"Strákurinn frá Búastöðum er enginn lopi." "Rallið er ekki búið fyrr en það er búið."

Morg dæmi eru um það í keppni, að jafnvel þótt horfur virðist ekki góðar, geta jákvæð hugsun og baráttuvilji oft komið sér vel.

Dæmi. 

Á Evrópumeistaramótinu í frjálsum íþróttum í Brussel fóru úrslitakeppnin í stangarstökki og langstökki fram á sama tíma. Torfi Bryngeirsson hafði komist upp úr undankeppninni í báðum greinunum, en varð að velja á milli þeirra í úrslitakeppninni. 

Fyrir keppnina var Torfi í 2. sæti á Evrópulistanum í stangarstökki en ekki einu sinni í tíu efstu sætunum í langstökkinu og því skildi enginn að hann skyldi velja langstökkið fram yfir stangarstökkið.

"Nú er ég búinn að skoða hina í undankeppninni", sagði Torfi, "og Ragnar Lundberg er í stuði í stönginni, en þeir, sem komust áfram í langstökkinu eru bara kettlingar" 

Í langstökkskeppninni voru aðstæður slæmar vegna misvindis og "kettlingarnir" hrundu niður vegna taugaóstyrks og voru langt frá sínu besta.  

Torfi, sem var frá Vestmannaeeyjum, hafði enga reynslu af stórmótum á meginlandi Evrópu, var hins vegar alveg óttalaus, barði sér á brjóst og hrópaði á íslensku "strákurinn frá Búastöðum er sko enginn lopi!"

Hann náði besta árangrinum á ferli sínum og varð Evrópumeistari. 

Blaðamenn undruðust taugastyrk hins óreynda keppanda og árangurs hans og spurðu hann, hverju þetta sætti. 

"Það er af því að ég er aldrei nervös", svaraði Torfi.

"Og hvernig stendur á því?" spurðu blaðamennirnir. 

"Af því að það er verra," svaraði Torfi. 

Kjörorð Jóns R. Ragnarssonar á ferli hans í rallakstri voru "rallið er ekki búið fyrr en það er búið."

Þetta sagði hann meira að segja eitt sinn, þegar bíllinn hafði oltið og stórskemmst, hann var sjálfur moldugur og hart leikinn, og engum flaug í hug að samt yrði haldið áfram.  

En það var gert og þessi mikli baráttuvilji skilaði honum oft langt. 

 

 

 

Segir Ísland vera „svarta hestinn“

Beinar hótanir Rússa um nýtt og grjóthart kalt stríð.

Það er að sjálfsögðu alger andstæða við friðsamlega sambúð þjóða ef foreskjulegt stórveldi ætlar að breyta innhafi eins og Eystrasalti í vettvang sífelldra ógnana með notkun herflugvéla, herskipa og kafbáta. 

En það er ekki hægt að líta öðru vísi á það ef Rússar fara inn á þessa braut en beina hernaðarlega hótun og þvingun að baki eignar kjarnorkuvopna, sem eru í raun lang stærsta ógn mannkynsins.   

Verið er að stilla upp vali Svía og Finna um tvo kosti: 

Ný Finnlandisering, haldinn friður hlutlausra þjóða með því að Rússar andi ofan í hálfsmálið 

eða - 

nýtt grjóhart Kalt stríð, sem gamla Kalda stríðið falli  í skuggann fyrir í samanburði. 

Rússar rufu lofthelgi Finna

Merkileg nýjung sem hægt er að mæla með.

Að afloknum ferðum um báða stóru hringina í íslenska vegakerfinu á árunum 2016 til 2018 á 125 cc léttbifhjóli, þar af tvisvar stóra hringinn, bæði yfir Öxi og um Fjarðabyggð, er óhætt að fullyrða, að fyrirhugaður Vestfjarðahringur ber af hvað fjölbreytni snertir. 

Er mikið tilhlökkunarefni hvernig til tekst og hvernig hægt verður að vinna úr framhaldinu. 

Flest skilyrði eru fyrir hendi til þess að gera svona Vestfjarðakeppni fræga út fyrir landsteinana.

Efsta myndin er tekinn í Vestfjarðahringnum 2018 á Hrafnseyrarheiði, en nú er hún komin út úr hringveginum og hóp ýmissa vega vestra, svo sem Þingmannaheiði.

Hér um árið tókst að komast um Þingmannaheiði á minnsta bíl landsins, NSU Prinz og einnig á stærri bílum, ævintýralega leið.

Sem eitt af mörgum dæmum um stórkostlegar hjólaleiðir er hringur Elísar Kjarans með ströndinni frá Dýrafirði til Arnarfjarðar, en mynd í viðtengdri frétt á mbl.is af leiðinni, þar sem hún liggur undir svonefndum Skútabjörgum í Arnarfirði, er bara einn af mörgum mögnuðum köflum á leiðinni. 

Ef færi gefst verður bætt við myndum hér í pistlinum úr ferð með allan búnað til tónleikahalds á léttbifhjólinu, sem farin var 2017.   

 Á kortinu sem verður sett neðst, verða vegirnir sem farnir voru í þremur stærstu hjólaferðunum.

Enda þótt Vestfjarðahringurinn virðist ekki ýkja stór, en hins vegar er fjöldi gamalla malarvega slíkur, að úr nógu er að moða. Á neðstu myndinni, sem verður hér á síðunni og er úr  viðtengdri frétt á mbl.is,  sést hjólreiðamaður á hinum magnaða stað undir svonefndum Skútabjörgum í Arnarfirði, Leiðin var enn meira spennandi áður en menn tóku sig til og fylltu fjöruna upp, þar sem sjórinn flæddi fyrrum yfir upp í kletta á háflóði. Sé leiðin ævintýraleg nú var hún enn ævintýralegri meðan á háflóði þurfti að ósnortna fjöruna líkt og komið væri út í hann meira en 200 metra djúpa Arnarfjörð.   

Tvær spennandi nýjar hjólakeppnir í boði í ár

Kemur ekki á óvart ef miðað er við hvernig embættisveitingin var.

Flest í kringum það þegar Donald Trump skipaði hina hægri sinnuðu dómara í Hæstarétt Bandaríkjanna var þess eðlis, að í raun ætti engum að koma það á óvart sem nú er að gerast á þeim vettvangi. 

Trump leit viðfangsefni sitt alveg nýjum augum varðandi það, að vegna þess hve mikilfenglegur hann væri, væri það fullkomlega eðlilegt að að hann veldi dómarana á þann hátt, að þeir yrðu honum sem allra þóknanlegastir í hvívetna. 

Trump afrekaði það meira að segja að láta viðkomandi dómara stilla sér þannig upp við hliðina á sér að það sæist langar leiðir og heyrðist líka, að dómarinn ætti Trump allt að þakka og skuldaði honum djúpa þökk og þýlyndi. 

Raunar er það fyrirkomulag að stjórnmálamaður skipi hæstaréttardómara beint oft ávísun á vandræði. 

Nema fyrir mikilmennið Trump, sem gumaði af sinni afburða embættisveitingu. 

Viðsnúningurinn endurspegli gliðnun í landinu

"Skjóta helvítin!"

Alveg var það óborganlegt á sínum tíma hvernig Laddi túlkaði hinn skotglaða Norðlending í grínþáttum í sjónvarpinu og hrópaði með sérstakri áherslu á norðlenska framburðinn á samhljóðunum: "skjóta helvítin!!"

En gamanið fer að kárna ef það er sjálfur forseti Bandaríkjanna sem eggjar lögregluna til stórræða gegn mótmælendum með því hrópa hvatningarorð til þeirra um að beita skotvopnum gegn mótmælendum fyrir utan Hvíta húsið 2020.  

Fleira í svipuðum dúr sagði hann á ferli síum, til dæmis þegar hann beindi orðum sínum til byssueigenda í sjónvarpskappræðum með því að horfa beint framan í myndavélina og biðja þá um að vera rólega en tilbúna; í tuskið væntanlega; þegar kosið yrði. 

Byssugleði Kananna er aðallega fyrir sunnan landamærin milli Kanada og BNA og margfalt fleiri skotnir árlega hlutfallslega fyrir sunnan landamærin og hrekkur þá sú útskýring skammt að það sé eðlilegt að byssueign og notkun sé nauðsynleg í landnemaþjóðfélagi. 

Trump hafi viljað skjóta mótmælendur

Upphafslandið fer oft verst útúr skæðum farsóttum.

Spænska veikin kom ekki fyrst upp á Spáni,  heldur í Bandaríkjunum, sem þá voru að senda hundruð þúsunda hermanna til Evrópu á síðasta ári Fyrri heimsstyrjaldarinnar.  

Hún drap fleiri en féllu í bardögum stríðsins og því var gríðarlega mikilvægt fyrir stríðsþjóðirnar að láta hana ekki hafa of mikil áhrif á baráttuþrek herjanna. 

Af því að Spánn og Portúgal voru hlutlaus í báðum heimsstyrjöldunum skipti plágan ekki eins miklu máli í þessum tveimur löndum, og því fékk Spánn að ósekju á sig þann stimpil sem heiti drepsóttarinar færði landinu.  

Donald Trump og fleiri sóttu það fast á tímabili að nefna COVID-19 Kínaveikina, enda veiran með upphaf þar þegar í lok 2019.  

Þegar litið var til upphafs spönsku veikinnar var það þó umdeilanlegt, en einkum voru rök Trumps fáránleg, sem hann hélt ákveðinn fram á blaðamannafundunum með doktor Fauci; sem sé þau að veikin væri kínverskt sýklavopn, sem Kínverjar hefðu framleitt eingöngu í þeim tilgangi að kom í veg fyrir endurkjör Trumps!  

Í ljósi þess hve grátt kínverjar eru leiknir af veikinni sýnir þessi margtuggða skýring Trumps aðeins það eitt, að hann stendur ævinlega í þeirri trú að hann sé merkilegasta mikilmenni allra tíma og að allt snúist um eða eigi að snúast um hann.  

Kínverska efnahagsundrið í uppnámi

Man nokkur nú eftir "icecreamsoda"?

Á knattspyrnuferli sínum varð Hemmi Gunn staðkunnugur á Akureyri, því að þá lék hann með KA á tímabili og kom við sögu við þjálfun liðsins ef rétt er munað. 

Þar á undan hafði hann líka farið margar ferðir norður með liði Vals og kunni því frá mörgu að segja Sumargleðimönnum, þau þrjú ár sem hann var liðsmaður þar. 

Sumargleðin var mikið á ferðinni á Akureyri, ekki aðeins þegar þar var skemmtun og ball á föstudagskvöld um verslunarmannahelgina, heldur líka þegar ekið var í gegnum bæinn á leið á aðra staði. 

Var þá mikil stemning í hópnum ef bjartviðri með hitabylgju ríkti á staðnum og oft komin sólarlandastemning í mannskapinn. 

Hluti af henni er að svala þorstanum sem best og í því efni kunni Hemmi sérstakt ráð. 

Það fólst í drykk sem nefndist "icecreamsoda" og var alveg sérstakur og aðeins til á Akureyri. 

Í ísbúð rétt við Bautann var hægt að biðja um icecreamsoda og fá dásemdina með hraði. 

Blandan var sérstök og auðvitað einstök fyrir Ísland, því þetta var hrærð blanda af ís, mjólkurhristingi og akureyrska gosdrykknum Mix! 

Þessi guðaveig var aldeilis sérlega svalandi og góð á bragðið, væri hún hrærð í réttum hlutföllum og höfð ísköld, og verður síðuhafa það ógleymanlegt. 

Gosdrykkurinn einn og sér var aldrei í uppáhaldi hjá síðuhafa, en verður síðuhafa samt  ógleymanlegur út af fyrir sig fyrir það, að í þrjá mánuði vorið 2008, sem hann glímdi við liftrarbrest og stíflugulu með ofsakláða og svefnleysi, brenglaðist allt bragðskyn hans, þannig að allir gosdrykkir voru ódrekkanlegir þennan hræðilega tíma nema Mix!

 

P.S. Nú er svo komið að það er ekki aðeins einu sinni á hverjum degi sem það verður að hlíta þeirri kröfu að melta ensk orð í stað íslenskra í fréttum, heldur tvisvar. Í pistlinum á undan þessum er það hinn óumflýjanlegi "leggur" í staðinn fyrir "áfanga" og í þessari tengdu frétt jafn óumflýjanlegt enskt orð "trend", sem er alveg óþörf viðbót við orðið "drykkur."

Og aðeins nokkur dægur síðan melta þurfti setninguna "...það verður að kópa við ríkoverýíð og fókusera á tsjallendsið."

Drykkjartrendið sem er að gera allt vitlaust

Það sem útlendingar eiga oft erfiðast með: að fastsetja ekki áfangana fyrirfram.

"Drottinn leiði drösulinn minn; / drjúgur verður síðasti áfanginn"... orti Grímur Thomsen, en óraði áreiðanlega ekki fyrir því að Íslendingar myndu eiga eftir að henda hinu ágæta orði "áfangi" og tönnlast í staðinn á alls konar "leggjum", meðal annars í texta viðtengdrar frétta á mbl.s., og syngja: "...drjúgur verður síðasti leggurinn.."

Áratuga reynsla af samstarfi og ráðleggingum við erlenda ferðamenn hefur verið sú, að það sem þeir eiga erfiðast með að sætta sig við, að vegna dynta í íslensku veðurfari er óráð að fastsetja hverja einustu dagleið eða áfanga í fyrirhugaðri ferð. 

Sumir þeirra, sem vilja koma hingað í kringum áramótin, geta ómögulega skilið það að þá vanti að mestu daginn í sólarhringinn, sem er þá að mestu leyti skammdegisnótt. 

Tæplega mánaðar fjölskylduferð um hálendi Íslands