Stökurnar stökkva fram.

Ummæli og stökur stökkva fram hjá ýmsum á þessum vordegi þegar fréttir af árangri 70 milljarða króna framlags vegna skuldavandamála heimilanna og af leyninefnd sem forsætisráðherra hefur skipað án vitneskju þingsins.

Framsóknarþingmenn hafa bent á það að stóri pakkinn opni ýmsa möguleika, til dæmis á því að konur geti nú látið lita á sér hárið, ýmist sjálfar eða á hárgreiðslustofum.

Sigurður Bogi Sævarsson segir í fésbókarathugasemd að eftirfarandi rím hafi dottið af vörum:

 

Konan litar lokkinn,

lipran, fagran, hrokkinn.

Stígur hún á stokkinn

og styður Framsóknarflokkinn.

 

Þegar ég sá þetta hraut eitthvað í þessa veru af vörum:

 

Gjafaféð notast af miklum móði,

í margs konar líkn rennur þessi gróði.

Þær setjast í leiðslu

í sælli hárgreiðslu

fyrir 70 milljarða´úr ríkissjóði.

 

Björn Valur Gíslason spyr hneykslaður í frétt á DV yfir skipun leynilegs starfshóps án vitundar Alþingis, hvort mönnum sé orðið andskotans sama. Í athugasemd við fréttina segist viðkomandi vera hissa.  

Þá koma upp í hugann þrjú rímorð í limru eftir Gísla Rúnar Jónsson af allt öðru tilefni fyrir mörgum árum og þar með sprettur fram þessi limra:

 

Nefndirnar fá mikinn frama

í feluleik, sem býr til drama, -   

á Alþingi dissa

en enginn er hissa

því öllum er andskotans sama.

 

 

Fyrir fólk sem litar sjálft á sér hárið

Athugasemdir

[Úrsúla Jünemann, 9.4.2014 kl. 22:54]

þetta hárlitunarmál er næsti bærinn við þegar ungri ljósku var mikið um að fá brennivínsbúðirnar opnar á sunnudegi til að geta keypt hvítvín með humrinum.

[Þorsteinn Briem, 9.4.2014 kl. 23:52]

Grænt nú litar hárið hér,
Hauksdóttir af vana,
Vigdís greiðir sjálfri sér,
sjötíu milljarðana.

[Þorsteinn Briem, 10.4.2014 kl. 00:13]

Tvær pizzur á mánuði

[Ómar Bjarki Kristjánsson, 10.4.2014 kl. 00:45]

Margt eru heimsmet framsóknar-

manna þetta árið,

láta ljúfa hrægamma

lita á þér hárið.

[Ómar Bjarki Kristjánsson, 10.4.2014 kl. 00:48]

Edit:

Mörg eru heimsmet framsóknar-

manna þetta árið.

Láta nú ljúfa hrægamma

lita á þjóðinni hárið.