Kirkjugarðar eru mikilvæg græn svæði. Margnota kistur?

Kirkjugarðar taka að sönnu mikið rými og á þessari bloggsíðu hafa áður verið reifaðar hugmyndir um breytta tilhögun við greftrun, sem fæli að vísu ekki í sér brennslu, heldur umhverfisvænni notkun á líkkistum og minni grafir. 

Í stuttu máli felst hugmyndin í því að vefja líkið inn í vistvænan poka og nota margnota kistur, sem væru með opnanlegum botni á hjörum, þannig að eftir að allir væru farnir frá gröfunni, kæmu starfsmenn kirkjugarðsins, losuðu botninn, sem sérstök taug lægi í, hífðu kistuna upp og mokuðu mold ofan á likpokann. 

Með þessu væri komist sem næst moldunartextanum "af jörðu/moldu ertu kominn..." og sparaður trjáviður. 

Nýtt kirkjugarðsstæði í hlíð Úlfarsfells er ágæt hugmynd hvað varðar það, að ekki er heppilegt við íslenskar aðstæður að hafa íbúðabyggðir í miklum bratta að vetrarlagi. 

Kirkjugarðar geta verið ágæt svæði til útivistar, svo framarlega sem gengið er um þá af hljóðlátri virðingu. Og frá komandi kirkjugarði í hlíð Úlfarsfells yrði prýðis útsýni. 

Á legsteinunum má stundum ráða í ákveðna sögu, svo sem í áletrununum  "Hér hvíla hjónin...." eða þegar lítið barn hefur fengið legstað hjá fullorðnum. 

 

Nýr kirkjugarður mótaður í Úlfarsfelli

Tóta frænka reykti eins og skorsteinn og varð 89 ára.

Aldur getur verið afstæður og er oft í genunum, þannig að það er eins og að eins konar lífsklukka sé í gangi. Sú hlýtur að vera raunin með elstu konu heims. 

Þegar ég var krakki hélt ég mikið upp á afasystur mína, Þórunni Guðbrandsdóttur. Á þeim tímum var fólk yfirleitt duglegara að heimsækja ættingja sína en síðar varð.

Tóta frænka varð mér minnisstæð fyrir það hve mér fannst hún flott kona.

Kannski er það bara aldur þessarar minningar sem gerir mynd hennar í huga mér skylda máltækinu um að fjarlægðin geri fjöllin blá og mennina mikla.

Í minni mínu var Tóta eitthvað svo sjálfstæð, enda var hún einhleyp og barnlaus og réði sér sjálf.

Í minningunni sat hún uppábúin í stól þessa sunnudaga sem við heimsóttum hana í Laugarnesinu, virðuleg eins og bresk aðalskona og reykti stóra vindla.

Mér skildist að hún reykti mikið, bæði vindla og sígarettur, en á þessum tíma voru reykingar frekar sjaldgæfar hjá konum. Hún reykti víst einhverja pakka á dag. Samt varð hún rétt tæplega 89 ára gömul og hélt vel reisn sinni og virðuleika.

"Þarna sjáið þið", segja kannski einhverjir, reykingarnar hafa ekkert að segja,

En svarið við því er einfalt:

"Ragnhildur systir hennar reykti ekki og varð 102ja ára!   

117 ára og á 97 ára gamlan son

Skilur forsetinn ekki að fleira geti ráðið gjörðum fólks en peningar?

Donald Trump forseti Bandaríkjanna virðist ekki skilja, að neitt annað en peningar geti ráðið því að fólk taki þátt í mótmælum gegn honum. 

Honum er að vissu leyti vorkunn, því að allur ferill hans og þar með viðhorf eru mótuð af valdi fjármagns og peningavafstri. 

Forsetanum er líklega enn ómögulegra að skilja, að fólk leggi framlög úr eigin vasa til slíkra aðgerða. 

Og ómögulegt að skilja að meðal þess meirihluta kjósenda, sem greiddu Hillary Clinton atkvæði, þótt ósanngjarnt kjörmannakerfi kæmi í veg fyrir réttlát úrslit, skuli vera fólk, sem leggur ekki hundflatt rófuna niður og hættir að nýta sér borgaralegan rétt sinn til andófs.  

Hver borgaði fyrir mótmælin spyr Trump

Harður heimur vegna hruns í diskasölu.

Í nýlegu viðtali við Eið Arnarson formann félags hljómplötuútgefenda kom fram að tæknibylting og breytt viðskiptaumhverfi leiki tónlistarfólk grátt og skapi nýjar áskoranir fyrir það. 

Þótt cd-diskurinn sýnist ekki fyrirferðarmikill er nú svo komið, að það er kostur að í fartölvum sé því sleppt að hafa diskaspilara í þeim. 

Ég hef til dæmis beðið eftir því í mörg ár að á markað kæmi tölva, sem væri handhægari en ódýrustu tölvurnar hafa verið, en samt með nógu stórt lyklaborð til að "blind fingrasetning" gæti notið sín með sínum mikla hraða. 

Vegna bilunar í tölvu minni stóð ég frammi fyrir því fyrir skemmstu að þurfa að leita að smærri tölvu til að leysa hana af hólmi, eða í það minnsta að geta verið í notkun samhliða henni, því að á okkar tímum er óráð að treysta á aðeins eina tölvu. 

Bara lítil "smábilun" eins og að pinni í heyrnartóli brotni inni í tölvunni, kostar tölvumissi á meðan gert er við hana. 

Brot úr pinna inni í tölvunni gerir hana gagnslausa við að spila tónlist í henni í gegnum hátalara. 

Við snögga skoðun kom í ljós að komin var ný og miklu handhægari, mjög ódýr tölva á markaðinn, sem var meira en tvöfalt minni en sú gamla, en samt með nægilega stóru lyklaborði, meðal annars með því að sleppa diskaspilaranum. 

Nú orðið þarf að panta diskaspilara sérstaklega með nýjum bílum og hrunið á markaðnum fyrir hljómdiska (plötusalan) síðustu misseri hefur verið mikið og þungbært. 

Spotify er miðað við stærð milljónatuga þjóða og því sáralítið sem íslenskt tónlistarfólk fær þar. 

Tónlistarfólkið hefur því orðið að snúa sér að því sem aðalatriði í afkomu sinni að koma fram á tónleikum og nýta nýjar aðferðir við að afla sér tekna með því að gera nýjar plötur.

"Léleg plötusala veitir listrænt frelsi" er táknræn fyrirsögn á tengdri frétt á mbl.is. 

Eftir sem áður hefur hljómdiskurinn þó þann kost að geta verið eiguleg gjöf í vönduðum umbúðum með góðum textaheftum.   

Léleg plötusala veitir listrænt frelsi

Þegar langalangamma var skráð inn í fyrsta bekk grunnskólans.

Það er ekki fráleitt að þeir, sem vilja vestræna þjóðfélagsgerð feiga með því að beita hryðjuverkaógn, séu ánægðir með árangur sinn í að valda ótta og móðursýki í vestrænum samfélögum þegar þeir frétta af því að þriggja mánaða gamalt barn hafi verið úrskurðað sem hryðjuverkamaður og meinað að ferðast til Bandaríkjanna, og að í ofanálag hafi barnið verið boðað í viðtal hjá bandaríska sendiráðinu!  

Ástæðan var fáránleg, sem sé sú að afi barnsins hafði óvart hakað við reit í ferðaheimild fyrir barnið þar sem spurt var um tengsl við hryðjuverkamenn. 

Afinn spyr réttilega hvort von sé til þess að nokkur hryðjuverkamaður fari að gefa tengsl sín við hryðjuverkasamtök upp á svona blaði, og hvers vegna hafi ekki verið auðséð að um mistök hefði verið að ræða. 

Atvikið minnir á það þegar 106 ára gömul íslensk kona fékk skipun um það hér um árið að mæta í fyrsta bekk grunnskóla. 

Þá mátti halda að erfitt væri að toppa þessi mistök, en hryðjuverkahvítvoðungurinn slær metið. 

Smá mistök hjá afanum

Klofin þjóð sem aldrei fyrr.

Tyrkland á sér sögu sem markast mjög af því að hafa verið fyrrum stórveldi, sem stóð traustum fótum í tveimur heimsálfum. 

Síðan hrundi heimsveldið að mestu, en áfram hefur hluti ríkisins verið í Evrópu. 

Þetta hefur markað sögu þess síðustu öld og valdið því að þjóðin hefur verið illilega klofin, þótt á tímabili hafi verið sótt um inngöngu í ESB. 

Sú innganga tafðist lengi vegna þess hve erfitt var að sannfæra Evrópuþjóðir um einingu Tyrkja og á síðustu árum hafa breyttar aðstæður og vandamál í Evrópu stöðvað þá framrás til evrópskra gilda og hátta sem komin var í gang. 

Nú er ljóst, að Tyrkir fara öld afturábak í lýðræðisefnum, en jafnframt ljóst að þjóðin er klofin. 

Naumur meirihluti sagði já

Er hugsanlegt eitthvað svipað og 1991 ?

George Bush eldri Bandaríkjaforseti var laginn samningamaður og hafði á sínum snærum menn, sem voru svipaðir honum að þessu leyti. 

Hann sigldi farsælu sambandi í gegn við fall Sovétríkjanna og ávann sér traust leiðtoga Sovétríkjanna og síðar Rússa. 

Illu heilli hefur það gagnkvæma traust beðið hnekki síðan. 

Bush eldri tókst að laða fram einstakt bandalag þjóða sem ekki gátu sætt sig lengur við framferði Saddams Husseins í Írak. 

Að vísu varð Flóastríðið niðurstaðan en fádæma samstaða þjóða heims náðist í því máli. 

Bush hafði vit á því að taka ekki Bagdad og róta ekki að óþörfu í viðkvæmu innanlandsástandi en illu heilli hafði sonur hans ekki burði til að fylgja fordæmi föður síns, svo að nú situr heimurinn uppi með hið hörmulega ástand í Miðausturlöndum, sem skilað hefur óróa og vandræðum norður um alla Evrópu. 

Nú væri gott að hafa við stjórnartauma mann með visku George Bush eldri til þess að ná upp samtöðu þjóða við lausn Norður-Kóreu málsins, sem heimurinn kallar eftir. 

Ef Trump vill efna kosningaloforð sín um minni umsvif Bandaríkjahers út um allar koppagrundir hefur hann tækifæri til að efna það með fulltingi H.R. McMaster þjóðaröryggisráðgjafa síns, sem skynjar, að þjóðaröryggi Bandaríkjanna er samofið öryggi allra þjóða heims. 

Þetta getur ekki haldið svona áfram

Þróun, sem verður að bregðast við.

Fróðlegt væri að vita hve margir hafa atvinnu af því að aka bílum. Það eru ekki aðeins leigubílstjórar, heldur einnig ökumenn sendibíla, fyrirtækjabíla og almenningsvagna. 

Sú var tíð að talið var stutt í að flugvélar flygju algerlega sjálfar, allt frá því að þeim væri ekið frá flugstöð í flugtaksstöðu þar til eftir lendingu og akstur að endastöð. 

En það hefur teygst úr því að þessi draumsýn verði að veruleika og meira að segja hefur aukin sjálfvirkni í stjórn flugvéla fært mönnum heim nýjar hættur á mistökum, sem bregðast hefur þurft við í þjálfun og verklagi. 

Dæmi: Á farþegaþotu einni var sjálfvirkur búnaður sem setti vængflapa niður í flugtaksbruni ef flugmenn gleymdu því. 

Á einni þotu hafði þessi búnaður verið bilaður en það ekki komið að sök, flugmenn fór vel yfir gátlistann og settu flapana niður. 

Síðan gleymdist það og flugmennirnir voru orðnir svo vanir því að vera leiðréttir sjálfvirkt að þeir áttuðu sig ekki á því og flugvélin fórst eftir að hafa farið brautina á enda á hraða, sem var mun meiri en flugtakshraði en skóp ekki nægan lyftikraft til flugtaks af því að flaparnir voru ekki niðri. 

Ótal svipuð vandamál þarf að leysa við sjálkeyrandi bíla, og í þættinum 60 mínútur sagði einn helsti yfirmaður í þessari þróun, að langt væri enn eftir við þróun þessara bíla áður en þeir yrðu almennt að veruleika. 

En svo hröð er þessi breyting samt, að í ódýrasta aldrifna bílnum, Suzuki Jimny, er þegar boðið upp á alls kyns sjálfvirkni við aksturinn. 

Einna erfiðast er að komast í gegnum það ástand, þegar hluti bílaflotans er sjálfvirkur en hinn hlutinn ekki. 

En sá fjöldi manna um allan heim, sem missa myndi atvinnuna ef þessi bylting gengi í gegn, skiptir tugum milljóna.

Um það gildir svipað og um atvinnumissi í fyrrum bílaverksmiðjum í Ryðbeltinu í Bandaríkjunum, að í stað þess að ætla að snúa tækniþróunninni til baka, eins og til dæmis Trump sagðist vilja, þarf að taka myndarlega á því að búa til ný atvinnutækifæri og gefa fólki færi á að endurmennta sig til nýrra starfa, sem skapast við breytingarnar.   

Apple þróar sjálfkeyrandi bíla

Stjarna fædd í Öskubuskuævintýri.

Einhver magnaðasti handboltaleikur um langa hríð var leikinn í Hafnarfirði í dag og útsendingin stóð í tvær og hálfa klukkustund. 

Alls voru skoruð 92 mörk í þessum maraþonleik, sem var ekki síst merkilegur fyrir þær sakir, að Fram hafði misst frá sér tíu leikmenn fyrir þessa leiktíð og var skiljanlega spáð því að skítfalla. 

Þetta Öskubuskulið lagði hins vegar Íslandsmeistarana í þessum leik og var með 16 ára barn í markinu, Viktor Gísla Hallgrímsson, sem varði á þann hátt, að segja má að stjarna sé fædd í íslenskum handbolta, nokkurs konar íslenskur Landin. 

Þessi leikur var síðan einstakt ánægjuefni fyrir mig að horfa á sem mann, sem var skráður inn í Fram þremur mánuðum fyrir fæðingu!  Til hamingju, Framarar! 

Fram áfram eftir maraþonleik

Stefnir í stórslys í náttúruverndar- og umhverfismálum að Fjallabaki?

Stórvaxandi ferðamannastraumur hefur valdið því undanfarin ár að öll viðbrögð við því ástandi, sem hefur skapast, verða æ lengra á eftir tímanum. 

Margir hafa af þessu réttmætar og miklar áhyggjur og fyrir dyrum standa miklar framkvæmdir á hinu einstæða svæði að Fjallabaki og innan friðlandsins þar, sem vekja alvarlegar spurningar um það hvert stefni. 

Sumir taka svo djúpt í árinni að segja, að það stefni í stórslys í náttúruverndar- og umhverfismálum á þessu svæði. 

Svæðið hefði fyrir löngu átt að verða skilgreint sem þjóðgarður og umgengni við það að vera í samræmi við það. 

2.300 bílar í Landmannalaugar á viku