er þar horft ofan í hið risavaxna gímald, sem gígurinn er og sést að bráðnandi ísinn er byrjaður að mynda sjóðandi tjarnir eða stöðuvötn. Af þessum einstæðu vötnum dregur Vatnajökull nafn. 

Það var erfitt að komast í Grímsvötn í dag, aðeins hægt að komast þangað í krókaleiðum og úr norðri. 

Það gekk á með skúrum og það var ókyrrt eins og sást á kvikmyndum sem teknar voru í þessari ferð. 

Á leiðinni austur mætti ég nokkrum jöklajeppum á leið frá Jökulheimum til byggða og maður iðar í skinninu að fara á minnsta jöklajeppa landsins eða minnsta Toyotajöklajeppa landins þarna upp eftir. 

En Stjórnlagaráð verður að hafa sinn gang og þar er í gangi heillandi vinna.

Ofan á eldgosið bættist síðan það verkefni að halda flugvöllum landsins opnum með því að fljúga stöðug mælingaflug á flugleiðunum út frá Suðvesturhorninu, alls sex ferðir. 

Minnkandi gosvirkni

Þurr aska eða blaut.

Vegna þess að Hekla getur gosið hvenær sem er og búast má við aukinni gosvirkni í Vatnajökli næstu áratugi þarf að stunda nýja fræðigrein af kappi með bestu fáanlegu tækni og tækjum, fræðigrein sem gæti heitið öskuflug.

Öskuflugið getur skipst í nokkra flokka.  Eitt er það flug sem stundað var á flugvöllum landsins í dag, en það var að mestu sjónflug í afar góðum skilyrðum, heiðríkju og eins björtu vorveðri og hugsast getur. 

Á slíkum dögum sjá flugmennirnir hvort þeir eru að fljúga í öskumettuðu lofti og því fráleitt að láta tölvur í London segja mönnum að flugleiðirnar liggi í gegnum öskuský. 

Öðru máli gegnir um flug í skýjum og rigningarúða. Þá er askan leðjukennd og þar að auki ekkert skyggni hjá flugmönnum, þannig að þeir geta ekki varast öskuský. 

Sé loftið þurrt og engin ský ættu flugmenn að eiga auðvelt með að meta hvort öskumistur sé meira en framleiðendur hreyflanna gefa upp sem mörk þess sem hreyflarnir þoli. 

Samkvæmt mælingu í fyrradag virðist mega miða við að sé skyggni meira en 5 kílómetrar í öskumettaða loftinu sé óhætt að fljúga í gegnum það á þotu. 

Á flugi mínu austur yfir Grímsvötn í kvöld var rigningarúði og lélegt skyggni á hluta leiðarinnar. 

Þar flaug ég á einum stað í gegnum dökka rigningarskúr og mátti þá greina örlitla gráa slikju á framrúðunni, sem þvoðist reyndar strax aftur í burtu enda beygði ég vélinni til að fljúga inn í ljósari hlutann af þessari skúr. 

Það hefur verið ánægjulegt að fljúga með mælingarmenn fyrir Isavia í dag til þess að halda flugvöllum landsins opnum, því að ella hefði þeir verið lokaðir í samræmi við það sem tölvurnar í London segja.

Að vísu virðast ekki allir ánægðir. Í athugasemd manns nokkurs við blogg mitt gagnrýnir hann mig harðlega fyrir að vinna að því að etja fólki út í lífshættulegt flug og hefði raunar átt að vera búið að taka af mér flugréttindin fyrir löngu fyrir fífldjarft flug.

Þúsundir flugfarþega, sem flugu um íslenska flugvelli í dag hafa líklega ekki gert sér grein fyrir því "fífldjarfa" flugi sem það stundaði í heiðríkjunni og ekki heldur áttað sig á því að íslensk flugmálayfirvöld skyldu vera að véla það út í lífshættulegt flug sem gæti kostað mörg mannslíf. 

Kannski var eitthvað af þessu fólki farþegar í innanlandsflugi í fyrra þegar mesta öskufall og öskumistur sögunnar mældist í Reykjavík en var alveg pallrólegt því að í tölvunum í London var loftið hreint og tært. 

Öskuskýin dreifast víða

Loftrými geta ekki opnað neitt.

Í fjölmiðlum og tilkynningum færist sífellt í vöxt að fjöll, svæði, hús og dalir séu að opna, en aldrei er sagt frá því hvað þessi fyrirbæri opni og hvað þessir dauðu hlutir geti yfirleitt opnað.

Nú hefur loftrými bæst við. Loftrými eru farin að opna eitthvað og loka einhverju. Ég get ekki séð að loftrými geti opnað neitt. Og ef það er eitthvað sem loftrými geta opnað væri gaman að vita hvað það er. 

Minni síðan á bloggin á undan þessu um það að flugvöllum verði lokað í kvöld vegna öskufalls, sem enginn sér og þaðan af síður að það hafi komið fram á mælum í mælingaflugi yfir þessa flugvelli. 

Raunar skiptir lokun vallanna sem betur fer ekki miklu máli á þessum tíma sólarhrings en í fyrramálið verður flogið mælingaflug yfir þá og vonandi að þá verði notkun flugvallanna ákveðin með tilliti til raunverulegs öskufalls sem sannanlega sé svo mikið, að skyggni fari niður í minna en þrjá kílómetra, en það benda mælingar í fyrradag til að séu mörk þess öskumagns í lofti sem þotuhreyflar þoli. 

Aftur lokað fyrir flug í kvöld

"Það sem augað sér".

Á efstu myndinni hér á síðunni er horft úr flugvél yfir að grábrúnum öskuvegg sem liggur frá miðjum Vatnajökli til suðvesturs um Hreppa og niður með Þjórsá.

Yfir er blár himinn en nær okkur hreint loft, sem við fljúgum í en hefur samt verið dæmt fullt af ösku í tölvu í Bretlandi og flugvellir á þessu svæði hreina loftsins lokaðir allan þennan dag.

Eftir að lent var hófst mælingaflug frá Selfossi og hafði öskuloftið þá sigið niður Ölfusið og skyggni aðeins 2-4 kílómetrar.

Við þær aðstæður mældist öskumagnið þó vera innan þeirra marka sem framleiðendur þotuhreyflar hafa gefið upp sem hámark ösku, sem sogast mætti í gegnum hreyfilinn svo að flugið væri öruggt. 

Ég var í þeirri einstöku aðstöðu í þessu flugi að sjá með eigin augum hvað svona öskumökkur þyrfti að vera þéttur til að fara fram úr þeim öryggismörkum sem framleiðendur þotuhreyfla setja. 

Þegar horft er á myndina hér við hliðina þar sem blasir við tært loftið yfir Kerlingarfjöllum til vinstri og Hofsjökli til hægri. Við erum sem sé að horfa í átt að flugleiðinni Reykjavík-Akureyri, sem er lokuð vegna öskufalls ! 

Og skyggnið í gær yfir Kjöl og Langjökul var svo gott að það var meira en 100 km. Samt lokað vegna öskufalls ! 

 Það þýðir að í raun er mannsaugað besta mælitækið, því að með því sést langar leiðir út fyrir mælingaferilinn, og var skyggnið á svæðinu, sem þotuflug var bannað

Lokaniðurstaða: Veðurspá fyrir sunnudaginn sýndi, að ekki var hætta á hröðum hreyfingum öskumassans sem hafði verið yfir austanverðu Suðurlandsundirlendinu langt fram eftir degi og með því að nota tvær litlar eins hreyfils flugvélar, sem hefðu verið á lofti til skiptis þann dag, hefði verið hægt að fylgjast náið með því hvort askan kæmi yfir flugvellina.

Nú í kvöld kom flugvélin TF-TAL úr flugi yfir flugvellina í Keflavík, Reykjavík og á Ísafirði og var enga ösku að finna í lofti yfir vestanverðu landinu. 

Engu að síður hefur völlunum verið lokað nú vegna tölvuspár frá London.

Sem betur fer er lítið flug yfir nóttina en hins vegar er hætt við að þetta muni trufla það flug sem fer um Keflavíkurflugvöll fyrst á morgnana. 

Á neðstu myndinni sést til suðausturs meðfram öskuveggnum sem liggur frá Vatnajökli niður í Flóa. 

Aska yfir Noregi