15 stiga frost við Korpu snemma í morgun.

Snemma í morgun komst frost nður í um 15 stig við Korpu.  Þaðan eru aðeins örfáir kílómetrar til sjávar þar sem frost var allt að tíu stigum minna. 

Þetta sýnir áhrif sjávar og skýjafars á hita. Í heiðskíru veðri og logni inn til landsins verður útgeislun frá jörðu mikil, en við sjávarmál er hún milduð af nálægð sjávarins. 

Á mörkum misjafnlga kalds lofts getur myndast mikil ísing á jörðu, og kannski var það eitthvað af þeim toga sem bjó til glæra svellið sem olli svo mörgum árekstrum í morgun. 

Um 20 stiga frost í nótt

Tengslin við gengnar kynslóðir.

Lögmál tímans felst í því, sem reynt er að lýsa í eftirfarandi línum í ljóðinu og laginu "Lífið er núna" á þennan veg: 

 

"...Hver andrá kemur og hún fer

og einn og sér er dagur hver. 

Hvort nýir góðir dagar koma´er óvíst enn. 

En boðskap flytur fortíðin, 

sem færir okkur vísdóminn: 

Svo lærir, sem lifir, segja menn."... 

 

Munurinn á fortíðinni og framtíðinni er sá, að hið fyrra er fólgið í sagnfræðilegum staðreyndum, sem hægt er að kanna og nota við upplifun á tengslum kynslóðanna, en hið síðara er algerlega háð ágiskunum, og tíminn einn getur leitt í ljós hvort og hverjar þeirra verða að sagnfræðilegum staðreyndum.  

Eftir Heimsstyrjöldina kepptust Evrópuþjóðir við að fjarlægja sem mest af rústum og öðru "gömlu drasli", en uppgötvuðu margar um seinan að oft hafði verið gengið of langt. 

Víða höfðu vinalegir borgarhlutar fortíðar þar sem hægt hafði verið að rölta um og setja sig í spor formæðra og forfeðra, vikið fyrir kuldalegum og líflausum steypu- og glerbáknum.

Hér á landi fékkst ákveðin viðspyrna með stofnun og starfsemi Torfusamtakanna sem tókst að bjarga og varðveita hús, sem nefnd höfðu verið "ónýtt kofadrasl" og stefnt að því að reisa þar í staðinn steinbákn fyrir stjórnarráðið. 

Saga yfirlætislitla hússins neðst við Frakkastíg liggur fyrir. Þar var fyrst franskur spítali reistur fyrir hina mörgu frönsku sjómenn, sem settu svip á Reykjavík. 

Síðar var þar gagnfræðiskólinnn Lindargötuskólinn þar sem þúsundir reykvískra unglinga fengu uppfræðslu á ógleymanlegum þroskaárum.  

Nú bregður fyrir löngun til þess að fullklára það verk að rífa hið gamla, sem eftir er á þessum slóðum og klára þá framtíðarsýn að þarna verði enn ein háhýsin.  

"Hvort eð er" hugsunin felst í því að hvort eð sé búið að rífa merk og söguleg gömul hús eins og hús timburverslunarinnar Völundar og stóra Kveldúlfsskálann, sem síðar var notað sem pakkhúsið Skúlaskáli. 

Það tókst að bjarga timburhúsunum tveimur sunnan megin við vesturenda Laugavegar, og fyrir bragðið er þar enn mögulegt að njóta sólskins við húsin beint á móti. 

Háhýsaþorstinn er á skjön við þá staðreynd, að Reykjavík er sú höfuðborg sjálfstæðs lands, sem býr við lægsta sólargang allra höfuðborga heimsins. 

 

 

 

Fjögur eldri hús fari á Frakkastíg

Kústurinn, lang hentugasta en samt gleymdasta tækið á bílastæðunum.

Nú eru komin nokkur ár síðan hér á síðunni var bent á það, hve miklu afkastameiri og hentugari venjulegur strákústur er við mokstur á snjó af bílum og samgöngumannvirkjun en öll önnur tæki, svo sem sköfur og jafnvel skóflur. 

Væri raunar furðulegt hve sjaldgæft er að sjá kústa nálæga þar sem þeir myndu gera mikið gagn. 

Samt er ekki að sjá að fólk hafi almennt áttað sig á þessu, og alger viðburður er að sjá þurrkur settar upp í loftið á bílum á veturna eins og almennt er gert á Norðurlöndunum.   

Alls kyns mótbárur eru færðar fram gegn kústunum, meðal annars þær, að hann komist ekki fyrir inni í bílum. 

Þetta er alger firra eins og sést á því að alla jafna er kústur síðuhafa hafður tiltækur inni í minnsta bíl, sem er í umferð á Íslandi og passar þetta líka ljómandi vel skorðaður langsum í bílnum, þótt hann hafi aðeins rými fyrir tvo í sæti, og lóðrétt afturrúða sé alveg við hnakkapúða sætanna. 

Kústurinn er svo handhægur, að mótbárur varðandi það að það sé of mikill snjór við bílana reynast vera hrein fjarstæða, eins og sést á því, að til þess að fá ekki snjó ofan í skóna, er langfljótlegast að sópa snjónum bara í burtu á þeim svæðum þar sem þarf að labba. 

Í dag var fyrr en varði búið að búa til auðar gönguleiðir í kringum bílana þrjá.  

Ein mótbáran er að það sé óþægilegt að nota kústinn við að sópa ofan af þökum og vélarhlífum, en eins og sést af mynd af kústinum uppi á þaki Suzuki Alto, er skaftið nógu langt til þess að hægt er að ýta snjó af þakinu þvert yfir það og láta  hann detta ofan af bílnum hinum megin við hann. 

Ætla að skutla nokkrum ljósmyndum frá mokstri við þrjá bíla í dag, sem tók enga stund, en hefði verið margfalt seinlegra með íssköfum einum.  

Að sjálfsögðu er ísskafa af stærri gerðinni höfð við hendina ásamt kústinum, en oftast er hægt að skafa hrím af gluggum með því að snúa kústhausnum á hvolf.

Auðvitað hafa kústarnir sínar takmarkanir gagnvart mismunandi aðstæður, svo sem þegar moka þarf þungan snjó. 

Einn af kostum kústa er sá að þeir fara betur með bök bakveikra en skóflur. 

 

Kórónaveiran verður áfram inni í heilbrigðiskerfinu.

Það eru að sönnu fólgin ákveðin tímamót í því hjá hverri þjóð þegar "aflétt verður öllum takmörkunum" vegna kórónaveirunnar eins og það er orðað, og að þessi farsótt verði sett í svipaðan flokk og "venjulegar umgangspestir". 

En alls staðar þar sem aflétting hinna sérstöku hamla er tilkynnt er það jafnfram látið fljóta með, að þessi nýja viðbót við viðfangsefni heilbrigðiskerfinu muni verða þar áfram sem eitt af þeim viðfangsefnum, sem krefjast meðferðar, svo sem hjartasjúkdómar, alzheimer, parkinson og ýmsir taugasjúkdómar, sem voru almenningi lítt kunnir fyrir nokkrum áratugum. 

Stóra ógnin, fjölónmæmissýklarnir og nýja ógnin, ópióðafíknin verða þarna áfram á þessu fyrirferðarmensta sviði ríkisútgjalda þjóðanna. 

Sonur forsetahjónanna smitaður – afhendingu frestað

Tævan; áhugavert land.

Ef svipast er um í heiminum um þessar mundir og hugað að friðarhorfum þjóðanna, koma fljótlega upp togstreita og deilur Rússa og Kínverja við nágranna sína, Úkraínu og Tævan. 

Tævan liggur fjær okkur og vekur því kannski ekki eins mikla athygli og Úkraínubúar, en þegar nánar er aðgætt, er fólkið sem býr á þessari fjarlægu eyju og þjóðlíf þess ekki síður áhugavert en Evrópuþjóða.  

Það er undravert í ljósi þess að Tævanbúar eru aðeins 23 milljónir, en Kínverjar meira en 70 sinnum fjölmennari.  

Árið 2049 verða liðin 100 ár síðan þjóðernasinnastjórn Chang Kai Shecks flúði frá meginlandinu undan Kommúnistastjórn Maós 1949 og það glyttir í þá langtímahugsun hjá núverandi valdhöfum í Kína að hernema eyjuna í tilefni afmælisins. 

En af hverju gera þeir það bara ekki sem fyrst? Fyrir því eru margar ástæður og ein þeirra er sú, að báðar standa afar vel á okkar tímum, Kína að verða mesta efnahagsveldi heims -  og - svo hitt,  sem erfitt er að sjá hvernig svona fámenn þjóð eins og Tævanir eru að þeir eru einhvert tæknivæddasta ríki heims, þótt smáríki sé.  

Þessi kínversku ríki stunda lygilega mikla verslun og samstarf á mörgum sviðum. Raunar sést fljótt, að aðall þeirra beggja felst í því að nýta sérþekkingu og tækni sína til að stunda samstarf við aðrar þjóðir. 

Það eru aðeins fáir dagar síðan ein af mörgum fréttum af slíku birtist í íslensku blaði: Japanski vélhjólaframleiðandinn Yamaha hefur fengið að kaupa bæði nýjasta búnað rafvélhjóla, sem eru með útskiptanlegum rafhlöðum hjá Gogoro, sem hefur komið upp tæknivæddasta kerfi notkunar slíkra hjóla í heiminum.  

Þegar Kawasaki vantaði gott 300 cc lúxusvespuhjól í framleiðslulínuna, keyptu þeir einkaleyfi til að smíða Kymco Downtown, tævanskt hjól,og færa það með smávægilegum breytingum í grænt gervi Kawasaki J300.  

Í þættinum 60 mínútum var greint frá því, að Bandaríkjamenn hefðu fengið sjokk í upphafi kórónuveikifaraldusins þegar þeir uppgötvuðu hve hræðilega langt á eftir Tævönum og Kínverjum þeir væru í framleiðslu á grunneiningum alls þess tölvubúnaðar, svo sem tölvukubbum, sem heimsbyggðin þarf á að halda í smáu og stóru. 

Tævanir hafa verið lagnir við að lifa við hótanir við Kínverja um hernám en þeim mun duglegri við að koma sér í mikilvæg sambönd við margar þjóðir, svo  sem Bandaríkjamenn, sem hafa heitið að standa við bakið á þeim. 

Tævanir ráða meira að segja enn yfir tveimur smáeyjum, Kvemoy og Matsu, alveg upp við strönd Kína, sem heimsbyggðin titraði yfir fyrst eftir sigur Maós yfir þeim sem efni í stríð, en eru nú flestum gleymdar nema kannski þeim, sem eru komnir á níræðisaldur og rámar í þetta. 

Þar að auki byggist hernám Tævan á innrás af sjó inn í land, sem er afar fjöllótt og oft með erfiðum veðuraðstæðum. 

Kínverjar líta kalt á stöðuna, vita hvað þeir hafa núna, en eru óvissari með það hvað stríð myndi færa þeim. 

Niðurstaða: Sama þráteflið áfram og það er gróðavænlegra.  

Neiti enn að afhenda þinginu umsóknir

Óvæntar og ófyrirséðar hreyfingar valda hættu.

Hvers vegna eru liðin nokkur misseri síðan maður heyrði reiðhjólabjöllu hringt. Samt er þessi hlutur einn mikilvægasti öryggisþáttur hjólanna. Getur verið að fólk sé feimið við að hringja eða hrætt við að vera talið með frekju og yfirgang?

Sé svo, þarf að breyta hugarfarinu og útbreiða þann tilgang bjölluhringinga að vegfarendur fylgist með umferðinni og fari að öllu með gát. 

Mörg óskrað og skráð óhöpp og slys verða í umferðinni vegna þess vegfarendur gera snögga og ófyrirséða breytingu á ferðum síðum, svo sem gangandi og hjólandi sem breyta skyndilega um stefnu og ganga eða hjóla í veg fyrir aðra, sem eiga sér einskis slíks von. 

Af þeim sökum má spyrja, hvort rétt sé að banna notkun heyrnartóla fyrir háværa tónlist og annað ljósvakaefni hjá gangandi og hjólandi fólki og fylgja því banni eftir. 

Fótstigin reiðhjól og rafhjól eru hljóðlaus og því geta því verið lúmskur hættuvaldur. 

Eftir að hlaupahjólin bættust við er æ algengara að sjá notendur þeirra koma skyndlega í ljós  eins og skrattinn úr sauðarleggnum og oft á of miklum hraða. 

Hopp lagði Færeyjar

Stærri skjálftar í Borgarfirði um miðjan áttunda áratuginn.

Stærri skjálftar komi í Borgarfiði árið 1974, steinhús skemmdust og mikið fjör hljóp í hveri, en Deildartunguhver er náttúrulega séð vatnsmesti hver landsins. 

Stærsti skjálftinn var 5,5 stig. 

Þessi skjálftahrina dó út og dró engan frekari dilk á eftir, en sýnilegar afleiðingar hennar voru sýndar bæði í sjónvarpsfréttum og Kastljósi. 

Sá stærsti í fleiri áratugi og fannst í borginni