Hjólað í manninn en ekki boltann.

Nóbelskáldið lýsti vel á sínum tíma þeirri áráttu Íslendinga að gera það að aðalatriðum í rökræðum HVER maðurinn sé en ekki HVAÐ hann sé að segja.

Á síðari árum hefur þetta atferli verið orðað með lýsingunni "að hjóla í manninn en ekki boltann." 

Nóbelskáldinu sárnaði hve vel þessi aðferð virkaði í samfélagi okkar.

Með þessari aðferð væru þeir sem hefðu einhver rök fram að færa rakkaðir niður, þeim gerðar upp illar eða eigingjarnar hvatigert, gert lítið úr þeim og þeir fældir frá því að leggja eitthvað til málanna.

Sorglegt dæmi um þetta má finna í grein valdamesta manns landsins, forsætisráðherra, (toppara Íslands ef notuð eru hans eigin orð um slíka stöðu) í dag þar sem miklu rými er eytt í að rakka persónu Kára Stefánssonar niður en það samt gert án þess að nefna beint nafn hans, heldur talað um "toppara sem þráir athygli."

Hefur því afbrigði af ómálefnanlegum aðdróttunm verið lýst vel af íslensku skáldi.

Í bloggpistli hér a blog.is eru þeim sem hefur sviðið sárt staða albansks drengs verið gerðar upp svipaðar og jafnvel enn verri hvatir en Kára.

Athyglisvert er þessari aðferð hefur verið beitt síðustu ár gegn þeim tveimur íslensku persónum, sem hafa þá sérstöðu að vera einu Íslendingarnir sem erlendis hefur verið skipað á bekk með hinna 100 áhrifamestu í heiminum á sínu sviði, en þetta eru Kári á sviði læknisfræði og Björk Guðmundsdóttir sem ein af 100 áhrifamestu konum heims.

Þeim báðum hefur verið borið á brýn að láta stjórnast af sjúklegri þrá til að vekja á sér athygli með því að halda fram skoðunum sínum hér á landi!

En miðað við einstæða stöðu þeirra meðal milljarða jsrðarbúa þurfa þau ásamt Vígdísi Finnbogadóttur minnst allra Íslendinga á athygli þeirra 0,005% mannkyns að halda sem byggja Ísland.    

 

Sigmundur Davíð: Toppari þráir athygli

Íslenskir sigrar yfir krabbameini.

Orðið krabbamein hefur lengi haft yfir sér sérstaklega ógnvekjandi blæ, sem hefur verið ígildi dauðadóms, sem engin leið væri að umflýja.

Sem betur fer hafa framfarir í læknavísindum og aðdáunarvert og óeigingjarnt starf heibrigðisstéttanna og áhugafólks um baráttuna við þennan skæða vágest borið þann árangur að sjúkdómsgreiningin "krabbamein" þarf ekki lengur að þýða óumflýjanlegan ósigur og dauða.

Ekki þarf annað en að nefna nokkra þekkta Íslendinga eins og Vigdísi Finnbogadóttur og Davíð Oddsson sem dæmi um frækilegan sigur sterkra einstaklinga í baráttu, sem var dauðans alvara.    

Laus við krabbameinið

Spennandi samkeppni orkubera.

Framundan er spennandi samkeppni á milli raforku, vetnisorku og jafnvel fleiri orkugjafa í bílum, en um er að ræða tæplega fjórðung alls kolefnisútblásturs jarðarbúa.

Blússandi framfarir eru nú í nýtingu þessara orkugjafa þótt stóru olíuframleiðsluríkin reyni að bregða fæti fyrir nýja orkugjafa með því að viðhalda lágu orkuverði svo að samkeppnishæfni nýrra orkugjafa skerðist.  

Í langflestum tilfellum verður um að ræða vetni eða rafmabn sem orkubera, þ.e. að upprunaorkan kemur frá stórum orkuverum sem nýta jarðefnaeldsneyti, kjarnorku, vatnsorku, sólarorku o.s.frv.

En vegna hagkvæmni stærðar þessara orkuvera verður lokaútkoman stórminnkuð losun kolefnis, jafnvel þegar um olíulindir, gas eða kolaorkuver er að ræða sem upprunaorku.

Við Íslendingar verðum í sérflokki með alla þá raforku, sem streymir fá raforkuverum okkar. 

 

Kia segir vetnið framtíðina

Einu sinni var maður sem hét Fisher.

Einu sinni var bandarískur maður af Gyðingaættum, sem hét Bobby Fisher.

Hann var sérvitringur að mörgu leyti og í tilfinningalegu jafnvægisleysi sem brenglaði svo mjög skoðanir hans á kynþætti hans, að þær þóttu sérlega ofstækisfullar.

Þó hafa sérfæðingar í mælingum á gáfnafari manna varpað fram þeirri niðurstöðu að Fisher hafi verið með hæstu gáfnavísitölu sem sögur fari af, jafvel hærri en sjálfur Albert Einstein.

Ástæðan er eindæma snilld hans þegar hann varð heimsmeistari í skák.

Vegna ástríðufullrar ástar sinnar á skákinni stóð Fisher fyrir nýju einvígi við Spasskí í Júgóslavíu og braut með því fáránlega eindtrengingslegar reglur fjármálalegs eðlis sem Bandaríkjamenn höfðu sett á tíma ófriðar í landinu.

Fisher, áður stolt Bandaríkjanna og vestrænna þjóða, varð hundeltur útlagi árum saman, en í lokin ákváðu íslensk stjórnvöld með Davíð Oddsson þáverandi utanríkisráðherra meðal helstu stuðningsmanna að veita Fisher landvistarleyfi og islenskan ríkisborgararétt þótt ótal undanbrögð hefði verið hægt að nota til segjast ekki geta gert það, enda verið að baka sér reiði ráðamanna eina risaveldis heims.

Verður sú gjörð öllum sem að henni stóðu til ævarandi sóma.   

 

Getur ekki snert við málinu

Rannsaka þarf ómannúðlegt kvótakerfi heilbrigðiskerfisins.

Sífellt koma upp fleiri og fleiri dæmi um ómannúðlegt kvótakerfi í heibrigðiskerfinu.

Til dæmis má nefna árlegan kvóta á aðgerðir og rannsóknir vegna hjartaflökts eða gáttaflökts, en það fyrirbrigði er stundum aðdragandi að heilablóðfalli eða hliðstæðum stórblæðingum.

Veit ég um eitt slíkt tilfelli hjá vini mínum.

Kvótinn ku ekki vera settur vegna skorts á mannskap eða tækjum til að vinna verkið, heldur vegna takmarkrar fjárveitingar vegna fyrirfram áætlaðs fjölda sjúklinga.

Ég hef heyrt að árlegur kvóti sé á aðgerðum vegna hjartaflökts, sem sé svo lítill, að hann klárist löngu áður en árið er búið.

Þá sitji stór hópur eftir sem annað hvort neyðist vegna fjárskorts til að fara í rússneska rúllettu með líf sitt og heilsu eða takist vegna aðgangs að nægu fjármagni að fara fram hjá kerfinu, sem þó er sagt um á tyllidögum að sé fyrir alla jafnt.

Sjálfur var ég ásamt hundruðum annarra á biðlistum látinn spila rússneska rúllettu af þessu tagi, að vísu vegna annars krankleika, mánuðum saman á fyrri hluta þessa árs.

Það þarf að rannsaka þessi kvótamál varðandi líf og heilsu fólks ofan í kjölinn og afhjúpa hið sanna. 

„Þrætir eins og sprúttsali“

"Er ekki hægt að lyfta þessu upp á örlítið hærra plan?"

Fleyg orð Nóbelskáldsins fá oft vængi ennþá, 40 árum eftir að þau voru sögð.

"Það er blússandi góðæri" andvarpar bankamaðurinn þegar hann lýsir raunverleikanum, sem hann og aðrir í svonefndum efstu lögum þjóðfélagsins upplifa, meðal annars afturvirkum launahækkunum sem taldar eru í hundruðum þúsunda króna á hvern mann á mánuði, álíka miklar og heil mánaðarlaun þeirra sem valdhafarnir halda í svelti.  

Í umræðum á þingi um þá smán, sem þessir lítilmagnar mega þola, er þrefað fram og til baka um það sem var að gerast í launamálum fyrir sex árum,- já, fyrir sex árum í kjölfar Hrunsins.

Á það plan er umræðunni beint og vinnutími hinna launahækkuðu notaður í það.

Er ekki hægt að koma umræðunni örlítið nær raunveruleika líðandi stundar, lyfta henni upp á örlítið hærra plan?

Brotabrot af hækkun á vinnumarkaði

Klókur leikur hjá Pútín.

Bretar geta baðað sig í þeim ljóma, sem er að vísu orðinn ansi gamall, að hafa staðið fyrir tímamóta rannsókn í sögu flugslysa sem þeir framkvæmdu eftir að fyrstu farþegaþoturnar, fórust hver af annarri við svipaðar aðstæður; þegar þær voru komnar í farflughæö í kjölfar flugtaks.

Rússar verða að gefa rannsókn á Su-24 þotu sinni sem trúverðugastan blæ með því að þiggja boð Breta um samvinnu við rannsóknina og nýta hvert tækifæri sem öflugur þáttakandi í aðgerðum gegn ISIS til að koma ár sinni fyrir borð í því næsta nágrenni við Evrópu sem Miðausturlönd eru. 

Pútín vill breska sérfræðinga

Framkvæmdavaldið ræður för.

Framkvæmdavaldið hefur áratugum saman skekkt valdahlutföllin sem eiga að vera milli þess og löggjafarvaldsins.

Þingmönnum hefur löngum fundist þeir vera afgreiðslustofnun fyrir ráðherrana.

Í haust hefur verið löng bið eftir því að ráðherrar hafi drattast til að leggjs fram frumvörp, sem sum hver var búið að lofa að leggja fram fyrir langa löngu, svo sem um húsnæðismál.

Og drátturinn á þeim flestum heldur áfram.

Þegar allt er að komast í óefni eftir langvinnt sleifarlag rýkur síðan sama framkvæmdavaldið upp, heimtar vinnu langt fram eftir nóttum og fjargviðrast yfir leti þingmanna.

Viðburður er ef þingmannafrumvörp komast í gegn á Alþingi.

Haft hefur verið á orði að varla sé hægt að hugsa sér ömurlegra hlutskipti en að vera stjórnarandstöðuþingmaður á Íslandi.

Í frumvarpi stjórnlagaráðs er reynt að jafna þennan valdamun, sem stríðir gegn einu helsta meginatriði vestrænnar lýðræðisskipunar.

Meðal annars er gert ráð fyrir því með að ráðherrar megi ekki sitja á þingi samtímis því sem þeir eru þingmenn, - og að forseti þingsins, þingnefndir og formenn þingnefnda fái aukin völd og áhrif.

En á slíkar umbætur mega valdaöflin ekki heyra minnst.

 

Vilja ekki tala fram á nótt

Saksóknari getur líka gert mistök.

Það voru mistök að ákæra í því máli sem nú hefur verið sýknað í. Ákæran hefur valdið fjölda fólk miklu hugarangri og andlegum þjáningum.

Engum myndi þó vonandi detta í hug að ákæra ætti og dæma saksóknarann fyrir þetta.

Allir geta gert mistök.

„Ætla að halda áfram með líf mitt“

Á sér því miður alltof mörg skoðanasystkin.

Sjá má í netheimum að margir kenna fjölmiðlum um það að kynda undir óróa og æsingi með því að "slá upp" ummælum Donald Trump.

En þá er alveg skautað fram hjá því að þetta er nú einu sinni fylgismesti forsetaframbjóðandi þess af tveimur höfuð stjórnmálaflokkum Bandaríkjanna sem hefur meirihluta í báðum þingdeildum Bandaríkjaþings.

Trump er ekki bara hver sem er.

Með því að kenna fjölmiðlum um athyglina sem Trump fær er verið að skjóta sendiboðann en ekki sendandann. 

Trump á líka því miður stóran hóp skoðanasystkina víða um lönd, meira aö segja hér á landi.

Trump ógnar þjóðaröryggi