Mogga Færeyjanna vantar meðgjöf.

Sú var tíðin að Morgunblaðið á Íslandi og Dimmalætting í Færeyjum báru höfuð og herðar yfir alla aðra prentmiðla. Nú er það liðin tíð og líkast til hefði Morgunblaðið hætt að koma út fyrir fjórum árum ef atbeini og innspýting fjársterkra aðila hefði ekki bjargað blaðinu.

Svipað er kannski það eina sem getur bjargað Dimmalætting nú.

Það er ekki nema rúmur áratugur síðan Morgunblaðið hafði slíka yfirburði á Íslandi, að til urðu fyrirbæri, sem ég kallaði "Moggaheilkennin."

Eitt þeirra var það, að iðulega kom það fyrir að á fréttafundum komu einstakir fréttamenn fram með umfjöllunarefni sem hlutu engar undirtektir á fréttafundum.

Síðan gerðist það síðar að Mogginn fjallaði um sama efni og þá ruku allir upp til handa og fóta yfir því og sögðu: "Sáuð fréttina í Morgunblaðinu? Við verðum að gera eitthvað í þessu?

Annað Moggaheilkenni var það að annar fjölmiðill, til dæmis fréttastofa RUV eða Stöðvar 2, kom með "skúbb" frétt, sem vakti mikla athygli og lukku. ´

Þá gerðist það iðulega að Mogginn virtist láta sér þetta í léttu rúmi liggja.

En síðan var það nokkrum vikum síðar, hæfilega löngu síðar að farið væri að fyrnast yfir fréttina, að Mogginn kom með alveg nýtt sjónarhorn á hana, sem var ekki aðeins ígildi "skúbb"fréttar, heldur líka efni í drjúga fréttarskýringu blaðsins og fréttir afleiddar fréttir.

Að baki þessu lá það augljóslega, að hjá Mogganum drógu menn rólega andann, settur var blaðamaður  í djúpa rannsóknarblaðamennsku, sem bar þann árangur, að á endanum "stal" Mogginn upphaflegu fréttinni og gerð hana að sinni eigin.

Og sama morgunin eftir heyrðist á fréttamannafundum hinna fjölmiðlanna: "Sáuð þið fréttina í Mogganum í morgun? !!"

Já, eins og sungið var hér í den: "Those were the days, my friend."

Dimmalætting líklega á leið í gjaldþrot

Athugasemdir

[Þorsteinn Briem, 17.9.2013 kl. 15:11]

Ekkert er skemmtilegra í fréttamennsku en að plata aðra fréttamenn.

Ljósamenn í Þjóðleikhúsinu fóru í verkfall og Gísli Alfreðsson þjóðleikhússtjóri gekk í þeirra starf en neitaði að hleypa fréttamönnum inn í húsið meðan á sýningu stóð.

Ég borgaði mig hins vegar inn á sýninguna, var því eini fréttamaðurinn á staðnum og tók viðtöl við bæði ljósameistarana og þjóðleikhússtjórann þar sem hann lýsti upp sviðið eins og hann hefði aldrei gert annað.

Og daginn eftir kom þessi fyrirsögn í Mogganum:

Skemmtilegra en að vera þjóðleikhússtjóri.

Og mynd af kallinum skælbrosandi að stýra ljósunum.

[Þorsteinn Briem, 17.9.2013 kl. 15:28]

Ég og aðstoðarmaður Þorsteins Pálssonar, þáverandi sjávarútvegsráðherra, vorum miklir vinir og ég skrifaði stundum ræður fyrir Þorstein, sem hélt að aðstoðarmaðurinn hefði skrifað þær.

Mætti svo á fundi þar sem sjávarútvegsráðherrann hélt ræðurnar og birti það helsta úr þeim í Mogganum.

[Már Elíson, 17.9.2013 kl. 21:43]

Þetta er skemmileg lesning ! - Kanntu ekki fleiri svona montsögur af sjálfum þér ?

[Þorsteinn Briem, 17.9.2013 kl. 21:48]

Ég þakka fyrir sífelldan áhuga þinn á að lesa það sem ég birti hér, enda þótt þér hafi verið margbent á að þú þurfir ekki að lesa það, Már Elíson.

[Jens Guð, 17.9.2013 kl. 22:06]

  Dimma (eins og Dimmalætting er jafnan kallað) fer í gjaldþrot en nýtt dagblað sprettur upp eins og stálfjöður.  Eigendur Dimmu eru þegar búnir að skrásetja nýtt útgáfufélag.  Vandamálið verður það helst að ráða nýtt starfsfólk.  

  Það er markaður fyrir tvö dagblöð í Færeyjum.  Dimma lenti hinsvegar í því að staðna á meðan hitt dagblaðið,  Sósíalurin,  hefur verið í stöðugri sókn.  Lengst af var Dimma aðal dagblaðið.  Kletturinn í hafinu.  Studdi danska sambandsríkið og flokka til hægri.  Blaðið var í stóru broti.  Blaðsíðan var tvöföld stærð blaðsíðu íslensks dagblaðs.

  Sósíalurin var málgagn krata og sjálfstæðissinna.  Fyrir 15 árum eða eitthvað svoleiðis var Sósíalnum breytt í frjálst og óháð dagblað.  Það var selt starfsmönnum.  Þetta varð blaðinu öflug vítamínssprauta.  Blaðið gekk í endurnýjun lífdaga.  Efnistök urðu allt önnur,  frískari og sprækari.  Þunglesnar langlokugreinar hurfu úr blaðinu eins og dögg fyrir sólu.  Við tóku stuttar greinar með uppsláttarfyrirsögnum.  Umfjöllun um tónlist, kvikmyndir og önnur dægurmál fengu æ stærri sess í blaðinu.  

  Á sama tíma breyttist ekkert hjá Dimmu.  Það blað var undirlagt langlokugreinum og alvarlegheitum virðulega blaðsins.

  Sósíalurin sveif fram úr Dimmu í sölu.  Mestu munaði um hvað Sósíalurin náði góðri sjoppusölu á meðan Dimma var aðallega í áskrift.

  Sósíalurin fór að reka útvarpsstöð,  Rás 2.  Sú stöð er unglingaútvarp (líkast FM957 á Íslandi).  Í Færeyjum er aðeins ein ríkisútvarpsrás (lík íslensku Rás 1) og kristileg útvarpsstöð, Lindin.  Unga fólkið er með stillt á Rás 2.

  Sósíalurin fór einnig að reka nokkra vinsæla netmiðla.  Þar á meðal tónlistarvefinn planet.fo,  fréttavefinn aktuelt.fo,  portal.fo og einhverja fleiri.  Jafnframt hefur Sósíalurin staðið fyrir allskonar hljómleikum og fleiri skemmtunum í húsnæði sínu,  Miðlunarhúsinu.  

  Nýverið seldi Sósíalurin þessa netmiðla og stofnaði nýjan,  in.fo.  

  Dimma færði sig yfir í minni blaðsíðustærð,  sömu og Sósíalurin en efnistök voru þau sömu.  Unga fólkið sækir í miðla Sósíalsins en Dimma er stöðnun að bráð.  Mér þykir samt vænt um Dimmu og það verður sjónarsviptir af brotthvarfi blaðsins.  Hvert sem framhaldið verður með nýju dagblaði.  

[Jens Guð, 17.9.2013 kl. 22:13]

  Til gamans má geta að nafnið Dimmalætting þýðir "dimmu léttir" (morgunskíma,  árblik).  Sósíalurin þýðir "samfélagið".