Mallorca-veðrið tafðist í tæp 40 ár.

Fyrir tæpum 40 árum var einn af þálifandi veðurfræðingum Veðurstofunnar svo óheppinn að spá "Mallorcaveðri" um verslunarmannahelgina eins og hann orðaði það í spá sinni í Sjónvarpinu á föstudagskvöld en varð síðan að éta það ofan í sig strax daginn eftir.

Fyrir suðvestan landið myndaðist nefnilega óvænt lægð sem gerði það til dæmis að verkum, að sú ætlun mín fór gersamlega í vaskinn að fljúga frá Akureyri til Suðurlands með Jón heitinn Gunnlaugsson eftirhermu sem farþega. Ég varð að snúa við í Tungudal, sem er gengur samsíða Norðurárdal frá Skagafirði yfir í Eyjafjörð. Heilmikil og dramatísk saga er að segja frá þessu flugi og skal það látið ógert í þetta sinn. 

Það hefur verið Mallorca-veður um mestallt land undanfarna daga og því spáð áfram yfir helgina nema hvað það gæti rignt í skúrum um sunnanvert landið aðra nótt og á mánudag ef marka má spárnar.

Hins vegar hrekk ég örlítið við þegar ég hlusta á flugveðurspána í númerinu 9020600. Minnst er á að lítil lægð hafi fæðist fyrir suðvestan land. Einnig hefur verið ansi þungbúið á suðvesturhluta landsins langt fram eftir degi í dag.

Mey skal að morgni lofa..., segir máltækið, og kannski rétt að bæta við: ...og verslunarmannahelgi að kvöldi.

Ég á erindi á morgun vestur á land og bíð spenntur eftir því hvort spákortin á vefnum "vedur.is" gefa það Mallorca-veður sem þar er sýnt. Er tvístígandi yfir því hvort ég eigi að fara á opna litla blæjubílnum mínum eða sams konar lokuðum örbíl vegna þess að þegar notað er orðið Mallorca-veður hef ég sennilega minni fílsins hvað snertir misheppnaðar veðurspár.  

Athugasemdir

[Sigurður Þór Guðjónsson, 3.8.2008 kl. 00:53]

Það er ekkert Mallorcaveðiur lengur og því er ekki spáð. Það verður bara venjuleg norðautanátt.

[Gunnar Helgi Eysteinsson, 3.8.2008 kl. 12:02]

... frábær pistill.

[Sigurður Hreiðar, 3.8.2008 kl. 12:34]

Bíð spenntur eftir ferðasögunni af fluginu með Jón Gunnlaugsson, sem þú minnist á í upphafi þessa pistils. Vona að hún komi á þessum vettvangi -- rámar raunar í að hafa heyrt einhvern ávæning af henni hjá þér munnlega -- eða var það eitthvert álíka ævintýraflug með einhvern annan ævintýramann?

Góð kveðja

[B.N. (IP-tala skráð) 3.8.2008 kl. 21:03]

Ég fór með hóp af fólki frá Spáni í hringferð um Ísland fyrir nokkrum árum. Þau elskuðu mjög mikið okkar veðurfar í þessari ferð sem var síbreytilegt. Til gamans þá var með í þessari för  þáverandi fylkisstjóri á Mallorca .

Baldvin Nielsen, Reykjanesbæ