"Já, við getum það!?"

Það var meira á brattann að sækja fyrir Barack Obama í síðustu kosningum en í kosningunum 2008.

Í kosningunum 2008 naut hann þess að undir slælegri stjórn Republikana var skollin á fjármálakreppa, þar sem einn af stærstu bönkum heims, Lehman Brothers, hafði fallið, og tvær af þremur stærstu bílaverksmiðjum landsins voru tæknilega gjalþrota og þurftu stórfellda ríkisaðstoð. 

Obama hreif kjósendur með ferskri og snjallri frammistöðu á alla lund í aðdraganda kosninganna með kjörorðið "já, við getum það!" sem var hið einfalda kjörorð sem hreif og Obama skilaði vel í leiftrandi ræðum. 

Obama tókst það, sem engum Bandaríkjaforseta úr röðum Demókrata hafði tekist, að koma á endurbættu velferðarkerfi sem þætti þó ekki mikið til koma í Evrópu. 

En á síðari hluta kjörtímabilsins fór honum að fatast flugið, bæði vegna þess að Repúblikanar náðu betri fótfestu í þinginu og nýttu sér það, og einnig vegna þess að Obama varð að hafa það í huga að geta náð endurkjöri og sveigja stefnu sína til hægri til þess að takast það. 

Obama tókst ekki að efna fjölmörg kosningaloforð sín frá 2008, ekki einu sinni að loka Guantanamo fangabúðunum. 

Nú þarf Obama hins vegar ekki að hafa endurkjör í huga eftir fjögur ár, því að lengur má hann hvort eð er ekki vera í embætti, og þá er spurningin hvort hann geti ekki beitt sér betur fyrir bragðið. 

Miðað við það hvernig spilaðist úr spilum Obama á síðasta kjörtímabili, er hins vegar þvi miður ekki að sjá að skár muni takast til nú. 

Bandaríkjamenn stefna fram af "fjárlagaþverhnípinu" og gálgafrestirnir geta varla orðið fleiri. 

Það að halda áfram á braut fjárlagahallsins og að láta þá ríkustu sleppa áfram við að taka sanngjarnan þátt í því að leggja skerf til samfélagsins getur ekki gengið en samt finnst engin lausn.

Kjörorðið "já, við getum það!" stefnir í að snúast upp í andhverfu sína: "nei, við getum það ekki!" 

Obama sór embættiseið

Stöðva Sjálfstæðismenn heimskreppuna ?

Nú virðast framkvæmdir framundan á Keflavíkurflugvelli við "eitthvað annað" en stóriðju. En auðvitað slær það ekkert á stóriðjuþrána né snýr við straumi í skoðanakönnunum. 

Ágætur fræðimaður sagði í útvarpsfréttum í dag að VG liði fyrir það í skoðanakönnunum að "hjól atvinnulífsins væri ekki farin að snúast" þ. e. að þeir stöðvi stóriðju- og virkjanaframkvæmdir.

Og sama útskýring hlýtur að vera á því að 41% styðja Sjálfstæðisflokkinn og samtals 53% hann og Framsóknarflokkinn sem stunda gylliboð um það að snúa rammaáætlun á hvolf eftir kosningar sem og að stöðva eða breyta fiskveiðistjórnarfrumvarpinu og koma stjórnarskránni í sama stoppið og hún hefur verið í 70 ár.

Því að með því að taka aftur upp gamla lagið, að stjórnarskrárnefndir flokkanna skrifi stjórnarskrána þar sem hver og einn aðili hafi neitunarvald hefur reynst trygging fyrir því í 70 ár að það hefur ekki tekist.  

Skoðum nánar hvað felst í því að VG komi í veg fyrir hjól atvinnulífsins fari að snúast með því að taka upp stóriðju- og virkjanastefnu áranna 2001-2008.

Þar er besta vitnið forstjóri Landsvirkjunar sem sagði á haustfundi fyrirtækisins að jafnvel þótt stórir orkukaupendur hefðu komið sér fyrir fremst í biðröð eftir orkunni, héldu allir að sér höndum þangað til "sæist til sólar" í heimskreppunni.

Annars staðar hefur komið fram að til dæmis í Helguvík er staðan þannig meðan samningarnir við 3 af 15 aðilum frá 2007 eru í gildi, að allri tiltækri orku og miklu meira en það hafi verið ráðstafað til eins risakaupanda, Norðuráls.

Auðvitað dettur engum í hug að leita samninga við sölumenn vöru, sem eru búnir að lofa henni allri og meira en það til eins stórs kaupanda.  

Nú er meðalsöluverð raforku frá Landsvirkjun að sögn forstjórans um 30% lægra en á alþjóðlegum markaði þrátt fyrir að þetta verð hafi verið hækkað í ljósi þess að gamla verðið tryggði ekki viðunandi arðsemi

Við blasir að meðan kreppan ríkir er engin von til þess að stóriðju- og virkjanaframkvæmdir hefjist nema að við gerum það sama og Sjallar og Framsókn gerðu 1995 að bjóða "lægsta orkuverð í heimi."

Þessi tveir flokkar eiga að koma hreint til dyranna og segja: Við lofum ykkur því að stöðva heimskreppuna eða, ef það tekst ekki, að lækka orkuverðið til útlendinga þangað til þeir fást til að kaupa hana, þótt við töpum á því, því að aðilar vinnumarkaðarins heimta "mannaflsfrekar framkvæmdir", jafnvel þótt jafnmargir verði atvinnulausir þegar þeim lýkur og fengu atvinnu þegar þær hófust.

En þetta segja þeir auðvitað ekki heldur stjórna umræðu þar sem breitt er yfir hið raunverulega ástand og stundað lýðskrum með gylliboðum til þess að geta tekið hér aftur upp stefnuna frá 1995 - 2008, sem skóp Hrunið. 

Framkvæmdir framundan á Keflavíkurvelli

Erfitt að sjá þetta fyrir.

Mjög er misjafnt hve vel nýjar flugvélagerðir heppnast og erfitt að spá um slíkt fyrirfram. 

Boeing B17 "fljúgandi virkið", sprengjuflugvélin fræga úr heimsstyrjöldinni, fór afleitlega af stað og fórst í reynsluflugi, en gallarnir voru sniðnir af og hún varð fræg í stríðinu.

Douglas DC-3 kom fram á svipuðum tíma og varð hins vegar strax að farsælustu farþega- og stríðsflugvél allra tíma. 

Junkers Ju 87 steypiflugvél Þjóðverja var svo mögnuð í upphafi þegar hún steypti sér nær lóðrétt (80 gráður) niður úr 6000 feta hæð til að miða sem nákvæmast á skotmarkið, sleppti sprengjunum í 2000 feta hæð og náði sér síðan upp aftur í dýfu, sem var svo kröpp, að flugmaðurinn missti meðvitund og sjálfvirk stjórnun tók við í dýfunni og á leiðinni upp aftir. Ærandi sírena á hjólaleggnum sá síðan um að gera þessa flugvél að skelfilegasta hernaðartæki þess tíma í hugum fólks. 

En í orrustunni um Bretland fóru þessar mögnuðu vélar svo miklar hrakfarir gegn Hurricane og Spitfire vélum Breta að þær voru dregnar út úr Orrustunni um Bretland snemma í ágúst.

Síðar urðu þær hins vegar afar skæðar í árásum á skriðdreka.

Boeing B 29 "Ofurvirkin" hrösuðu í byrjun vegna hitavandamála í hreyflum en urðu síðan að aðalvopni Bandaríkjamanna gegn Japönum.   

De Havilland Comet, fyrsta farþegaþotan, var tímamótaflugvél upp úr 1950 og Bretar fengu nokkurra ára forskot á alla aðra í framleiðslu þotna og skrúfuþotna, sem gerbyltu farþegaflugi um víða veröld.

En síðan fórust Comet-þoturnar ein af annarri og rannsókn leiddi í ljós að svonefnd málmþreyta var orsökin, nokkuð sem enginn hafði heyrt fyrr. 

Vickers Viscount fjögurra hreyfla skrúfuþotan, var líka tímamótaflugvél, meðal annars hér á landi, en síðar komu í ljós hræðilegir gallar í nauðbeitingarbúnaði hreyflanna og vegna ísingar, sem kostaði það að vélar af þessari gerð fórust, meðal annars Hrímfaxi með 12 manns við Osló, hinn 14. apríl 1963. 

Þegar Boeing 747 kom fram var hún tvöfalt þyngri og stærri en nokkur farþegaþota hafði verið áður.

Það hefði mátt halda að margir "barnasjúkdómar" myndu koma fram á slíkri tímamótiflugvél og að jafnvel hefði verið of langt seilst, en í staðinn hefur Boeing 747 reynst einhver farsælasta og öruggasta flugvél allra tíma og heldur enn sessi sínum og vinsældum eftir bráðum hálfrar aldar feril, líkt og Boeing B 52  sprengjuþotan, sem búin er að vera í notkun í bráðum 60 ár þótt margar tilraunir hafa verið gerðar til að slá hana af og láta hana víkja fyrir nýjum vélum.

Með Airbus A380 tefldu framleiðendurnir djarft, því að farið var að ystu mörkum stærðar og fyrirferðar.

Þær lentu í dálitlum vandræðum allra fyrst, dróst aðeins að koma þeim á markað og þurfti að lagfæra nokkur atriði, en síðan virðast þessar vélar ætla að sigla lygnan sjó í háloftunum, ef svo má að orði komast.

Vandræðin með 787 Draumaþotuna kemur á óvart hjá jafn þrautreyndum framleiðanda og Boeing, jafnvel þótt þotan sé hlaðin nýjungum eins og til dæmis metnotkun á koltrefjaefnum, sem virðast samt ekki vera ástæða bilananna.  

Boeing afhendir ekki fleiri vélar

Helmingur fundarmanna sést á myndinni.

Myndin sem fylgir tengdri frétt á mbl.is og er hér til hægri, sýnir "allmarga" fundarmenn á Austurvelli en þó ekki nema helming þeirra, því að annar eins hópur stóð sunnar á vellinum.

Myndin er tekin þannig, að hinn dreifði hluti á helmingi vallarins er fremst á myndinni og mest áberandi, en yfirgnæffandi meirihluti fundarmanna vildi ekki standa í bleytunni á grasinu og er fjær á myndinni.

Sagt var í útvarpsfréttum að "meira en hundrað" hefðu komið sem er rétt út af fyrir sig, og hefði verið jafn rétt að segja að fleiri en tveir hefðu verið þar. 

Ég hef skemmt fólki á mörg þúsund skemmtunum í meira en hálfa öld og tel mig vita nokkurn veginn hvað eitt Háskólabíó eða einn Austurbær af fólki.

Ég hefði giskað á að ekki færri en 500 hafi verið á Austurvelli í dag í slagveðri, þrumum og eldingum.

Læt fljóta með mynd sem er tekin í átt að Alþingishúsinu með þeim fundarmönnum sem þar stóðu, en hópurinn náði horna á milli á vellinum.  

Vilja að stjórnarskrármálið sé klárað

Slæmur galli riðlakeppni.

Þegar leikið er í riðlakeppni er alltaf hætta á uppákomum eins og þeim að lið "reyni ekki að vinna" eins og gerðist í leik Dana og Makedóníumanna þar sem Makedóníumenn reyndu ekki að vinna og Danir áttu í vandræðum með að leika hæfilega mikið fyrir neðan getu til að eyða lágmarkspúðri í sigur.

Fyrir bragðið lék hvorugt liðið eins og vel og leikurinn því lélegri en áhorfendur hefðu átt kröfu á að sjá og vafasamt hvort flokka mátti slíkt undir íþróttamannslega framkomu.

Það sem veldur þessu er einföld stærðfræði, "veldisfjölgun leikja" með hverri umferð.

Til að hver einasti leikur verði útsláttarkeppni, þurfa liðin að vera 2, 4, 8, 16 eða 32. Næst síðasta talan er heldur lág fyrir heilt stórmót; - 8 leikir með 16 liðum, en síðasta talan of há, því að hún kostar það að 16 leiki þurfi að leika í fyrstu umferð mótsins með þátttöku 32ja liða. 

Sömuleiðis ræður heppni afar miklu í 16 leikjum milli 32ja liða, og enda þótt að óumdeilt kunni að verða hver hreppir gullið, getur heppnisfaktorinn skilað liðum silfri eða bronsi. 

„Við reyndum heldur ekki að sigra“

Sexskeytlan um rafmagnsleysið.

Það er ekki nýtt að talsmenn raforkufyrirtækja þurfi að biðjast afsökunar á rafmagnsleysi eða rafmagnstruflunum.

Eitt slíkt tilfelli dundi yfir hér um árið hjá Orkuveitu Reykjavíkur og þurfti þáverandi fjölmiðlafulltrúi að gera sitt besta til að útskýra málið og biðjast afsökunar. Var augljóslega í vandræðum með það og sumir orkukaupendanna áttu erfitt með að róast niður. 

Á þessum tíma hafði ég gaman af því að gera það sem ég kalla sexskeytlur af nokkrum gerðum. 

Sexskeytla er svipað fyrirbrigði og ferskeytla, nema að ferskeytlan er fjórar ljóðlínur, en sexskeytlan sex, og og ósviknasta afbrigði hennar er það, að fyrst er sett fram ferskeytla, en síðan bætt við þriðju línu, oftast eitt örstutt orð eða einn bókstafur, og í lokin kemur síðan sjötta línan sem rímar á móti þriðju línunni, og skemmtilegast er þegar þessi litla viðbót gerbreytir merkingu vísunnar.  

Slík sexskeytla varð til í tilefni rafmagnsleysisins hja OR, og var rafmagnsleysið og útskýringarnar á því túlkað með því að lýsa kjörum gamallar konu þessa helgi, sem rafmagnið fór og gefa mun skýrari mynd af því sem gerðist. Ferskeytla var svona: 

 

            Gamla konan gleypir belgi 

            og getur skeð að sér hún velgi 

            eða prjóni eða telgi

            því ósköp trist er þessi helgi. 

 

En með því að breyta ferskeytlunni skýrist málið skemmtilega, svona:

 

Gamla konan gleypir belgi

og getur skeð að hún sér velgi 

te

eða prjóni eða telgi 

því ósköp trist er þessi Helgi

Pé. 

 

 

Biðst afsökunar á rafmagnsleysinu

Maður sem talar tæpitungulaust.

Haraldur Sigurðsson hefur starfað lengi erlendis og þegar hann nú kemur heim, hokinn af reynslu og þekkingu, talar hann tæpitungulaust, enda er það auðveldara fyrir þá, sem hafa ekki verið í návígi lengi við umræðu og viðfangsefni hér heima og eru þar að auki komnir á eftirlaun.

Í fámenninu hér heima þurfum við á slíku að halda. 

Nú tekur Haraldur skorinort til orða um Vilhjálm Stefánsson landkönnuð, sem sumir Íslendingar stungu upp á að ætti að koma til greina sem forseti Íslands. Það var vegna þess að hann var fyrsti Evrópumaðurinn sem rannsakaði menningu ínúíta að einhverju ráði og hlaut fyrst og fremst frægð fyrir það. 

Haraldur rekur það sem miður hafi farið í störfum Vllhjálms en sjálfsagt er skoða jöfnum höndum hið jákvæða í störfum hans eins og það sem miður fór. 

 

„Vilhjálmur er frægur að endemum“

"...Og þegar Íslendingar arka´á suðurpólinn..."

Afrek Vilborgar Örnu Gissuarardóttur verður lengi í minnum haft, ekki bara vegna þess að hún er fyrsta íslenska konan sem vinnur þessa hetjudáð, heldur líka fyrsti Íslendingurinn sem gengur þetta ein síns liðs.

Þetta hleypir nýju lífi í lagið "Þá eru að koma jól", sem ég syng á skemmtunum yfir jól og nýjár, og fjallar um helstu teikn þess að jólin séu að komja, en miðhluti lagsins er svona: 

       

      ....Og þegar Íslendingar arka´á suðurpólinn

          þá er það óhugsandi nema fyrir jólin.

          Og þegar lokaður er loksins barnaskólinn

          og lausir kennarnir eru að koma jólin.

          Og er af rónunum þeir rýma Arnarhólinn

          má reikna með því að þá eru´að koma jólln.

          Á nektarstað ef engir fara´að fjörga tólin

          er það fullvíst, að þá eru´að koma jólin.

 

Og þegar leikið er að jólabarnið lagt sé í jötu

þá loksins koma jól. 

Og alltaf þegar Bubbi kóngur er að gefa´út plötu

þá eru´að koma jól. 

Þegar jólaauglýsingar eru orðnar alger pína

þá eru´að koma jól. 

Og þegar öllum verður mál að gefa´út ævisögu sína

þá eru´að koma jól...."

 

      Til hamingju, Vilborg Arna og Íslendingar með þetta glæsilega afrek sem lífgar upp skammdegið!

Vilborg komin á suðurpólinn

Skyldi annar eins hálfleikur koma aftur ?

Íslendingar hafa í rúma sex áratugi att kappi af og til við ríkjandi heimsmeistara og kannski var leikurinn slæmi við Dani spilaður við væntanlega heimsmeistara, - hver veit?

En síðari hálfleikur landsleiks Íslendinga og ríkjandi heimsmeistara, Rúmena, í Laugardalshöllinni 1971, var viðburður sem enn á engan sinn líka í sögu handknattleiks á Íslandi. 

Spurningin er hvort íslenskt handknattleikslandslið muni nokkurn tíma leika slíkan hálfleik við ríkjandi heimsmeistara aftur.

Hjalti Einarsson kom þá í markið og lokaði því í heilar 18 mínútur! Heimsmeistararnir skoruðu aðeins þrjú mörk í síðari hálfleik og úrslitinu urðu jafntefli.

Fyrir vikið var Hjalti kjörinn íþróttamaður ársins þetta ár.

Ég man vel eftir því, að Þorsteinn Björnsson, sem var einnig í fremstu röð íslenskra markvarða, fylgdist með þessari ævintýralegu frammistöðu Hjalta og þegar "lokunin" stóð sem hæst, sagði Þorsteinn við nærstadda:

"Þetta er alveg lygilegt. Nú eru þeir búnir að skjóta bara öðru megin á Hjalta mörgum sinnum og hann fer alltaf í rétt horn og ver! Þetta getur ekki haldið áfram svona, þeir hljóta að fara að skjóta hinum megin."

En í næstu sókn skutu Rúmenarnir enn einu sinni sömu megin og Þorsteinn átti varla orð. 

Í næstu sókn þeirra gerðist það loks, að þeir skutu hinum megin.

En, viti menn, kastaði Hjalti sér ekki einmitt í það horn! Las leikinn greinilega rétt.

Í þessar 18 mínútur varði hann skot af öllum regnbogans litum, hvar sem þau lentu innan rammans.

Nú berst fregn af andláti Hjalta og því þykir mér rétt að rifja upp þetta frábæra afrek hans og senda aðstandendum hans og íþróttafélagi samúðarkveðjur.   

Guðjón: Mætum ferskir á móti Katar

Hvítasykur og koffein = tvö fíkniefni.

Í Coladrykkjum eru tvö fíkniefni: Hvítasykur og koffein. Ég er einn af fíklunum og ef ég fær ekki "stöffið" mitt fæ ég fráhvarfseinkenni. Coca-Cola reyndi einu sinni að framleiða koffeinlaust kók. Ótrúlegt að þeim skyldi detta þetta í hug því að enginn vildi drekka þetta, - ekki frekar en að drekka koffeinlaust kaffi. 

Hitaeiningatalan er hins vegar frekar lág, 44 hitaeiningar á 100 grömm, en til samanburðar má nefna að í flestum tegunum súkkulaðis og morgunkorns er magnið 9-10 sinnum meira og fituinnihaldið í súkkulaði er um 40% sem er álíka mikið og í rjóma og meira en tvöfalt meira en í matreiðslurjóma.

Ein hálfs lítra kók og tvö súkkulaðikexstykki gefa meira en 600 hitaeiningar, og tvær hálfs lítra kók með þremur stykkjum af kexi, sem margir "fíklar" neyta daglega, gefa samtals um 1200 hitaeiningar, sem er um það bil helmingur af orkuþörf fullorðins karlmanns. 

Coladrykkur með súkkulaði ( kók og prins ) gerir sem sé málið margfalt verra ef þynging neytandans er vandamál. 

Gervisykur með engri orku er þrautalausn margra en gallinn bara sá að bragðið og áhrifin eru ekki þau sömu og löngunin eftir "real" stöffi eykst bara og verður illviðráðanlegri, sem aftur kallar á aukna neyslu og hugarangur þess sem finnst hann vera að berjast vonlítilli baráttu við aukakílóin.

Auk þess má heyra kenningar um það að gervisykurinn skekki efnaskiptin, sé hans neytt í miklum mæli; - líkaminn láti ekki plata sig óhæfilega og hætti að framleiða insúlín þegar áreitið er "plat" og að hættan sé á að fá áunna sykursýki, alveg eins og þegar hvítasykurs er neytt í óhófi.

Já, óhófsneysla á öllum sviðum er orðið versta bölið sem mannkynið glímir við. 

Það þarf sterk bein til að þola góða daga, segir máltækið. 

 

 

 

 

Coca-Cola varar við offitu