Gamall draumur minn: Undan vindi mestallan hringinn!

Þegar ég var ungur var ég ástríðufullur hjólreiðamaður. Einn draumur minn þegar hringvegurinn var fullgerður var sá að hjóla á ótrúlega góðum tíma hringinn með því að nýta mér hagstæð veðurskilyrði. 

Það átti að byggjast á því að sæmilega kröftug lægð kæmi upp að landinu úr suðvestri og færi norðaustur fyrir landið.

Hjólað yrði af stað frá Vík í Mýrdal þegar það væri að byrja að hvessa af suðaustri og hjólað með vindinn í bakið til Reykjavíkur.

Þá stæði einmitt þannig á að kuldaskil væru að fara yfir landið og þar með hægt að hjóla undan snörpum suðvestan vindi alla leið norður til 'Akureyrar og austur til Egilsstaða.

Þá væru kuldaskilin farin þar yfir og komin norðanátt sem blési í bakið suður til Hornafjarðar og væri frekar hagstæð til Víkur.

Þetta byggðist sem sagt á því að lægðin og skilin færu þannig yfir landið að hægt yrði að hjóla mestalla leiðina undan vindi !  

Umhverfis landið á 40 tímum

Athugasemdir

[Haukur Kristinsson (IP-tala skráð) 21.6.2013 kl. 20:07]

Sem "ungur drengur" hefur þú verið skrambi góður í "meteo" Ómar.

Vissir hvernig vindar snúast í lægðum etc. Ertu að plata okkur?

Ekki lærði ég veðurfræði í MA. 

[Þorsteinn Briem, 21.6.2013 kl. 20:58]

Veðurfræði eftir Markús Á. Einarsson var kennd í Menntaskólanum á Akureyri.

En ég var nú yfirleitt ekki í MA þegar ég var í MA.

Var til að mynda eina önnina á bátum frá Grindavík.

Tómas Ingi Olrich, síðar menntamálaráðherra og sendiherra í París, gaf mér þá einkunnina 1 í frönsku en Gérard Lemarquis, frönskukennarinn minn í Menntaskólanum við Hamrahlíð, gaf mér einkunnina 10.

Það sýnir að annað hvort kann Tómas Ingi ekkert í frönsku eða hann heldur að núll skipti engu máli.

Og það síðarnefnda er að sjálfsögðu mun verra fyrir íslensku þjóðina, eins og dæmin sanna.

[Haukur Kristinsson (IP-tala skráð) 21.6.2013 kl. 21:12]

Góður Steini Briem. Kemur mér ekki á óvart.

Menn eins og Tómas Ingi hafa alltaf haldið að það skiptu sko núll máli hvar þetta blessaða núll stendur. Framan eða aftan við stafinn. Hafa aldrei skilið það.

[Ómar Ragnarsson, 21.6.2013 kl. 23:41]

Ég hafði það mikinn áhuga á veðrinu kornungur, að ég man vel eftir því þegar það fóru að heyrast veðurfregnir í útvarpinu eftir stríðið og þegar ég spurði afa minn Ebba að því hvað það þýddi þegar þulurinn sagði: "Rok undir Eyjafjöllum."

Þegar ég hjólaði lengri vegalengdir, eins og frá Reykjavík upp í Norðurárdal 15 ára gamall, valdi ég dag þegar það var rólegt veður en norðan átt til baka.

Í dagbók, sem ég skrifaði í sveitinni í Langadal í Húnavatnssýslu 13 ára sumarið 1954 er nákvæmlega bókað hvernig veðrið var á hverjum degi og hve vel eða illa spáin hefði ræst.

Ömmusystir mín, bóndinn, var mjög veðurglögg og kenndi mér mikið.

Í heyskapnum skiptu veðrið og veðurspáin öllu og einkum gat spáin verið tvíbent í vestsuðvestan átt þegar spáð var nokkuð þurru í Húnavatnssýslum og Skagafirði, en skúrir gátu laumast inn Breiðafjörðinn og komist yfir Laxárdalsheiði austur í Húnaþing.

Þá reyndist frænka mín oft snjallari en veðurfræðingarnir.

Draumurinn um að hjóla hringinn kom upp 1974 en þá var ég 33ja ára og hafði auðvitað lært það sem kennt var í veðurfræði í M.R. 16 árum fyrr.

[Jón Logi (IP-tala skráð) 22.6.2013 kl. 09:40]

Eitt sinn keypti ég kálfa tvo og sótti. Þeir voru í Teigi í Fljótshlíð.
Tvo hafði ég vinnumenn, þar sem að farkosturinn til flutnings (Lada 1600) bauð ekki upp á annað en mann á kálf, og kálfurinn mestallur í fóðurpoka.
Fjárlögin dugðu fyrir kálfunum, en ekki alveg fyrir bensíni. Á heimleið varð ég sem sagt bensínlaus. En....bara kílómeter eftir.
Með miklum tilþrifum var bílnum ýtt svolítinn spotta, og að afleggjaranum heim. Þar sem að vindur stóð þar fallega í bak, var opnað skott og hurðir, og fór þar Ladan yfir 30 km hraða án vélarafls.
Vindurinn er öflugur í þesu öllu.

[BMX (IP-tala skráð) 22.6.2013 kl. 12:31]

Stein Briem með vind i vömb

prumpar allan daginn

bloggar oft sem gömul önd

Þá tæmist a honum maginn

[Þorsteinn Briem, 22.6.2013 kl. 13:48]

Ég hélt að þúfutittlingarnir hétu AMX.

[Sæmundur (IP-tala skráð) 22.6.2013 kl. 20:57]

Ertu að gera lítið úr þessum hjólreiðamönnum Ómar? Að veðurskilyrði hafi verið með þeim hætti að þetta hafi verið lítið mál? Mér finnst þetta vel að verki staðið hjá þeim og þeir eigi skilið klapp á bakið fyrir