Hvert var stórbrunanum forðað? Hvert er slysum forðað?

"Fram, fram, fylking, forðum okkur hættum frá.." Með þessum sungnu upphafshendingum hefst gamall leikur, og þarna er sögnin í samræmi aldagamla hugsun, sem sé að einhverju mikilvægu eða verðmætu sé forðað í burt frá hættu, sem að því steðjar, samanber að forða sér frá einhverju.

Svipuð hugsun ríkir þegar sagt er að menn forðist eitthvað, forðist átök, forðist slys. 

Á síðari árum hefur hins vegar rutt sér til rúms rökvilla í notkun þessarar sagnar og byrjað að tala sífellt um að slysum sé forðað í stað þess að segja að einhverju sé forðað frá slysum. 

Ef sögnin að forða er rétt notuð í tengdri frétt um ketti einbúa nokkurs, sem afstýrðu eða komu í veg fyrir hættulegum stórbruna, er hægt að tala um að kettir hans hafi hafi forðað honum hættu frá, svo að vísað sé til orða söngsins "Fram, fram fylking. 

"Öskrandi kettir forðuðu stórbruna" segir hins vegar í fyrirsögn fréttarinnar. 

Hvert forðuðu kettirnir stórbrunanum? Frá hverju forðuðu kettirnir stórbrunanum? 

Sífellt er talað um að forða slysum. 

Hvert er slysunum forðað?  Frá hverjum er slysunum forðað? Hverjir eru það sem ógna svo mjög slysum, að það verði að forða slysum frá þeim?

Af hverju er nánast búið að útrýma því að tala um að forðast slys, koma í veg fyrir slys eða afstýra slysum? 

Svo að aftur sé vikið að söngnum í upphafi pistilsins verður hugsanlega næsta skref í þessu rugli að syngja:  "Fram, fram fylking, forðum hættum okkur frá..." 

En þar með eru það við, sem syngjum, sem ógnum hættunum svo mjög, að það verður að forða hættunum í burtu frá okkur. 

 

Öskrandi kettir afstýrðu stórbruna

Í upphafi skyldi endinn skoða.

Það er gott og blessað ef Íslendingar slást í för með þeim Evrópuþjóðum sem setja sér metnaðarfull markmið í orkumálum og loftslagsmálum. 

En nú virðast margir vera að vakna upp við þann vonda draum, að við höfum hugsanlega þegar gengið of langt á þeirri braut að lögleiða jafnharfan allar tilskipanir og samninga um þessi mál innan EES, vegna þess að ekki verði aftur snúið á þeirri braut þegar eitt leiðir af öðru. 

Því er brýnt að stinga niður fæti ef stefnir í það að við missum fullveldið yfir orkuframleiðslunni og stjórn auðlindanna og þar með í raun stjórn yfir varðveislu mesta verðmætis landsins, einstæðra náttúruauðlinda. 

Því að undanfarin ár hafa verið gefnar ákveðnar yfirlýsingar um einbeitt áform virkjana- og stóriðjusinna um sæstreng og tvöföldun núverandi raforkuframleiðslu fram til 2025. 

Sú stefna fæli í sér að við framleiddum ekki aðeins tíu sinnum meira rafmagn en við þurfum fyrir eigin fyrirtæki og heimili, heldur misstum jafnvel algerlega stjórn á þessum mikilvæga málaflokki. 

Við eigum alveg að geta staðið okkar pligt í orku- og umhverfismálum í samvinnu við aðrar þjóðir án þess að færa svona afgerandi fórnir.

Nú ríður á að vanda vel til verka og kafa þannig ofan í þessi mál að til farsællar lausnar leiði. 

 

Miklar áhyggjur af orkulöggjöfinni