Of margir að rótast á sama svæðinu, þ.á.m Trump.

Donald Trump gagnrýndi Hillary Clinton og Barack Obama harðlega fyrir hernaðaraðstoð og aðgerðir hersins í Sýrlandi og Írak undanfarnir ár en er nú sjálfur að auka útgjöld til hernaðarumsvifa Bandaríkjahers. 

Enda ekki furða, því að eftir því sem Ríki Íslams fer hallloka eykst hættan á því að Rússar, stjórnarher Sýrlands, uppreisnarmenn og Kúrdar fái miklu meira í sinn hlut af unnu landi en þeir, sem eru samherjar Bandaríkjamanna. 

Þar með eykst hættan á árekstrum milli þessara fimm aðila að hernaðinum og staðan verður æ flóknari og hættulegri.  

Nýr og hættulegur kafli að hefjast

Stórkostleg hjólreiðahugmynd framkvæmd með glæsibrag.

Í tilefni hinnar miklu árlegu hjólreiðakeppni, sem nú er hafin bendi ég á tónlistarmyndbandið "Let it be done!" sem ég set á facebook síðu mína í tilefni dagsins og til heiðurs keppninni. 

Það er tvöföld ástæða til þess, því að einmitt í dag voru gögn send til útlanda sem hefja framleiðslu á 4 diska albúmi með 72 lögum úr minni smiðju, sem fjalla öll að meira eða minna leyti um íslenska náttúru og tengsl þjóðarinnar við hana. 

Þegar diskurinn kemur út, vonandi í byrjun júlí, verður einmitt notaður táknrænn hjólagerningur til að kynna hann. 

Nafnið er "Hjarta landsins - náttúran og þjóðin" til að vekja athygli á hugmyndinni um stóran þjóðgarð á miðhálendi Íslands og einnig á möguleikunum, sem felast í komandi orkuskiptum.

Í laginu "Let it be done", sem tríóið "The messengers" syngja, Egill Ólafsson, Þór Breiðfjörð og ég, eru meðal annars þessar ljóðlínur:  

 

"Let it be done!  Come on, let´s have fun

on að journey to a fight that must be won!...

 

"Spurting over obstacles up every slope and hill

with ever growing endurance and strenght and faith and will..!" 

 

Let it be done!  Let it be done!

Bicycles on the run! 

Father and mom!  Daughter and son!...

...Fighting spirit and fun!..."

 

With power from clean energy we light the brigtest beam!

With power from our deepest hearts because we have a dream!

By using all our wit and guts we sweep through storm and rain

To undertake enormous task,  defying weariness and pain!"

 

Tónlistarmyndbandið má finna á Youtube með því að slá upp nafni mínu og lagsins. 

 

Fyrir aðeins tíu árum hefði hver sá, sem hefði sett fram framtíðarsýn um svona stóra hjólakeppni í kringum landið, verið álitinn alger draumóramaður. 

En stundum flytur trúin fjöll. Góða ferð! 

WOW Cychlothon hafið

"Heitt og hátt."

Því ástandi, sem flugmenn er einna verst við við flugtak og lendingar er lýst með þremur orðum:  "Heitt og hátt" ( hot and high).

Sem sagt: Verst er ef völlurinn liggur hátt yfir sjó og hitinn á honum er mikill. 

Einnig versnar mjög fluggeta véla í farflugi við slík skilyrði þannig að hindranir, sem annars eru viðráðanlegaar, verða hættulegar. 

Stundum er flugleið eða flugvöllur í mikilli hæð en samt getur orðið funheitt. 

Sem dæmi um flugvöll sem liggur hátt og íslenskar flugvélar fljúga áætlunarflugferðir til, er Denver í Colorado. 

Hann liggur í 1600 metra hæð, og þess vegna er loftið þar miklu þynnra en við sjávarmál og þa með verður burður loftsins minni og vélarnar þurfa að komast á meiri hraða til að geta lyfst frá jörðu og klifrað eftir það.

Það fer fyrst og fremst eftir hreyflum vélanna hve geta þeirra er mikil og eftir flatarmáli vengja frekar en eftir stærð véla.

 

En minni flugvélar eru oft með bulluhreyfla, sem missa afl með aukinni hæð.

Sumar eru með forþjöppu sem gefur betra afl upp að ákveðnu marki en þó ekki eins mikið og þotuhreyflar.  

Flugferðum aflýst vegna hita

Hvað gera menn ef verð er of hátt? Þeir verða að lækka það.

Hrikalegar tölur eru nú nefndar varðandi hækkanir á vörum og þjónustu, sem ferðamenn verða að kaupa hér á landi og þær notaðar sem röksemd fyrir því að það þurfi að snarlækka gengi krónunnar. 

En verði það gert mun æða af stað höfrungahlaup í kjaramálum með tilheyrandi verðbólgu og verðhækkunum af hennar völdum.. 

Margs konar verð, sem nefnt er, til dæmis á einföldum varniningi eins og kaffibollum er ekki aðeins dæmi um hækkun krónunnar, heldur líka oft á tíðum dæmi um fádæma græðgi seljenda. 

Ef svona verð er of hátt og veldur því að hrun verði í ferðaþjónustunni, er, úr því sem komið er, aðeins ein leið til að bregðast við því: Að lækka verðið. Að slá af græðginni.  með góðu eða illu.

Í sumum tilfellum er það ekki aðeins allt að 40 prósent hækkun á gengi krónunnqr, sem hefur valdið samsvarandi hækkun verðs á vörum og þjónustu fyrir ferðamenn. Upphaflegt græðgisverð var einfaldlega of hátt allt of víða.  

Og síðan má nefna það hvort endilega þurfi að hækka opinberar álögur á ferðaþjónustuna einmitt þegar hún stendur á viðkvæmasta punkti rekstrarumhverfis síns. 

Pakkaferðin hefur hækkað um 42%

Hítardalur og Hítará leyna á sér, en áin getur þó ekki opnað.

Hítartalur og náttúra hans var eitt af því sem kom mér verulega á óvart þegar ég fór að kynnast þessum merkilega dal, fyrst úr lofti og síðan af jörðu niðri. 

Í dalnum er að finna fjölbreytilegar jarðmyndanir og land mótað af eldvirkni, og við ána niður af mynni dalsins er aldeilis magnað að sjá muninn á gróðrinum á tiltölulega litlu svæði sem vindar og líklega misjöfn beit hafa annars vegar valdi mikilli gróður- og jarðvegseyðingu en hins vegar kjarr og graslendi heldið sér vel.  

Hítará fellur síðan um Mýrar til sjávar eftir að hún kemur út úr dalnum, og þótt ég þekki ekki til veiðarinnar í henni, þykir mér líklegt að hún sé mikið augnayndi með góða og gefandi veiðistaði. 

En þótt hún sé mögnuð opnar Hítará ekki neitt eins og segir í upphafi tengdrar fréttar. 

Það er rökleysa þegar sagt er að fjöll, ár svæði opni sig þegar þau eru opnuð af mannavöldum. 

Það má deila um misjafnan málsmekk og málnotkun, en það verður þó að draga línuna varðandi það hvort orðalag sé rökleysa og vitleysa. 

Flottur fyrsti dagur í Hítará

Heilsteyptur og trúr sjálfum sér.

Alfreð Hitchcock var líklega þekktasti kvikmyndaleikstjóri heims á sinni tíð en fékk samt aldrei Óskarsverðlaun, var óheppinn með keppinauta þau ár sem myndir hans voru frumsýndar. 

Volkswagenverksmiðjurnar stefndu í gjaldþrot um 1970 vegna þess að tími bíla með loftkældar vélar að aftan var liðinn og nýjustu bílarnir með framdrif og þverstæðar vatnskældar vélar með yfirliggjandi kambásum. 

Volkswagen tók sér hressilega tak, keypti Audi/NSU og nýtti sér reynslu þeirra verksmiðja.

NSU K70 var notaður sem brú yfir í nýju bílana, en fyrst kom Scirocco, síðan Polo og loks Golf 1974.

Þótt með honum kæmi til sögu heill stærðarflokkur, sem var kenndur við hann, varð hann ekki fyrir valinu 1974 sem bíll ársins í Evrópu, heldur Citroen CX sem flestum er gleymdur, enda ekki einu sinni með jafn góða cx-tölu (loftmótstaðu) og fyrirrennarinn, Citroen DS frá 1955.

Það kom í ljós, að ef haldin var tryggð við höfuðatriði góðs bíls, gæði, var forysta í sölu tryggð. 

 

Golf hefur elst vel. Rétt eins og mennirnir hefur hann aldrei breyst það mikið í útliti að hann hafi ekki haft svip frá næsta bíl á undan.

Þetta hefur verið aðdáunarvert núna eftir aldamótin, þar sem keppinautarnir reyna sífellt að stunda tískubrögð til að ná athygli kaupenda með alls kyns skúlpúrum og tilhneiginu til að minnka glugga og útsýni.

Það kann til dæmis vel að vera að útlit Mercedes-Benz A, með sínar ávölu útlínur, hátt nef og aflíðandi línur að aftan, þyki smart og töff, en þetta er gert á kostnað rýmis í aftursæti og svo mjög á kostnað afturdyranna, að það er beinlínis erfitt að troða sér inn um þær. 

 

Golf og Polo hafa aldrei verið látnir falla fyrir einhverjum útlitstrixum og tískubólum, heldur hefur einmitt það að halda útlitinu skapað þeim sérstakan yfirlætislausan svip sem sker sig úr, svo mótsagnarkennt sem það kann að hljóma.

Það er auðvelt að þekkja þessa bíla úr, - ættarsvipurinn er sterkur og einfaldur.

Ef Golf væri maður, væri sagt um hann að hann hefði ævinlega verið heilsteyptur og trúr sjálfum sér.   

 

Allir vildu Golf kveðið hafa

Dæmi um óviðráðanlegra þenslu: Auð salerni. Sjúddírallírei.

Árið 2007 horfðu landsmenn á það eins og í leiðslu þegar byggingakranar þutu upp eins og gorkúlur út um allt. Haustið áður munaði hársbreidd að yfirhlaðið bankakerfi landsins hryndi til grunna, en aðeins örfáir "innvígðir og innmúraðir" vissu um það þá. 

Nú er horft á ný í leiðslu þegar byggingakranar þjóta upp um allt á sama tíma sem samdráttur er skollinn á í ferðaþjónustunni úti á landsbyggðinni á sama tíma og hún er að kollkeyra allt í vexti annars staðar, því að allir, allt frá æðstu stjórnendum niður í manninn á götunni, horfa líka sem í leiðslu á íslensku krónuna bólgna og bólgna án þess að nokkur virðist geta við því gert, heldur hellir Seðlabankinn olíu á eld þenslunnar með vaxtalækkun. 

Ein af viðbrögðunum við endalausu risi krónunnar eru þau, að hún sýni með hækkun sinni, að enda þótt hún sé langminnsti gjaldmiðill í heimi, sé hún sterkasti gjaldmiðlill í heimi, - það sé ekki hún sem hækki, heldur lækki allir aðrir gjaldmiðlar, dollarar, pund og evrur af því að þeir séu svo veikir og vesælir.  

Sem þýðir að það er öllum öðrum stjórnandun þjóða að kenna öðrum en okkar, hvernig ástandið er. 

Menn horfa líka vanmegnugir á skort á íbúðarhúsnæði og leiguhúsnæði og sífellda hækkun leiguverðs á sama tíma sem óviðráðanlegt hótelbyggingaæði ríkir hvarvetna. 

Einnig horfa menn dolfallnir og sem lamaðir á svæði við náttúruperlur vaðast upp í drullu og ferðafólk bregðast við skorti á salernum á sama tíma og ný salerni standa auð og ókláruð vegna manneklu af völdum hinnar óviðráðanlegu þenslu. 

 

MBL.IS FRÉTT Í HNOTSKURN. (Ekki fyrir viðkvæma) 

(Með sínu lagi)

 

Klósett autt er undarlegt að líta, 

ekkert vatn, samt gljáir skálin hvíta. 

Yfirvöldin ákaflega sýta 

að enginn skuli þarna vera að ...

..sjúddírallírei, 

sjúddirallíra...

..enginn skuli tefla páfann við, 

ónei!. 

 

Í iðrum fólks er ógnar matarbrennsla

og af því getur hlotist mikil þensla. 

Af auðu klósetti er illt að vita 

ef á fólkið hleypur mikil...

..sjúddírallirei, sjúddirallira....

ef að fólki hleypur kapp í kinn, -  

rasskinn!  

 

 

Salerni í Dyrhólaey stendur autt

Svipað fyrirbæri og við Geirangursfjörð í Noregi?

Tsunami er alþjóðlegt heiti á því fyrirbæri þegar eldsumbrot í sjó eða stór jarðskjálfti hrindir af stað flóðbylgju sem getur orðið tugir metra á hæð og valdið ofboðslegu tjóni þegar hún gengur á land. Slíkar flóðbylgjur hafa fallið á síðustu árum, bæði í Suðaustur-Asíu og Japan, og stór flóðbylgja var afleiðing af risagosinu í Krakatá 1883.  

En síðan eru líka til örlítið öðruvísi flóðbylgjur sem stafa af berghlaupi, því að fjöll springa í sjó fram vegna innri gliðnunar eða að risastórar skriður falla í hlíðum þeirra fram í sjó. 

Rúmlega fjögurra stiga jarðskjálfti á varla einn og sér getað valdið stórri flóðbyglju, svo að leita verður annarrar skýringar á flóðbylgjunni í Grænlandi, sem olli mannskaða. 

Þá leitar hugurinn til hins ofurfagra Geirangursfjarðar í Noregi, þar sem hætta vofir yfir vegna fjalls við utanverðan fjörðinn, sem er klofið af jarðsprungu, sem gæti opnast með þeim afleiðingum að hrikalegt berghlaup gæti skapað meira en hundrað metra hárri flóðbylgju sem myndi drekkja mestallri byggð við fjörðinn. 

Myndin sýnir botn fjarðarins, sen þegar bylgjan kæmi þar inn, myndi hún verða hærri en ella við að lokast inni í fjarðarbotninum. 

Hugsanlegasta skýringin á grænlensku flóðbylgjunni er því að jarðskjálfti hafi framkallað berghlaup eða jafnvel hið gagnstæða, sem þó er mun ósennilegra, að berghlaup hafi valdið jarðskjálftanum. 

Rannsaka hvers vegna flóðbylgja skall á þorpinu

Suðurlandsflugvöllur yrði á sama veðursvæði og Keflavíkurflugvöllur.

Af og til kemur upp umræða um að stór alþjóðaflugvöllur við Selfoss eða Hellu gæti orðið varaflugvöllur fyrir Keflavíkurflugvöll, nú síðast í grein í Morgunblaðinu. 

Þá er alveg skautað yfir það að sunnan-og sauðaustlægum vindáttum er Suðurlandsundirlendið á sama veðursvæði og Suðurnes. 

Þar að auki er Ingólfsfjall svo nálægt Selfossi að fjallið veldur skæðum sviptivindum í hvassri norðanátt á Selfossflugvelli. 

Í suðvestanátt, likri þeirri sem lokaði Keflavíkurflugvelli í gærkvöldi, er Reykjavíkurflugvöllur að vísu á sama veðursvæði og Keflavíkurflugvöllur, en í sunnan- og suðaustanáttum er Reykjavíkurflugvöllur í vari fyrir suddanum og þokunni sem lokar stundum öllu svæðinu frá Suðurnesjum og austur um Suðurland. 

Sérstakur ferðamannaflugvöllur við Hellu er allt of dýr framkvæmd til þess að hægt sé að réttlæta hana. 

Frá Selfossi eða Hellu er lítið styttra að fara "Gullna hringinn" um Þingvelli, Gullfoss og Geysi heldur en frá Reykjavík. 

Ef menn vilja stytta leið erlendra ferðamanna til Íslands um Gulna hringinn væri nær að lengja austur-vesturbrautina í Reykjavík og stórminnka með því í leiðinni flugumferð um norður-suðurbrautina yfir Kvosina og Kársnes. 

Þess má geta að um það leyti sem flugvélum var bægt frá Keflavíkurflugvelli vegna slæms skyggnis var rakastig á vellinum 101% og einnig 100% á veðurathugunarstöðinni á Kálfhóli, sem er næsta veðurstöð við Selfoss á Suðurlandsundirlendinu. 

Á sama tíma var rakastig mun lægra á Reykjavíkuflugvelli eða 93% en í suðvestanátt stendur vindur þvert á norður-suðurbrautina, sem er eina braut vallarins sem er nógu löng til að gagnast meðalstórum þotum. 

Ef austur-vestur brautin væri lengri brautin myndi notagildi vallarins og gildi hans sem varaflugvöllur fyrir Keflavíkurflugvöll stóraukast. 

Rétt er að geta þess að í vest-norð-vestan átt er oft bjart á Suðurlandsundirlendingu þegar þungt er yfir Faxaflóa. 

En þessi tilfelli eru margfalt óalgengari en sunnan- og suðaustanáttirnar. 

Þurftu að lenda á Egilsstöðum

17. júní í Mosó. Ófyrirsjáanlegar dýrlegar afleiðingar barneigna.

Flugdagurinn á Akureyri var í hávegum hafður hjá mér um áratuga skeið og aðstoðaði ég við það árlega að halda uppi kynningu á atriðum á flugsýningunni. Var þetta snar þáttur í lífinu á þessum árum, því að á Akureyri á ég einhverja nánustu og bestu vini mína, einkum þá sem hafa lifað og hrærst í fluginu þar. 

En ég áttaði mig ekki á því fyrir hálfri öld hvaða afleiðingar miklar og örar barneignir á árunum 1962-1974 myndu hafa hálfri öld seinna. 

En þá var flugdagurinn jafnan um Jónsmessu á sama degi og eitthvert af 20 barnabörnum útskrifaðist úr háskólanámi og auðvitað hafði fjölskyldan forgang fram yfir flugdaginn. 

Þar að auki hefur Fornbílaklúbbur Íslands haldið aðal hátíð sína á Selfossi sama dag, þannig að bæði flug og bílar hafa orðið að víkja þá helgi. 

Nú bregður svo við að í fyrsta sinn í mörg ár úrskrifast ekkert barnabarn úr háskólanámi um Jónsmessu. 

En einmitt þá er flugdagurinn færður fram til 17. júní, sem ævinlega hefur verið helgaður fjölskyldunni eins og hægt hefur verið. 

Flest barnabarnanna eiga heima í Mosfellsbæi og þar var líka þjóðhátíðardagurinn haldinn með pomp og pragt. 

Set hér inn myndir frá deginum, þar sem meðal annars má sjá Evu Ingadóttur (og Ölmu) lætur Kristínu Rán Guðjónsdóttur mála á sig kisuandlit í tilefni dagsins sem er svo yndislegur í faðmi sinna nánustu.

 

Listflug og 17 júní-gleði á Akureyri