Bílar af árgerð, sem aldrei var framleidd. Gengur það upp?

Ef ég man rétt, eru þrjú ár síðan síðast var fjallað um það á mbl.is, að bílar hér á landi væru skrásettir af ágerð, sem væri allt að tveimur árum nýrri en samsvaraði raunverulegu framleiðsluári.

Mér er kunnugt um nokkur dæmi um þetta og það skondnasta er sú staðreynd að bíll, sem var seldur árið 2014 og sagður vera af þeirri árgerð gat einfaldlega ekki verið af þeirri árgerð, af því að síðasta framleiðsluár hans var 2013. 

Að vísu voru bílarnir af þessari gerð greinilega seldir á afsláttarverði, sem var það hagstætt að kaupendurnir voru hæstánægðir, enda hafa bílar af þessari gerð reynst mjög vel og verið afar ódýrir í rekstri. 

Það er svo að sjá að reglurnar í þessum efnum séu losaralegar og væri ágætt efni í nánari rannsóknarblaðamennsku að kanna þetta betur. 

Ef bílar, já, eða vélhjól, sem ég veit dæmi um, hafa staðið lengi úti, getur það farið verr með þá en hæfileg notkun, og sú spurning er áleitin hvort ekki þurfi að endurskoða þetta kerfi allt rækilega. 

Því að það virðist vera þannig, að hægt sé að breiða yfir raunverulega forsögu viðkomandi bíls á fullkomlega löglegan hátt.  

 

Bílar ranglega skráðir yngri

Athugasemdir

[Guðmundur Þór Björnsson, 2.3.2018 kl. 02:10]

Þessi pistill er ágætur, eins og flest sem frá þér kemur Ómar. En þú gætir alveg minnt landa okkar á að í okkar síminnkandi veröld er ákveðið kerfi í gangi er varðar farartæki, og sennilega eingöngu alvitrir landar okkar sniðganga. Tíundi stafurinn (eða tala) í svokölluðu VIN númeri allra (með eðlilegum fyrirvara) framleiddra farartækja táknar árgerð. Og ekkert meira um það að segja. Það geta allir "googlað" þessa töflu, sem nær yfir 30 ár í senn og endurtekur sig síðan. Þannig hefur þetta verið síðan að ég held 1981.

Kveðja úr Ameríkunni,

GÞB

[Gunnar Heiðarsson, 2.3.2018 kl. 04:38]

Auðvitað á að skrá bæði framleiðsluár bílsins, ásamt fyrsta skráningardegi, í skoðunarvottorð. Ef ég men rétt eru dálkar fyrir báðar þessar upplýsingar í skoðunarvottorði bíla.

Reyndar hélt ég að seint á síðustu öld hafi verið gerð reglugerðarbreyting, þar sem þessar upplýsingar eiga að koma fram. Er það misminni hjá mér? Eða hefur reglunni verið breytt aftur?