Nei, hvað segir hann; mengunarreglur ?

Per Jessing, sérfræðingur í skipaflutningum, nefnir mengunarreglur í Kanada sem eina af ástæðum þess að siglingar norðan við Ameríku séu ólíklegar næstu áratugina. Æ, hvaða vesen, og við sem ætluðum að verða moldríkir af þessum siglingum strax á næstu árum.

Voðalega geta Kanadamenn verið vitlausir að láta einhverja ófyrirséða mengun skemma fyrir sér í því að skapa stórgróða af nýjum siglingaleiðum.

Slík viðhorf eru okkur Íslendingum framandi. Því fleiri olíuhreinsistöðvar, sem við gætum fengið til að rísa hér, því meiri olíuskipaflutningar og siglingar á gömlum og/eða óhæfum stórskipum sem næst landi okkar, því meiri og stórfelldari olíuboranir á Drekasvæðinu, því betra.

Því meira sem við gætum látið flæða af olíu og skipum og því fljótar sem við gætum klárað olíuna upp til agna, svo að það sé tryggt að við deilum henni ekki með komandi kynslóðum, því betra fyrir okkur.

Því, eins og maðurinn sagði: Hvað hafa komandi kynslóðir gert fyrir okkur? Ekki neitt.

Og hver segir að það verði nokkrar komandi kynslóðir? Er ekki alveg eins líklegt að einhverjir vitleysingar hleypi af stað kjarnorkustyrjöld sem eyði mannkyninu og mestöllu ef ekki öllu lífi á jörðinni?

Því fyrr og meira sem við getum grætt og orðið moldrík, því betra.  

Að vísu liggur siglingaleiðin milli Evrópu og Japans norður fyrir Rússland ekki framhjá Íslandi, heldur meðfram ströndum Noregs. En auðvitað myndu skip krækja vestur til Íslands af því að við myndum bjóða þjónustuna við þau niður úr öllu valdi, áfram og áfram niður og veita fríðindi í bak og fyrir þangað til þau gætu ekki hafnað því að koma til okkar. Höfum af því góða reynslu, nú síðast á Bakka við Húsavík. Jafnvel borga með þessu til þess að skapa atvinnu.

Síðan er það svo að fyrstu hafnir sem skipin koma að á hinni ógnarlöngu hafnlausu leið yrðu í Norður-Noregi en ekki á Íslandi. En það hljóta að vera smámunir í dæminu.

Óraunhæfar siglingar um norðurleiðina

Athugasemdir

[Bergur (IP-tala skráð) 20.3.2013 kl. 08:35]

Það hefur því miður verið oftar en ekki þegar pólitíkusar fá snjallar hugmyndir og halda lærðar ráðstefnur um málin að þau eru andvana fædd má nefna Vetnis bílana og nú norðurhafa siglingar

[Jón Logi (IP-tala skráð) 20.3.2013 kl. 17:39]

Ég mæli með því að menn skoði hnattlíkan í stað þess að skopast með það.

Al-stysta siglingarleiðin frá Evrópu og til Asíulanda er austan megin við okkur og yfir pól, en hvorn veginn sem farið væri hjá Íslandi er það samt framjá Íslandi, og það stutt frá.

Þessi leið, ef fær verður, er óendanlega styttri en núverandi leiðir, og myndi því vera umhverfissjónarmiðum í heild til hagsbóta.