Ungt lið, sem þarf tíma til að verða gullaldarlið.

Nú eiga sér stað einhver gagngerustu kynslóðaskipti sem um getur í íslenskum handbolta og birtast meðal annars í því að helstu burðarásarnir í liðinu geta átt framundan allt að tuttugu áratugi í fremstu röð.  

Það er staðreynd að líkamleg og andleg geta mannfólksins er að jafnaði í hámarki á lífsleiðinni í kringum 25 ára aldurinn og því er ósanngjarnt að dæma lið sem er nánast enn á unglingsárum á sama hátt og landslið, sem er hokið af reynslu og þar að auki á besta aldrinum í þessari íþrótt sem er frá 25-35 ára. 

Annar markvörður landsliðsins í leiknum við Frakka í dag er aðeins tvítugur og atkvæðamestu mennirnir í vörn og sókn lítið eldri. 

Markvarsla hins kornunga manns var samt alveg á pari við það besta sem sést á svona stórmóti og vörnin hefur allan tímann ekki staðið neinni annarri vörn á mótinu að baki. 

Miðað við að verið var að keppa við landslið Frakka sem á að baki mikla reynslu og feril markaðan sigrum á helstu stórmótum í handboltanum undanfarna áratugi, má segja, að það hafi verið hálfgert unglingalið, sem stóð vel uppi í hárinu á þessu stórliði alveg fram undir það síðasta í leiknum. 

Það er að mörgu leyti einstakt að svona ungt lið skuli geta teflt fram vörn á HM sem fær á sig færri mörk að jafnaði en önnur lið á mótinu. Og hefur hingað til haldið sínu óvenju vel. 

Eðli málsins samkvæmt þarf lið, sem er svona kornungt og á svona langan tíma framundan að fá næði og tíma til að þroskast á ferli, sem augljóslega mun taka óvenju langan tíma. 

 

Það var einhver ólund í þeim

Lopavettlingar utan á vélhjólahönskum handa Sanders? Meiriháttar þorrablót.

Það er vandasamt að finna réttu lausnirnar varðandi fatnað og búnað á vélhjólaferðum á Íslandi. 

Fyrir nokkrum árum fékk ég að gjöf þessa fínu BMW vélhjólahanska úr leðri með beinbrotavörn sem voru að vísu miklu betri en þeir hanskar sem voru fyrir, en reyndust engu að síður ekki vera nógu hlýir í frosti.  

Þegar frostið var orðið 5-8 stig var manni anski kalt á höndunum og skildi af hverju boðið er upp á "handahitun" á sumum dýrum hjólum. 

En síðan gerðist það fyrir einskæra tilviljun þegar verið var að handleika gamla góða lopavettlinga upp á íslenska mátann, með rými fyrir þumalputta öðru megin, og fyrir annan putta hinum megin þar sem enginn putti er, sjá mynd, og notaðir hafa verið við að flytja lagið Hott, hott á hesti, að sú hugmynd vaknaði að prófa þá gömlu góðu. 

Í athugasemd við pistilinn er bent á að svona vettlingar hafi verið kallaðir tvíþumla vettlingar. 

Það reyndist ekki vel að nota þá eina. Ullin hleypti kalda loftinu inn að berum fingrunum. 

En síðan í tómu bríaríi og upp á grín var prófað að fara fyrst í leðurhanskana og síðan í íslenska lopann utan yfir þá, að komin var aldeilis stórkostleg vörn fyrir hendurnar, og það upp í allt að átta stiga frosti. 

Á miðmyndinni sést íslenski lopavettlingurinn einn og sér til hægri, BMW hanskinn einn og sér í miðjunni, en vinstra megin er búið að klæða hinn leðurhanskann í íslenska lopann.  

Ástæðan er líklega sú, að lopinn "drepur" og stöðvar kalda loftið inni í sér, og þetta rými af kyrrsettu lofti inni í ullinni hitast upp af höndum vélhjólaknapans í gegnum leðrið, svo að úr verður þessi líka afbragðs vörn!   

Hún er þó sennilega ekki algild ef það rignir. Blaut og gegndrepa ull hættir nefnilega að halda þurru, heitu lofti inni í sér. 

Á efstu myndinni og neðstu tveimur myndunum er samsettu vettlingarnir/hanskarnir í þeirri stöðu á stýrinu, sem hendurnar eru í þegar hjólinu er ekið. 

En á þetta hefur ekki reynt ennþá og ofangreind lausn hefur reynst alger lausn á áður illviðráðanlegu vandamáli. 

Kannski væri ráð að senda Bernie Sanders svona lopavettlinga og fá hann til að prófa þessa mjög svo íslensku lausn. 

Og sömuleiðis upplýsingar á facebook minni um íslensku þorrablótin undir laginu Meiriháttar þorrablót: 

 

Þetta er meiriháttar þorrablót

þar sem að kætast bæði sveinn og snót. 

Hákarl og brennivín er heilsubót. 

Hámum nú í okkur og verum fljót. 

 

Þegar hnígur húm að þorra

hugsa ég til kvenna vorra 

:,: og til kjammanna, sem korra 

:,: á köldum borðum hér :,: :,: 

 

En mín kona´er haldin kvíða 

að ég kannski detti í það. 

:,: Ég var sekur um það síðast 

:,:  að súpa´of mikið þá :,: :,: 

 

Hér mig hressir hangiketið; 

af því hef ég svo mikið étið 

:,: að ég get ekki setið 

;,: en verð að fara fram :,: :,:  

 

Stjórn skal hafa hér á gríni, 

hákarli og brennivíni. 

:,: Aðgát æringjar hér sýni 

:,:  við annáls fíflagang :,: :,: 

 

Þetta er meiriháttar þorrablót, 

þar sem að kætast bæði sveinn og snót. 

Hákarl og súrmatur er heilsubót; 

hámum nú í okkur og verum fljót!  

 

Rúgbrauð er hið mesta yndi

ef það etið er í skyndi, 

:,:  því það eyðir öllum vindi 

úr iðrum sérhvers manns :,: :;: 

 

En Þingeyiingum þykir miður

að fá þrumara í sín iður, 

:,: því þeir leka´og lyppast niður 

:,:  er loftið fer úr þeim ;.: :,:  

 

Kona oft hér horfir á karl

og ætlar ser að fá karl, 

:,: en það er ekkert á við hákarl, 

:,: það eitt er mikið víst :,: :,:  

 

Þetta er meiriháttar þorrablót 

þar sem að kætast bæði sveinn og snót. 

Hákarl og súrmatur er heilsubót, 

hámum nú í okkur og verum fljót! 

 

Nú mun karla listin klikka; 

að kjassa fljóð og blikka; 

:,: þær vilja helmingi heldur pikka

:,: í hrútspung súrsaðan :,: :,:  

 

:,: Þetta er meiriháttar þorrablót

þar sem að kætast bæði sveinn og snót. 

Hákarl og súrmatur er heilsubót; 

hámum nú í okkur og verum fljót :,: 

 

Saltkjöt og baunir´! Túkall!

Bernie Sanders stal senunni á innsetningarathöfn Bidens