Mikið um að vera í Madrid varðandi umferðarmálin.

Gísli Sigurgeirsson rafeindavirki, sem er þúsundþjalasmiður á sviði rafhjóla og endurbætur á rafbílum, er nýkominn úr heimsókn til Madridar á Spáni og sagði síðuhafa heldur betur sögurnar af því marga sem yfirvöld þar eru að bralla til þess að vinna úr umferðarandamálunum þar.

Þetta átak til orkuskipta og betri orkunýtingar, auk aðgerða gegn útblæstri, eru enn fjölþættari en greint er frá í tengdri frétt á mbl.is.

Yfirvöldin virðast vita það, sem við Íslendingar virðumst ekki fatta, að hver sá sem ferðast á hjóli, reiðhjóli, rafreiðhjóli, rafknúinni "vespu" eða sparneytnu og útblástursmildu vélhjóli, er í raun að gefa einum auka bílstjóra á einkabíl eftir það rými, sem hjólamaðurinn hefði annars tekið í plássfrekri bílaumferðinni. 

Í Madrid er tæknibylting varðandi hjól af öllu tagi komin á veg með því að opna fyrir fjölbreyttar tækninýjungar varðandi rafknúin hjól á borð við byltinguna sem Gogoro á Tævan hefur staðið fyrir.

Í höfuðborginni þar, um 350 þúsund manna borgarsamfélagi, eru komið net 757 skiptistöðva fyrir rafnhlöður í hjólin, sem ná allt að 80 km hraða og drægni upp á 80-120 kílómetra á hleðslunni.

Útskipting rafhlaðnanna tekur sex sekúndur og notað app eða kort við það sem færir svona endurnýjun orkunnar yfirburði yfir bensíndælurnar á bensínstöðvunum.

Honda er á leiðinni með Honda PCX rafhjól og hybrid hjól, (23sm styttra en hjólið á myndinni sem er Honda Forza 125) og margir framleiðendur eru á fullri ferð með álíka útfærslur á því að leysa orku-, útblásturs og rýmisvandamálin í umferðinni.

Nefna má kínverska framleiðandann Niu, hin þýsku Unu, Kumpanhjólin og fleiri, þar sem útskiptanlegar rafhlöður eru komnar í gagnið.

Auk þessa er við hornið aukin notkun rafknúinna örbíla eins og Microlino, Tazzari og hins sænska Unity, þar sem hugvitið sænska er líklegt til afreka. 

Hægt er að leggja þremur Microlino bílum þversum í stæði fyrir einn venjulegan bíl, og séu þrír slíkir bílar á ferð losa þeir pláss í umferðinni fyrir einn auka einkabíl af venjulegri stærð. 

Gísli Sigurgeirsson situr ekki auðum höndum við sína hjólasmíð og endurbætur frekar en fyrri daginn. 

Hann hefur smíðað rafknúna fjallahjólið Sleipni, breytt tveimur venjulegum reiðhjólum í rafreiðhjólin Sörla og Perlu og á auk þess tveggja manna rafreiðhjól. 

Þar að auki hefur hann endurbætt Mitsubishi i-Miev rafbíl verulega. 

Síðuhafi hefur sömu reynslu og Gísli varðandi það að hjólin nýtist mun betur en Íslendingum er tamt að halda. 

Undanfarin fjögur ár hefur ekki fallið úr vika sem síðuhafi hefur ekki getað notað hjólin tvö, Náttfara og Létti, svo framarlega sem hann hefur verið ferðafær á annað borð. 

 

  

 

Hart tekið á mengandi bílum

Hve lengi verður forsetinn einn?

Ein meginástæða lúmskrar undiröldu í kjaramálum, sem birtist í fylgi Sósíalistaflokks Íslands er aðgerðarleysi íslensku elítunnar og yfirstéttarinnar gagnvart afrakstri sjálfstöku hennar hvað varðar eigin launahækkanir, sem hafa gengið fram af svo mörgum. 

Í meira en ár hefur meira að segja maður, sem sjálfur sagðist hafa verið meðal innvígðra og innmúraðra í Sjálfstæðisflokknum spurt spurninganna sem brenna á vörum margra: Hvenær ætlar elítan að skilja þetta og bregðast við?

Forseti Íslands var hinn eini sem afsalaði sér hluta launa sinna til góðgerðarmála eftir hinn makalausa úrskurð Kjaradóms, sem var búinn til að æðstu valdamönnunum sjálfur, og ætli ástæðan hafi ekki verið að miklu leyti sú, að forsetinn er eini ráðamaðurinn sem er kjörinn beint af þjóðinni með beinni kosningu?

Beint lýðræði hefur verið sameiginlegt áhugamál okkar Styrmis um áratugaskeið. 

Meira að segja þingmenn Flokks fólksins, sem hefur kjör hinna verst settu sem sitt stóra mál, hafa ekkert aðhafst í ætt við það sem forsetinn hefur gert, heldur barist á banaspjótum Klausturmálsins og rifist um innri peningamál flokksins i blaðagreinum. 

Hlusta á það sem fólkið hefur að segja

Ástæðan fyrir því að May situr enn: Vantar samkeppni?

Það hefur ekki vantað hrakspárnar varðandi setu Theresu May í stóli forsætisráðherra. Aftur og aftur hefur henni verið spáð því að hrökklast frá. 

Samt hangir hún enn, þrátt fyrir öll áföll og vandræði, óg þegar um svona ástand er að ræða, verður niðurstaðan að leit að ástæðu sú, að þetta segi meira um þá sem keppa að því að komast í Downingstræti en hana sjálfa. 

Það virðist sem sé enginn vera þarna úti í augnablikinu sem sé skárri. 

Corbyn aldrei verið óvinsælli