ÓÞARFLEGA HÁTT.

Ég sá á flugi yfir Hálslóni fyrir þremur dögum að lónið nær nú alveg inn í jökul. Athygli vekur hve stórt svæði bætist við lónstæðið með síðustu metrunum sem það hækkar og það leiðir hugann að því að óþarfi var að hafa það svona stórt á þeim tíma sem hlýnun lofthjúpsins eykur bráðnun jökla og vatnsmagn í jökulám. Landið sem fer undir við hækkun úr 615 eða 618 metrum í 625 er tiltölulega flatt og það mun auka mjög það svæði sem verður þakið leir snemmsumars og veldur leirfoki sem menn munu fyrst kynnast eftir tæpt ár.

Hálslón orðið fimmtíu ferkílómetrar að stærð

Athugasemdir

[Gunnar Th. Gunnarsson, 30.8.2007 kl. 14:39]

Þessu er hægt að stjórna með botnlokunum og ég treysti alveg Landsvirkjunarmönnum til að meta það hvort ástæða sé til að hafa svona hátt í lóninu. En eflaust þurfa þeir að fylla það að fullu, svona fyrsta kastið til að prófa.

[Sævar Helgason, 1.9.2007 kl. 13:58]

Er ekki afar ólíklegt að Landsvirkjun fari að rýra raforkuframleiðslugetuna frá Kárahnjúkasvæðinu með því að senda hluta af uppsöfnuðu vatni sumarsins ónýtt til sjávar ?

Verður ekki full þörf á því að ná sem mestri raforku út úr virkjunni úr því sem komið er.Það þarf jú að borga reikninginn fyrir framkvæmdina ,reikning sem hefur hækkað verulega frá fyrsta kostnaðarplani ?

Varðandi leirinn sem þarna verður á gríðarlegu svæði frá vori og langt fram á sumar, þá er ástæða til að hafa af þeim vanda verulegar áhyggjur fyrir lífríkið í heild svo og ferðamennskuna á þessum landshluta .

Tíminn einn leiðir í ljós hversu leirfokið verður skaðsamt. 

[Villi Asgeirsson, 2.9.2007 kl. 11:33]

Frá því ég man fyrst eftir mér, einhvern tíma í kring um 1973-1975, hefur verið hamrað á foki. Landið er að fjúka og við verðum að gera allt sem í okkar valdi stendur til að koma í veg fyrir að harðvegurinn fjúki á haf út. Milljarðar hafa verið settir í landgræðslu.

Hvers vegna er verið að búa til vandamál eins og þetta? Er ekki alveg eins gott að sleppa því að græða upp landið? Virkja þetta bara svo við getum flutt inn vinnuafl til að vinna í álverum? Landið er þess virði sem einhver er tilbúinn til að borga fyrir það. Hver vill borga fyrir grænar heiðar? 

[Gunnar Th. Gunnarsson, 3.9.2007 kl. 08:25]

Í hvaða álveri er vinnuaflið innflutt, Villi?

[Villi Asgeirsson, 3.9.2007 kl. 08:46]

Það er næga atvinnu að hafa á Íslandi. Það þarf ekki álver eða olíuhreinsunarstöðvar til að koma atvinnuleysinu niður.

Annars var það ekki punkturinn sem ég vildi koma að. Ég var að tala um jarðvegsfok.