Gróinn vinur.

Ég kynntist Eiði Guðnasyni fyrst í M.R. og það nokkuð vel þótt hann væri ári eldri og í bekk á undan mér því ég hafði næstum eins mikil samskipti við þann bekk og minn eigin. Strax tókst með okkur góð vinátta sem hefur enst æ síðan.

Leiðir okkar lágu aftur saman á fréttastofu Sjónvarpins þar sem Eiður var varafréttastjóri þangað til hann skellti sér í pólitíkina fyrir kosningarnar 1977. Um þau ár "svart-hvíta gengisins, sem stóðu í rúman áratug, hef ég reynt að tjá hug minn með textanum "Ó, þessi ár með þér", sem gerður var við lagið "Those were the days."

Á þessum tíma var Eiður í fararbroddi í fréttamennsku, sérlega öflugur, iðinn og vandaður fréttamaður. Hann varð snemma einkar snjall í fréttaferðum til útlanda og lagði þar grundvöll að ferli sínum á sviði stjórnmála og í utanríkisþjónustunni.

Eiður var afburða íslenskumaður, þótt enginn okkar kæmist þó jafnfætis fréttastjóranum okkar, Emil Björnssyni. Eiður fékk sérstök móðurmálsverðlaun að launum.

Eiður var umhverfisráðherra í fyrstu ríkisstjórn Davíðs Oddssonar og átti þar góðan feril. Hann getur litið ánægður yfir ævistarf sitt.

Við hjónin, Helga og ég sendum þeim Eiði og Eygló okkar bestu kveðjur.

Eiður Guðnason hættir

Athugasemdir

[Þorsteinn Briem, 8.1.2009 kl. 04:24]

Aldrei hann gat í eyður,
og engum þótti leiður,
í Sjónvarpinu var seiður,
því svarthvítur var Eiður.

[Margrét Birna Auðunsdóttir, 8.1.2009 kl. 15:36]

Ég man þegar Eiður lét sér vaxa skegg, það var þegar hann var fréttamaður. Þetta er sennilega eitt umdeildasta skegg Íslandssögunnar, hvílík mótmæli sem það vakti. Fólk sendi inn vísur og ég man bara niðurlagið af einni:

Rakaðu af þér, Eiður minn,

andskotans skegghýunginn.

Ef einhver kann fyrripartinn þá væri það mjög skemmtilegt

[Eiður (IP-tala skráð) 9.1.2009 kl. 22:57]

Um vísuna:

Sumarið  1974 lét ég mér vaxa skegg , er við   Örn Harðarson kvikmyndatökumaður og Oddur Gústafsson  hljóðmaður  vorum   rúma  viku  við þáttagerð   austur á  Seyðisfirði og á Héraði.  12. október  1974  fékk ég meðfylgjandi vísu  frá  Agli Jónassyni bóksala á Húsavík: Dáði ég  sjónvarpssvipinn þinn –söknuð í mínu hjarta finn.Rakaðu af þér Eiður minn,andskotans tísku hýjunginn.  Svo  rakaði ég af mér skeggið  þegar kom fram á haustið og þá fékk ég  svohljóðandi bréf: Eyrað heyrir og augað sér,andstyggð,sem  tískunafnið ber,snyrtimennskuna þakka ég þér,og það gera fleiri norður hér. Gleðileg jól! 

Þinn  aðdáandi Egill Jónasson, Húsavík.

Þannig  var  nú það. Einhver  bréf  fékk ég líka,  meðal  annars  frá  þremur  hjúkrunarkonum   á  Akranesi sem  buðu fram  aðstoð  við  raksturinn. Það  virtust allir  hafa skoðanir á  þessu skeggi mínu  !