Góðar fréttir af þráðum framfarasporum á Ströndum.

Það eru góðar fréttir, sem berast frá Árneshreppi á Ströndum, því að þær eru af framkvæmdum, sem hafa verið langþráðar til þess að koma nútímanum á fót í samfélagi, sem er þess eðlis, að í raun getur enginn sagt að hann hafi komið í Strandasýslu og á Strandir með því einu að hafa aðeins farið um Þröskulda og Steingrímsfjarðaheiði.  

Á tímabili leit út fyrir að þessi mál væru í gíslingu hjá þeim sem hafa löngum ekki séð neitt ráð til uppbyggingar nema með því að fórna til þess náttúruverðmætum, sem þó eru og verða vonandi stór og vaxandi þáttur í sókn þessarar fögru og heillandi byggðar inn í blómlega framtíð. 

Ljósleiðari í fámennasta hrepp landsins

Dásamlegt að frétta af Óskurum og Grammy, sem tengjast Íslandi.

Það er ekki á hverjum degi sem nöfn smábæja fá flug í listaheiminum, því að venjulega eru þetta borgir á borð við Wonderful Copenhagen sem njóta þess að vinsæl lög öðlist viðurkenningu og heimskynningu sem getur orðið lyftistöng fyrir hróður staðarins og landsins, sem skapar jafnvel ferðamannastraum.

Til hamingju, Húsavík! Og til hamingju, Gísli Darri Halldórsson fyrir tilnefninguna fyrir stuttmyndina, að ekki sé nú talað um Hildi Guðnadóttur með Grammyverðlaunin. 

Húsavík tilnefnt til Óskarsins

Alveg við Suðurstrandarveginn.

Mælingatækni nútímans virðist gera það mögulegt að leiða að því líkum að hraunkvika, sem komið gæti upp á yfirborðið í eldgosi sé aðeins örfáa kílómetra frá nýjum þjóðvegi með bundnu slitlagi. 

Gildir þá einu hvort um lítið magn hrauns eða svonkallaða spýju verði að ræða, að nýtt hraun yrði það. 

Það hlýtur að vera sérkennilegt tilfinning fyrir vegfarandur eftir þessum vegi að vera meðvitaðir um þá stöðu, sem vegurinn og vegfarendurna hans eru í. 

á nýjasta korti vísindamanna sem birt var í morgun sést afstaða Suðurstrandarvegarins vel til aðal umbrotasvæðsins.  

Rúmlega 600 skjálftar frá miðnætti

"Martröð olíufurstanna" fellur fyrir sömu martröð.

Þegar Ford verksmiðjurnar settu Fiesta á markaðinn á áttunda áratug síðustu aldar var hann settur til höfuðs Volkswagen Polo, Renault 5 og Fiat 127 sem voru feikna vinsælir. 

Fiestan spjaraði sig svo vel að aðeins Volkswagen Polo hefur haldið velli og stendur nú yfir höfuðsvörðum hins netta og ofursparneytna Ford smábíls, sem danska bílablaðið Bilen og baaden kallaði "martröð olíufurstanna." 

Fiestan stóð lengi af sér ásókn rafbíla sem enn verri martröð olíufurstanna, og í lokin var Ford Ka meira að segja í raun aðeins Fiesta sem var styttur fyrir aftan afturhjól. 

En nú lýkur sem sé 45 ára gamalli sögu bíls, sem verður ekki sá fyrsti sem þarf að lúta í möl fyrir nýjustu tækni sem er bætist hver af annarri í martröð olíufurstanna. 

Dauðadómur yfir Fiesta

Við Suðurstrandarveg í vestanverðum Sigluberghálsi við Festi.

Stóri skjálftinn sem reið yfir rétt áðan er sagður eiga upptök 2,5 kílómetra fyrir vestan Nátthaga, en það er nánar tiltekið undir Suðurstrandaveginum í vestanverðum Siglubergshálsi við Festi, um 5 kílómetra frá meginbyggðinni í Grindavík. 

Þetta er óþægileg tilfærsla en engu að síður hefur myndast óvissum kvikuna þarna undir vegna bruna í erlendu gagnaveri og því alls ekki þar með sagt að kvika komi þarna upp. 

Greint hefur verið frá því að hún sé ekki mikil og því verði það lítið gos sem gæti komið þarna upp. 

Það minnir svolítið á upphaf Kröfluelda, þar sem kom upp lítið hraun en þó í aðeins rúmlega kílómetra fjarlægð frá stöðvarhúsinu, sem stendur enn ásamt öllum megin mannvirjum Kröfluvirkjunar.    

 

Harður jarðskjálfti

Enginn er sterkari en keppinauturinn.

Ofangreind orð eru stundum sögð í sambandi við keppni í ýmsu, svo sem í íþróttum og listum. 

Dæmin eru mýmörg: Alfred Hitchkock fékk ekki Óskarsverðlaun fyrir neina af sínum tímamótamyndum. Hann var svo óheppinn að íburðarmiklar og rándýrar stórmyndir voru keppnautar þau ár sem hann hefði átt skilið að fá verðlaunin alla jafna. 

Hnefaleikararnir sem voru bestir á gullöld þungavigtarinnar í hnefaleikum á áttunda áratugnum  hefðu nokkrir átt það skilið að verða heimsmeistarar ef þeir hefðu ekki verið svo óheppnir að vera að keppa á sama tíma og Muhammad Ali. 

Volkswagen Golf markaði upphaf sérstakrar gerðar og stærðar af bílum, sem síðan varð nafn á bílum í svonefndum Golf-flokki. 

Golf var hins vegar á matslistanum yfir keppinauta um titilinn Bíll ársins í Evrópu þar sem Citroen CX hreppti hnossið.   

Enn fellur Ísland

Birtutíminn klukkustund lengri en næturtíminn. "Vor í lofti."

Þótt jafndægri á vori séu í kringum 20. mars er skilgreindur birtutími, sem sólin er minna en 6 gráður ofan sjóndeildarhrings, orðinn lengri en næturtíminn um 3. mars, og er núna frá ca klukkan sjö á að mð morgni til klukkan átta að kvöldi. 

Það var sólbaðsveður í skjóli í Reykjavík í gær og við sólarupprás núna áðan sindraði sólin á gluggunum í Austurbrúnarblokkunum í vestri. Og gott að frétta af endurbótum á aðgengi á Þingvöllum fyrir þá, sem vilja njóta nýrrar gönguleiðar þar, sem verið er að vinna við.  

                                                                 VOR Í LOFTI.

                                                                (Með sínu lagi,á Spotify)  

Það er vor í lofti og lífið er svo ljúft á þessum degi. 

Eftir vetrardrunga og dimmu hér

ríkir dýrð á láði og legi. 

Eins og hendi veifað nú hvarf á braut 

allt hugarvíl og þreyta. 

Það er vor í lofti, öll linast þraut

og líkn vill sólin oss veita. 

 

Ó, hve sælt um bæinn að leggja leið; 

sjá leik hjá glöðum börnum 

og að hlusta´á fuglanna söngvaseið 

er þeir synda´á lækjum og tjörnum; 

horfa´á pörin una við eyjasund 

og ástarorðin hjala. 

Það er vor í lofti og vonarstund, 

sem vekur sálina´af dvala.  

 

Birtu´á tindana bláminn slær

yfir bröttum, fannhvítum hlíðum. 

Þegar glampar sólin og glóir snær

þá er gott að vera á skíðum. 

 

Þó á almanaki sé okkur tjáð,

að ennþá ríki vetur, 

sólin hefur þegar á hjarnið skráð, 

að senn hafi sumarið betur. 

 

Þegar hátt hún líður um ljómans hvel

hún lofar birtu og hlýju. 

:,: Það er vor í lofti, oss líður vel 

og lífið brosir að nýju.:,: 

 

Ný gönguleið í hjarta þinghelginnar

Enn betra lag hjá Daða en í fyrra?

Daði og Gagnamagnið komust eins langt með lag sitt í fyrra og aðstæður leyfðu, og ævinlega þegar komist er jafn hátt og þá var farið, er erfiðara bæta um betur og koma með er enn betra; leiðinni á toppnum hættir alltaf við að fara aðeins í eina átt; niður. 

Lagið núna sýnist og heyrist vera enn betra en lagið í fyrra, og mikið eyrna- og augnakonfekt; það myndast löngun strax eftir fyrstu spilun til þess að heyra það aftur. 

Á einum stað í laginu er laglínan kannski aðeins of lík smákafla í laginu í fyrra, en auðvitað getur enginn bannað lagahöfundi að leita fanga hjá sjálfum sér. 

Framlag Íslands í Eurovision frumflutt

Fróðlegar umræður á miðlum um það hvernig bílum er lagt. Saga frá Ameríku.

Skrautlegar stöður bíla virðast vera árátta hér á landi. Dæmi um það má sjá á facebook og víðar þar sem myndir eru birtar til skýringar. 

Á einni síðunni sem er helguð rafbílum á Íslandi, birtast áhugaverðar umræður,spurningar og svör um rafbíla, en eftirtektarvert er hve mikið rými frásagnir fá af bílum, sem lagt er þannig að það veldur stórvandræðum fyrir aðra. 

Fjölbreytnin er mikil. Fyrirferðarmestar eru myndir af venjulegum bílum knúnum jarðefnaeldsneyti, sem lagt er stórum stíl í stæði, sem eru við hleðslustaura og því sérstaklega ætluð rafbílum. 

Það yrði ekki vel séð, ef rafbíl yrði lagt þannig við bensíndælu að hún væri ónothæf og rafbílaeigandinn teldi það eðlilegt, jafnvel til langrar dvalar. 

En ekki er síður fróðlegt að sjá myndir og lesa frasagnir af rafbílum, sem hafa verið skildir eftir í hraðhleðslu mörgum klukkustundum saman og jafnvel lungann úr degi til mikilla vandræða fyrir aðra rafbílaeigendur, sem þurfa á hraðhleðslu að halda. 

Minnir á samtal bandarískra lögregluÞjóna við íslenskan ferðamann vestra hér um árið, sem kom á bíl sínum inn á bílastæði við stórmarkað og lagði honum á ská, þannig að hann tók pláss, sem ætlað var tveimur bílum. Þá varð til samtal, nokkurn veginn svona að því er Íslendingurinn sagði síðar frá:  

Þú verður að færa bílinn eins og skot og borga sekt hér á staðnum.  

Já, en það eru engir bílar í þessum stæðum og ég ætla rétt að skreppa inn. 

Þeir, sem koma hingað á meðan þú ert inni vita ekkert um það hvað þú ætlar að vera lengi inni í stórmarkaðnum.

Já, en þeir geta fundið bílastæði annars staðar. 

Þú veist ekkert um hvort þau bílastæði verði laus þá, þótt þau séu kannski laus núna.

Já, en ég kom á undan þeim.  

Það að þú komst á undan þeim gefur þér ekkert leyfi til að brjóta umferðarreglurnar. 

Bíllinn er stopp hérna og er á meðan ekki í umferðinni. 

Heyrðu, væni minn, ákvæði um það, hvernig bílum er lagt, er í umferðarlögunum; hvaðan kemur þú eiginlega?

Ykkur kemur það ekki við hvaðan ég kem. Það er mitt mál. 

Hægan, hægan! Sýndu okkur ökuskírteini þitt! Jahá, þetta er merkilegt, þú kemur frá Íslandi. Stórmerkilegt¨!

Já, við erum með stórkostlega náttúru, eldfjöll og jökla. 

Ég á ekki við það heldur það hvort það sé ekki farið eftir umferðarlögunum hjá ykkur. 

Jú, jú. Svona yfirleitt.

Ytirleitt? Ekki alltaf? Stansið þið ekki á rauðu ljósi?

Jú. 

En leggið svona í bílastæðin. 

Já, ef enginn annar þarf að nota þau í augnablikinu og við erum á undan.  

Stórmerkilegt land. 

Já, með mikil hverasvæði og stórbrotna náttúru.

Ég á ekki við það heldur það hvernig þið umgangist lögin. Nú er nóg komið af þessu rugli og við hringjum á kranabíl og látum fjarlægja bílinn þinn hér með á þinn kostnað. 

Já, en ...

Ekkert já, en, annars verðurðu handjárnaður. 

Þurftu að færa bíl með handafli

Sérkennilegt ástand í kreppu: M.a. "heilsárs jólasveinn."

Það sést vel á nýjustu aðgerðum Bandaríkjamanna til að vinna á móti afleiðingum heimsfaraldurins og svipuðum aðgerðum, sem hér á landi hefur verið beitt, að í notkun er hagfræði, sem átti sér upphaf í kreppunni miklu 1930-1940 og fólst í þeirri kennisetningu, að í góðæri eigi að draga úr opinberum fjárfestingum til að minnka hættu á of mikilli þenslu, en beita hins vegar opinberum fjárfestingum til að minnka áhrif mikils samdráttar á krepputímum. 

Reynslan af þessu eftir bankahrunið 2008 varð sú, að enda þótt farið hefði verið´út í stórfelldar aðgerðir þá, hefði átt að taka miklu hraustlegar til þeirra aðgerða. 

Það hefur nú verið gert bæði vestra og hér vegna heimsfaraldursins og er mörgum um og ó hér á landi vegna þess að ríkið tapar milljarði króna á hverjum degi að jafnaði. 

Þegar um aðgerðir ríkisstjórnar þriggja flokka er að ræða er getur aðstaða ráðherranna verið misjöfn til að fá sem mest af þessum aðgerðum í hlut sinna málaflokka. 

Það er oft tilhneiging til þess að setja mikla fjármuni í svonefndar atvinnuskapandi aðgerðir, sem eru út af fyrir sig eðlilegar vegna þess að ekkert fyrirbæri kreppuástands er eins illvígt og atvinnuleysi. 

Þá eru alls konar verklegar framkvæmdir sem styrkja jafnframt svonefnda innviði oft nærtækar lausnir, svo að jafnvel geti verið um of á kostnað annarra málaflokka. 

Staða Framsóknarflokksins varðandi ráðuneytin er sú, að hann er með marga atvinnuskapandi málaflokka á sínum snærum, og athyglisvert hefur verið hve oft Sigurður Ingi Jóhannsson hefur leikið eins konar heils árs jólasvein í þessum efnum. 

Vegna umtalsins og athyglinnar sem slíkt hefur vakið, allt að því daglega, læðist því sú hugsun að, að það sé ekki tilviljun að uppskeran felist í auknu fylgi í skoðanakönnunum um þessar mundir, hvað sem síðar á eftir að verða.  

Framsókn nær vopnum sínum