Á leið til Egilsstaða í átt til Grænlands?

Þegar ég var í skóla var kennd þar landafræði, raunar allt til 15 ára aldurs. Æ oftar má sjá hve landafræðikunnáttu, jafnvel um sitt eigið land, hefur hrakað síðustu áratugi, þrátt fyrir margfaldar utanlandsferðir. 

Í fréttatíma Stöðvar 2 í kvöld var sýnt hvernig flugvél Air Iceland Connect fór af stað áleiðis til Egilsstaða áður en henni var snúið til baka. 

Er skemmst frá því að segja að meint flugleið var sýnd þannig á kortinu, að hún lá í þveröfuga átt, beint vestur Faxaflóa með stefnu á Grænland. 

Í einum fréttatíma ljósvakamiðils um daginn var tvívegis talað um Snæfellsjökul í frétt sem fjallaði um Svinafellsjökuls. 

Oftar en einu sinni heldur fjölmiðlafólk að Litla kaffistofan og jafnvel Svínahraun séu á Sandskeiðinni. 

Oft er grátlegt hvernig skortur á einfaldri stærðræðikunnáttu blandast inn í fáfræði í landafræði. 

Talað um mílur og fet, ruglað saman landmílum og sjómílum og talað eins og að enskt pund sé hálft kíló. 

Enginn fjölmiðlamaður hefur enn haft fyrir því að taka tvö núll aftan af ótal fréttum um það hve marga hektara skógareldar, flóð eða skriður hafa þakið. 

Þegar rætt er um 40 þúsund hektara er venjulegt fólk engu nær. Ef talað væri um 400 ferkílómetra væri fólk einhverju nær, því að 20 x 20 = 400. 

Vélarbilun í vél Air Iceland Connect

Athugasemdir

[Haukur Kristinsson (IP-tala skráð) 9.8.2018 kl. 19:44]

Grikkir eiga orð yfir eitt þúsund fermetra; stremma (flt. stremmata) Einn hektar er því 10 "stremmata" og eftir því væru 400 ferkílómetrar eða 40 þúsund hektarar 400 þúsund "stremmata." Flestir eiga auðveldara með að sjá fyrir sér (visualize) 1000 fermetra en 10.000 fermetra eða ein hektar. Oft eru byggingarlóðir þetta í kringum eitt þúsund fermetrar. Svo eigum við stærðina "dagslátta", en þá vandast málið.