Vatnajökulsþjóðgarður: Kjölfestan í náttúruvernd og gildi Íslands.

Það þarf ekki annað en að líta á kort af Íslandi og sjá hvaða hluti landsins er innan marka Vatnajökulsþjóðgarðs til að það blasi við í sjónhendingu hve mikinn hlut þessi magnaði og stóri þjoðgarður á í vernd hinnar einstæðu náttúru Íslands. 

Í upphafi var lagt upp með það að mörk þjóðgarðsins fylgdu að mestu jöklinum sjálfum, en gallinnn við slíkt er sá, að með rýrnun jökla vegna loftslagshlýnunar minnka jöklarnir sífellt svo að það myndi valda minnkun þjóðgarðsins ef farið yrði eftir því. 

Því eru það góðar fréttir þegar mörk þjóðgarðsins séu frekar færð út og vöxtur og viðgangur þessarar kjölfestu náttúruverndar á Íslandi tryggður.  

Athyglisvert er, að á sama tíma sem mikill ófrægingaráróður hefur verið í gangi hér á landi gagnvart þjóðgörðum almennt, ber öllum þeim, sem fögnuðu tuttugu ára afmæli þjóðgarðsins yst á Snæfellsnesi einróma saman um hve vel hafi tekist til með þjóðgarðinn á alla lund, enda hefur viðamikil hagfræðileg rannsókn leitt í ljós, að fyrir hverja milljón krónur, sem lagðar hafa verið í þjóðgarðinn hafi 23 milljónir unnist í tekjur af honum. 

Vatnajökulsþjóðgarður stækkar

Tólf stiga hiti á heiðskírri nóttu í 660 metra hæð, 20 á daginn.

Veðrið á landinu þessa dagana minnir á hitana í ágúst 2004. Á leið frá Sauðárflugvelli til Reykjavíkur sást allt landið án minnstu ummerkja um hafgolu nokkurs staðar, það var á annan tug stiga uppi á Öræfajökli. 

Næstu daga er spáð meira en tólf stiga hita í heiðríkju á næturnar í 660 metra hæð yfir sjávarmáli á Sauðárflugvelli og áfram gæti hitinn þarna uppi á hálendinu farið yfir 20 stig í nokkra daga enn, líkt og gerst hefur að undanförnu. 

Siggi stormur: Hér verður flottasta veðrið um helgina

Sigurdagurinn mikli fyrir 70 árum: Stórbrotin frammistaða Arnar Clausen.

Ríkarður Jónsson var maður landsleiks Ísendinga og Svía, 4:3, í Reykjavík 29. júní 1951, fyrir 70 árum, skoraði fimm mörk, en eitt þeirra var ranglega dæmt ógilt vegna meintrar rangstöðu. 

Sama kvöld unnu Íslendingar bæði Dani og Norðmenn í þriggja landa landskeppni í frjálsum íþróttum í Osló. 

Maður þeirrar keppni var tvímælalaust Örn Clausen, sem var lang stigahæstur allra. 

Bróðir, hans, Haukur, tognaði, en ber er hver að baki nema sér bróður eigi: Örn keppti í stað bróður síns í spretthlaupunum og halaði þar inn verðlaun og stig. 

Þar að auki sigraði hann í báðum grindahlaupunum.  

Aðeins fágætur afreksmaður á heimsmælikvarða gat afrekað á þennan hátt, en árin 1949, 1950 og 1951 var Örn í 2. til 3. sæti á heimslistanum í tugþraut. 

Fleiri brilleruðu á Bislet og unnu gull í þessari keppni. Gunnar Huseby var aðeins 5 sentimetra frá Norðurlandameti sínu í kúluvarpi, og Torfi Bryngeirsson setti glæsilegt Íslandsmet í stangarstökki, auk þess sem Hörður Haraldsson sigraði bæði i 100 og 200 metra hlaupi.