Mikilvægasti tímamótadagurinn, - gerði lýðveldið mögulegt.

Ákvæði Sambandslaganna, sem fengu gildi 1. desember 1918, kváðu á um það að 25 árum síðar gæti hvor aðildarþjóðin sem væri, sagt samningnum upp. 

Sá skilningur myndaðist á þessu ákvæði fyrir hernám Danmerkur 9. apríl 1940 að Íslendingar gætu frá og með 1. desember 1943 sagt samningnum upp og stefnt að afnámi konungssambandsins við Dani og lýðveldi. 

Allar aðgerðir Íslendinga á stríðsárunum miðuðu að þessu takmarki, sem annars hefði verið ómögulegt eða illmögulegt að ná. 

Fyrstu áratugina eftir fullveldið 1918 var 1. desember haldinn mun hátíðlegri en síðar varð. 

Ég minnist þess tíma vel og man eftir texta og hressilegu lagi sem ég söng á fullveldissamkomum á árunum kringum 1960. Textinn við viðlagið, sem var ætlað sem fjöldasöngur, var svona:  

 

Fyrsta des! 

Fyrsta des

fríkka fés! 

Já, fyrsta des. 

Frelsið fengum óskorað! 

Frjálsir skálum upp á það 

alveg hikstalaust og hyllum fyrsta des! 

 

Lagið var lengra, skiptist í a og b kafla, og ég væri alveg til í að endursemja textann við hinn helminginn. 

Það er kominn tími til að endurreisa virðingu og hátíðleika þessa merka dags og rífa hann upp úr þeirri lægð, sem hann hefur verið í undanfarna áratugi. 

Þessi miklu tímamót eiga það skilið að þeim sé haldið eins hátt á lofti og unnt er. 

Það væri líka kærkomið mótspil við þá tvo nýju "tylldaga", Black Friday og Cyber Monday, sem tröllríða orðið öllu hér á landi í lok nóvember, en þeir eru upphaflega tilkomnir vegna bandaríska hátíðardagsins Thanksgiving Day, sem síðasta fimmtudag í nóvember er nokkurs konar bandarísk upskeruhátíð og miðast við þá dagsetningu þegar landnemar stigu á land við Plymouth rock i Massachusetts. 

Tilefni sem kemur okkur Íslendingum nákvæmlega ekkert við.  

 

Miðflokkurinn vill bæta við frídegi

Athugasemdir

[Húsari. (IP-tala skráð) 30.3.2018 kl. 16:13]

Sæll Ómar.

Mæltu manna heilastur!

Með öllu óskiljanlegt að Íslendingar skuli hafa
fjarlægst svo uppruna sinn og helstu ávinninga
í frelsisbaráttu sinni að hugtökin fullveldi og
sjálfstæði skulu orðin fjarlæg og virðast ekki hafa
neina einustu þýðingu.

Vesaldómur okkar nær svo hæstum hæðum í því að
hafa ekki látið hanna nýtt skjaldarmerki í þrívídd
er prýða mætti Alþingishúsið 1. desember 2018.

Aðeins þá er hægt að ætlast til þess að Íslendingar
láti sig þetta einhverju varða en engin von til þess meðan
svo er háttað málum að tákn hins danska valds skuli
trjóna á Alþingishúsinu. Það er þingi og þjóð til ævarandi skammar
og löngu tímabært að breyting verði gerð þar á.

Ef ekki þá munum við sjá þjóðhátíðardaginn 17. júní fara sömu leið.
Reyndar neitar því ekki nokkur maður að þegar er orðin breyting
í þá átt.

Það er síðan skemmtilegt til að vita að af öllum stofnunum
í landinu þá er það RÚV sem hvað best hefur haldið afmælisári
þessu á lofti! Heill sé þeim fyrir það.

[Halldór Egill Guðnason, 30.3.2018 kl. 21:30]

 Tek undir hvert orð síðuhafa.

 Góðar stundir, með kveðju að sunnan.

[Ómar Ragnarsson, 30.3.2018 kl. 23:46]

Bíðum nú aðeins.

Kristján 9. var, hvort sem okkur líkar það betur eða verr, konungur Íslands þegar Alþingishúsið var reist og þá var þetta skjaldarmerki þjóðhöfðingja Íslands. 

Húsið fellur undir lög um minjavernd og höfundarrétt arkitektsins. 

Á landinu eru fleiri hús og mannvirki, sem hafa verið reist í nafni konunga Íslands á ýmsum tímum. 

Mér finnst að þau eigi að nota fornminjaverndar. 

Kommúnistar leyfðu Kreml að standa þótt vondir keisarar hefðu staðið að því að reisa mannvirkin þar. 

Ef ég man rétt lagði Kristján 10 hornstein að Ljósafossvirkjun 1937. Á þá að fjarlægja hornsteininn, þetta "tákn um danskt vald"? 

Höfði er sögustaður í mannkynssögunni. Á myndum af Reagan og Gorbatsjof eru málverk af Bjarna Benediktssyni og öðrum Sjálfstæðismanni á bak við þá. 

Þau voru fjarlægð við tilkomu nýs borgarstjórnarmeirihluta, sem ég tel hafa verið rangt, því að varðveiti beri þennan stað í nákvæmlega því horfi sem hann var þegar þessi sögulegi fundur var haldinn. 

Verður þá ekki eðlilegt framhald af því að "fótósjoppa" málverkin í burtu?