Hvert var stórbrunanum forðað? Hvert er slysum forðað?

"Fram, fram, fylking, forðum okkur hættum frá.." Með þessum sungnu upphafshendingum hefst gamall leikur, og þarna er sögnin í samræmi aldagamla hugsun, sem sé að einhverju mikilvægu eða verðmætu sé forðað í burt frá hættu, sem að því steðjar, samanber að forða sér frá einhverju.

Svipuð hugsun ríkir þegar sagt er að menn forðist eitthvað, forðist átök, forðist slys. 

Á síðari árum hefur hins vegar rutt sér til rúms rökvilla í notkun þessarar sagnar og byrjað að tala sífellt um að slysum sé forðað í stað þess að segja að einhverju sé forðað frá slysum. 

Ef sögnin að forða er rétt notuð í tengdri frétt um ketti einbúa nokkurs, sem afstýrðu eða komu í veg fyrir hættulegum stórbruna, er hægt að tala um að kettir hans hafi hafi forðað honum hættu frá, svo að vísað sé til orða söngsins "Fram, fram fylking. 

"Öskrandi kettir forðuðu stórbruna" segir hins vegar í fyrirsögn fréttarinnar. 

Hvert forðuðu kettirnir stórbrunanum? Frá hverju forðuðu kettirnir stórbrunanum? 

Sífellt er talað um að forða slysum. 

Hvert er slysunum forðað?  Frá hverjum er slysunum forðað? Hverjir eru það sem ógna svo mjög slysum, að það verði að forða slysum frá þeim?

Af hverju er nánast búið að útrýma því að tala um að forðast slys, koma í veg fyrir slys eða afstýra slysum? 

Svo að aftur sé vikið að söngnum í upphafi pistilsins verður hugsanlega næsta skref í þessu rugli að syngja:  "Fram, fram fylking, forðum hættum okkur frá..." 

En þar með eru það við, sem syngjum, sem ógnum hættunum svo mjög, að það verður að forða hættunum í burtu frá okkur. 

 

Öskrandi kettir afstýrðu stórbruna

Athugasemdir

[Húsari. (IP-tala skráð) 9.4.2018 kl. 00:02]

<Kéttir veina en öskra ekki!>

[Ómar Ragnarsson, 9.4.2018 kl. 01:53]

Já, það kæmi ekki á óvart að sá eða sú sem skrifaði fréttina hefði sagt ef kettirnir hefðu étið eitraðan mat og drepist, að þeir hefðu borðað eitraðan mat og látist. 

[Halldór Egill Guðnason, 9.4.2018 kl. 02:58]

 Blaðamenn eru öskrandi vitleysingjar, upp til hópa, sem ekkert mark er á takandi lengur. "Copy paste" aular í besta falli og fjölmiðlarnir sem þeir starfa á, á svipuðu "kalíberi". 

 Góðar stundir, með kveðju að sunnan.

[Húsari. (IP-tala skráð) 9.4.2018 kl. 14:20]

Sæll Ómar.

Alltaf hollt að rifja upp dýrafræðina:

Kusa jarmar, kindin baular,
kisi geltir, seppi hrín
selurinn kvakar, svanurinn gaular,
Svona er lífið, - eintómt grín!