Óreiðan er verst í akstri á rafskútum.

Rafskútur hafa reynst þarfaþing hér á landi sem annars staðar, en sögur frá Noregi um óreiðukenndan akstur og notkun þeirra eiga því miður of margar samsvaranir hér.

Sumir aka þeim gersamlega án þess að virða hið minnsta eðlilegar umferðareglur, ljóslausir í myrkri og rökkri, hjálmlausir, jafnvel tveir til þrír á skútu og þeysandi þvers og kruss um gangstéttir og götur á móti rauðum umferðarljósum og öðrum umferðarmerkjum.  

Af þeim sökum er oft sköpuð slysahætta þegar þessi hljóðlátu tæki birtast skyndilega eins og skrattinn úr sauðaleggnum og skjótast í veg fyrir aðra í umferðinni nánast hvar sem er og í hvaða átt sem er. 

Þessi nýju samgöngutæki eru alltof nytsamleg til þess að vera meðhöndluð á þennan hátt með þeim afleiðingum, sem nú má sjá dæmi um í nágrannalöndunum, svo sem í Færeyjum og Noregi. 

Læsa 15.000 rafhlaupahjólum í Ósló

Þarna opnast ný leið.

Árangur Breiðabliks í riðlakeppni Meistaradeildar Evrópu í knattspyrnu kvenna er tímamótaviðburður í íslenskri knattspyrnu og opnar nýja leið í íþróttiinni, sem fáir hefðu þorað að láta sig dreyma um fyrr á árum.  

Í Breiðabliki var lagður grunnur að þessu í upphafi kvennaboltans hér um árið, systurdóttir síðuhafa, Margrét Ólafsdóttir, var meðal burðarása liðsins og landsliðskona að auki hægt að vera stoltur af henni. 

Þarna liggur framtíðin í uppbyggingu knattspyrnunnar almennt hér á landi, og horfurnar eru afar spennandi. 

Geggjað að taka þátt í að skrifa söguna

Rými fyrir hvern bíl í bílastæði er 12,5 fermetrar, en hvert hjól 2 fermetrar.

Japanir eru sú þjóð sem fyrst gerði sér grein fyrir því til fulls hvert virði var fólgið í því rými sem farartæki taka í umferðinni.

Fyrir um hálfri öld tók þeir upp miklar ívilnanir í gjöldum á þá bíla sem voru styttri en 3 metrar og mjórri en 1,3 metrar og voru þeir nefndir kei-bílar. 

Síðan 1999 hafa þessar tölur verið 3,40 metrar á lengd og 1,48 metrar á breidd. Slíkur bíll er álíka langur og Toyota Aygo, Citroen C-1 og Peugeot 108 eru. 

Þegar nútíma kei-bílar eins og Daihatsu Cuore eru skoðaðir kemur í ljós að innanrými fyrir fjóra fullorðna í þeim er eins mikið og í mörgum miklu stærri millistærðarbílum, en rýmið sem þessir kei-bílar taka á götum og bílastæðum er 5 fermetrar nettó á sama tíma og einn pallbíll á borð við Toyota Hi-lux þarf tvöfalt meira nettórými. 

Munurinn verður enn meira sláandi þegar bornir eru saman bílar og hjól. 

Bílastæði fyrir bíl er 12,5 fermetrar en hjól, t.d. léttbifhjól í flokki A1 ("vespa") þarf fimm sinnum minna rými. Rými kostar peninga á margan hátt, svo sem í malbiki bílastæða og gatna. 

Auðvelt væri að setja hvetjstandi löggjöf ívilnana fyrir farartæki sem miðast við það hve rúmfrek þau eru.  

Stæði fyrir 550 bíla og 100 hjól

Skálar við Drekagil, Herðubreiðarlindir og Grágæsavatn. Flugbrautir 30-35 km frá.

Mannaferðir eru þó nokkrar í næsta nágrenni Öskju.

Jeppaslóðir liggja að henni úr nokkrum áttum og skálinn í Drekagili er alveg við Öskjuopið, en skáli í Herðubreiðarlindum er um 30 kílómetra akstursfjarlægð og þar er lika malarflugbraut. Herðubreið er dálítið nálægt henni og í vestanátt getur verið ókyrrð þar. 

Óróinn núna er vestan megin við Öskjuvatn, vinstra megin á þessari mynd. 

 

30 kílómetra loftlína er frá Öskju austur til fjallaskála Völundar heitins Jóhannessonar og um 35 kílómetrar loftlína, eða um tíu mínútna flug frá Öskju austur til Sauðárflugvallar, sem er langstærsti flugvöllurinn á hálendinu með fimm flugbrautir allt að 1300 metra langar. 

Askja er einhver litríkasta eldstöð landsins og til alls vís, allt frá því að ekki gjósi eða lítið hraungos verði upp í eitt af stærstu sprengigosum hér á landi, líkt og varð þar 1875. 

Í því gosi mynduðust bæði sprengigígurinn Víti, sem er næst okkur á þessari mynd,  og sjálft Öskjuvatn, þá dýpsta stöðuvatn landsins, varð þá til. 

Fyrir gosið í Holuhrauni 2014-15 var helst hallast að því að gamla Holuhraunið og gígarnir, sem það kom úr fyrir um tveimur öldum, væru á áhrifasvæði Öskju en ekki Bárðarbungu. 

Í ljós kom að gosið 2014 var knúið áfram af Bárðarbungu, og nú er spurningin hvort órói og landris í Öskju séu ekki tengd Bárðarbungu í gegnum Holuhraun. 

Lýsa yfir óvissustigi vegna landriss í Öskju

Mikilvægur farmur um borð.

Þótt nú séu liðin meira en sextíu ár síðan lunginn af snilldarliði Manchester United fórst í flugtaki í Munchen, vaknar spurningin um það hvort Þjóðverjar muni þann atburð enn þegar þeir láta flugvél með þýska landsliðið taka óvænta beygju á leiðinni til Þýskalands og lenda í öryggisskyni í Skotlandi.

Þótt aðeins sé miðað við beint markaðsvirði leikmannanna um borð er það ekkert smáræðis mikilvægur farmur, sem er um borð. 

Flugvél Þjóðverja tók óvænta beygju

Bæði gaman, gagnlegt og peningasparandi að nota vélknúin hjól.

Eftir sex ára prófun í notkun rafknúinna farartækja, er það ekki bara ánægjan af því að njóta eindæma sparneytni rafknúinna léttbifhjóla, sem stendur upp úr, heldur ekki síður hin hressandi útivera sem er gleðjandi. 

Síðuhafi var reiðhjólafrík fram til 19 ára aldurs, en hljóp yfir skellinöðrustigið beint á minnsta, umhverfimildasta og sparneytnasta bíl landsins. 

Segja má að á síðustu sex árum hafi maður verið að vinna upp glötuð unglingsár að þessu leyti.  

Fleiri vilja læra á bifhjól

Á fyrstu 25 mínútunum: Tvö þýsk eðalmörk, klassa ofar.

Þegar þetta er skrifað eru 25 mínútur búnar af landsleik Íslendinga og Þjóðverja og gestirnir hafa þegar séð til þess að íslenska liðið hefur aðeins haft boltann í um 20 prósent tímans en Þjóðverjarnir um 80 prósent. 

Þeir þýsku hafa þegar skorað tvö eðalmörk, sem svo lygilegri þýskri nákvæmni að unun er á að horfa, einkum fyrra markið. 

Íslenska liðið leggur sig að vísu fram af alefli en þetta þýska lið er einfaldlega klassa betra, enn sem komið er. 

Þjóðverjar nokkrum númerum of stórir fyrir Ísland

Flugskýli á Reykjavíkurflugvelli; spor í rétta átt.

Í Reykjavík eru þrenns konar samgöngumannvirki, sem eru nauðsynleg fyrir höfuðborg, sem vill ekki kafna undir nafni.  

Mannvirki fyrir landsamgöngur, þar með taldar gangstéttir og stígar, bílastæði og bílskúrar, taka samtals um 50 prósent af borgarlandinu, höfnin og hafnarmannvirki um 12 prósent og flugvallarsvæðið er um 10 prósent. 

Um þessi mannvirki ætti að gilda það að þau séu á sem tæknilega og rekstrarlega á besta stað. 

Sundahöfnin er mjög nálægt miðju af því að það er besta hafnarstæðið. Engum dettur í hug að leggja höfnina niður og flytja hana til Njarðvíkur til þess reisa íbúðabyggð á núverandi hafnarstæði og nýta sér það að frá útlöndum er styttra að sigla til Njarðvíkur en Reykjavíkur.  

Nú er Reykjavíkurflugvöllur á besta hugsanlega stað varðandi veðurfar og flugskilyrði og er þar að auki nauðsynlegur varaflugvöllur fyrir Keflavíkurflugvöll. Hins vegar hefur verið í gangi alveg einstök flugvallarfjandsamleg stefna um að leggja flugvöllinn niður og lengja allar flugleiðir innanlands um 170 kílómetra ferðaleið að meðaltali fram og aftur.

Loksins fæst nú eitthvað af viti gert á Reykjavíkurflugvelli, en auðvitað með því skilyrði að hægt verði að rífa flugskýlið niður eftir aðeins níu ár. 

Borgin gefur grænt ljós á flugskýli

"Ný lausn" búin að vera í áratugi erlendis. Við erum í sumu hálfri öld á eftir.

Svonefndir svífandi stígar hafa verið við lýði erlendis að minnsta kosti síðan fyrir aldamót. 

Þar eru þeir til dæmis á hverasvæðinu við Old Faithful í Yellowstone og voru þeir sýndir í sjónvarpi hér heima 1999. 

Þegar Steingrímur Hermannsson varð forsætisráðherra sendi hann komandi þjóðgarðsvörð á Þingvöllum þegar í stað í ferð til Bandaríkjanna til þess að kynna sér rekstur þjóðgarða þar. 

Sjálfur hafði Steingrímur skoðað fjölmarga þjóðgarða vestra þegar hann var þar við nám, og komið á ævinni í öll ríki Bandaríkjanna nema Alaska. 

Stundum finnst manni eins og það ríki skipulögð viðleitni okkar Íslendinga til að læra helst sem minnst af því hvernig erlendar þjóðir meta náttúruverðmæti. 

Og að það taki grátlega langan tíma fyrir viðurkenndar aðferðir við mat á náttúruverðmætum að skolast hingað til lands. 

Og umræðan hér á landi er enn á svipuðu stigi og hún var í Bandaríkjunum fyrir 50 árum. 

En burtséð frá því er framtakið við Skíðaskálann í Hveradölum lofsvert og þakkarvert og ástæða til þess að óska fötluðum til hamingju með það og jafnframt að hvetja til þess að Íslendingar, vörlslumenn einhverra mestu náttúruverðmæta heimsins, slái nú í klárinn í náttúruverndar- og umhverfismálum. 

Í vel unninni erlendri handbók um 100 undur veraldar eru um 40 þessara undra náttúrugerð. Af  þeim eru sjö í Evrópu og tvö á Norðurlöndum; hinn eldvirki hluti Íslands og norsku firðirnir. 

Í Norður-Ameríku er Yellowstone, mesta orkubúnt álfunnar, skilgreint sem heilög vé, sem aldrei verði snert. Samt kemst Yellowstone ekki á blað í þessari bók. Ís og eldur Íslands er skör hærra.  

Hér á landi má hins vegar heyra setta fram þá stefnu Miðflokksins að virkja sem allra mest til þess að reisa fleiri álver og fylgir sögunni, að það eigi að láta svonefnt "samhengi" við álver í Kína ráða. 

Ef Sigmundur Davíð er tekinn á orðinu eigum við sem sagt að gera það til þess að hjálpa Bandaríkjamönnum til að vernda sín náttúruverðmæti. 

Svífandi stígar teknir í notkun

Sandkaflinn í "stærstu sýningu heims" stendur enn.

Á svæðinu suðvestur af Vatnajökli hefur í aldir og árþúsund staðið yfir sýning, sem kalla hefur mátt "stærstu sýningu í heimi" og er knúinn áfram af eldvirkni og jarðvarma undir jöklinum og suðvestur og vestur af honum. 

Í henni hafa skipst á tveir stórir meginkaflar sem nefna má sandkafla og hraunakafla eftir þeim jarðefnum sem sótt hafa fram í hvorum þeirra. 

Nú stendur enn yfir sandkafli þar sem í Skaftárhlaupum á tveggja til þriggja ára fresti berst gríðarlegt magn af sandi sem jarðhiti á tveimur svæðum bræðir jökulinn yfir sér, bræðsluvatnið safnast fyrir og brýst loks fram í gríðarlegum hlaupum sem ber sand yfir stórt svæði.  

Síðasti hraunakafli var í Skaftáreldum 1783 þegar rann næststærsta hraunflæmi, sem runnið hefur á jörðinni á sögulegum tíma. 

Á undan því var hraunakafli í eldgosum að Fjallabaki seint á 15. öld, en mesta hraun á sögulegum tíma rann hins vegar í Eldgjárgosinu 934, og fór það hraun enn lengra í átt til sjávar en Eldhraunið 1983; alla leið niður í Meðalland. 

Sandurinn safnast fyrir, fyllir hraunið upp og er að drepa hægt og bítandi fengsæla veiðilæki í Landbroti, Tungulæk og Grenlæk. 

 

 

Hámarksrennsli verði minna en áður