Mikill grátur, - mikill harmur!

Margir muna enn eftir upphrópuninni "mikið grín, - mikið gaman" sem Laddi lagði í munn Kínverjanum hér í gamla daga.

En ef hugað er að því, hvort til sé einhver andstæða þessa, koma nýsögð orð Péturs Blöndal upp í hugann, svohljóðandi: "Ég hef grátið hvert tonn af vatni, sem rennur óbeislað til sjávar, kemur aldrei til baka og nýtist okkur ekkert." 

Nú er það svo að 105 tonn af vatni falla á hverri sekúndu óbeisluð um Gullfoss og 184 tonn á hverri einustu sekúndu um Dettifoss.

Má leiða að því líkum að það hljóti að vera lífshættulegt fyrir Pétur að sjá þessa fossa og aðra svipaða á Íslandi, svo mikill yrði grátur hans og harmur.

Óbeislað vatn á Íslandi er ekki aðeins fólgið í köldum vatnsföllum, heldur líka í sjóðandi vatni háhitasvæðanna. Má nærri geta hve nærri Pétur myndi ganga sér í gráti og harmi ef hann færi að Geysi í Haukadal eða á önnur háhitasvæði landsins.

En það er fróðlegt að heyra þetta sjónarmið sem og það sem Pétur sagði á þingi þess efnis  hér um árið, að það væri nú munur að sjá hálendið þakið "snyrtilegum lónum" frekar en að það væri ósnortið.

Pétur ætti að koma að Hálslóni fyrri hluta sumars þegar mikill meirihluti lónstæðisins er þurr og þakinn örfínum, nýföllnum leir, sem borist hefur í það úr Brúarjökli og rýkur og verður að blindandi stormi þegar suðlægur, heitur hnjúkaþeyrinn leikur um svæðið á hlýjustu dögum sumarsins.

Miðað við það að hann gráti yfir óbeislaða vatninu í fossunum má ætla að það að vera við Hálslón í þessum aðstæðum myndi veita honum dýpstu sælu og unað, að ég nú ekki tali um hvað það hefði glatt hann á sínum tíma að vera viðstaddur þegar  40 ferkílómetrum af gróðulendi og ómetanlegum náttúruverðmætum var fórnað þar fyrir stóriðjuna. 

Pétur er yngri en ég og á því kannski möguleika á að sjá heimildarmyndina um Örkina ef og þegar hún verður sýnd, og má þá ætla að hann muni ganga nærri sér að hlátri og gleðisköllum þegar sést á hvíta tjaldinu hverngi landinu var drekkt og sýnt hve hratt og vel gengur að fylla 25 kílómetra langan Hjalladal af drullu.

Miðað við boðað frumvarp á Pétur á skoðanasystkin á Alþingi sem ætla sér að hjóla í rammaáætlunina svo að grátur þeirra þurfi ekki að vera eins sár og þau óttast að hann verði ef áætluninni verður haldið áfram á svipuðum nótum og verið hefur.

Áætlunin er 13 ára, en Bjarni Benediktsson sagði í útvarpsviðtali að hún væri tuttugu ára gömul. Kannski er ekki ástæða til þess að muna slíkt úr því að hún er svona lítils virði.

Rétt er að geta þess að ég kann afar vel að meta það hve trúr Pétur hefur verið þingsmannseiði sínum um að fara helst eftir sannfæringu sinni.

Án nokkurs gríms tel ég að hann hafi oft gegnt þar góðu hlutverki við að setja óhræddur fram nýja sýn á mörg mál og fara sínar eigin leiðir, en oft mættu fleiri þingmenn í fleiri flokkum alveg reyna slíkt.

En mikill grátur og mikill harmur hans og skoðanasystkina hans yfir því að ekki sé stútað öllum vatnsföllum og hverasvæðum á Íslandi fyrir stóriðju er sannarlega ekkert grín.  

Athugasemdir

[E (IP-tala skráð) 29.9.2012 kl. 20:19]

Oft hefur maður velt því fyrir sér hvaða orku hin heimtufreka íslenska þjóð ætlar að nýta til að knýja samgöngur sínar í framtíðinni. Olía verður tæpast á boðstólum nema fyrir okurverð og raforka verður trúlega mikilvægust í einni eða annarri mynd. En ef íhaldi og framsókn verður sleppt að stjórnarráðinu, verður búið á næstu tíu árum að ráðstafa allri óbeislaðri raforku í álframleiðslu.

[Haraldur (IP-tala skráð) 29.9.2012 kl. 20:54]

Er ekki ástæða til að staldra við og eiga eitthvað til hörðu árana sem eru í vændum ?
Á einhverju verður þjóðin að lifa í framtíðinni.
Eithvað þurfum við til að skapa Íslenska atvinnu með okkar eigin fyrirtækjum.
Og svo samgöngur og hitun.
Held að skynsamlegt sé að geyma það sem eftir er fyrir afkomendurna frekar en að gefa erlendum auðhringum ódýrt.

[Sævar (IP-tala skráð) 29.9.2012 kl. 22:24]

Já, eins og sagt var eitt sinn er grín ekkert gamanmál.

Takk fyrir þennan Orwellska greinarstúf Ómar.

[Ari (IP-tala skráð) 30.9.2012 kl. 01:34]

Mér finnst skelfilegt að í hvert skipti sem bunan fer niður í postulínið að það hafi enginn fundið upp heimilistæki til að virkja þennan daglega kraft, vatnsaflið og varmann, heimilinu til tekna.

[Haukur Kristinsson (IP-tala skráð) 30.9.2012 kl. 09:10]

"Ég hef grátið hvert tonn af vatni, sem rennur óbeislað til sjávar, kemur aldrei til baka og nýtist okkur ekkert."

„Það er nú munur að sjá hálendið þakið snyrtilegum lónum frekar en að það væri ósnortið“.

Hrikalegt að lesa þetta. Fáfræði og heimska. Maður fyllist vanmáttugri reiði og vonleysi fyrir hönd þjóðarinnar.

Sjallabjálfarnir eru óútreiknanlegir og því stórhættulegir samfélaginu.

Það hefði átt að vera búið að banna þessa mafíu klíku fyrir löngu.

[Sigurgeir Jónsson, 30.9.2012 kl. 11:36]

Ekkert getur breytt þeirri staðreynd að mesta sóunin á orku á Íslandi, er sóunin þeirri  orku sem fellur óbeisluð til sjávar og er ekki nýtt og verður aldrei nýtt eftir að hún fer þangað.íslenskir jöklar verða horfnir eftir 100-200 ár og þær ár og sú orka sem frá þeim kemur verður aldrei nýtt eftir það.

[Sigurgeir Jónsson, 30.9.2012 kl. 11:44]

Þeir ferðamenn sem koma til Íslands og segjast vera komnir til að skoða íslenska náttúru fara flestir aldrei til þess svæðis á Íslandi sem kallað er af sumum "hálendið".Flestir erlendir ferðamenn sem koma til íslands skoða þá náttúru sem er í byggð.Svartsengi, Skaftafell,Þingvelli,Jökulsárlón,Skálafellsjökul,Mývatn, svo eitthvað sé upptalið.Og þeir koma til að skoða Kárahnjúkavirkjun og það svæði þar sem varla nokkur kjaftur kom áður.

[Ómar Ragnarsson, 30.9.2012 kl. 12:18]

Ég er nógu mikið og nógu oft á ferðinni við Kárahnjúka á hverju sumri til þess að geta rekið það ofan í þig að útlendingarnir komi í stórhópum til að skoða það svæði.

Flesta daga rekst ég ekki á nokkurn mann þar á ferð.  

Enda er vonlaust að vera þar á ferð á hlýjustu hnjúkaþeysdögunum fyrri hluta sumars vegna jökulleirsins sem liggur þar nýr í meirihluta lónstæðisins.

Ef einfaldlega hefði verið lagður ferðamannavegur án þess að sökkva svæðinu í drullu og svæðið sett á heimsminjaskrá ósnortið væru þar margfalt fleiri ferðamenn en nú.

Það er nýtt fyrir mér að á ferðamannasvæðinu efst á Skálafellsjökli sé fólk "í byggð."

Og enn á ný heyrir maður sönginn um að "við verðum jú að hafa rafmagn fyrir okkur" þótt erlend stóriðja fái 80% núverandi orkuframleiðslu og sótt sé í að koma þeirri tölu yfir 90%.

[Kári H. Sveinbjörnsson (IP-tala skráð) 30.9.2012 kl. 13:11]

Ferðamennskan er að verða jarðarkringlunni ofviða. Ekkert eitt athæfi mannskepnunnar er eins mengandi. Ef við hefðum vit á og hættum þessari flökkuáráttu væri heiminum bjargað um mörg ókomin ár.

[Þorsteinn Briem, 30.9.2012 kl. 14:04]

Ísland er eitt strjálbýlasta land í heimi.

Hér á Íslandi eru þrír íbúar á hvern ferkílómetra og hingað til Íslands kemur nú um hálf milljón erlendra ferðamanna á ári.

Miðað við að hver erlendur ferðamaður dveljist hér á Íslandi í eina viku eru hér að meðaltali um tíu þúsund erlendir ferðamenn á degi hverjum allt árið á öllu landinu.

Um níu af hverjum tíu Íslendingum ferðuðust innanlands árið 2009 og gistu þá að meðaltali tvær vikur á þessum ferðalögum.

Að meðaltali voru því um ellefu þúsund Íslendingar á ferðalögum innanlands á degi hverjum árið 2009.

Að meðaltali voru því FLEIRI ÍSLENDINGAR á ferðalögum hérlendis en erlendir ferðamenn á degi hverjum árið 2009.

Þeir sem ekki eru á ferðalögum utan síns heimabæjar ferðast þar flestir nær daglega til og frá skóla og vinnu. Og fólk er yfirleitt ekki á ferðalögum utan síns heimabæjar nema nokkrar vikur á ári.

Langflestir menga því mun meira í sínum heimabæ en utan hans, hvort sem þeir búa hérlendis eða erlendis.

Í hverri rútu og flugvél eru yfirleitt fjölmargir farþegar en í hverjum einkabíl á höfuðborgarsvæðinu hér á Íslandi er eingöngu bílstjórinn í fjölmörgum tilfellum.

Ef erlendir ferðamenn kæmu ekki hingað til Íslands myndu þeir ferðast til annarra landa og menga álíka mikið í þeim ferðum.

Og innan við 1% af flugvélaflota Evrópu flýgur með farþega sem hér dvelja.

[Sigurgeir Jónsson, 30.9.2012 kl. 14:20]

Ferðamenn gengu stundum hvern dag um Skálafelljörðina og á Skálafellsjökul síðastliðið sumar.Jökullinn er í 15-20 metra göngufæri frá Skálafelli, ég hef ekki séð þig þar.Þú hefur ekki rekið neitt ofan í mig, og getur aldrei.Það hefur engum dottið þag í hug nema þér. að halda því fram að fleiri hafi komið að Kárahnjúkum fyrir virkjun en eftir.

[Ómar Ragnarsson, 30.9.2012 kl. 18:31]

Það var eins erfitt að komast um Kárahnjúkasvæðið og hugsast gat áður en virkjað var en hefði verið í lófa lagið að bæta aðgengið fyrir lítið fé, til dæmis með nettri brú yfir Jöklu rétt norðan við Kárahnjúka.  

Ég hef ferðast um þetta svæði oft á hverju sumri í tólf ár og dvalist alls heilt vinnuár þar.

En auðvitað veist þú þetta miklu betur en ég.

[Ómar Ragnarsson, 30.9.2012 kl. 19:46]

Það var eins erfitt að komast um Kárahnjúkasvæðið og hugsast gat áður en virkjað var en hefði verið í lófa lagið að bæta aðgengið fyrir lítið fé, til dæmis með nettri brú yfir Jöklu rétt norðan við Kárahnjúka.  

Ég hef ferðast um þetta svæði oft á hverju sumri í tólf ár og dvalist alls heilt vinnuár þar.

En auðvitað veist þú þetta miklu betur en ég.

"Ferðamenn gengu stundum hvern dag um Skálafellsjörðina..." segir þú. Varla getur það verið tilefni til að nefna þessa gönguleið í hópi fjölförnustu ferðamannastaði landsins eins og Landmannalaugasvæðið þar sem eru mörg hundruð manns á ferð hvern einasta dag ferðamannatímans.

[Ómar Ragnarsson, 30.9.2012 kl. 19:47]

Afsakið að athugasemdin fór tvisvar inn, en þó ekki öll í fyrra skiptið.