Í Gerðum í Garði? Nei, í Reykjavík !

Fyrirsögn í frétt á mbl.is um byssumann í Gerðunum er ruglingsleg og bara til að rugla menn í ríminu og fara að halda að byssumaðurinn hafi verið í Gerðum í Garði.

Þegar fréttin er lesin sést að þessi Gerði eru í Reykjavík, en síðan umrætt hverfi var reist fyrir rúmri hálfri öld hefur það gengið undir nafninu Smáíbúðahverfi.

Ég bloggaði nýlega um vankunnáttu og rugl í meðferð fólks á örnefnum utan Reykjavíkur en nú hefur leikurinn borist inn í borgina.

Athugasemdir

[Þorsteinn Briem, 3.1.2009 kl. 01:12]

Í Gerðum það eitt sinn gerði,
hún Gerður með honum Merði,
í litlum voru garði sem var gervi,
þau gerðu það smá í íbúðahverfi.

[eyþór jónsson (IP-tala skráð) 3.1.2009 kl. 01:43]

steini þú sökkar....sorry þú ert örugglega ágætis gaur en plís hættu..................

[Þorsteinn Briem, 3.1.2009 kl. 02:15]

Eyþór Jónsson. Sá sem skrifar nöfn manna með litlum stöfum, meira að segja sitt eigið, og þar að auki "sökkar", "sorry" og "plís" í sömu línunni, hefur ekki hundsvit á íslensku máli yfirhöfuð, þannig að ég bendi þér vinsamlegast á að skipta þér ekki af vísum á annarra manna bloggsíðum, hvort sem þér líkar þær betur eða verr.

[Valur Björn (IP-tala skráð) 3.1.2009 kl. 05:04]

Ómar,ég bý nú svo vel að búa með frænku þinni hérna í Garðinum en ég er ekki alveg að kveikja á Gerði eða Gerðum hérna.

[Ari (IP-tala skráð) 3.1.2009 kl. 05:18]

Langar að spyrja þig um eitt: strákurinn sem braut glugga í Réttarholtsskóla f. stuttu var sagður "á tvítugsaldri". Er hægt að segja svona? Þar sem táningsaldur er til. Á ekki alltaf að nota það einmitt. "Tvítugsaldur" er aldrei notað og á ekki að nota eða hvað? Aðeins ætti að nota þrítugs-, fertugs-, o.s.frv.  , ertu með e-ja skoðun á þessu?

[Haraldur Bjarnason, 3.1.2009 kl. 06:49]

Ég stoppaði við lesturinn þegar ég sá þessa fyrirsögn Ómar og fór að spá í hvar þetta Gerðahverfi væri í Reykjavík. Svo sá ég að þessi maður hefði sést í Breiðagerði og áttaði mig á að þetta var í Smáíbúðahverfinu. Nýyrðasmiðir mbl.is fara á kostum eins og þegar fyrirsögn á frétt um bilun í hugbúnaði Kárahnjúkavirkjunar var: "Rekstrarbilun." Ég skildi ómögulega að rekstur bilaði.

[Hildur Helga Sigurðardóttir, 3.1.2009 kl. 07:14]

Mér finnst þetta nú bara nokkuð skondin vísa hjá honum Steina Briem.

Hvað byssumanninn í Gerðunum varðar þá gekk ég út frá því sem vísu, miðað við fyrirsögnina, að þarna væri átt við Gerði í Garði.   Las reyndar ekki fréttina, bara fs.

En Suðurnesjamenn -og ég- kunnum þér þakkir fyrir að benda á þetta Ómar.

Hvað er eiginlega orðið af "málfarspervertunum", eins og slíkir, bráðnauðsynlegir, tuðarar voru kallaðir á Fréttastofu Útvarps í eina tíð ?

[Þorsteinn Briem, 3.1.2009 kl. 13:43]

Þegar ég byrjaði að vinna sem blaðamaður á Mogganum hafði ég tekið próf ásamt um eitt hundrað öðrum í íslensku, dönsku og ensku en þá var ég ekki einu sinni kominn með stúdentspróf. Hafði hins vegar meðal annars búið í sveit og verið á sjó. Var sendur í sveit sex ára gamall og gleymdist þar.

Síðar var ég í háskólanámi, bæði hérlendis og erlendis, í tölvunarfræði, hagfræði og lögfræði en er ekkert betri í íslensku en þegar ég var tólf ára gamall í Húsabakkaskóla í Svarfaðardal. En skólinn var lagður niður, þar sem hann var of lítill fyrir stórmennið Hjöra á Tjörn.

Þegar vísurnar mínar eru orðnar svo góðar að enginn hefur gaman af þeim hætti ég að semja vísur.

Vegnar ímyndaðs sparnaðar hafa verið ráðnir ritsóðar á Mbl.is sem kunna ekkert í íslensku en verið útskrifaðir í svokallaðri fjölmiðlun af háskólalektorum og -traktorum, dósentum, Dósóþeusum og dósasöfnurum, sem agnúast út í Smáralindarbæklinga. Og þar að auki búnir að hanga árum saman á Msn með sínar skammstafanir, enskuslettur og hroðvirkni.

Það hringlar í hausnum á þessu liði og það ætti allt að vera með bert rassgatið í gapastokk niðri á Austurvelli. En það er nú svo sem enginn munur á því og að æla daglega yfir þjóðina fávisku sinni allri hér á Mbl.is.

[Elín Sigríður Grétarsdóttir, 3.1.2009 kl. 17:52]

ég bjó einmitt í þessu hverfi öll mín uppvaxtarár, hef aldrei heyrt talað um Gerðin!

[sigurvin (IP-tala skráð) 3.1.2009 kl. 18:15]

Eru Gerði í Garði eða Garður í Gerðum? Ég hélt að Garður væri í Gerðum en það er bölvuð vitleisa, Gerði eru í Garði, milli út- og inn- Garðs. Þurfti að fletta þessu upp, það þurfa heimamenn líka að gera. Allt rétt hjá Ómari. Hitti eitt sinn mann sem vissi ekki hvar Kvíguvogar voru, hann bjó í Vogunum (nei, ekki í Reykjavík).

[Eiður Guðnason (IP-tala skráð) 3.1.2009 kl. 19:58]

Okkur sem ættir  eigum  í Garðinn hnykkti  mörgum  við að heyra  talað um Gerðahverfið í    Reykjavík, þegar átt var   við  Smáíbúðahverfið  sem  svo hefur verið kallað í   meira en hálfa öld. 

Gerðar eru í  Garðinum miðjum, Inn-Garður     austan við og Út-Garður  vestan  við.  Gott  hjá  þér  Ómar að  benda á þetta.  Ég minnist þess  strákur að hafa heyrt talað um Gerðahverfið   í Garðinum, og  var þá  átt  við  húsin  við Gerðagötuna, sem lá og liggur  frá þjóðveginum niður að  bryggjunni og  frystihúsinu    sem einu sinni hét Hraðfrystihús Gerðabátanna, muni ég rétt.

En  svo einn "málfarspervertinn" láti í sér  heyra þá  var ekki ónýtt  að  heyra  einn af fréttamönnum   Ríkissjónvarpsins  tala um "fjallagarða" og "harðneskjulega vegarspotta" í fréttunum áðan.

[Olgeir Engilbertsson (IP-tala skráð) 3.1.2009 kl. 21:09]

Ég tek undir með þeim sem hér hafa skrifað um málfarið á Mbl.is.   Stundum er ruglað saman orðtökum og fleira athugavert. Þeim sem setja inn fréttir er að vísu vorkunn  þar sem allt þarf að ganga hratt fyrir sig. Nýlega var sagt að bíll hefði lent í árekstri við bæ. Svo  kom í ljós að áreksturinn var á móts við þennan bæ. Með kveðju Olgeir.

[Ómar Ragnarsson, 4.1.2009 kl. 00:47]

Ég hef enga sérstaka löngun til að hafa málfar á mbl.is sérstaklega á hornum mér.

Ástæða þess að tilefnin tengjast oftast mbl.is er að þar erum við bloggararnir samankomnir og þetta blasir við okkur.

Í mörgum fjölmiðlum er málfar verra.