Mayweather á að geta unnið á stigum. 50-0.

Talan 49-0 varðandi bardaga Floyds Mayweathers er mikilvæg fyrir hann, því að ef hann getur búið til töluna 50-0 hefur hann bætt árangur Rocky Marcianos fyrir rúmum 60 árum. 

Þegar sagt er að Mayweather hafi síðast rotað mann 2011 er tíminn enn lengri síðan andstæðingur hans kláraði ekki allar tilsettar lotur, - því að Mayweather þótti á ódrengilegan hátt hafa nýtt sér það að Ortiz var að beina máli sínu að dómaranum og hafði hendurnrar niðri. þegar Mayweather nýtt sér það og sló hann varnarlausan með tveimur höggum í gólfið.

Út af fyrir sig var þetta ekki ólöglegt, því að meginskylda hvers hnefaleikara er "að verja sig öllum stundum."

Og á þeim hæfileika hefur Mayweather einkum byggt óslitinn sigurferil sinn.

En það er liðinn um áratugur síðan bardagi hafi verið stöðvaður hjá honum, en það var á móti Ricky Hatton árið 2007, "TKO", "tæknilegt rothögg."

Sem er raunar ónákvæm þýðing, ætti frekar að vera "tæknilega sleginn út."  

Og á fyrri hluta ferils síns sáu yfirburða hraði og nákvæmni hans á besta aldri til þess að hann vann marga bardaga á rothöggi.

Vafasamt er að nokkurn tíma hafi verið uppi hnefaleikari með betri vörn en Mayweather og líkurnar fyrir því að það atriði ráði enn einu sinni úrslitum teljast vera talsverðar.

Stór spurning er að hve miklu leyti hár aldur hefur hægt á honum, en peningarnir fyrir bardagann eru tryggðir svo að verkefnið virðist einfaldlega vera það að verjast undrahröðum gagnhöggum McGregors, oftast með vinstri hendi.

Ef vörnin á að nægja er hætta á að bardaginn verði jafnvel sá leiðinlegasti á ferli Mayweathers.

Lengst af á ferli hans hafa gríðarleg tækni og mikill hraði skapað einstæðan sigurferil.

Og á pappirnum virðist það verða auðvelt fyrir hann að koma í veg fyrir að McGregor nái inn höggi á hann.

Til samanburðar má geta þess að í seinni viðureign Joe Louis og Max Scmelings 1938 þurfti Louis aðeins að gæta þess að halda vinstri hönd sinni nógu vel uppi öllum stundum, að Schmeling kæmi ekki inn sínu skæða hægri handar höggi.

McGregor er örvhentur, þannig að það að halda uppi vörnum gegn beinni vinstri, er svipað verkefni fyrir Mayweather.

En síðan eru dæmi um að þrátt fyrir fyrirfram vitað atriði í sókn andstæðings mistakist meistara að halda uppi vörnum.

Nefna má bardaga Ali og Earnie Shavers sem dæmi. Þar þurfti Ali að verjast hægri handar höggum Shavers sem voru talin þyngstu högg í sögu hnefaleikanna.

Ali gætti þess ekki að Shavers var með 15 sentimetrum lengri faðmlengd en hæð hans sagði til um og það var einungis fyrir einstætt höggþol Alis, að hann þoldi þá barsmíð.  

Frumraun McGregor í boxi nálgast

Segja of margir: "Ég kem ekki aftur"?

Eitt af því, sem mörgum sést yfir þegar lagt er mat á möguleika lands til að laða að sér ferðamenn, er það hvort ferðafólkið sé líklegt til að koma aftur til landsins.

Ég minnist þess þegar ég kom í fyrsta skipti til Mallorca með skemmtiferðaskipinu Regina Maris þar sem ég var ráðinn sem skemmtanastjóri, að ég fór í land og notaði tímann vel, leigði mér létta skellinöðru og skoðaði mig vel um.

Þegar skipið lagði frá var ofarlega í huganum: "Hingað á ég eftir að koma aftur."

Það gekk eftir löngu síðar, en þá raunar til Torremolinos á Sólarströndinni og síðar fleiri staða í Suður-Evrópu.

Nokkrum árum síðar tók ég upp puttaferðaling með bakpoka á leið til Akureyrar og var gagnrýndur fyrir að "ganga erinda bakpokalýðsins" sem gæfi ekkert af sér.

Gagnrýnendunum gleymdist að bakpokalýðurinn svonefndi samanstóð að miklu leyti af háskólanemum, sem myndu kannski koma aftur þegar þeir væru orðnir vel stætt háskólafólk og gera Íslandi miklu betur skil í ljósi betri fjárhags.

Puttaferðalangurinn hefur í áratugi komið árlega til Íslands með nokkra tugi nemenda sinna í þýskum háskóla. 

Á ferðalögum mínum og í samskiptum við fjölmarga útlendinga fyrstu uppgangsárin í ferðaþjónustunni, mátti heyra marga þeirra segja: "Ég á eftir að koma hingað aftur og skoða landið betur."

Og það gekk eftir hjá fjölmörgum.

En á ferðalögum um landið í sumar hefur of oft kveðið við nýjan tón þegar útlendingar hafa verið spurðir að því hvort þeir kæmu aftur:  "Nei, ég hef akki efni á því, það er orðið of dýrt og mér finnst landið hafa misst svolítið ljómann við það að maður verði æ meira var við guppsprengt verð og græðgi."

Þótt Ísland sé ekki stórt land, eru möguleikarnir til upplifunar margfalt meiri en í mörgum margfalt stærri löndum.

Ef því erlenda ferðafólki fer fjölgandi sem segir samt: "Ég kem ekki aftur" er græðgisbólan í ferðaþjónustunni orðin of fyrirferðarmikil og það á eftir að hefna sín.     

Hótelgeirinn á krossgötum

Hliðstæða við skuttogarabyltinguna?

Sjósókn á Íslandi hefur gengið í gegnum nokkur mjög stór framfaraskref, meðal annars vélskipa- og togarabyltinguna fyrir rúmri öld, sem olli stórfelldumm flutningi verstöðva frá útnesjum inn í firði og flóa. 

Í kringum 1970 varð skuttogarabyltingin og í framhaldinu verksmiðjutogaranir. 

Skuttogarabyltingin var eitt af þeim atriðum, sem urðu Viðreisnarstjórninni að falli, ásamt því að hún var ekki heldur nógu vakandi fyrir breyttum aðstæðum í landhelgismálum. 

Sumt, sem varð afdrifaríkt, virtist ekki stórt á yfirborðinu, en eftirminnileg sjónvarpskappræða Lúðvíks Jósepssonar alþingismanns og sjávarútvegsráðherra 1956-58 og Eggerts G. Þorsteinssonar sjávarútvegsráðherra í Viðreisnarstjórninni eftir að sjónvarpið hafði byrjað starfsemi, birti í hnotskurn mikla yfirburði Lúðvíks, stjórnmálarefs sem gjörþekkti sjávarútveg á Íslandi, svo að Eggert fór miklar hrakfarir.

Kvótakerfið og stækkaðir togarar hafa haft mikil áhrif á byggðaþróun á landsbyggðinni, en fróðlegt verður að sjá, hvort nýja sjálfvirkniskerfið í Engey á eftir að valda frekari breytingum á útgerð og fiskvinnslu.

Sem hliðstæðu í iðnaði má nefna tilkomu róbóta í bílasmíði, en hún hefur gert mögulegt að smíða samkeppnisfæra gæðabíla í miklu fleiri löndum en áður var hægt og að því leyti jafnað aðstöðumun þjóða á þessu sviði.  

 

Vekur athygli um allan heim

Einhverjir héldu að það þyrfti að klæða Hornstrandir með lúpínu.

Eftir að byggð lagðist af á Hornströndum og sauðfé var þar ekki lengur, hefur allur gróður tekið svo hraustlega við sér að það er hreint ótrúlegt, miðað við það að þetta svæði er annað af þeim tveimur svæðum á Íslandi, sem er á nyrsta útkjálka. 

Þess vegna þurfti að segja mér það tvisvar að í Fljótavík þurfi að verjast ágangi lúpínu, sem einhverjir héldu að vantaði þar líkt og er á Mýrdalssandi.  

Fljótavíkin er umvafin svo miklu náttúrulegu blómskrúði og gróðri í því, að aðdáun og undrun vekur. 

Svipaða sögu var að segja í þeim víkum öllum, sem ég kom í þegar ég gerði sjónvarpsþáttinn "Eyðibyggð" fyrir tæpum 40 árum og ekki hefur gróðurinn minnkað síðan þá. 

Lúpínan er hið mesta þarfaþing þar sem hún á við, en það er frekar í ætt við trúarbrögð og hömluaust trúboð en heilbrigða skynsemi hvernig sumir hafa tekið lúpínuna svo hraustlega upp á arma sína, að það séu engin takmörk fyrir því hvar þurfi að sá henni og útbreiða hana. 

Raski ekki lífríkinu á Hornströndum

Torfbæirnir og bær Bakkabræðra höfðu yfirburði yfir Orkuveituhúsið.

Sennilega er hús Orkuveitunnar mesta endemis hús sem reist hefur verið á Íslandi og þó víðar væri leitað. 

Strax í upphaf sáust helstu gallarnir, sem hafa komið í ljós síðan þá og eru lýsandi fyrir bruðlið, sem var í gangi: 

Húsið er alltof stórt og dýrt. Meira að segja Parkinsonlögmálið þess efnis að starfsemi húsa leitist við að fylla þau, gildir ekki í þessu mesta monthúsi álfunnar. 

Jafnvel ekki þótt farið hefði verið í fiskeldi, sem hugmynd var um að setja þar á stofn. 

Húsið er mjóst neðst og breikkar eftir því sem ofar dregur. Ef það yrði hækkað myndi það á endanum yfirskyggja allt Ísland. Fræðilega hægt að hækka það þar til það yfirskyggði hálfa jörðina.

Þessi endemi eiga áreiðanlega sinn þátt í því að húsið riðar í miklum vindi svo að fólk fái jafnvel sjóriðu.

Nú er ljóst að stór hluti hússins var þegar orðinn gjörónýtur á aðeins áratug!  

Í samanburði við gömlu torfbæina hafa torbæirnir margfalda yfirburði yfir Orkuveituhúsið, allt að tífalda yfirburði!

Meira að segja hinn gluggalausi bær Bakkabræðra hafði yfirburði, því að það var þó hægt að gera á hann glugga!  

Kostnaðurinn vegna þessa viðundurs sem Orkuveituhúsið er, verður á þriðja milljarð króna hið minnsta.

Það eru þó smámunir miðað við bruðlið og rányrkjuna á Hellisheiði, þar sem reist var tiu sinnum stærri virkjun en nam því að orkan væri endurnýjanleg og virkjunin sjálfbær.

Þar verður um að ræða hundruð milljarða tjón áður en yfir lýkur.

Þeir helstu sem stóðu að þessum ósköpum öllum hafa forðað sér og prýðis fólk, sem ekki stóð að þessu rugli, þarf að standa í því að berjast við óheyrilegan vanda.  

Ein hugmyndin að rífa húsið

Túrbínutrixið er sprellifandi.

"Túrbínutrixið" frá 1970, þegar keyptar voru fyrirfram rándýrar túrbínur í margfalt stækkaða virkjun og láta alla standa frammi fyrir gerðum hlut eða hlíta eignarnámi ella, hefur stungið upp kollinum hér og þar allt til þessa dags.

Í Reykjanesbæ er sagt við íbúana að menn standi frammi fyrir gerðum hlut, búið að reisa mengunarspúandi verksmiðju, sem skuldi verktökum milljarð og bæjarsjóði hundruð milljóna, og yfir vofi að þessir peningar tapist allir nema verksmiðjan fái að að halda áfram "þjóðþrifastarfi" sínu.

Alveg er skautað framhjá því þegar þetta er tiltekið, hvernig eigendur verksmiðjunnar hafa hagað sér fjárhagslega, látið dæma á sig milljarð í skaðabætur vegna vanefnda við verktaka og skuldi stórupphæðir til bæjarsjóðs, en mest af þessum vanefndum urðu til án þess að vandræði við reksturinn ættu þátt í því. 

Það kom strax í ljós hvernig eigendurnir og forsvarsmennirnir höguðu sér, jafnvel í glæfraakstri á Reykjanesbrautinni sjálfri. 

Í gær var sagt að það þyrfti að "bjarga" Helguvíkurhöfn með því að lokka þangað aðra stóriðju ef þessi brygðist, því að búið væri að eyða mörgum milljörðum í þessa höfn, sem hefði frá upphafi verið reist á þeirri forsendu að stóriðja og aðeins stóriðja gæti "bjargað Reykjanesbæ. 

Ekki var kostnaðurinn við gerð Helguvíkurhafnar rakinn nánar, þannig að halda mætti að Íslendingar hefðu eytt öllum þessum milljörðum í höfnina. 

En á sínum tíma var sagt að það væru raunar Bandaríkjamenn sem stæðu að gerð þessarar olíuhafnar. 

Það er sem sagt sögð höfuðnauðsyn að viðhalda hinu stóra túrbínutrixi í Helguvík, sem meðal annars fólst í því 2008 að taka fyrstu skóflustunguna að risaálveri 2008 og hefja byggingu kerskála án þess að búið væri að ganga frá málum varðandi tólf sveitarfélög alla leið austur í Skaftafellssýslu sem áttu að skaffa stæði fyrir háspennulínur, vegi, og virkjanir með tilheyrandi stöðvarhusum, skiljuhúsum. gufuleiðslum, stíflum og uppistöðulónum. 

„Verður kísilverinu lokað, já eða nei?“

Rímar ekki við kuldatrúna.

Málflutningur þeirra, sem nefndir hafa verið kuldatrúarmenn á þessari bloggsíðu, hefur aðallega snúist um tvennt. 

Að í raun sé loftslag frekar að kólna en hlýna, því að í áróðursskyni hafi verið notaðar falsaðar mælingar og athuganir vísindamanna sem Donald Trump segir að þurfi að skipta út fyrir "alvöru vísindamenn, sem komast að réttum niðurstöðum."

Í öðru lagi sé fráleitt, ef eitthvað hlýni, að það verði af mannavöldum. Skipti mesti koltvísýringur í andrúmsloftinu í 800 þúsund ár eða súrnun sjávar þar engu máli. 

Ekki eru nema um tvö ár síðan kuldatrúarmaður sýndi mér hrollvekjandi myndir af hraðvaxandi hafís í Íshafinu. Það væru réttar myndir en aðrar myndir, sem haldið hefði verið fram, væru falsaðar.

Ekkert hef ég séð af svona hrollvekjumyndum síðustu tvö misseri og frétt um siglingu umm norðausturleiðina á mettíma er svo sannarlega ekki í takt hina miklu kuldatrú og trú á alheimssamsæri vísindamanna og vísindastofnana í heiminum, sem hafi náð hámarki þegar "40 þúsund fífl fóru á galna ráðstefnu í París í desember 2015.  

Sigldi norðausturleiðina á mettíma

Buddan getur blekkt neytandann.

"Fólk fer eftir buddunni þegar það kaupir eitthvað" er ein af setningunum, sem notaðar hafa verið um viðskiptahætti og hegðun kaupenda. 

Þetta, ásamt nýungagirni Íslendinga er líklega skýringin á því að þeirri óhemju miklu og almennu þátttöku í verslun við Costco sem hefur orðið hér á landi. 

Costco er ekki góðgerðafyrirtæki eins og sumir, einkum tugþúsundir félaga í aðdáendaklúbbi verslunarinnar halda, heldur er þessi verslun rekin eftir einföldum lögmálum markaðarins sem tryggja verða eigendunum lágmarks arð, þ.e. gróða. 

Það eru stundum notuð gamalþekkt brögð úr viðskiptum, svo sem að taka nokkrar áberandi vörur út úr og selja þær með tapi um sinn til þess að láta viðskiptavininn bíta á öngulinn. 

Þegar bragðið hefur heppnast og kaupendur eru komnir á bragðið, hækkar siðan verðið hægt og bítandi að nýju, en það atriði hverfur í magninu, sem hinn nýi kaupandi er búinn að festa sig í að kaupa. 

Fyrir um aldarfjórðungi kom í ljós það tímabundna fyrirbrigði, að hjá Bónusi virtust einstaka áberandi vörur seldar með tapi. 

Kókakóla var til dæmis selt á lægra verði en framleiðandinn seldi í heildsölu til verslana. 

Þetta olli því að kaupmaðurinn á horninu varð að hætta viðskiptum við framleiðandann og fara í staðinn út í Bónus til að kaupa kók til að selja viðskiptavinum sínum. 

Tilkoma Bónus og Hagkaupa var hluti af svipuðu fyrirbæri erlendis og fól í sér meiri kjarabót fyrir almenning en margir kjarasamningar. 

En í staðinn fóru kaupmennirnir á horninu unnvörpum á hausinn. 

Tilkoma Costco er óhjákvæmileg hér á landi eins og í öðrum löndum og verður vonandi til kjarabóta fyrir almenning þegar áhrifin hafa skilað sér út á markaðinn og til samkeppnisaðilanna. 

Í þetta skiptið verða það kaupmenn á horninu úti á landi, sem eiga í vandræðum og málið er vandasamt byggðamál. 

En kaupandinn í Costco verður líka að hafa varann á eins og í allri verslun varðandi það að hann hafi yfirsýn yfir viðskipti sín. 

Áður hefur verið minnst á það að reikni maður eins og ég, sem þarf að aka 30 kílómetra samtals fram og til baka að bensíndælunni við Kauptún, eyðir 3-4000 krónum aukalega í kostnað við aksturinn áður en hann getur tekið einn einasta lítra af dælunni. 

Svipað má segja um ýmislegt annað, sem ekki liggur kannski alveg í augum uppi þegar viðskipti eru gerð. 

Og vegna þess að Costco er erlent fyrirtæki í samkepnni við innlend fyrirtæki, hefur það áhrif á buddurnar okkar hvernig íslensk fyrirtæki komast af, og stórfellt tap lífeyrissjóðanna á eignarhlutum í Högum og Bónusi vegna nýs veruleika, verður á kostnað Íslendinga. 

 

Ófyrirséðar afleiðingar af Costco

Góðviðrið getur lumað á efniviði fyrir veðurbreytingu.

Í gær var einmuna veðurblíða um mestallt land. Það var logn og heiðríkja allt frá Faxaflóa með Snæfellsjökul við sjóndeildarhring austur, suður og norður um til ysti nesja austanlands. 

Veðurspástofur settu stórar heiðríkjusólir á spákort sín fyrir daginn í dag, sem samkvæmt því yrði jafnvel enn betri en dagurinn í gær. 

En í leyni lágu ákveðin áhrif af góðviðrinu, sem byrjuðu strax að koma fram í gærkvöldi þegar mjó þokubönd fóru að myndast utan í Esjuhlíðum. 

Þessi þokubönd mynduðust vegna kólnunar loftsins þegar sól var komin lágt á loft. 

Þá kom í ljós að hinn mikli sólarhiti dagsins hafði haft í för með sér uppgufun á raka, sem byrjaði að þéttast þegar sólar naut ekki lengur og loftið kólnaði. 

Eftir að sol var sest óx þetta þokulag hratt og í morgun var alskýjað á landinu og mjög lágskýjað eða jafnvel þoka víða. 

Það er minni hætta á þessu fyrirbrigði um hásumarið en er núna, þegar sólar nýtur ekki í sjö klukkustundir á hverri nóttu.  Hitinn hrapaði niður í 6-8 stig sums staðar. 

Nú hefur að vísu rofað hressilega til á norðausturhálendinu og Héraði, en ennþá er til dæmis lágskýjað á Akureyri og í uppsveitum á Suðurlandi. 

Allar áætlanir um að nýta daginn vel til kvikmyndatöku- og ljósmyndatöku ruku út í veður og vind, - einkum vegna þess, að of mikill hluti dagsins hafði orðið ónothæfur og að það þurfti að vera sæmilega öruggt um að komast til baka til Reykjavíkur úr heiðríkjunni eystra ef farið yrði í þennan leiðangur. 

Spá 18 stiga hita í dag

Hverjir stökkva á innflytjendamálin og múslimana?

Í borgarstjórnarkosningunum 2014 stökk Framsóknarflokkurinn á flugvallarmálið og múslimamálið og hafði um þrefalda fylgisaukningu upp úr krafsinu ef ég man rétt. 

Þetta þurfti ekki langan aðdraganda, gerðist nokkrum vikum fyrir kosningar. 

Svipað gerðist hjá Frjálslynda flokknum 2007 þegar Jón Magnússon og fleiri gerðu innflytjendamálin að aðalmáli þess framboðs inan við þremur mánuðum fyrir Alþingiskosningarnar það vor. 

Nú er svo að heyra á Framsóknarfólki í Reykjavík, að minnsta kosti um sinn, að eins konar andúð á múslimum og innflytjendum verði ekki áfram við lýði í aðdraganda næstu kosninga.

En hvað mun þá gerast á næstu útmánuðum? 

Það sést á tryggum lesendahópi bloggíðna, þar sem jafnvel er bloggað um múslima dag eftir dag, og einnig víðar á netinu og útvarpsrásum, að það er jarðvegur hjá talsverðum hluta kjósenda fyrir því að gera múslima og innflytjendur að fyrirferðarmiklu máli. 

Í flokki fólksins má greina, að þar er rætt í innsta hring um það, hvaða afstöðu flokkurinn eigi að taka í þessum málum sérstaklega. 

Það er eðlilegt að slíkt sé skoðað hjá nýju framboði, því að reynslan sýnir að með því má laða til fylgis við framboðið ákveðnn markhóp, sem kannski myndi annars fara yfir á önnur smærri framboð og róta upp í fylginu "á jaðrinum". 

Það verður fróðlegt að sjá hvað Sveinbjörn Birna Sveinbjörnsdóttir gerir í aðdraganda borgarstjórnarkosninganna. 

Kannski hefur hún fengið sig fullsadda af pólitíkinni, en í ljósi þess sem að ofan er rakið, er heldur aldrei að vita nema að hún finni sér stað fyrir málflutning sinn, jafnvel tiltölulega skömmu fyrir kosningar, eins og hún gerði fyrir tæppum fjórum árum. 

 

Sveinbjörg Birna hættir í Framsókn