Rétt að taka undir aðvörunarorð Björns Bjarnasonar um Þingvelli.

Á þeim tíma sem ferðast var um lönd á Norðurhveli jarðar, mest um Noreg og Bandaríkin til kvikmyndagerðar um umhverfis- og náttúruverndarmál, blasti við hve dýrmætt það þótti erlendis að einhver fyrirbæri væru á Heimsminjaskrá UNESCO.  

Litið dæmi blasti við í Leifsstöð, ferðabæklingur um Noreg með bryggjuhúsunum í Björgvin í bak og fyrir með tilheyrandi ábendingum um þann stað og fleiri, sem væru á Heimsminjaskránni. 

Á Íslandi ríkti þá og ríkir þvi miður enn eindæma fáfræði og fordómar um þetta mál. 

Í sjónvarpsviðtali við þáverandi sveitarstjóra í Skútustaðahreppi hnussaði fyrirlitlega í honum þegar Heimsminjaskráin var nefnd, svo líils virði fannst honum hún vera.

Á níunda áratugnum var leitað hófanna lauslega um það að Þingvellir og Mývatn færu á skrána.

Þingellir hlutu náð, en Mývatn var hlegið út af borðinu með Kísiliðjuna og kísilnám í vatninu sem helsta atriðið í sveitinni. 

Svo mikið var lagt upp úr Kísiliðjunni að í hvert sinn sem það varð einhver vafi um að hún gæti haldið áfram, var það fyrsta frétt að nú myndi Mývatnssveit leggjast í eyði. 

Svo fór hún loksins og Mývatnssveit er þarna enn og enginn man nú þennan meinta hornstein byggðarinnar. 

Þingvellir komust hins vegar á skrána en er þeirri stöðu ógnað vegna köfunar í gjánum. 

Björn Bjarnason fyrrum menntamálaráðherra varar sterklega við þeirri hættu, sem steðjar að veru Þingvalla á lista UNESCO og er full ástæða til að taka undir það sem hann skrifar um þetta mál.

Vera Þingvalla á skránni er miklu stærra mál en að því megi klúðra á nokkurn hátt.  

 

Athugasemdir

[Grímur Kjartansson, 27.7.2021 kl. 02:56]

"Heimsminjaskráningin hefur einnig pólitíska hlið"
Er ekki bara verið misbeita þessari nefnd sem nú vill taka Stonehenge af skránni vegna jarðganga sem einhver í nefndinni er ósáttur við

[Rafn Haraldur Sigurðsson, 27.7.2021 kl. 07:18]

Sæll Ómar, hver er ávinningurinn við það að komast á heimsminjaskrá? Verður landið eitthvað fallegra við það, held ekki, Mývatn var og er mjög fallegt svæði.

[Ómar Ragnarsson, 27.7.2021 kl. 07:23]

Að vera á heimsminjaskrá er álíka gæðastimpill og að standast þær kröfur, em gerðar eru til þjóðgarða. Eða að bíll standist þær kröfur, sem gerðar eru til þess að hljóta fimm stjörnur í árekstrarprófun. 

Eða að hótel se fimm stjörnu hótel. 

[Halldór Jónsson, 28.7.2021 kl. 11:26]

Er einhver bísness í þessu heimsminjaveseni?