Lítur Kia Rio bíllinn svona út?

Leitin að Birnu Brjánsdóttur er púsluspil, og enda þótt hvert smáatriði sýnist geta verið léttvægt, er sjálfsagt hjá lögreglunni að athuga það, til dæmis með því að birta mynd, sem náðist af Kia Rio bíl á ferli skammt frá Birnu þegar hún gekk austur Laugaveg. 

En þá verður líka helst að birta mynd af bílnum frá því sjónarhorni, sem líklegast að einhver hafi séð hann. 

Efsta myndin hér er af rauðum Kia Rio bíl séðum á ská framan á hægra megin. 

Myndin neðar var birt á mbl.is og ruv.is í gær, og á henni sjást tveir Kia Rio bílar, séðir ofan frá, og er annar þeirra af nýjustu gerðinni, en hinn af gerðinni, sem var þar á undan og er nokkrum árum eldri. Einnig er birt raunverulega myndin af Kia Rio bílnum, sem virðist vera sá nýrri. 

En þetta getur ruglað fólk, rétt eins og ranga myndbirtingin af Geirfinni Einarssyni gerði á sínum tíma.

Hve margir þekkja Kia Rio séðan ofan frá?

Um það var spurt í bloggpistli í gærkvöldi.  

Af hvorri gerðinni var umræddur Kia Rio? Breytingin á framljósunum er mest áberandi, þau eru stærri á nýjustu gerðinni, sem er nær á myndinni, sem birt var í gærkvöldi. 

Og af hverju ekki að birta mynd af bílnum séðum frá því sjónarhorni, sem lang líklegast er að einhver hafi séð hann?

Neðsta myndin er síðan af eldri geðinni af Kia Rio. 

Allsherjarútkall í birtingu

18 í einkaþotu? Eða Dash 8 Q400 með lið og áhorfendur?

Lars Lagerback upplýsir að 130 manns vinni við útgerð sænska landsliðsins í knattspyrnu en aðeins 18 við það íslenska, og þess vegna sé það pirrandi að fljúga á almennu farrými og þvælast úr einu tengiflugi í annað. 

"Það fer illa með mann" segir sænski verðlaunahafinn. 

Það fylgir að vísu ekki sögunni hjá Lars hvort allir þeir 130 sem vinna við sænska landsliðið fljúgi í öllum landsliðsferðunum, en miðað við það að knattspyrnuliðið, sem fórst um daginn í Suður-Ameríku, var allt í 80 sæta farþegaþotu sem átti að fljúga til borgarinnar, þar sem úrslitaleikurinn átti að verða, mætti ætla að erlendis sé reynt að fara frekar með leikmenn og aðstoðarfólkið allt í sömu vél sem beinast til borgarinnar, þar sem á að keppa. 

Á Íslandi er ekkert leiguflugfélag, sem býður upp á litlar farþegaþotur. 

Það næsta sem hægt væri að komast væri að fá Dash 8 Q400 á leigu hjá Flugfélagi Íslands í slíkt flug og selja áhugafólki um landsleikina sætin 40-50 sem yrðu laus.  

Þetta eru hraðfleygusu skrúfuþoturnar núna, en samt fjórðungi hægfleygari en þotur. 

Á móti kemur að þurfa ekki að vera að skipta um flugvélar á leiðinni með því leiðindaveseni sem fylgir þvælingnum í gegnum flugstöðvarnar með hugsanlega langri rútuferð í lokin.

Og annar vandi blasir við: Varla fer flugvélin að bíða ónotuð á meðan landsliðið lýkur sér af? 

Þá er eftir sá möguleiki að fá leiguþotu erlendis frá sem fer sérstaklega til Íslands til að sækja liðið ef það kemur allt héðan. 

En þá er spurningin hve oft leikmennirnir koma allir úr sömu áttinni á landsleiksstaðinn. 

Og hve oft það myndi verða þægilegt fyrir liðið að fara allt saman í leiguþotu í ferð frá sameiginlegum brottfararstað í Evrópu. 

Hvernig var til dæmis farið til Kína á mótið þar?

Gaman væri ef einhver rannsókarblaðamaður væri settur í að kafa ofan í þetta. 

Lars elskar Ísland en segir eitt pirrandi við landsliðið

Hve margir Íslendingar þekkja Kia Rio ofan frá?

Í rannsókn Geirfinnsmálsins var birt mynd af honum, sem var orðin alveg úrelt, því að útlit hans hafði breyst. 

Nú er birt mynd af Kia Rio þar sem horft er ofan á bílinn. 

Hve margir Íslendingar þekkja Kia Rio ofan frá? 

Langflestir sjá bíla úr sömu hæð og þeir standa sjálfir, það er framan frá, á hlið, aftan frá eða á ská. 

En ævinlega úr láréttri átt. 

Hvernig væri nú að birta mynd af rauðum Kia, sem horft er á úr sömu átt og vegfarendur sjá bíla? 

Birna sást síðast í miðbænum

Mótsögn hjá Trump. Gagnkvæmt traust er mikilvægt.

Donald Trump hefur mikið til síns máls varðandi útþenslu NATO og ESB upp í hlaðvarpa Rússlands.

Þegar röðin var komin að Úkraínu og Krímskaga var það hliðstætt við að að risabandalag á vegum Kínverja og Rússa værið komið inn á gafl í Kanada og á Florida. 

Eða að hætta væri á því að slíkt bandalag næðu yfirráðum yfir flotastöðinni í Norfolk á austurströnd Bandaríkjanna. 

Rússar fórnuðu ekki að ástæðulausu lífi meira en 50 þúsund hermanna í Krímstríðinu á miðri 19. öld og lifi milljóna rmanna í Seinni heimstyrjöldinni vegna hernaðarmikilvægis skagans.  

Það eru reginmistök fólgin í því að geta aldrei skoðað hlutina frá sjónarhóli mótherjans. 

Sovétríkin tóku upp stefnu gagnvart Finnlandi í Kalda stríðinu, sem hlaut heitið Finnlandisering. 

Hlutleysi Svíþjóðar og hernaðarlegir yfirburðir Rússa við austanvert Eystrasalt gerði það að verkum að Stalín og eftirmenn hans töldu óhætt að leyfa Finnum óvenjulega mikið sjálfstæði af nágrannaþjóðum að vera, en að Finnar yrðu þó að gefa tryggingu fyrir því að ganga ekki lengra en Sovétríkin teldu óhætt. 

Á þessum árum komust Finnar upp með það að vera í Norðurlandaráði og með vestrænt lýðræði og þjóðskipulag í hávegum. 

Þegar farið var í heimsókn til Finnlands var öll upplifun þess alveg eins og verið væri í ferðalagi í hvaða Norðurlandanna sem væri.

Gerólík upplifun og aðstæður miðað við það að koma til leppríkjanna í Austur-Evrópu.

Þessi merkilega staða byggðist á geirnegldu gagnkvæmu trausti Finna og Rússa.

Slíkt traust þarf að endurvekja nú og slaka á hernaðarkapphlaupi sem er ógnun við stöðugleika og frið og að því leyti hefur Donald Trump mikið til síns máls.

Auðvitað þurfa báðir aðilar að slaka á í nýjum samningum sem tryggi frið á norðurslóðum. 

 

Hins vegar er mótsögn hjá Trump í því að segja í öðru orðinu að NATO sé úrelt fyrirbrigði en í hinu orðinu að Bandaríkin "ætli að vernda þessar þjóðir." 

Gagnkvæm trygging NATO-ríkjanna varðandi það að árás á eitt þeirra skoðist sem árás á þau öll er meginatriði í tilvist bandalagsins. 

Segir að NATO sé úrelt stofnun

Þegar SÍS-veldið, Tíminn og Sjónvarpið voru hrekkt.

Ég ferðaðist með Árna Jónssyni söngvara um allt land á héraðsmót Sjálfstæðismanna 1959 og 1960 og á héraðsmót Framsóknarmanna 1961. 

Árni vann um árabil hjá Sambandi íslenskra samvinnufélaga og sagði mér þeim hrekk, sem var gerður í Sambandshúsinu, að nokkrum skiltum á hurðum hafði verið breytt einn morguninn, þegar fólk kom til vinnu, yfirmönnum Sambandsins til lítillar ánægju.

Þegar hrekkurinn var gerður var þarna gjaldkeri, sem þótti vera heldur um of fjarverandi.

Morguninn, sem hrekkurinn var gerður, stóð "Sjaldkeri" á hurðinni hjá honum, og á hurð Íslendingasagnaútgáfunnar stóð "SÍSlendingasagnaútgáfan."

Ég skemmti árlega á þessum árum á árshátíðum dagblaðsins Tímans, og var siður á þeim að gefa út árlegt skopblað, líkt Tímanum, sem bar nafnið "Hálftíminn" og var dreift á hverri árshátíð.

Á einni árshátíð gerðist það að ritstjóri lenti í harðvítugum slagmálum við setjara einn, og lauk viðureigninni þannig að ritstjórinn beit í lærið á setjaranum.

Ritstjórn Hálftímans var vandi á höndum á næstu árshátið, því að á vinnustaðnum þótti atvik þetta hafa verið af þeirri stærð, miðað við annað fréttnæmt á árinu, að erfitt væri að komast hjá því að gera grín að því í árshátíðarblaðinu.

En málið var viðkvæmt og hætt væri við því að yfirstjórn blaðsins myndi reiðast. 

En lausnin fannst.

Í Hálftímanum höfðu verið dálkar með stuttum setningum og máltækjum og ritnefndin fann stað fyrir þetta í máltækjadálki blaðsins.

Meðal mátækjanna var þetta: "Ekkert fær staðist tímans tönn."  

Þegar þetta er sagt, fer ekki á milli mála við hvað er átt.

En með því að hafa orðið með litlum staf var varist viðbrögðum yfirmanna blaðsins. 

Þegar ég var dagskrárritstjóri Sjónvarpsins um eins árs skeið, var dagskráin sýnd á skjánum í tíu mínútur áður en hún hófst. 

Dagskrána vélritaði ég á blaðstrimil sem var sett upp á pappírsrúllu fyrir framan sjónvarpsmyndavél, og í gegnum myndavélina var textanum varpað út á ljósvakann. 

Dagskrána mátti sjá á skjám innanhúss 20 mínútum fyrir útsendingu, starfsmönnum til hagræðis, en ekki var hægt að sjá hana utanhúss í gegnum dreifikerfið fyrr en 10 mínútum fyrir útsendingu. 

Það verður að geta nokkurra atriða til að hægt sé að skilja eðli hrekksins.

Garðar Þorsteinsson var prófastur í Hafnarfirði og voru ástamál hans umrædd á þessum tíma.

Þrír yfirmenn dagskrárgerðar voru Pétur Guðfinnsson, Emil Björnsson og Jón Þórarinsson og Eiður Guðnason var varafréttastjóri. 

Og eitt af því sem Emil var mjög viðkvæmur fyrir var vísa, sem Stefán Jónsson hafði gert um hann, svohljóðandi: 

Séra Emil giftir og grefur. 

Glatt er í himnaranninum. 

Eru á ferli úlfur og refur

í einum og sama manninum. 

 

Meðal efnis kvöldið sem ég lét verða að því að framkvæma smá hrekk, átti, að því að mig minnir, þetta að standa á strimlinum: 

Stundin okkar. Barnatími Sjónvarpsins. 

Fréttir. 

Á öndverðum meiði. Stjórnandi Eiður Guðnason. 

Maður er nefndur.  Þórbergur Þórðarson.  

Garðar ástarinnar. Mynd um fræga aldingarða á Indlandi.  

Lusy Ball. (Borið fram Lúsí bol). Þáttur með hinni frægu gamanleikkonu.  

Pétur og úlfurinn. Saga og tónverk eftir Sergei Prókofiev. 

Ég gerði nú tvær dagskrárrúllur, sú innri var rétt, en sú ytri breytt, þannig að ég gat látið röngu rúlluna standa í 10 mínútur, en síðan kippt henni í burtu nokkrum sekúndum áður en dagskráin fór út á ljósvakann, þannig að hrekk-dagskráin sást aðeins innanhúss en hin rétta fór í loftið út á ljósvakann.

Gabb-dagskráin var svona:

Stundin rokkar. Skarnatími Sjónvarpsins.

Réttir. Runki fór í réttirnar. 

Á öndverðum Eiði. Varafréttasjóri rífst við sjálfan sig.

Maður er klemmdur. Rætt við fjármálaráðherra.

Garðar ástarinnar. Prestur í Hafnarfirðí í erfiðum málum.

Lús í bol. Skítugur bítill finnur lús í bol sínum.

Pétur og úlfurinn og Jón.

 

Skemmst er frá því að segja að það fór allt á hvolf í húsinu þegar hrekk-dagskráin blasti við og séra Emil kom hlaupandi niður í útsendingarstjórnarherbergið þar sem dagskrárrúllurnar voru. En í þeim svifum hafði ég tekið gabb-rúlluna í burtu og benti honum á að ekkert væri við þá dagskrá að athuga sem væri í loftinu.

Hann trúði ekki sínum eigin augum og auðvitað sefaðist hann ekkert við þetta heldur varð ennþá sárari, einkum yfir síðasta dagskrárliðnum, sem hafði blasað við honum mínútu fyrr.

Málið var tekið fyrir hjá yfirstjórninni og mér var veitt verðskulduð ofanígjöf.  

Hrekkjalómurinn gaf sig fram

Hvað um Hörpuna?

Það er magnað að ekki nema 14 ára gamalt hús liggi undir rakaskemmdum, þar sem þegar eru byrjaður að tikka inn hundruð milljóna í viðgerðarkostnað. 

Það leiðir hugann að Hörpunni, sem einnig er með nýstárlegan ytri flöt, þótt úr öðru efni sé en Orkuhúsið. 

Fljótlega eftir að Harpa var fullbyggð voru ritaðar greinar um að á það myndu herja illvígar tæringarskemmdir og væru raunar þegar byrjaðar að sjást. 

Harpa og Orkuhúsið eru tvær af táknmyndum græðgisbólunnar og hrunsins á fyrstu átta árum aldarinnar. 

Kostnaðurinn við byggingu Orkuhússins fór langt fram úr öllum áætlunum og var bygging þess í raun hneyksli og gaf tóninn fyrir REI-hneykslið 2007, sem var byrjunin á endemis kafla í sögu stjórnar Reykjavíkurborgar, þar sem fimm borgarstjórar voru við völd á aðeins þremur árum.  

Á næstu dögum mun ég kannski setja hér inn sitthvað, sem birst hefur á fyrstu tíu árum þessarar bloggsíðu, og læt mynd, sem facebook var svo vinsamleg að setja inn og var tekin fyrir réttum þremur árum prýða síðuna. 

Það er mikill órói og uppspenningur í myndinni, sem gæti minnt okkur á að sól er að byrja að hækka á lofti. 

Það er svolítið táknrænt fyrir upphaf virkjana- og stóriðjuæðið í byrjun aldarinnar, að lagið á Orkuhúsinu er þannig, að ef það væri hækkað jafnt og þétt upp í hið óendanlega myndu hinar úthallandi hliðar þess smám saman slúta yfir allt Ísland! 

Sækja hugsanlega bætur vegna skemmda

Staða þessara tveggja manna er blákaldur veruleiki.

Fantasíufrétt um leiðtogafund Trumps og Pútíns er að vísu ein af hinum skaðlegu lygafréttum sem virðist fara fjölgandi og gera æ meira ógagn, meðal annars með því að eiga þátt í því að lyfta að því er virðist óhæfum manni í stól valdamesta manns heims.

Er vonandi að bandaríska stjórnkerfið, sem Trump sagðist vera í krossferð gegn, standist þá þolraun, sem vel gæti beðið þess næstu fjögur ár.

Ef marka má skoðanakannanir, sem gerðar hafa verið í Rússlandi, vill meirihluti Rússa viðhalda harðri stjórn Pútíns þrátt fyrir kúgun hans, og sýnir val þessara tveggja manna til forystu öflugustu kjarnorkuvelda heims, hve gallað lýðræðið getur verið, þrátt fyrir að ekkert skárra form hafi fundist.

Gallar kjörmannakerfisins vestra ollu því að Trump skorti meira en tvær milljónir atkvæða til að fá samtals meirihluta atkvæða kjósenda.  

En stjórnmál verða að fást við raunveruleikann þótt aldrei megi missa sjónar á göfugum hugsjónum.

Staða Trumps myndi hafa verið afgreidd út af borðinu fyrir hálfu ári sem gabbfrétt, en hún er hins vegar bláköld staðreynd.

Það var reyndar svolítið skrýtið að í gabbfréttinni um Reykjavíkurfund þeirra Trumps og Pútíns var sagt, að af hálfu Trumps myndi höfuðáhersla verða lögð á fækkun kjarnorkuvopna.

Það er á skjön við yfirlýsingar hans í kosningabaráttunni um að efla herinn á alla lund, þar á meðal kjarnorkuheraflann.  

Og þá kvaðst Pútín skilja Trump vel og vera sjálfur að hugsa um svipað.

Það breytir því ekki að nauðsyn á því að Trump og Pútín komi á nýjan leiðtogafund í Reykjavík er blákaldur veruleiki og brýn nauðsyn þegar horft er fram á fjögur ár, þar sem þessir tveir kumpánar eru á valdastólum sínum, hversu slæmt og fjarstætt sem mönnum kann að þykja það. 

„Fréttin er fantasía“

Löngu tímabær fundur.

Það var fyrir löngu kominn tími á það að leiðtogar Bandaríkjanna og Rússlands hittust á sérstökum fundi utan meginlanda Ameríku og Evrópu, líkt og Reagan og Gorbatsjof gerðu í Reykjavík 1986. 

Það er ekki aðeins að kjarnorkuvígbúnaður þessara tveggja ríkja séu lúmskasta og huganlega versta ógnunin við tilvist mannkynsins, heldur er brýnt að breyta andrúmsloftinu í samskiptum þessara þjóða og þar með samskiptum NATO og Evrópuþjóða við Rússland.  

Trump vill funda með Pútín í Reykjavík

9625 bloggfærslur á áratug.

Margt smátt gerir eitt stórt segir máltækið. Þennan mánaðardag, 14. janúar 2007, fyrir réttum tíu árum, opnaði ég þessa bloggsíðu og byrjaði loks að blogga.  

Síðan þá hafa um það bil 10 þúsund bloggfærslur birst á síðunni og athugasemdirnar, sem hafa verið snar þáttur í umræðum og efnislegum tökum í heild, eru ekki minna en 20 þúsund alls, gætu jafnvel verið fleiri en 30 þúsund. 

Ekki er hægt að sjá af tölum, hve margir lesendurnir hafa verið, - það er misjafnt hvað hver lesandi hefur litið oft inn, en flettingar nema samtals um 7,3 milljónum á þessum áratug og innlitin líklegast um 4 milljónum. 

Ég er þakklátur fyrir það að hafa átt þess kost að halda þessari síðu úti og reyna að hafa hana sem fjölbreyttasta og efnismesta, auk þess að fá fram margvísleg sjónarmið og fróðleik. 

Vil ég þakka öllum sem hafa kíkt á síðuna og tekið þátt í að viðhalda henni. 

Frumarp stjórnlagaráðs gerði ráð fyrir samábyrgð ráðherra.

Það er galli á núverandi skipan mála varðandi vald ráðherra, að það hefur verið lenska að þeir fái að valsa ansi frjálslega einir í sínum málaflokki. 

Afleiðingin er sú að of oft hafa þeir getað notað þessa aðstöðu til þess að hygla sínu kjördæmi í sínum málaflokki.

Í frumvarpi stjórnlagaráðs er lagt til að allir ráðherrar ríkisstjórna taki ábyrgð af stjórnarathöfnum og geti því aðeins firrt sig ábyrgð, að þeir bóki skriflega um það.  

Páll segir Bjarna hafa gert mistök