Fleyg orðaskipti Söru Leander og Joseph Göbbels.

Sara Leander hét þekkt sænsk söngkona, sem var svo vinsæl bæði í Svíþjóð og í Þýskalandi, að hún komst í gegnum stríðsárin, en leið þó fyrir það víða utan Þýskalands. 

Hún var undir pressu frá báðum aðilum, en þekkt urðu orðaskipti hennar við Joseph Göbbels, áróðurs- og menntamála þar sem atlaga Göbbels mistókst.  

Þau hittust á samkomu og Gðbbels sagði við Söru: "Nafnið Sara, er það ekki Gyðinganefn?"

Sara lét sér hvergi bregða en svaraði samstundis: "Þú þarft ekki að spyrja mig að því, Joseph minn."

Ekki segir af frekari orðaskiptum þeirra. 

Björguðu listamönnum úr klóm nasista

Verktakar og verkbeiðendur sýna of oft mikla vanrækslu.

Burtséð frá því hvort aðstæður á Eldfellsvegi við Viðlagafjöru í Vestmannaeyjum er, hefur um áraragðir verið plagsiður hér á landi að verktakar fá að vanrækja stórlega skyldur sínar um aðstæður fyrir ökumenn samkvæmt útboðslýsingum. 

Mörg dæmi eru um slíkt, en þegar málsatvik eru skoðuð nánar sést, að lagaskyldan um frágang og er á ábyrgð verkbeiðenda, sem oftast eru viðkomandi sveitarfélag eða Vegagerðin.  

Hér á þessari bloggsíðu hafa í gegnum árin verið rakin mörg einstök dæmi um þetta án þess að séð verði að bragarbót verði á.  

Einkum er vanræksla á merkingum sifellt að valda vandræðum. 

Í ofanálag draga tryggingarfélög oft lappirnar við að ganga frá málum sem skyldi. 

Vara við að aka veginn í myrkri

Snillingur, sem enn getur unnið leiki og mót.

Síðasta HM í fótbolta varð afar mikilvægt fyrir knattspyrnusnillinginn mikla, Lionel Messi, þar sem sjá mátti kafla í spili, þar sem sóknarlínan gat notað einstæðan sólóspuna Messis til að vefa í kringum stærri spilvefi, sem skópu mörk. 

Á þessu móti mátti sjá ýmis afbrigði af hæfni hans til að splundra vörnum mótherjanna og nýta það fyrir sig og eigið lið til að spinna glæsilegar og árangarsríkar leikfléttur. 

Nú er aldurinn farinn að hafa áhrif á þann firna erfiða leikstíl, sem hefur verið aðall Messis, þar sem hann er allt í öllu í leik liðsins um víðan völlinn í vörn og sokn. 

Það styttist því væntanlega í það að ekki verði lengur mögulegt að valda svona firna erfiðu hlutskipti til fulls. 

Hann nálgast nú þann stað, bæði í staðreyndatali og almennu mati, að standa ekki aðeins jafnfætis Maradona sem besti leikmaður sögunnar, heldur fara fram úr honum. 

Messi allt í öllu

Gæti verið ótrúlega stór frétt að bóluefni við krabbameini sé að koma.

Framfarir í læknavísindum hafa raðað sér í gegnum tíðina í sögu mannkyns sem meðal stærstu frétta.  Má nefna marga sjúkdómi sem dæmi, svo sem mænuveikina á miðri síðustu öld.

"Til moldar oss vígði hið mikla vald, 

hvert mannslif, er jörðin elur.

Sem hafsjór þau rísa, fald við fald,

og falla, en Guð þau telur..."

 

Þannig lýsti Einar Benediktsson hinum einfalda veruleika mannslífanna. Milljónirnar sýnast hafsjór en þó er ekkert mannslíf og engin alda nákvæmlega eins og önnur. 

Þessu hefur verið lýst hér á síðunni með því að vitna í lag og ljóð, sem ber heitið "Það er ekki annað í boði" þar sem meðal annars eru þessar línur:

 

Þegar við fæðumst og færir oss yl

framtíðar morgunroði

við engu´um það ráðum að erum við til;

það er ekki annað í boði..." 

 

Nú stendur yfir hátíð kristinna manna, sem snýst um líf og dauða, og því kemur fréttin um hugsanlegt stórvirki læknavísindanna á viðeigandi tíma. 

Og ljóðið "Það er ekki annað í boði" endar svona:

 

"...því jarðlífið sveiflast sem hverfanda hvel, 

í heilsunni´er fjör eða doði. 

Er dauðinn þig tekur, þá taktu´honum vel;

það er ekki annað í boði. 

 

Núið, hver stund, sem þú nota skalt vel, 

fæðing og dauði; fjörbrot og hel, 

upphaf og stopp, samt hluti´af eilífðarvél;

það er ekki annað í boði."

 

 

 

Bóluefni gegn krabbameini verði tilbúið fyrir 2030

Gagnleg flotformúla fyrir jeppadekk.

Ætli það séu ekki liðin um fimmtán ár síðan sett var fram formúla hér á síðunni, sem beita mætti til að giska á flotgetu jeppadekkja.  Hún er svona, miðað við dekk sem stendur í lóðréttri stöðu, t.d. á jöklajeppa síðuhafa, Suzuki Grand Vitara dísil árg. 1998, myndin tekin í jeppaferð í Setur með Kerlingarfjöll í baksýn. 

Heildarhæð dekksins  x  breidd dekksins  x  hæð dekksins frá jörðu upp í felgu  x  0,28.   

35 tommu dekk:  35 x 12,5 x 10 x 0,28 =  1220.  Ef þetta er létt Súkka Fox, 1220 kíló, getur verið hægt að framlengja dæmið með prósentutölu, þ. e. að jeppinn hafi 100 % flotgetu.

Grand Vitarajeppinn er 1480 kíló og flotgetuprósentan ca 77 %. 

38 tommu dekk:  38 x 15,5 x 11,5 = 1900, og ef þetta er Toyota Hi-Lux, 2350 kíló, er flotgetan 75%. 

Formúlan hefur verið marg prófuð, bæði í ferðum og með jeppana inni á steingólfi til að sjá bælinguna við úrhleypingar. 

Radialdekk bælast jafnara en diagonal, eins og 44 tommu dekkin eru, en þeim er hætt við því að vöðlast upp við mikla úrlhleypingu. Þótt flotgetutalan sé meira en 3000 á 44 tommu dekkjum, sjást þeir yfirburðir best við það hve lítið dekkin bælast á 4 pundum eða meira, En þegar nálgast 2 pundin byrja ókostir diagonal dekkja að segja til sín. 

Því lengra sem hjólfarið er í kyrrstöðu miðað við breiddina, því betur rennur jeppinn, samanber eiginleika skíða.  

Síðuhafi hefur í 19 ár átt Range Rover með Nissan Laurel dísilvél árgerð 1973 og nefnt hann Kötlujeppann með tilliti til þess, að yfirvöld setja alloft það skilyrði fyrir umferð jeppa á fréttaslóðum að þeir séu með minnst 38 tommu dekkja. 

Þessi lúni jeppi er 2100 kíló og flotgetan lítið meiri en á 35 tommu Súkkunni. 

 

 

 

 

 

 

   

    

Vilja njóta landsins í sátt og samlyndi

Airbus - þótt fyrr hefði verið.

Icelandair hefur alla sína tíð verið tryggur viðskiptavinur framleiðandanna sem fyrstir seldu þeim vélar. 

Þegar Fokker F-27 Frienship skrúfuþoturnar sem þeir keyptu fyrir innanlandsflugið 1965 voru orðnar úreltar um 1990 var haldið áfram að kaupa Fokker á þeim forsendum að verksmiðjan væri svo óskaplega traust og vélarnar góðar. 

Örfáum árum síðar varð Fokker gjaldþrota og hinar þungu og úreltu F-27 hurfu fljótlega. 

Icelandair keypti fyrstu millilandaþoturnar 1967 og voru það hárrétt kaup. En með tilkomu Airbus gerðist svipað og gerst hafði hjá Fokker, að hannaðar voru nýjar vélar sem voru aðeins rýmri og stærri en mjóþotur Boeing og gátu því notað stærri hreyfla vandræðalaust á sama tíma og 737, vinsælasta tegund allra tíma, leið fyrir það að þurfa flókið og vandasamt tölvukerfi til að hafa af að verða notuð áfram. 

Boeing gerði svipuð mistök og Fokker að hanga of lengi á gömlu hönnuninni og lenda fyrir bragðið í Boeing 737 Max vandræðunum. 

Icelandair breytti stuttlega til þegar pöntun var gerð um kaup á Douglas DC-10 þriggja hreyfla þotu, en óhöpp beindu félaginu aftur til Boeing með kaupum á Boeing 757 fyrir tíunda áratuginn, og reyndust þau kaup henta félaginu afar vél. 

Vegna sérstakra flugvalla aðtæðna á Íslandi komu stórir vængir þeirra véla sér vel og einnig við flug til valla í mikilli hæð, svo sem Denver í Kólóradó. 

Nú reynist sú vél of eyðslufrek svo að framleiðslu hennar var hætt, og um þessar mundir eru framleiðsludagar tímamóta breiðþotunnar stóru frá 1967, Boeing 747 taldir.  

Hún var ævintýralega góð breiðþota í upphafi en hefur í kapphlaupi við tveggja hreyfla vélar komist á endastöð.   

Nú eru að verða 60 ár síðan samvinna Icelandair og Boeing hófst og loksins hefur verið tekin sú ákvörðun í kjölfar farsæls reksturs aö kaupa Airbus vélar fyrir þau verkefni sem þær leysa best af hendi en lofa Boeing 737 Max að halda áfram á styttri leiðum.  

Leysa Boeing 757 af hólmi með nýjum Airbus flugvélum

Skriftin er á veggnum.

Stóra línuritið, sem sýnir mannfjöldaspá fyrir ESB löndin á 21. öldinni er svo sláandi, að nota má gamla orðtakið um skriftina á veggnum. 

Aldurshlutföll mannfjöldans munu breytast mjög í þá átt sem nota mætti þá lýsingu, að æ færri muni þurfa að vinna fyrir æ fleiri öldruðum lífeyrirþegum.  

Og ástandið í Frakklandi einmitt undanfarnar vikur sýnir hina miklu tregðu gegn þessari þróun sem brýst út þegar reynt er að breyta aldursmörkunum, sem ákvarða starfslok vegna aldurs. 

Þörfin á gagngerðri breytingu á lífsháttum, mataræði og hreyfingu er æpandi þegar horft er á sívaxandi "velmegunarsjúkdóma og afleiðingar þeirra. 

Sívaxandi vandræði í heilbrigðisþjónustunni og velferðarkerfinu vex meðal annars vegna hins mikla skilningsleysis og þrjósku ráðamanna gagnvart orsökum og afleiðingum á þessu sviði.  

Íbúafjöldinn í ESB að ná hámarki

Skautað framhjá því að herinn komi aftur. "Ó, hve margur yrði sæll..."

Í spjallinu, sem þessi bloggpistill er tengdur við á mbl.is, er hugmyndum um íslenskan her stillt upp sem eina möguleikanum andspænis því að hafa engan íslenskan her. 

En 1951 var efling varna hér leyst með komu bandarísks varnarliðs og allt fram til 2006 stóðu innanlandsdeilur um varnarmálin aðallega um veru þess liðs.  

Ekki er hægt að skauta framhjá tilvist þessa möguleika um bandarískt varnarlið í rökræðum um íslenskan her með sjálfboðaliðum eða herskyldu. 

Fyrir rúmri öld var haldin þjóðaratkvæðagreiðsla um þegnskylduvinnu og var henni hafnað í henni. Íslendingar eru ólíklegir til að samþykkja herskyldu. 

Meðal atriða, sem átti þátt í höfnun þegnskylduvinnu var þessi vísa:

 

"Ó, hve margur yrði sæll 

og elska myndi landið heitt

mætti´hann vera í mánuð þræll 

og moka skít fyrir ekki neitt."

Gætum kvatt 38 þúsund manns í her

Fyrir sextíu árum kviknaði í nýjum slökkvibíl.

Á sjötta áratug síðustu aldar var tækjakostur slökkviliðs Reykjavíkur orðinn ansi lúinn, og dróst mjög að taka nýjan, stóran og fullkominn slökkvibíl í notkun. 

Dag einn var strætisvagn fullur af farþegum á leið suður Nóatún þegar hinum nýja slökkvibíl var ekið fram úr honum; greinilega á leið úr prísundinni hjá Eimskipum. 

Þótt þetta væri út af fyrir sig stórfrétt, ráku farþegarnir og strætisvagnabílstjórinn upp stór augu þegar þeir sáu að mikinn reyk lagði aftur úr slökkvibílnum, og fór hann greinilega vaxandi. 

Strætisvagnabílstjórinn sá að slökkvibílstjórinn virtist ekki hafa hugmynd um þetta og gaf því strætisvagninum rösklega inn og byrjaði að þeyta flautuna. 

Fór fljótlega fram úr slökkvibílnum og þvingaði upp á gangstétt þar sem hann stöðvaðist. +

Út úr bílnum snaraðist slökkibílstjórinn með miklum þjósti, greinilega mjög æstur yfir þessu háttalagi strætóbílstjórans. 

Vindur stóð úr suðri og lagði reykinn því norður á Klambratún, en slökkiliðsmaðurinn var svo æstur, að hann virtist ekki sjá það, enda var hann með allan hugann við athæfi strætisvagnastjórans, sem opnaði dyrnar á vagninum. 

Sótrauður af bræði hellti slökkviliðsmaðurinn sér yfir strætóstjórann, sem sat hinn rólegasti og bað hann að róa sig aðeins og líta yfir til afturenda slökkvibílsins. 

Slökkviliðsmanninum snarbrá við að sjá nýja fína slökkvibílinn. 

"Heyrðu, það er kviknað í bílnum!" hrópaði hann. 

"Hvað eigum við að gera?!"

"Nú, kalla á slökkviliðið" svaraði strætóstjórinn. 

Óhætt er að nota orðin að vita ekki sitt rjúkandi ráð yfir ástand slökkvibílstjórans. 

"Það er til dæmis slökkvitæki þarna fyrir ofan þig" sagði strætóstjórinn. 

Nú tók við óðagot hjá slökkviliðsmanninum af því tagi, að farþegarnir veltust um af hlátri, því að meðan á því stóð snarminnkaði reykurinn úr slökkvibílnum. 

Það stóð á endum að loksins þegar tekist hafði að losa slökkvitækið hafði reykurinn minnkað niður í næstum ekki neitt. 

Ekki minnkaði æsingur slökkviliðsmanns við þessa óvæntu sjón. 

"Hva, reykurinn horfinn!!" kallaði hann. 

"Já," samsinnti strætóstjórinn, "þú hefur greinilega ekið af stað með handbremsuna á svo að hún hitnaði nógu mikið til þess að það kviknaði í henni. En um leið og þú stansaði hætti núningurinn, svo að maðurinn sem olli eldinum slökkti hann óvart sjálfur."

 

Þetta skondna atvik komst aldrei í fréttir, en strætisvagnabílstjórinn sagði mér frá því síðar. 

Myndskeið: Alelda strætó í Reykjanesbæ

Hugmyndafátækt og árátta að ná sem mestu af öldruðum.

Æ ofan í æ er eins og að íslenskum ráðamönnum detti aldrei neitt annað í hug sem fjáruppspretta fyrir ríkissjóð en að ráðast að öldruðum og öryrkjum og öðrum, sem minnst mega sín.  

Eitt af ótal dæmum um þetta er mál Gísla B. Árnasonar og fleiri, sem lýst er í viðtengdri frétt á mbl.is.  

Af sama meiði má það teljast að sama daginn koma fram hugmyndir um að hygla sérstaklega með skattfríðindum erfðafjár helst þeim, sem hafa meiri tekjur. 

Skerðingar „eins og að fá högg undir beltisstað“