"Það sem hefur aldrei gerst áður..."

Skoðanakönnun Fréttablaðsins og Stöðvar tvö um það hvort fólki vilji að Ólafur Ragnar Grímsson gefi áfram kost á sér að gegna forsetaembættinu leiðir hugann að hefðum og því þegar eitthvað gerist sem hefur aldrei gerst áður.  

Hefðir eru yfirleitt ekki til á blaði, - þær myndast smám saman og stundum eru þær rofnar.

Á síðustu árum hefur margt gerst hér á landi, sem hefur aldrei gerst áður, svo sem Hrunið og margt sem tengist því.

 Nokkur dæmi um það sem hefur aldrei gerst áður tengjast Ólafi Ragnari Grímssyni, forseta.

Fram að árinu 2004 hafði það aldrei gerst áður að forseti nýtti sér málskotsrétt 26. greinar stjórnarskrárinnar.

Aldrei áður hefur það gerst að forseti hafi nýtt sér þennan rétt oftar en einu sinni og oftar en tvisvar.

Það hefur verið hefð að í síðasta nýjársávarpi sínu á kjörtímabili sínu hafi forsetar tilkynnt það ef þeir gæfu ekki kost á sér áfram. Ef þeir hafa ekki minnst á það hefur það verið tekið sem gefið að þeir gæfu áfram kost á sér.

Í nýjársávarpi sínu rauf Ólafur Ragnar þessa hefð með því að halda þeim möguleika opnum, þrátt fyrir yfirlýsingu um að vilja gjarnan hætta, að hann kynni að láta til leiðast að halda áfram.

Slíkt hafði aldrei gerst áður hjá fyrri forsetum.

Þess vegna hefur ríkt óvissuástand í þessu efni, sem aldrei hefur ríkt áður, einkum vegna þess að vinir Ólafs og fleiri stuðningsmenn hrundu af stað undirskriftasöfnun þar sem skorað er á hann að gefa kost á sér áfram, en það hefur heldur aldrei gerst áður að hliðstæð undirskriftasöfnun hafi farið af stað.  

Ef Ólafur gefur kost á sér og verður kjörinn forseti, yrði hann  kjörinn í fimmta sinn, sem hefur aldrei gerst áður, og hann gæti setið í alls 20 ár á forsetastóli með því að sitja út kjörtímabilið, en það hefur aldrei gerst áður.  

Þá yrði hann 73ja ára eða álíka gamall og þegar Adenauer kanslari Vestur-Þýskalands var að hefja glæsiferil sinn og gæti Ólafur því átt það til að leika sama leikinn og nú með véfréttartali í nýjársávarpi tvö kjörtímabil í viðbót.

Með því að gera þetta þrisvar gæti hann búið til nýja hefð í þessu efni og fylgt glæsilegu fordæmi Adenauers með því sitja vel fram á níræðisaldur á Bessastöðum.  

Yrði hann þá búinn að sitja svo lengi í embætti að slíkt hefði aldrei gerst áður og gæti aldrei gerst aftur.

Nú liggja fyrir niðurstöður skoðanakönnunar um það hvort fólk vilji að hann gefi áfram kost á sér, en skoðanakönnun af þessu tagi varðandi forseta Íslands á þessum tímapunkti á kjörtímabili hans hefur aldrei verið gerð áður.

Ef Ólafur dregur þá ályktun af niðurstöðu skoðanakönnunarinnar og undirskriftarsöfnunarinnar að hann telji sig ekki geta skorast undan því að gefa kost á sér áfram, hefur slíkt aldrei gerst áður.

Hann færi létt með að leggja það upp hve glæsilegt þetta væri og væri með pálmann í höndunum.

Ef hann ákveður að bjóða sig ekki fram, þrátt fyrir áskoranir um það, hefur slíkt heldur aldrei gerst áður.

Hann færi líka létt með að leggja það upp hve glæsilegt það væri og væri með pálmann í höndunum.

Hvernig sem allt veltur er því ljóst að það hefur aldrei gerst áður að við höfum haft forseta eins og Ólaf Ragnar.

Það hefur til dæmis aldrei gerst áður að forseti Íslands hafi komið til Suðurskautslandsins.

Það hefur heldur aldrei gerst áður að forseti Íslands hafi dottið tvívegis af hestbaki og brotið sömu öxlina í bæði skiptin.

Í seinna skiptið sem hann datt af baki kom þó upp undantekning frá því sem er stefið í þessum pistli, því að seinni byltan og brotið voru endurtekning á fyrra óhappinu og hafði því gerst áður, þótt það hefði aldrei gerst áður að svona lagað gerðist tvisvar í röð !

Minnir það á orðtakið góða að það sem hefur aldrei gerst áður getur alltaf gerst aftur.

Orðið "einstæður" er forseta vorum tamt og hefur það fyrirbæri fylgt honum alla ævi, því að þegar hann var skírður er það næsta víst að það hafði aldrei gerst áður að nokkur annar Íslendingur héti nákvæmlega sama nafni og hann, Ólafur Ragnar Grímsson.

Og kannski er það enn í dag þannig, að það hafi aldrei gerst áður að aðeins einn maður á Íslandi héti fullu nafni Ólafur Ragnar Grímsson.

Læt ég hér staðar numið þótt fleira mætti nefna, enda líklega nóg komið, því að það hefur aldrei gerst áður  að sambærilegt tilefni hafi fundist til að skrifa svona pistil.

Meirihluti vill Ólaf Ragnar áfram

Athugasemdir

[Sævar Óli Helgason, 13.2.2012 kl. 09:55]

Jæja...!?!

-

Þar sem að hefðir eru afsökun staðnaðra huga...

Og þar sem það virðist vera orðin einhver hefð hjá þjóðinni að hafa Ólaf Ragnar sem forseta... Þá ber að koma í veg fyrir það...!

Því öll stöðnun er afturför...

(Sjá sem dæmi núverandi ríkisstjórn, en henni er stýrt af stöðnuðum hugum...)

-

Þar með er ég farinn að leita logandi ljósi að einstakling sem brotið gæti upp hefðina, en samt sameinað þjóðina...

Það held ég að þú Ómar Ragnarsson, gætir einn manna gert...!

-

Endurtek ég þessvegna það sem ég bað þig um á Gestabók þessarar síðu í gær... Og spyr þig...

Er ekki hægt að plata þig í að verða forseti minn...?

-

Þú, held ég, ert sá eini sem gætir stuggað við þessum sitjandi en samt fengið þjóðina til að sameinast...

Það er einmitt hefð hjá þjóðinni að kjósa sitjandi forseta og það verður að breyta því...

-

Gerðu það... Plís...?!?

[Jón Logi (IP-tala skráð) 13.2.2012 kl. 10:38]

Það er bara engin almennileg flugbraut á Bessastöðum

[Tobbi (IP-tala skráð) 13.2.2012 kl. 11:28]

Nú en Ómar hefur svosem lent á Bessastaðanesinu!   Og þar með er það ekki án fordæma og gæti því gerzt aftur.

[Ómar Ragnarsson, 13.2.2012 kl. 12:00]

Varðandi athugasemd númer þrjú þá lenti ég FRÚnni á Bessastaðanesi og fór aftur í loftið árið 2001 með leyfi forseta þegar ég var að fjalla um þann möguleika að gera þar flugvöll.

Varðandi spurninguna á gestabókinni þá er þetta mál allt í limbói af augljósum ástæðum.

Lendingin og flugtakið á Bessastaðanesinu er hins vegar borðliggjandi og var það sýnt í Sjónvarpinu á sínum tíma.

Þar með er það eina sem liggur fyrr, að ég gæti boðið upp á þann möguleika að verða eini forsetinn í heiminum, sem getur farið á forsetaFRÚnni um land allt !

[Sævar Óli Helgason, 13.2.2012 kl. 12:32]

"...þá er þetta mál allt í limbói af augljósum ástæðum...?!?"

Fyrirgefðu mér heimsku og aulaskap, Ómar. En ég sé ekki þessar augljósu ástæður... Þú mátt náttúrulega eiga það við þig ef þú "þorir ekki..." Tíhíhí...!

En mér finnst það við hæfi að þú, af öllum mönnum, allavega KLÁRIR það sem við hin treystum þér til og komir á þessari stjórnarskrá sem þið sömduð fyrir okkur... Því ég treysti ekki þingi til að fara að vilja þjóðarinnar í því... Einsog mér sýnist vera að gerast..

Hvað sem svo gerist eftir það er þá þitt mál, hvort að þú hafir þá fundið þig sem forseti eða ekki... En enn og aftur ég skora á þig... Nei, ég mana þig því ég veit að hefur svoddan keppnisskap...Hehehe...!

Í öllum bænum... Værir þú ekki til í að verða minn forseti...?

kv. Sævar Óli Helgason

[Jón Logi (IP-tala skráð) 13.2.2012 kl. 13:14]

Æjá, ég man nú líka eftir nauðlendingu á veginum þarna rétt við.

En það vildi svo til að meir að segja mér var eitt sinn boðið á Bessastaði, og mér fannst þetta nú vera hálfgerðir bleðlar þarna í kring, enda öðru vanur :D

[Þorsteinn Briem, 13.2.2012 kl. 14:04]

Aldrei hefur áður fæðst,
Óli Ragnar Grímsson,
í huga hans var útrás æðst,
einkanlega í London.

[Ásthildur Cesil Þórðardóttir, 13.2.2012 kl. 17:58]

Góður pistill Ómar.  Eða eins og sagt er; það sem aldrei hefur gerst getur alltaf gerst aftur.