Samt á að stefna í hálfa milljón tonna árlega í sjókvíaeldinu!

Á sama tíma sem máttlaus kjaftafundur verður haldinn um markvissa útrýmingarsókn gagnvart villtum laxastofnum í Atlantshafi, er stefnan sett á það að hundraðfalda sjókvíaeldið á tíu árum, talið frá árinu 2014 ! 

Æsingurinn og firringin sem birtast í þessum fyrirhugaða veldisvexti er á þeim skala, að veldur kjálkasigi á venjulegu fólki.  

Rétt er að benda á fróðlegan bloggpistil Jóhanns Elíassonar um samanburð á sjókvíaeldi og landeldi hér á Moggablogginu og spyrja, hvernig í ósköpunum sé ekki hægt að koma neinum böndum á þessi ósköp. 

Bubbi gerði heiðarlega tilraun í beinni útsendingu fyrir skömmu að vekja athygli á þessu máli, en stjórlaus græðgi hinna nýju sægreifa kaffærir umræðuna, þar sem efasemdarmenn um þessi firn eru útnefndir sem óvinir landsbyggðarinnar og þaðan af verra. 

Laxinn í útrýmingarhættu

Ömurleg tekjulind.

Lýsing Eiðs Smára Guðjohnsen á böli spilafíknar og áfengisfíknar leiðir hugann að þeim ömurleika, sem felst í því að láta líknar- og góðgerðarstofnanir neyðast til þess að fá tekjur af spilakössum eða eftir öðrum leiðum þar sem tekjur stofnananna byggjast a fíkn fíklanna, og eru þess vegna væntanlega þeim mun meiri sem meiru er eytt í viðkomandi fíkn, svo sem spilakassa.  

Eiður Smári opnar sig um fíknivanda

Að "vélar vinni störfin og enginn geri neitt..."? Ekki enn, en senn hársbreidd frá því.

Eins og greint var frá í pistli hér á síðunni í fyrradag, hefði verið betra að hærra ártal en 2012 í lagi með heitinu "Árið 2012", til dæmis árið 2071. En vegna hrynjandans í hinu erlenda kántrílagi voru sjö nótur í því ártali, tveimur fleiri en í 2012.  

En að einu leyti erum við alveg hársbreidd frá því að laglínan um veldi gervigreindarinnar yrði raunveruleiki ársins 2012:

"Og veröldin var skrýtin, það var allt orðið breytt, 

því vélar unnu störfin og enginn gerði neitt."

Sem dæmi um tölvutæknina og gervigreindina má nefna, að greiningartölva fyrir krabbamein getur flett á augabragði upp öllum þeim þúsundum greina í læknablöðum heimsins, sem hafa verið gefnar út um krabbamein og fengið niðurstöðu um bestu lyfjameðferðina og greininguna viðkomandi krabbameini á dagstund, á þúsundföldum hraða læknis. 

Gervigreindar tölvutækninni fleygir nú svo hratt fram, að þeir sem best þekkja þar til, spá meiri iðnbyltingu í þeim efnum, sem yrði mesta bylting af því tagi í sögunni. 

En hvað um línuna "...vélar unnu störfin og enginn gerði neitt."? 

Þar stendur kannski hnífurinn í kúnni að vissu leyti. Það þarf nefnilega að hanna og framleiða allar þær vélar, sem vinna störfin, og líka að gera við þær þegar þær bila. 

Og svo þarf kannski að forrita upp á nýtt. Við vitum að hundruð þúsunda vinnandi fólks vinnur nú þegar við að "uppfæra" allan fjandann.   

En engu að síður má sjá á öllu hinu gríðarmarga, sem nú er verið að finna upp á þessu sviði, að fullyrt er að búin verði til forrit, sem framleiða forrit og uppfæra þau; jafnvel nýjar og nýjar kynslóðir forrita!  

Snjalltæknin nýtt við meðhöndlunina

Einkenni hins nýja eldgosatímabils?

Jarðskjálftarnir, sem þessar vikurnar eru í gangi á Reykjanesskaganum allt frá sjó við Reykjanestá og austur úr, eru athyglisverðir, einkum þeir vestustu.  

Sérfræðingar hafa talað um að eldgosin við Fagradalsfjall og aðrar hræringar undanfarin ár séu merki um að átta hundruð ára goshléi á svæðinu sé lokið.  

Engar mælingar voru þær aldir, sem eldgosin voru fyrir hléð, og því skortir samanburð að því leyti.  

Það breytir því ekki að það verður að vera við öllu búinn hér eftir þótt erfitt sé að spá miklu um það hvernig sú breyting gerist í nánari atriðum. 

Skjálftar suður af Reykjavík og við Selfoss

Ekki síður skoða aðlögun að þverrandi orkulindum jarðefnaeldsneytis.

Ráðstefna um loftslagsbreytingar og aðlögun, sem nú er haldin, er löngu tímbær. En jafnvel enn fyrr hefði mátt standa fyrir hinni hliðinni á peningnum, ítarlegri ráððstefnu um aðlögun að enn óumdeilanlegri staðreynd; að komið er að hámarki olíualdarinnar svonefndu og nú liggur leiðin óhjákvæmilega niður á við í þeim efnum sem öllu öðru fremur hefur ráðið för í orkubúskap og efnahagslífi þjóða heims. 

Jafnvel þótt nýjar olíulindir verði teknar í notkun, verða þær hér eftir óhagkvæmari og minni en hin mikla uppspretta í Miðausturlöndum hefur verið.  

Viðfangsefnið, loftslagið og orkulindirnar, skarast og þess vegna mætti síðan allt eins hugsa sér þriðja viðfangsefnið, hvernig sú skörun á eftir að virka.  

Beint: Ráðstefna um loftslagsbreytingar og aðlögun

Fyrsta Ölfusárbrúin brast 1944. Af hverju ekki 2 plús 2 á nýju brúnni?

Brúargerð á nokkrum stöðum á landinu í kringum aldamótin 1900, - Ölfusárbrú - Þjórsárbrú - brú við Klaustursel á Jökuldal og Fnjóskárbrú - markaði eins konar upphaf á vegabótum á landinu. 

En þetta var fyrir komu bílanna, og hálfri öld síðar reyndist Ölfusárbrúin orðin úrelt og brast undan þunga tveggja flutningabíla. Kraftaverki líkast var það þegar Jón Guðmundsson barst niður með ánni og komst lifandi á land. 

Nýja Ölfusárbrúin þótti voldugt mannvirki, en enginn stððvar tímans þunga nið og hún er orðin of veigalítil og afar flott ný brú komin á tteikiiborðið. 

Ef satt er, að hún eigi ekki að vera með tvær akreinar í báðar áttir vaknar spurningin hvort eina ferðina enn sé verið að spara of mikið.  

Styrkur Ölfusárbrúar í athugun

"Aukin átök í veðurfari."

Í mestallan vetur hefur það sést skýrt á veðurkortum, að veðurfarið hér á landi hefur markast af átökum tveggja öflugra loftmassa, annars vegar stórs kuldapolls yfir Grænlandi og þar norður af, en hins vegar stórs og hlýs loftmassa, sem er fóðraður af hitum í Afríku. 

Þegar sá loftmassi hefur sótt kröftuglega til norðurs hefur það í grófum dráttum valdið átökum við kalda massann með tilheyrandi öfgum í veðurfari. 

Árið byrjaði með tveimur samliggjandi mánuðum, þar sem annar var sá kaldasti í marga áratugi, en hinn sá hlýjasti í marga áratugi. 

Afl hlýja massans hefur notið góðs af hækkandi stöðu sólar á útmánuðum, en hins vegar nýtur sólarhæðar nær ekkert á pólsvæðinu og þess vegna hefur kuldasvæðið staðið fast á móti. 

Allt er þetta hluti af birtingarmynd hlýnandi lofstlags hvað heildina varðar á jörðinni og í samræmi við kenningar um það.  

Hitabylgja á Bretlandi gæti haft áhrif á Íslandi

"Hvað er að, þegar ekkert er að, en þó er ekki allt í lagi?" Munur á varúð og neyð.

Tilvitnunin hér að ofan er úr lítilli flökkusögu, sem flögraði um um miðja síðustu öld. 

Meiraprófskennari og prófdómari fyrir atvinnubílstjóraréttindi fór að leggja ofangreinda spurningu fyrir nemendur á lokaprófinu, og vafðist hún fyrir mörgum nemendum til að byrja með, en smám saman spurðist tilvist hennar út og hent var gaman að útkomunni.  

Spurningin var svona: "Hvað er að þegar ekkert er að en þó er ekki allt í lagi"

Rétt svar:

"Þá er litla gatið á bensínlokinu stíflað."

Útskýringin er sú, að þetta litla gat er haft til þess að þrýstingurinn haldist hinn sami inni í bensíngeyminum og utan hans þegar bensínpumpan dælir eldsneytinu úr fullum geymi, því að þegar bensínið streymir úr geyminum, skilur það eftir sig lofttæmi, sem getur valdið því að bensínpumpan gefi sig eða að geymirinn leggist saman. 

Það var hent gaman að þessu á sínum tíma, en það sést samt við nánari athugun, að þetta eru bláköld sannindi.  

Í fluginu er gerður greinarmunur á því, hvort grípa þarf til varúðarráðstana þegar truflanir eða bilanir verða, eða hvort grípa þurfi til ney'arrástafana.

Í fréttinni um "nauðlendinguna" í Keflavík á miðvikudag í fyrirsögn, en síðar um "öryggislendingu" eða varúðarlendingu. 

Ljóst virðist að í fyrirsögninni er ofmælt, og má nefna mörg dæmi um það, að blaðamenn hafi talað um nauðlendingu þegar aðeins var um varúðarlendingu að ræða. 

Nefnt skal eitt af þessum dæmum. Fyrir rúmum tveimur áratugum lenti flugmaður í meiri mótvindi en áætlað hafði verið á leið sinni frá Akureyri til Reykjavíkur. 

Þegar leið á ferðina fór að verða tvísýnt um að hann stæðist þá kröfu í flugreglum að eiga eftir bensín til hálftíma flugs þegar komið væri á ákvörðunarstað. 

Hann vissi af því að á Húsafellsflugvelli væri hægt að fá keypt bensin og millilenti því þar til að fullnægja kröfunni um varabirgðir. 

Í fréttaflutningi var hins vegar sett í fyrirsagnir að hann hefði "nauðlent" á Húsafellsflugvelli. 

Það var rangt; þetta var varúðarlending (precautionary landing) en ekki nauðlending (emergency landing). 

Flugmaðurinn braut engar flugreglur og þetta var engin frétt. 

Um þetta gilti því gamla spurningin: "Hvað er að þegar ekkert er að, en þó er ekki allt í lagi?"

Í frétt þessa dagana er greint frá því að gefin hefðu verið út fyrirmæli um aukaskoðun á burðarvirki í Boeing 737 MAX. 

Um hana gilti, að ekki væri ástæða til að óttast slys af þessum ástæðum, heldur nægði að ganga sérstaklega úr skugga um það að rétt hefði verið staðið að gerð burðarvirkisins. 

Í viðtali við talsmann Icelandair kom fram að farið yrði að þessum tilmælum flugmálayfirvalda og framleiðanda.   

 

 

 

 

Nauðlenti í Keflavík vegna tæknibilunar

Jákvætt að lækka verðið og auka framboð á ódýrari rafbílum.

Það er jákvætt og þarft þegar Brimborg lækkar verð á nýjum bílum.  Í umræðum um rafbíla hefur heyrst kvartað yfir litlum möguleikum hinna tekjulægri. 

Nefna má þrjá möguleika til þess að vinna gegn þessu. 

Að lækka söluverð nýrra bíla þegar færi gefst. 

Að flytja inn nóg af ódýrum rafbílum. 

Aö nýta markaðinn fyrir notaða rafbíla. 

Síðuhafi hefur skoðað þann nýja bíl, sem nú er kominn á markað í Danmörku og víðar og er sá ódýrasti á markaðnum, en það er Dacia Spring, sem selst þar á verði sem samsvarar um þremur milljónum á markaði hér á landi. Bíllinn er sá langódýrasti á markaði nýrra bíla. 

Nokkrir bílar eru komir á bílasölu hér, að minnsta kosti á Bílalind is. 

Auk beinnar skoðunar á Spring er hægt að sjá reynsluakstur á youtube og lesa nánar í dönsku bílablaði með yfirlit yfir rafbíla í boði þar í landi. 

Hönnuðir Spring nota nokkrar snjallar lausnir til að ná markmiðunum um ódýran rafbíl með nothæf sæti og farangursrými fyrir fjóra. 

Þeim tekst að koma þyngd bílsins niður í aðeins 1045 kíló, meðal annars með því að minnka rafhlöðuna niður í 27,2 kwst.  Það kostar að vísu slaka drægni, en þó 230 kílómetra.

Með sparnaði á rými fyrir rafhlöðuna eykst rými í aftursæti og farangursrými líka. 

Það ætti að gefa möguleika á að fara frá Reykjavík til Akureyrar með því að stansa tvisvar á hlaðhleðslustöð á leiðinni.  Bíllinn nýtur sín annars best í innanbæjarakstri þar sem með lagni er hægt að komast í 300 km á hleðslunni. 

Bíllinn er sá mjósti á bílamarkaðnum hér og aðeins 3,73 m á lengd og því afar lipur í þrengslum í borgarumferðinni, minni en Yaris og álíka stór og nýi Aygo. 

Til þess að aðstoða við að ná fram góðri drægni er vélaraflið aðeins 45 hestöfl, en það nægir samt til að ná 125 km/klst hraða. 

Í stillingu fyrir sparakstur takmarkast vélaraflið við 31 hestafl, en það nægir samt til að halda 100 km hraða. 

Með skynsamlegri stillingu á sætunum fæst rými fyrir fætur og höfuð sem er jafnvel aðeins meira í aftursætunum en á Honda-e og Opel Corsa-e. 

Skammt frá Spring bílnum mátti sjá fjðgurra ára gamlan Nissan Leaf á svipuðu verði í nýr Spring og eftir því sem árin líða fjölgar möguleikunum til að fá sér notaðan rafbíl á viðráðanlegu verði.  

Brimborg lækkar verð á nýjum bílum

"...yfirmaður hans var lítill vasatransistor..."

Þegar textinn "Árið 2012" var í smíðum fyrir 55 árum, var auðvitað erfitt að giska á allar þær breytingar, sem orðið gætu á hinum mörgu sviðum mannlífsins eftir öld eða svo.  

Best hefði verið að ganga lengra fram í tímann við val ártalsins, en gallinn var bara sá, að vegna atkvæðafjöldans í hinu nefnda ártali svo að hann gengi upp í söng lagsins, voru aðeins fimm atkvæði eða tónar til umráða, "tvö-þús-und-og tólf". 

Það var hæsta fimm tóna talan á 21. öldinni. Hinar voru 2001, 2002, 2öö3, 2005, 2006, og 2007. 

Næsta tala á eftir 2012, sem var aðeins fimm tónar, var talan 3001 !

Það mátti gruna að tölvur og reiknivélar yrðu smáar, með mörg þúsund sinnum meiri vinnslugetu en tölvurnar höfðu á sjöunda áratugum 20. aldarinnar, en erfiðara að giska á hvaða nafn þau undur framtíðar myndu bera. 

Orðið örgjörvi var ekki til og því var notast við orðið transistor:

"Og ekki hafði neitt að gera útvarpsstjóri vor, 

því yfirmaður hans var lítill vasatransistor..." 

Í fyrsta sinn sem tölva með hámarksgetu þess tíma var notuð í kosningasjónvarpi, var svonefnd Háskólatölva notuð, en sagt var að hún þyrfti pláss í heilu herbergi.

Kæmist líkast til fyrir í brjóstnælu á okkar tímum.  

Eitt breyttist lítið frá 1968 til 2012:

"...og þingmennirnir okkar voru ei með fulle fem..."

 

 

 

Fagna 50 árum og endalokum stórtölvunnar